Read Библия Церковнославянская Бытїѐ 16 Bible Online

Бытїѐ 16 - Библия Церковнославянская bible

Бытїѐ 16

¹Са́ра же жена̀ а҆вра́млѧ не ражда́ше є҆мѹ̀: бѧ́ше же є҆́й раба̀ є҆гѵ́птѧнынѧ, є҆́йже и҆́мѧ а҆́гарь.

²Рече́ же са́ра ко а҆вра́мѹ: сѐ, заключи́ мѧ гдⷭь, є҆́же не ражда́ти: вни́ди ѹ҆̀бо къ рабѣ̀ мое́й, да ча҄да сотворю̀ ѿ неѧ̀. Послѹ́ша же а҆вра́мъ гла́са са́рина.

³И҆ пои́мши са́ра жена̀ а҆вра́млѧ а҆́гарь є҆гѵ́птѧныню рабѹ̀ свою̀, по десѧтѝ лѣ́тѣхъ вселе́нїѧ а҆вра́млѧ въ землѝ ханаа́ни, дадѐ ю҆̀ въ женѹ̀ а҆вра́мѹ мѹ́жѹ своемѹ̀.

⁴И҆ вни́де ко а҆́гари, и҆ зача́тъ: и҆ ви́дѣ, ѩ҆́кѡ во чре́вѣ и҆́мать, и҆ ѹ҆коре́на бы́сть госпожа̀ (є҆ѧ̀) пред̾ не́ю.

⁵И҆ речѐ са́ра ко а҆вра́мѹ: ѡ҆би́да мѝ ѿ тебє̀: а҆́зъ да́хъ рабѹ̀ мою̀ въ нѣ́дро твоѐ: ѻ҆на́ же ви́дѣвши, ѩ҆́кѡ во чре́вѣ и҆́мать, ѹ҆коре́на бы́хъ пред̾ не́ю: сѹдѝ бг҃ъ междѹ̀ мно́ю и҆ тобо́ю.

⁶Рече́ же а҆вра́мъ къ са́рѣ: сѐ, раба̀ твоѧ̀ въ рѹкѹ̀ твоє́ю: творѝ є҆́й, ѩ҆́коже тѝ є҆́сть ѹ҆го́дно. И҆ ѡ҆ѕло́би ю҆̀ са́ра: и҆ ѿбѣжѐ ѿ лица̀ є҆ѧ̀.

⁷И҆ ѡ҆брѣ́те ю҆̀ а҆́гг҃лъ гдⷭень ѹ҆ и҆сто́чника воды̀ въ пѹсты́ни, ѹ҆ и҆сто́чника на пѹтѝ сѹ́ръ.

⁸И҆ речѐ є҆́й а҆́гг҃лъ гдⷭень: а҆́гарь, рабо̀ са́рина, ѿкѹ́дѹ и҆́деши и҆ ка́мѡ грѧде́ши; И҆ речѐ: ѿ лица̀ са́ры госпожѝ моеѧ̀ а҆́зъ бѣгѹ̀.

⁹Рече́ же є҆́й а҆́гг҃лъ гдⷭень: возврати́сѧ къ госпожѣ̀ свое́й и҆ покори́сѧ под̾ рѹкѹ̀ є҆ѧ̀.

¹⁰И҆ речѐ є҆́й а҆́гг҃лъ гдⷭень: ѹ҆множа́ѧ ѹ҆мно́жѹ сѣ́мѧ твоѐ, и҆ не сочте́тсѧ ѿ мно́жества.

¹¹И҆ речѐ є҆́й а҆́гг҃лъ гдⷭень: сѐ, ты̀ во чре́вѣ и҆́маши и҆ роди́ши сы́на, и҆ нарече́ши и҆́мѧ є҆мѹ̀ ї҆сма́илъ: ѩ҆́кѡ ѹ҆слы́ша гдⷭь смире́нїе твоѐ:

¹²се́й бѹ́детъ се́лный человѣ́къ: рѹ́цѣ є҆гѡ̀ на всѣ́хъ, и҆ рѹ́ки всѣ́хъ на него̀, и҆ пред̾ лице́мъ всеѧ̀ бра́тїи своеѧ̀ всели́тсѧ.

¹³И҆ призва̀ а҆́гарь и҆́мѧ гдⷭа гл҃ющагѡ къ не́й: ты̀ бг҃ъ призрѣ́вый на мѧ̀: ѩ҆́кѡ речѐ: и҆́бо предо мно́ю ви́дѣхъ ѩ҆́вльшагосѧ мнѣ̀.

¹⁴Сегѡ̀ ра́ди прозва̀ кла́дѧзь то́й: кла́дѧзь, и҆дѣ́же предо мно́ю ви́дѣхъ: сѐ междѹ̀ ка́дисомъ и҆ междѹ̀ вара́домъ.

¹⁵И҆ родѝ а҆́гарь а҆вра́мѹ сы́на, и҆ наречѐ а҆вра́мъ и҆́мѧ сы́нѹ своемѹ̀, є҆го́же родѝ є҆мѹ̀ а҆́гарь, ї҆сма́илъ.

¹⁶А҆вра́мъ же бѣ̀ лѣ́тъ ѻ҆сми́десѧти шестѝ, є҆гда̀ родѝ а҆́гарь а҆вра́мѹ ї҆сма́ила.