Read Библия Церковнославянская Бытїѐ 15 Bible Online

Бытїѐ 15 - Библия Церковнославянская bible

Бытїѐ 15

¹По глаго́лѣхъ же си́хъ, бы́сть сло́во гдⷭне ко а҆вра́мѹ въ видѣ́нїи но́щїю, гл҃ѧ: не бо́йсѧ, а҆вра́ме: а҆́зъ защища́ю тѧ̀, мзда̀ твоѧ̀ мно́га бѹ́детъ ѕѣлѡ̀.

²Глаго́ла же а҆вра́мъ: влдко гдⷭи, что́ ми да́си; а҆́зъ же ѿпѹща́юсѧ безча́денъ: сы́нъ же масе́къ домоча́дицы моеѧ̀, се́й дама́скъ є҆лїе́зеръ.

³И҆ речѐ а҆вра́мъ: поне́же мнѣ̀ не да́лъ є҆сѝ сѣ́мене, домоча́децъ же мо́й наслѣ́дникъ мо́й бѹ́детъ.

⁴И҆ а҆́бїе гла́съ гдⷭень бы́сть къ немѹ̀, гл҃ющїй: не бѹ́детъ се́й наслѣ́дникъ тво́й, но и҆́же и҆зы́детъ и҆з̾ тебє̀, то́й бѹ́детъ наслѣ́дникъ тебѣ̀.

⁵И҆зведе́ же є҆го̀ во́нъ и҆ речѐ є҆мѹ̀: воззрѝ на не́бо и҆ и҆зочтѝ ѕвѣ́зды, а҆́ще возмо́жеши и҆счестѝ ѧ҆̀. И҆ речѐ: та́кѡ бѹ́детъ сѣ́мѧ твоѐ.

⁶И҆ вѣ́рова а҆вра́мъ бг҃ѹ, и҆ вмѣни́сѧ є҆мѹ̀ въ пра́вдѹ.

⁷Рече́ же къ немѹ̀: а҆́зъ (є҆́смь) бг҃ъ и҆зведы́й тѧ̀ ѿ страны̀ халде́йскїѧ, ѩ҆́кѡ да́ти тебѣ̀ зе́млю сїю̀ наслѣ́дствовати.

⁸И҆ речѐ: влдко гдⷭи, по чесомѹ̀ ѹ҆разѹмѣ́ю, ѩ҆́кѡ наслѣ́дити ю҆̀ и҆́мамъ;

⁹Рече́ же къ немѹ̀: возмѝ мнѣ̀ ю҆́ницѹ трилѣ́тнѹ и҆ ко́зѹ трилѣ́тнѹ и҆ ѻ҆вна̀ трилѣ́тна, и҆ го́рлицѹ и҆ го́лѹбѧ.

¹⁰Взѧ́ же ѻ҆́нъ всѧ҄ сїѧ҄ и҆ раздѣлѝ ѧ҆̀ на по́лы, и҆ положѝ ѧ҆̀ противоли҄чна є҆ди́на ко дрѹго́мѹ: пти́цъ же не раздѣлѝ.

¹¹Слетѣ́ша же пти҄цы на тѣлеса̀ растє́санаѧ и҆́хъ: и҆ сѣ́де бли́зѹ и҆́хъ а҆вра́мъ.

¹²Заходѧ́щѹ же со́лнцѹ, ѹ҆́жасъ нападѐ на а҆вра́ма, и҆ сѐ, стра́хъ те́менъ ве́лїй нападѐ на́нь.

¹³И҆ рече́но бы́сть ко а҆вра́мѹ: вѣ́дый ѹ҆вѣ́си, ѩ҆́кѡ пресе́лно бѹ́детъ сѣ́мѧ твоѐ въ землѝ не свое́й, и҆ порабо́тѧтъ ѧ҆̀, и҆ ѡ҆ѕло́бѧтъ ѧ҆̀, и҆ смирѧ́тъ ѧ҆̀ лѣ́тъ четы́риста:

¹⁴ѩ҆зы́кѹ же, є҆мѹ́же порабо́таютъ, сѹждѹ̀ а҆́зъ: по си́хъ же и҆зы́дѹтъ сѣ́мѡ со и҆мѣ́нїемъ мно́гимъ:

¹⁵ты́ же ѿи́деши ко ѻ҆тцє́мъ твои҄мъ въ ми́рѣ, препита́нъ въ ста́рости до́брѣй:

¹⁶въ четве́ртѣмъ же ро́дѣ возвратѧ́тсѧ сѣ́мѡ: не бо̀ и҆спо́лнишасѧ грѣсѝ а҆морре́ѡвъ до нн҃ѣ.

¹⁷Є҆гда́ же бы́сть со́лнце на за́падѣ, пла́мень бы́сть: и҆ сѐ, пе́щь дымѧ́щисѧ, и҆ свѣщы̀ ѻ҆́гнєнны, ѩ҆̀же проидо́ша междѹ̀ растеса҄нїи си́ми.

¹⁸Въ де́нь то́й завѣща̀ гдⷭь а҆вра́мѹ завѣ́тъ, гл҃ѧ: сѣ́мени твоемѹ̀ да́мъ зе́млю сїю̀ ѿ рѣкѝ є҆гѵ́петскїѧ да́же до рѣкѝ вели́кїѧ є҆ѵфра́та:

¹⁹кене́ѡвъ и҆ кенезе́ѡвъ и҆ кедмѡне́ѡвъ,

²⁰и҆ хетте́ѡвъ и҆ ферезе́ѡвъ и҆ рафаі́нѡвъ,

²¹и҆ а҆морре́ѡвъ и҆ ханане́ѡвъ, и҆ є҆ве́ѡвъ и҆ гергесе́ѡвъ и҆ ї҆евѹсе́ѡвъ.