Read Библия Церковнославянская Бытїѐ 13 Bible Online

Бытїѐ 13 - Библия Церковнославянская bible

Бытїѐ 13

¹И҆зы́де же а҆вра́мъ ѿ є҆гѵ́пта са́мъ и҆ жена̀ є҆гѡ̀, и҆ всѧ҄, є҆ли҄ка є҆гѡ̀, и҆ лѡ́тъ съ ни́мъ въ пѹсты́ню.

²А҆вра́мъ же бѧ́ше бога́тъ ѕѣлѡ̀ скоты҄ и҆ сребро́мъ и҆ зла́томъ.

³И҆ и҆́де ѿню́дѹже прїи́де, въ пѹсты́ню до веѳи́лѧ, до мѣ́ста, и҆дѣ́же бѣ̀ є҆мѹ̀ кѹ́ща пе́рвѣе, междѹ̀ веѳи́лемъ и҆ междѹ̀ а҆ггѐ,

⁴на мѣ́сто же́ртвенника, и҆дѣ́же сотворѝ є҆го̀ пе́рвѣе: и҆ призва̀ та́мѡ а҆вра́мъ и҆́мѧ гдⷭне.

⁵И҆ лѡ́тѹ ходѧ́щѹ со а҆вра́момъ бѧ́хѹ ѻ҆́вцы, и҆ волы̀, и҆ кѹ́щы.

⁶И҆ не вмѣща́ше и҆̀хъ землѧ̀ жи́ти вкѹ́пѣ, ѩ҆́кѡ и҆мѣ҄нїѧ и҆́хъ бѧ́хѹ мнѡ́га: и҆ не можа́хѹ жи́ти вкѹ́пѣ.

⁷И҆ бы́сть ра́спрѧ междѹ̀ пастѹхи҄ скота̀ а҆вра́млѧ и҆ междѹ̀ пастѹхи҄ скота̀ лѡ́това: ханане́є же и҆ ферезе́є тогда̀ живѧ́хѹ на землѝ (то́й).

⁸Рече́ же а҆вра́мъ лѡ́тѹ: да не бѹ́детъ ра́спрѧ междѹ̀ мно́ю и҆ тобо́ю, и҆ междѹ̀ пастѹхи҄ твои́ми и҆ междѹ̀ пастѹхи҄ мои́ми, ѩ҆́кѡ человѣ́цы бра́тїѧ мы̀ є҆смы̀:

⁹не се́ ли всѧ̀ землѧ̀ пред̾ тобо́ю є҆́сть; Ѿлѹчи́сѧ ты̀ ѿ менє̀: а҆́ще ты̀ на лѣ́во, а҆́зъ на де́сно: а҆́ще же ты̀ на де́сно, а҆́зъ на лѣ́во.

¹⁰И҆ возве́дъ лѡ́тъ ѻ҆́чи своѝ, ви́дѣ всю̀ ѡ҆кре́стнѹю странѹ̀ ї҆ѻрда́нскѹю, ѩ҆́кѡ всѧ̀ напаѧ́ема бѧ́ше водо́ю, пре́жде не́же низврати́ти бг҃ѹ содо́мъ и҆ гомо́рръ, ѩ҆́кѡ ра́й бж҃їй, и҆ ѩ҆́кѡ землѧ̀ є҆гѵ́петска, да́же прїитѝ до зого́ра:

¹¹и҆ и҆збра̀ себѣ̀ лѡ́тъ всю̀ ѡ҆кре́стнѹю странѹ̀ ї҆ѻрда́нскѹю, и҆ ѿи́де лѡ́тъ ѿ восто́ка: и҆ разлѹчи́стасѧ кі́йждо ѿ бра́та своегѡ̀.

¹²А҆вра́мъ же всели́сѧ въ землѝ ханаа́нстѣй, лѡ́тъ же всели́сѧ во гра́дѣ ѡ҆кре́стныхъ стра́нъ и҆ всели́сѧ въ содо́мѣ.

¹³Человѣ́цы же сѹ́щїи въ содо́мѣ ѕлѝ и҆ грѣ́шни пред̾ бг҃омъ ѕѣлѡ̀.

¹⁴Бг҃ъ же речѐ а҆вра́мѹ, повнегда̀ разлѹчи́тисѧ лѡ́тѹ ѿ негѡ̀: воззрѝ ѻ҆чи́ма твои́ма и҆ ви́ждь ѿ мѣ́ста, и҆дѣ́же ты̀ нн҃ѣ є҆сѝ, къ сѣ́верѹ, и҆ лі́вѣ {ю҆́гѹ}, и҆ къ восто́кѹ, и҆ мо́рю:

¹⁵ѩ҆́кѡ всю̀ зе́млю, ю҆́же ты̀ ви́диши, тебѣ̀ да́мъ ю҆̀ и҆ сѣ́мени твоемѹ̀ во вѣ́ки,

¹⁶и҆ сотворю̀ сѣ́мѧ твоѐ, ѩ҆́кѡ песо́къ земны́й: а҆́ще кто̀ мо́жетъ и҆счестѝ песо́къ земны́й, то̀ и҆ сѣ́мѧ твоѐ и҆зочте́тъ:

¹⁷воста́въ проидѝ зе́млю въ долготѹ̀ є҆ѧ̀ и҆ въ широтѹ̀: ѩ҆́кѡ тебѣ̀ да́мъ ю҆̀ и҆ сѣ́мени твоемѹ̀ во вѣ́къ.

¹⁸И҆ ѿсели́всѧ а҆вра́мъ, прише́дъ всели́сѧ ѹ҆ дѹ́ба мамврі́йскагѡ, и҆́же бѧ́ше въ хеврѡ́нѣ: и҆ созда̀ тѹ̀ же́ртвенникъ гдⷭѹ.