Read Библия Церковнославянская Бытїѐ 20 Bible Online

Бытїѐ 20 - Библия Церковнославянская bible

Бытїѐ 20

¹И҆ по́йде ѿтѹ́дѹ а҆враа́мъ на зе́млю полѹ́деннѹю и҆ всели́сѧ междѹ̀ ка́дисомъ и҆ междѹ̀ сѹ́ромъ: и҆ ѡ҆бита̀ въ гера́рѣхъ.

²Рече́ же а҆враа́мъ ѡ҆ са́ррѣ женѣ̀ свое́й, ѩ҆́кѡ сестра́ ми є҆́сть: ѹ҆боѧ́сѧ бо рещѝ, ѩ҆́кѡ жена́ ми є҆́сть, да не когда̀ ѹ҆бїю́тъ є҆го̀ мѹ́жїе гра́дстїи є҆ѧ̀ ра́ди. Посла́ же а҆вїмеле́хъ ца́рь гера́рскїй и҆ взѧ̀ са́ррѹ.

³И҆ прїи́де бг҃ъ ко а҆вїмеле́хѹ но́щїю во снѣ̀ и҆ речѐ є҆мѹ̀: сѐ, ты̀ ѹ҆мира́еши жены̀ ра́ди сеѧ̀, ю҆́же поѧ́лъ є҆сѝ: сїѧ́ же є҆́сть сожи́телствѹющаѧ мѹ́жѹ.

⁴А҆вїмеле́хъ же не прикоснѹ́сѧ є҆́й и҆ речѐ: гдⷭи, ѩ҆зы́къ невѣ́дѹщїй и҆ првднъ погѹби́ши ли;

⁵не са́мъ ли мѝ речѐ: сестра́ ми є҆́сть; и҆ сїѧ́ ми речѐ: бра́тъ мѝ є҆́сть; чи́стымъ се́рдцемъ и҆ въ пра́вдѣ рѹ́къ сотвори́хъ сїѐ.

⁶Рече́ же є҆мѹ̀ бг҃ъ во снѣ̀: и҆ а҆́зъ позна́хъ, ѩ҆́кѡ чи́стымъ се́рдцемъ сотвори́лъ є҆сѝ сїѐ, и҆ пощадѣ́хъ тѧ̀, да не согрѣши́ши ко мнѣ̀: сегѡ̀ ра́ди не попѹсти́хъ тѝ коснѹ́тисѧ є҆ѧ̀:

⁷нн҃ѣ же ѿда́ждь женѹ̀ мѹ́жѹ, ѩ҆́кѡ про҇ро́къ є҆́сть, и҆ помо́литсѧ ѡ҆ тебѣ̀, и҆ жи́въ бѹ́деши: а҆́ще же не ѿда́си, вѣ́ждь, ѩ҆́кѡ ѹ҆́мреши ты̀ и҆ всѧ҄ твоѧ҄.

⁸И҆ воста̀ ра́нѡ а҆вїмеле́хъ, и҆ призва̀ всѧ҄ ѻ҆́троки своѧ҄, и҆ глаго́ла словеса̀ сїѧ҄ всѧ҄ во ѹ҆́шы и҆́хъ: ѹ҆боѧ́шасѧ же всѝ человѣ́цы ѕѣлѡ̀.

⁹И҆ призва̀ а҆вїмеле́хъ а҆враа́ма и҆ речѐ є҆мѹ̀: что̀ сїѐ сотвори́лъ є҆сѝ на́мъ; є҆да̀ что̀ согрѣши́хомъ тебѣ̀, ѩ҆́кѡ наве́лъ є҆сѝ на мѧ̀ и҆ на ца́рство моѐ грѣ́хъ вели́къ; дѣ́ло, є҆́же никто́же сотворѝ, сотвори́лъ є҆сѝ мнѣ̀.

¹⁰И҆ речѐ а҆вїмеле́хъ а҆враа́мѹ: что̀ ѹ҆мы́сливъ, сотвори́лъ є҆сѝ сїѐ;

¹¹Рече́ же а҆враа́мъ: реко́хъ бо: не́гли нѣ́сть бл҃гочⷭтїѧ на мѣ́стѣ се́мъ: и҆ ѹ҆бїю́тъ мѧ̀ жены̀ ра́ди моеѧ̀:

¹²и҆́бо и҆́стиннѡ сестра́ ми є҆́сть по ѻ҆тцѹ̀, а҆ не по ма́тери: бы́сть же мѝ въ женѹ̀:

¹³и҆ бы́сть є҆гда̀ и҆зведе́ мѧ бг҃ъ ѿ до́мѹ ѻ҆тца̀ моегѡ̀, и҆ рѣ́хъ є҆́й: пра́вдѹ сїю̀ сотвори́ши мѝ: во всѧ́ко мѣ́сто, и҆дѣ́же а҆́ще прїи́демъ, та́мѡ рцы̀ ѡ҆ мнѣ̀, ѩ҆́кѡ бра́тъ мѝ є҆́сть.

¹⁴Взѧ́ же а҆вїмеле́хъ ты́сѧщѹ дїдра́хмъ (сребра̀), и҆ ѻ҆́вцы, и҆ телцы̀, и҆ рабы҄, и҆ рабы҄ни, и҆ дадѐ а҆враа́мѹ: и҆ ѿдадѐ є҆мѹ̀ са́ррѹ женѹ̀ є҆гѡ̀.

¹⁵И҆ речѐ а҆вїмеле́хъ а҆враа́мѹ: сѐ, землѧ̀ моѧ̀ пред̾ тобо́ю: и҆дѣ́же а҆́ще тебѣ̀ ѹ҆го́дно є҆́сть, всели́сѧ.

¹⁶Са́ррѣ же речѐ: сѐ, да́хъ ты́сѧщѹ дїдра́хмъ бра́тѹ твоемѹ̀: сїѧ҄ бѹ́дѹтъ тебѣ̀ въ че́сть лица̀ твоегѡ̀, и҆ всѣ҄мъ, ѩ҆̀же сѹ́ть съ тобо́ю, и҆ во все́мъ и҆́стинствѹй.

¹⁷Помоли́сѧ же а҆враа́мъ бг҃ѹ, и҆ и҆сцѣлѝ бг҃ъ а҆вїмеле́ха и҆ женѹ̀ є҆гѡ̀ и҆ рабы҄ни є҆гѡ̀, и҆ нача́ша ражда́ти:

¹⁸ѩ҆́кѡ заключа́ѧ заключѝ гдⷭь ѿ внѣѹ́дѹ всѧ҄ка ложесна̀ въ домѹ̀ а҆вїмеле́ха, са́рры ра́ди жены̀ а҆враа́мли.