Read Библия Церковнославянская Бытїѐ 24 Bible Online

Бытїѐ 24 - Библия Церковнославянская bible

Бытїѐ 24

¹А҆враа́мъ же бѧ́ше ста́ръ, заматерѣ́вшїй во дне́хъ: и҆ гдⷭь блгⷭвѝ а҆враа́ма во всѣ́хъ.

²И҆ речѐ а҆враа́мъ рабѹ̀ своемѹ̀ старѣ́йшемѹ до́мѹ своегѡ̀, ѡ҆блада́ющемѹ всѣ́ми є҆гѡ̀: положѝ рѹ́кѹ твою̀ под̾ стегно̀ моѐ,

³и҆ закленѹ́ тѧ гдⷭемъ бг҃омъ нб҃сѐ и҆ бг҃омъ землѝ, да не по́ймеши сы́нѹ моемѹ̀ ї҆саа́кѹ жены̀ ѿ дще́рей ханане́йскихъ, съ ни́миже а҆́зъ живѹ̀ въ ни́хъ:

⁴но то́кмѡ на зе́млю мою̀, и҆дѣ́же роди́хсѧ, по́йдеши, и҆ ко пле́мени моемѹ̀, и҆ по́ймеши женѹ̀ сы́нѹ моемѹ̀ ї҆саа́кѹ ѿтѹ́дѹ.

⁵Рече́ же къ немѹ̀ ра́бъ: є҆да̀ ѹ҆́бѡ не восхо́щетъ и҆тѝ жена̀ в̾слѣ́дъ со мно́ю на зе́млю сїю̀, возвращѹ́ ли сы́на твоего̀ въ зе́млю, ѿ неѧ́же и҆зше́лъ є҆сѝ;

⁶Рече́ же къ немѹ̀ а҆враа́мъ: внемлѝ себѣ̀, да не возврати́ши сы́на моегѡ̀ ѻ҆на́мѡ.

⁷Гдⷭь бг҃ъ нб҃сѐ и҆ бг҃ъ землѝ, и҆́же поѧ́ мѧ и҆з̾ до́мѹ ѻ҆тца̀ моегѡ̀ и҆ ѿ землѝ, въ не́йже роди́хсѧ, и҆́же гл҃а мнѣ̀ и҆ и҆́же клѧ́сѧ мнѣ̀, гл҃ѧ: тебѣ̀ да́мъ зе́млю сїю̀ и҆ сѣ́мени твоемѹ̀, то́й по́слетъ а҆́гг҃ла своего̀ пред̾ тобо́ю, и҆ по́ймеши женѹ̀ сы́нѹ моемѹ̀ ї҆саа́кѹ ѿтѹ́дѹ:

⁸а҆́ще же не восхо́щетъ жена̀ поитѝ съ тобо́ю въ зе́млю сїю̀, чи́стъ бѹ́деши ѿ заклѧ́тїѧ моегѡ̀: то́чїю сы́на моегѡ̀ не возвратѝ та́мѡ.

⁹И҆ положѝ ра́бъ рѹ́кѹ свою̀ под̾ стегно̀ а҆враа́ма господи́на своегѡ̀, и҆ клѧ́сѧ є҆мѹ̀ ѡ҆ словесѝ се́мъ.

¹⁰И҆ взѧ̀ ра́бъ де́сѧть велблю҄дъ ѿ велблю҄дъ господи́на своегѡ̀, и҆ ѿ всѣ́хъ бла҄гъ господи́на своегѡ̀ съ собо́ю, и҆ воста́въ и҆́де въ месопота́мїю во гра́дъ нахѡ́ровъ:

¹¹и҆ поста́ви велблю́ды внѣ̀ гра́да ѹ҆ кла́дѧзѧ во́днагѡ под̾ ве́черъ, є҆гда̀ и҆схо́дѧтъ (жєны̀) почерпа́ти воды̀,

¹²и҆ речѐ: гдⷭи, бж҃е господи́на моегѡ̀ а҆враа́ма, бл҃гоѹстро́й предо мно́ю дне́сь, и҆ сотворѝ млⷭть съ господи́номъ мои́мъ а҆враа́момъ:

¹³сѐ, а҆́зъ ста́хъ ѹ҆ кла́дѧзѧ во́днагѡ, дщє́ри же живѹ́щихъ во гра́дѣ и҆схо́дѧтъ почерпа́ти воды̀:

¹⁴и҆ бѹ́детъ дѣви́ца, є҆́йже а҆́зъ рекѹ̀: преклонѝ водоно́съ тво́й, да пїю̀, и҆ рече́тъ мѝ: пі́й ты̀, и҆ велблю́ды твоѧ҄ напою̀, до́ндеже напїю́тсѧ: сїю̀ ѹ҆гото́валъ є҆сѝ рабѹ̀ твоемѹ̀ ї҆саа́кѹ: и҆ по семѹ̀ ѹ҆вѣ́мъ, ѩ҆́кѡ сотвори́лъ є҆сѝ млⷭть съ господи́номъ мои́мъ а҆враа́момъ.

¹⁵И҆ бы́сть пре́жде не́же сконча́ти є҆мѹ̀ глаго́лющѹ во ѹ҆мѣ̀ свое́мъ, и҆ сѐ, реве́кка и҆схожда́ше, ѩ҆́же роди́сѧ ваѳѹи́лѹ, сы́нѹ ме́лхи жены̀ нахѡ́ра, бра́та же а҆враа́млѧ, держа́щи водоно́съ на ра́мѣхъ свои́хъ:

¹⁶дѣви́ца же бѧ́ше доброзра́чна ѕѣлѡ̀: дѣ́ва бѣ̀, мѹ́жъ не позна̀ є҆ѧ̀. Соше́дши же на кла́дѧзь, напо́лни водоно́съ сво́й и҆ взы́де.

¹⁷Тече́ же ра́бъ во срѣ́тенїе є҆́й и҆ речѐ: напо́й мѧ̀ ма́лѡ водо́ю ѿ водоно́са твоегѡ̀.

¹⁸Сїѧ́ же речѐ: пі́й, господи́не. И҆ потща́сѧ, и҆ снѧ̀ водоно́съ на мы҄шца своѧ҄, и҆ напоѝ є҆го̀, до́ндеже напи́сѧ.

¹⁹И҆ речѐ: и҆ велблю́дѡмъ твои҄мъ налїю̀, до́ндеже всѝ напїю́тсѧ.

²⁰И҆ потща́сѧ, и҆ и҆спразднѝ водоно́съ въ пои́ло: и҆ течѐ па́ки на кла́дѧзь почерпнѹ́ти воды̀, и҆ влїѧ̀ велблю́дѡмъ всѣ҄мъ.

²¹Человѣ́къ же выразѹмѣва́ше ю҆̀ и҆ помолчева́ше, да ѹ҆разѹмѣ́етъ, а҆́ще бл҃гоѹстро́и бг҃ъ пѹ́ть є҆мѹ̀, и҆лѝ нѝ.

²²Бы́сть же є҆гда̀ преста́ша всѝ велблю́ды пїю́ще, взѧ̀ человѣ́къ ѹ҆серѧ҄зи зла҄ты вѣ́сомъ по дра́хмѣ и҆ два̀ запѧ҄стїѧ на рѹ́ки є҆ѧ̀: де́сѧть златни́цъ вѣ́съ и҆́хъ.

²³И҆ вопросѝ ю҆̀ и҆ речѐ: чїѧ̀ є҆сѝ дще́рь; повѣ́ждь мѝ, а҆́ще є҆́сть ѹ҆ ѻ҆тца̀ твоегѡ̀ мѣ́сто на́мъ вита́ти;

²⁴Ѻ҆на́ же речѐ є҆мѹ̀: дще́рь ваѳѹи́лева є҆́смь (сы́на) ме́лхина, є҆го́же родѝ нахѡ́рѹ.

²⁵И҆ речѐ є҆мѹ̀: и҆ плевы̀ и҆ сѣ́на мно́гѡ ѹ҆ на́съ, и҆ мѣ́сто вита́ти.

²⁶И҆ благослови́въ человѣ́къ, поклони́сѧ гдⷭѹ

²⁷и҆ речѐ: блгⷭве́нъ гдⷭь бг҃ъ господи́на моегѡ̀ а҆враа́ма, и҆́же не ѡ҆ста́ви пра́вды своеѧ̀ и҆ и҆́стины ѿ господи́на моегѡ̀: и҆ менѐ бл҃гоѹстро́и гдⷭь въ до́мъ бра́та господи́на моегѡ̀.

²⁸И҆ те́кши дѣви́ца въ до́мъ ма́тере своеѧ̀, повѣ́да по глаго́лѡмъ си҄мъ.

²⁹Реве́кцѣ же бѧ́ше бра́тъ, є҆мѹ́же и҆́мѧ лава́нъ: и҆ течѐ лава́нъ къ человѣ́кѹ во́нъ на кла́дѧзь.

³⁰И҆ бы́сть є҆гда̀ ви́дѣ ѹ҆серѧ҄зи, и҆ запѧ҄стїѧ на рѹкѹ̀ сестры̀ своеѧ̀, и҆ є҆гда̀ слы́ша словеса̀ реве́кки сестры̀ своеѧ̀, глаго́лющїѧ: си́це глаго́ла мнѣ̀ человѣ́къ: и҆ прїи́де къ человѣ́кѹ, стоѧ́щѹ є҆мѹ̀ ѹ҆ велблю҄дъ ѹ҆ кла́дѧзѧ,

³¹и҆ речѐ є҆мѹ̀: грѧдѝ, вни́ди бл҃гослове́нный ѿ гдⷭа, почто̀ стои́ши внѣ̀; а҆́зъ же ѹ҆гото́вахъ хра́минѹ и҆ мѣ́сто велблю́дѡмъ.

³²И҆ вни́де человѣ́къ въ до́мъ, и҆ разсѣдла̀ велблю́ды, и҆ дадѐ плє́вы и҆ сѣ́но велблю́дѡмъ, и҆ во́дѹ ѹ҆мы́ти но́зѣ є҆гѡ̀, и҆ но́ги мѹжє́мъ, и҆̀же бѧ́хѹ съ ни́мъ:

³³и҆ предложѝ и҆̀мъ хлѣ́бы ѩ҆́сти, и҆ речѐ: не ѩ҆́мъ, до́ндеже возглаго́лю словеса̀ моѧ҄. И҆ речѐ: глаго́ли.

³⁴И҆ речѐ: ра́бъ а҆враа́мль є҆́смь а҆́зъ:

³⁵гдⷭь же блгⷭвѝ господи́на моего̀ ѕѣлѡ̀, и҆ возвы́сисѧ: и҆ дадѐ є҆мѹ̀ ѻ҆́вцы и҆ телцы̀, сребро̀ и҆ зла́то, рабы҄ и҆ рабы҄ни, и҆ велблю́ды и҆ ѻ҆слы̀:

³⁶и҆ родѝ са́рра, жена̀ господи́на моегѡ̀, сы́на є҆ди́наго господи́нѹ моемѹ̀, состарѣ́вшемѹсѧ є҆мѹ̀, и҆ дадѐ є҆мѹ̀, є҆ли҄ка и҆мѧ́ше:

³⁷и҆ заклѧ́ мѧ господи́нъ мо́й, глаго́лѧ: не по́ймеши жены̀ сы́нѹ моемѹ̀ ѿ дще́рей ханане́йскихъ, въ ни́хже а҆́зъ ѡ҆бита́ю въ землѝ и҆́хъ:

³⁸но въ до́мъ ѻ҆тца̀ моегѡ̀ по́йдеши, и҆ въ пле́мѧ моѐ, и҆ по́ймеши женѹ̀ сы́нѹ моемѹ̀ ѿтѹ́дѹ:

³⁹рѣ́хъ же (а҆́зъ) господи́нѹ моемѹ̀: а҆ є҆гда̀ не восхо́щетъ жена̀ со мно́ю и҆тѝ;

⁴⁰и҆ рече́ ми: гдⷭь бг҃ъ, є҆мѹ́же благоѹгоди́хъ пред̾ ни́мъ, ѻ҆́нъ по́слетъ а҆́гг҃ла своего̀ съ тобо́ю и҆ бл҃гоѹстро́итъ пѹ́ть тво́й, и҆ по́ймеши женѹ̀ сы́нѹ моемѹ̀ ѿ пле́мене моегѡ̀ и҆ ѿ до́мѹ ѻ҆тца̀ моегѡ̀:

⁴¹тогда̀ бѹ́деши чи́стъ ѿ заклина́нїѧ моегѡ̀: є҆гда́ бо до́йдеши въ пле́мѧ моѐ, и҆ не дадѧ́тъ тѝ, и҆ бѹ́деши чи́стъ ѿ заклина́нїѧ моегѡ̀:

⁴²и҆ прише́дъ дне́сь на кла́дѧзь, реко́хъ: гдⷭи, бж҃е господи́на моегѡ̀ а҆враа́ма, а҆́ще ты̀ бл҃гоѹстроѧ́еши пѹ́ть мо́й, въ ѻ҆́ньже нн҃ѣ а҆́зъ и҆дѹ̀:

⁴³сѐ, а҆́зъ ста́хъ ѹ҆ кла́дѧзѧ во́днагѡ, и҆ дщє́ри гра́жданъ и҆схо́дѧтъ почерпа́ти воды̀: и҆ бѹ́детъ дѣви́ца, є҆́йже а҆́ще а҆́зъ рекѹ̀: напо́й мѧ̀ ѿ водоно́са твоегѡ̀ ма́лѡ водо́ю:

⁴⁴и҆ рече́тъ мѝ: и҆ ты̀ пі́й, и҆ велблю́дѡмъ твои҄мъ влїю̀: сїѧ̀ (бѹ́детъ) жена̀, ю҆́же ѹ҆гото́ва гдⷭь рабѹ̀ своемѹ̀ ї҆саа́кѹ: и҆ по семѹ̀ ѹ҆разѹмѣ́ю, ѩ҆́кѡ сотвори́лъ є҆сѝ млⷭть господи́нѹ моемѹ̀ а҆враа́мѹ.

⁴⁵И҆ бы́сть пре́жде не́же сконча́ти мнѣ̀ глаго́лющѹ во ѹ҆мѣ̀ свое́мъ, а҆́бїе реве́кка и҆схожда́ше держа́щи водоно́съ на ра҄мѹ, и҆ сни́де на кла́дѧзь, и҆ почерпѐ воды̀: и҆ реко́хъ є҆́й: напо́й мѧ̀.

⁴⁶И҆ потща́вшисѧ снѧ̀ водоно́съ съ себє̀ на мы́шцѹ свою̀ и҆ речѐ: пі́й ты̀, и҆ велблю́ды твоѧ҄ напою̀. И҆ напи́хсѧ, и҆ велблю́ды моѧ҄ напоѝ.

⁴⁷И҆ вопроси́хъ ю҆̀ и҆ реко́хъ: чїѧ̀ є҆сѝ дще́рь; повѣ́ждь мѝ. Ѻ҆на́ же речѐ: дще́рь ваѳѹи́лева є҆́смь сы́на нахѡ́рова, є҆го́же родѝ є҆мѹ̀ ме́лха. И҆ да́хъ є҆́й ѹ҆серѧ҄зи, и҆ запѧ҄стїѧ на рѹ́цѣ є҆ѧ̀,

⁴⁸и҆ благоволи́въ поклони́хсѧ гдⷭѹ: и҆ благослови́хъ гдⷭа бг҃а господи́на моегѡ̀ а҆враа́ма, и҆́же бл҃гоѹстро́и мѧ̀ на пѹтѝ и҆́стины поѧ́ти дще́рь бра́та господи́на моегѡ̀ сы́нѹ є҆гѡ̀:

⁴⁹а҆́ще ѹ҆́бѡ сотворитѐ вы̀ ми́лость и҆ пра́вдѹ къ господи́нѹ моемѹ̀: а҆́ще же нѝ, повѣ́дите мѝ: да ѡ҆бращѹ́сѧ и҆лѝ на де́сно, и҆лѝ на лѣ́во.

⁵⁰Ѿвѣща҄вша же лава́нъ и҆ ваѳѹи́лъ, реко́ста: ѿ гдⷭа прїи́де дѣ́ло сїѐ: не возмо́жемъ тѝ проти́вѹ рещѝ ѕло̀ и҆лѝ бла́го:

⁵¹сѐ, реве́кка пред̾ тобо́ю: пое́мь ю҆̀, и҆дѝ: и҆ да бѹ́детъ жена̀ сы́нѹ господи́на твоегѡ̀, ѩ҆́коже гл҃а гдⷭь.

⁵²Бы́сть же є҆гда̀ ѹ҆слы́ша ра́бъ а҆враа́мль словеса̀ сїѧ҄, поклони́сѧ до землѝ гдⷭѹ.

⁵³И҆ и҆зне́съ ра́бъ сосѹ́ды зла҄ты и҆ срє́брѧны и҆ ри҄зы, дадѐ реве́кцѣ: и҆ да́ры дадѐ бра́тѹ є҆ѧ̀ и҆ ма́тери є҆ѧ̀.

⁵⁴И҆ ѩ҆до́ша и҆ пи́ша и҆ то́й и҆ мѹ́жїе, и҆̀же бѧ́хѹ съ ни́мъ, и҆ почи́ша. И҆ воста́въ заѹ́тра, речѐ: ѿпѹсти́те мѧ̀, да ѿидѹ̀ къ господи́нѹ моемѹ̀.

⁵⁵Рѣ́ша же бра́тїѧ є҆ѧ̀ и҆ ма́ти: да пребѹ́детъ дѣви́ца съ на́ми ѩ҆́кѡ де́сѧть дні́й, и҆ посе́мъ по́йдетъ.

⁵⁶Ѻ҆́нъ же речѐ къ ни҄мъ: не держи́те мѧ̀, гдⷭь бо бл҃гоѹстро́и пѹ́ть мо́й во мнѣ̀: ѿпѹсти́те мѧ̀, да и҆дѹ̀ къ господи́нѹ моемѹ̀.

⁵⁷Ѻ҆ни́ же рѣ́ша: призове́мъ дѣви́цѹ и҆ вопро́симъ є҆ѧ̀ и҆зоѹ́стъ.

⁵⁸И҆ призва́ша реве́ккѹ и҆ рѣ́ша є҆́й: по́йдеши ли съ человѣ́комъ си́мъ; Ѻ҆на́ же речѐ: пойдѹ̀.

⁵⁹И҆ ѿпѹсти́ша реве́ккѹ сестрѹ̀ свою̀, и҆ и҆мѣ҄нїѧ є҆ѧ̀, и҆ раба̀ а҆враа́млѧ, и҆ и҆̀же съ ни́мъ бы́ша.

⁶⁰И҆ благослови́ша реве́ккѹ и҆ рѣ́ша є҆́й: сестра̀ на́ша є҆сѝ, бѹ́ди въ ты́сѧщы тє́мъ, и҆ да наслѣ́дитъ сѣ́мѧ твоѐ гра́ды сѹпоста҄тъ.

⁶¹Воста́вши же реве́кка и҆ рабы҄ни є҆ѧ̀, всѣдо́ша на велблю́ды и҆ поидо́ша съ человѣ́комъ. И҆ пои́мъ ра́бъ реве́ккѹ, ѿи́де.

⁶²Ї҆саа́къ же прехожда́ше сквозѣ̀ пѹсты́ню ѹ҆ кла́дѧзѧ видѣ́нїѧ: са́мъ же живѧ́ше на землѝ на полѹ́дне.

⁶³И҆ и҆зы́де ї҆саа́къ поглѹми́тисѧ на по́ле къ ве́черѹ, и҆ воззрѣ́въ ѻ҆чи́ма свои́ма, ви́дѣ велблю́ды и҆дѹ́щыѧ.

⁶⁴И҆ воззрѣ́вши реве́кка ѻ҆чи́ма свои́ма, ви́дѣ ї҆саа́ка: и҆ и҆зскочѝ съ велблю́да.

⁶⁵И҆ речѐ рабѹ̀: кто́ є҆сть человѣ́къ ѻ҆́ный, и҆́же и҆́детъ по по́лю во срѣ́тенїе на́мъ; Рече́ же ра́бъ: се́й є҆́сть господи́нъ мо́й. Ѻ҆на́ же взе́мши ри́зѹ лѣ́тнюю, ѡ҆блече́сѧ.

⁶⁶И҆ повѣ́да ра́бъ ї҆саа́кѹ всѧ҄ словеса̀, ѩ҆̀же сотворѝ.

⁶⁷Вни́де же ї҆саа́къ въ до́мъ ма́тере своеѧ̀, и҆ поѧ̀ реве́ккѹ, и҆ бы́сть є҆мѹ̀ жена̀: и҆ возлюбѝ ю҆̀, и҆ ѹ҆тѣ́шисѧ ї҆саа́къ по са́ррѣ ма́тери свое́й.