Read Библия Церковнославянская Бытїѐ 2 Bible Online

Бытїѐ 2 - Библия Церковнославянская bible

Бытїѐ 2

¹И҆ соверши́шасѧ не́бо и҆ землѧ̀, и҆ всѐ ѹ҆краше́нїе и҆́хъ.

²И҆ совершѝ бг҃ъ въ де́нь шесты́й дѣла̀ своѧ҄, ѩ҆̀же сотворѝ: и҆ почѝ въ де́нь седмы́й ѿ всѣ́хъ дѣ́лъ свои́хъ, ѩ҆̀же сотворѝ.

³И҆ блгⷭвѝ бг҃ъ де́нь седмы́й, и҆ ѡ҆ст҃ѝ є҆го̀: ѩ҆́кѡ въ то́й почѝ ѿ всѣ́хъ дѣ́лъ свои́хъ, ѩ҆̀же нача́тъ бг҃ъ твори́ти.

⁴Сїѧ̀ кни́га бытїѧ̀ небесѐ и҆ землѝ, є҆гда̀ бы́сть, въ ѻ҆́ньже де́нь сотворѝ гдⷭь бг҃ъ не́бо и҆ зе́млю,

⁵и҆ всѧ́кїй ѕла́къ се́лный, пре́жде да́же бы́ти на землѝ, и҆ всѧ́кѹю травѹ̀ се́лнѹю, пре́жде да́же прозѧ́бнѹти: не бо̀ ѡ҆дождѝ гдⷭь бг҃ъ на зе́млю, и҆ человѣ́къ не бѧ́ше дѣ́лати ю҆̀:

⁶и҆сто́чникъ же и҆схожда́ше и҆з̾ землѝ и҆ напаѧ́ше всѐ лицѐ землѝ.

⁷И҆ созда̀ бг҃ъ человѣ́ка, пе́рсть (взе́мъ) ѿ землѝ, и҆ вдѹ́нѹ въ лицѐ є҆гѡ̀ дыха́нїе жи́зни: и҆ бы́сть человѣ́къ въ дѹ́шѹ жи́вѹ.

⁸И҆ насадѝ гдⷭь бг҃ъ ра́й во є҆де́мѣ на восто́цѣхъ, и҆ введѐ та́мѡ человѣ́ка, є҆го́же созда̀.

⁹И҆ прозѧбѐ бг҃ъ є҆щѐ ѿ землѝ всѧ́кое дре́во кра́сное въ видѣ́нїе и҆ до́брое въ снѣ́дь: и҆ дре́во жи́зни посредѣ̀ раѧ̀, и҆ дре́во є҆́же вѣ́дѣти разѹмѣ́телное до́брагѡ и҆ лѹка́вагѡ.

¹⁰Рѣка́ же и҆схо́дитъ и҆з̾ є҆де́ма напаѧ́ти ра́й: ѿтѹ́дѹ разлѹча́етсѧ въ четы́ри нача҄ла.

¹¹И҆́мѧ є҆ди́нѣй фїсѡ́нъ: сїѧ̀ ѡ҆крѹжа́ющаѧ всю̀ зе́млю є҆ѵїла́тскѹю: та́мѡ ѹ҆́бѡ є҆́сть зла́то.

¹²Зла́то же ѻ҆́ныѧ землѝ до́брое: и҆ та́мѡ є҆́сть а҆́нѳраѯъ и҆ ка́мень зеле́ный.

¹³И҆ и҆́мѧ рѣцѣ̀ вторѣ́й геѡ́нъ: сїѧ̀ ѡ҆крѹжа́ющаѧ всю̀ зе́млю є҆ѳїо́пскѹю.

¹⁴И҆ рѣка̀ тре́тїѧ ті́гръ: сїѧ̀ проходѧ́щаѧ прѧ́мѡ а҆ссѷрі́ѡмъ. Рѣка́ же четве́ртаѧ є҆ѵфра́тъ.

¹⁵И҆ взѧ̀ гдⷭь бг҃ъ человѣ́ка, є҆го́же созда̀, и҆ введѐ є҆го̀ въ ра́й сла́дости, дѣ́лати є҆го̀ и҆ храни́ти.

¹⁶И҆ заповѣ́да гдⷭь бг҃ъ а҆да́мѹ, гл҃ѧ: ѿ всѧ́кагѡ дре́ва, є҆́же въ раѝ, снѣ́дїю снѣ́си:

¹⁷ѿ дре́ва же, є҆́же разѹмѣ́ти до́брое и҆ лѹка́вое, не снѣ́сте ѿ негѡ̀: а҆ въ ѻ҆́ньже а҆́ще де́нь снѣ́сте ѿ негѡ̀, сме́ртїю ѹ҆́мрете.

¹⁸И҆ речѐ гдⷭь бг҃ъ: не добро̀ бы́ти человѣ́кѹ є҆ди́номѹ: сотвори́мъ є҆мѹ̀ помо́щника по немѹ̀.

¹⁹И҆ созда̀ бг҃ъ є҆щѐ ѿ землѝ всѧ҄ ѕвѣ҄ри сє́лныѧ и҆ всѧ҄ пти҄цы небє́сныѧ, и҆ приведѐ ѧ҆̀ ко а҆да́мѹ ви́дѣти, что̀ нарече́тъ ѧ҆̀: и҆ всѧ́ко є҆́же а҆́ще наречѐ а҆да́мъ дѹ́шѹ жи́вѹ, сїѐ и҆́мѧ є҆мѹ̀.

²⁰И҆ наречѐ а҆да́мъ и҆мена̀ всѣ҄мъ скотѡ́мъ, и҆ всѣ҄мъ пти́цамъ небє́снымъ, и҆ всѣ҄мъ ѕвѣрє́мъ зємны́мъ. А҆да́мѹ же не ѡ҆брѣ́тесѧ помо́щникъ подо́бный є҆мѹ̀.

²¹И҆ наложѝ бг҃ъ и҆зстѹпле́нїе на а҆да́ма, и҆ ѹ҆́спе: и҆ взѧ̀ є҆ди́но ѿ ре́бръ є҆гѡ̀, и҆ и҆спо́лни пло́тїю вмѣ́стѡ є҆гѡ̀.

²²И҆ созда̀ гдⷭь бг҃ъ ребро̀, є҆́же взѧ̀ ѿ а҆да́ма, въ женѹ̀, и҆ приведѐ ю҆̀ ко а҆да́мѹ.

²³И҆ речѐ а҆да́мъ: сѐ, нн҃ѣ ко́сть ѿ косте́й мои́хъ и҆ пло́ть ѿ пло́ти моеѧ̀: сїѧ̀ нарече́тсѧ [жена̀], ѩ҆́кѡ ѿ мѹ́жа своегѡ̀ взѧта̀ бы́сть сїѧ̀.

²⁴Сегѡ̀ ра́ди ѡ҆ста́витъ человѣ́къ ѻ҆тца̀ своего̀ и҆ ма́терь и҆ прилѣпи́тсѧ къ женѣ̀ свое́й, и҆ бѹ́дета два̀ въ пло́ть є҆ди́нѹ.

²⁵И҆ бѣ́ста ѻ҆́ба на҄га, а҆да́мъ же и҆ жена̀ є҆гѡ̀, и҆ не стыдѧ́стасѧ.