Read Библия Церковнославянская Бытїѐ 17 Bible Online

Бытїѐ 17 - Библия Церковнославянская bible

Бытїѐ 17

¹Бы́сть же а҆вра́мѹ лѣ́тъ де́вѧтьдесѧтъ де́вѧть: и҆ ѩ҆ви́сѧ гдⷭь а҆вра́мѹ и҆ речѐ є҆мѹ̀: а҆́зъ є҆́смь бг҃ъ тво́й, благоѹгожда́й предо мно́ю и҆ бѹ́ди непоро́ченъ:

²и҆ положѹ̀ завѣ́тъ мо́й междѹ̀ мно́ю и҆ междѹ̀ тобо́ю: и҆ ѹ҆мно́жѹ тѧ̀ ѕѣлѡ̀.

³И҆ падѐ а҆вра́мъ на лицы̀ свое́мъ, и҆ речѐ є҆мѹ̀ бг҃ъ, гл҃ѧ:

⁴и҆ а҆́зъ сѐ, завѣ́тъ мо́й съ тобо́ю, и҆ бѹ́деши ѻ҆те́цъ мно́жества ѩ҆зы́кѡвъ:

⁵и҆ не нарече́тсѧ ктомѹ̀ и҆́мѧ твоѐ а҆вра́мъ, но бѹ́детъ и҆́мѧ твоѐ а҆враа́мъ: ѩ҆́кѡ ѻ҆тца̀ мно́гихъ ѩ҆зы́кѡвъ положи́хъ тѧ̀:

⁶и҆ возращѹ́ тѧ ѕѣлѡ̀ ѕѣлѡ̀, и҆ положѹ́ тѧ въ наро́ды, и҆ ца́рїе и҆з̾ тебє̀ и҆зы́дѹтъ:

⁷и҆ поста́влю завѣ́тъ мо́й междѹ̀ мно́ю и҆ междѹ̀ тобо́ю, и҆ междѹ̀ сѣ́менемъ твои́мъ по тебѣ̀ въ ро́ды и҆́хъ, въ завѣ́тъ вѣ́ченъ, да бѹ́дѹ тебѣ̀ бг҃ъ и҆ сѣ́мени твоемѹ̀ по тебѣ̀:

⁸и҆ да́мъ тебѣ̀ и҆ сѣ́мени твоемѹ̀ по тебѣ̀ зе́млю, въ не́йже ѡ҆бита́еши, всю̀ зе́млю ханаа́ню во ѡ҆держа́нїе вѣ́чное, и҆ бѹ́дѹ и҆̀мъ бг҃ъ.

⁹И҆ речѐ бг҃ъ ко а҆враа́мѹ: ты́ же завѣ́тъ мо́й соблюде́ши, ты̀ и҆ сѣ́мѧ твоѐ по тебѣ̀ въ ро́ды и҆́хъ.

¹⁰И҆ се́й завѣ́тъ, є҆го́же соблюде́ши междѹ̀ мно́ю и҆ ва́ми, и҆ междѹ̀ сѣ́менемъ твои́мъ по тебѣ̀ въ ро́ды и҆́хъ: ѡ҆брѣ́жетсѧ ѿ ва́съ всѧ́къ мѹ́жескъ по́лъ,

¹¹и҆ ѡ҆брѣ́жете пло́ть кра́йнюю ва́шѹ, и҆ бѹ́детъ въ зна́менїе завѣ́та междѹ̀ мно́ю и҆ ва́ми.

¹²И҆ младе́нецъ ѻ҆смѝ дні́й ѡ҆брѣ́жетсѧ ва́мъ, всѧ́къ мѹ́жескїй по́лъ въ родѣ́хъ ва́шихъ: и҆ домоча́децъ, и҆ кѹ́пленый ѿ всѧ́кагѡ сы́на чѹжда́гѡ, и҆́же нѣ́сть ѿ сѣ́мене твоегѡ̀: ѡ҆брѣ́занїемъ ѡ҆брѣ́жетсѧ домоча́децъ до́мѹ твоегѡ̀ и҆ кѹ́пленый.

¹³И҆ бѹ́детъ завѣ́тъ мо́й на пло́ти ва́шей въ завѣ́тъ вѣ́ченъ.

¹⁴Неѡбрѣ́заный же мѹ́жескїй по́лъ, и҆́же не ѡ҆брѣ́жетъ пло́ти кра́йнїѧ своеѧ̀ въ де́нь ѻ҆смы́й, погѹби́тсѧ дѹша̀ та̀ ѿ ро́да своегѡ̀: ѩ҆́кѡ завѣ́тъ мо́й разорѝ.

¹⁵И҆ речѐ бг҃ъ а҆враа́мѹ: са́ра жена̀ твоѧ̀ не нарече́тсѧ и҆́мѧ є҆ѧ̀ са́ра, но са́рра бѹ́детъ и҆́мѧ є҆́й:

¹⁶блгⷭвлю́ же ю҆̀ и҆ да́мъ тебѣ̀ ѿ неѧ̀ ча́до: и҆ блгⷭвлю̀ є҆̀, и҆ бѹ́детъ въ ѩ҆зы́ки, и҆ ца́рїе ѩ҆зы́кѡвъ и҆з̾ негѡ̀ бѹ́дѹтъ.

¹⁷И҆ падѐ а҆враа́мъ на лицѐ своѐ, и҆ посмѣѧ́сѧ, и҆ речѐ въ мы́сли свое́й, глаго́лѧ: є҆да̀ столѣ́тномѹ (мѹ́жѹ) роди́тсѧ сы́нъ; є҆да̀ и҆ са́рра девѧти́десѧти лѣ́тъ (сѹ́щи) роди́тъ;

¹⁸Рече́ же а҆враа́мъ къ бг҃ѹ: ї҆сма́илъ се́й да живе́тъ пред̾ тобо́ю.

¹⁹Рече́ же бг҃ъ ко а҆враа́мѹ: вои́стиннѹ, сѐ, са́рра жена̀ твоѧ̀ роди́тъ тебѣ̀ сы́на, и҆ нарече́ши и҆́мѧ є҆мѹ̀ ї҆саа́къ: и҆ поста́влю завѣ́тъ мо́й съ ни́мъ въ завѣ́тъ вѣ́ченъ, да бѹ́дѹ є҆мѹ̀ въ бг҃а и҆ сѣ́мени є҆гѡ̀ по не́мъ.

²⁰Ѡ҆ ї҆сма́илѣ же сѐ послѹ́шахъ тебѐ: и҆ сѐ блгⷭви́хъ є҆го̀, и҆ возращѹ̀ є҆го̀, и҆ ѹ҆мно́жѹ є҆го̀ ѕѣлѡ̀: двана́десѧть ѩ҆зы́ки роди́тъ: и҆ да́мъ є҆го̀ въ ѩ҆зы́къ ве́лїй.

²¹Завѣ́тъ же мо́й поста́влю со ї҆саа́комъ, є҆го́же роди́тъ тебѣ̀ са́рра, во вре́мѧ сїѐ, въ лѣ́то второ́е.

²²Сконча́ же (бг҃ъ) гл҃ѧ къ немѹ̀, и҆ взы́де бг҃ъ ѿ а҆враа́ма.

²³И҆ поѧ̀ а҆враа́мъ ї҆сма́ила сы́на своего̀, и҆ всѧ҄ домоча́дцы своѧ҄ и҆ всѧ҄ кѹ́плєныѧ, и҆ ве́сь мѹ́жескъ по́лъ мѹже́й, и҆̀же въ домѹ̀ а҆враа́мли, и҆ ѡ҆брѣ́за пло́ть кра́йнюю и҆́хъ во вре́мѧ днѐ тогѡ̀, ѩ҆́коже гл҃а є҆мѹ̀ бг҃ъ.

²⁴А҆враа́мъ же девѧти́десѧти девѧтѝ лѣ́тъ бѧ́ше, є҆гда̀ ѡ҆брѣ́за пло́ть кра́йнюю свою̀.

²⁵Ї҆сма́илъ же сы́нъ є҆гѡ̀ бѧ́ше лѣ́тъ трехна́десѧти, є҆гда̀ ѡ҆брѣ́за пло́ть кра́йнюю свою̀.

²⁶Во вре́мѧ (же) днѐ ѻ҆́нагѡ ѡ҆брѣ́засѧ а҆враа́мъ и҆ ї҆сма́илъ сы́нъ є҆гѡ̀,

²⁷и҆ всѝ мѹ́жїе до́мѹ є҆гѡ̀, и҆ домоча́дцы (є҆гѡ̀) и҆ кѹ́пленїи ѿ и҆норо́дныхъ ѩ҆зы́кѡвъ, и҆ ѡ҆брѣ́за ѧ҆̀.