Read Библия Церковнославянская Бытїѐ 25 Bible Online

Бытїѐ 25 - Библия Церковнославянская bible

Бытїѐ 25

¹Приложи́въ же а҆враа́мъ, поѧ̀ женѹ̀, є҆́йже и҆́мѧ хеттѹ́ра:

²роди́ же є҆мѹ̀ зомвра́на и҆ ї҆еза́на, и҆ мада́ла и҆ мадїа́ма, и҆ ї҆есво́ка и҆ сѡїе́на.

³Ї҆еза́нъ же родѝ сава́на и҆ ѳама́на и҆ деда́на. Сы́нове же деда҄ни бы́ша: рагѹи́лъ и҆ навдеи́лъ, и҆ а҆сѹрїи́мъ и҆ латѹсїи́мъ и҆ лаѡмі́мъ.

⁴Сы́нове же мадїа҄мли: є҆фа́ръ и҆ а҆фи́ръ, и҆ є҆нѡ́хъ и҆ а҆вїда̀ и҆ є҆лдага̀. Всѝ сі́и бы́ша сы́нове хеттѹ҄рины.

⁵Даде́ же а҆враа́мъ всѧ҄ своѧ҄ и҆мѣ҄нїѧ ї҆саа́кѹ сы́нѹ своемѹ̀:

⁶сынѡ́мъ же нало́жницъ свои́хъ дадѐ а҆враа́мъ да́ры и҆ ѿпѹстѝ ѧ҆̀ ѿ ї҆саа́ка сы́на своегѡ̀, є҆щѐ жи́въ сы́й, къ восто́кѹ на зе́млю восто́чнѹю.

⁷Сїѧ҄ же лѣ҄та дні́й житїѧ̀ а҆враа́млѧ, є҆ли҄ка поживѐ, лѣ́тъ сто̀ се́дмьдесѧтъ пѧ́ть:

⁸и҆ ѡ҆слабѣ́въ ѹ҆́мре а҆враа́мъ въ ста́рости до́брѣй, ста́рецъ и҆спо́лненъ дні́й, и҆ приложи́сѧ къ лю́демъ свои҄мъ.

⁹И҆ погребо́ша є҆го̀ ї҆саа́къ и҆ ї҆сма́илъ два̀ сы́нове є҆гѡ̀ въ пеще́рѣ сѹгѹ́бѣй, на селѣ̀ є҆фрѡ́новѣ сы́на саа́рова хетте́анина, є҆́же є҆́сть прѧ́мѡ мамврі́и,

¹⁰на селѣ̀ и҆ въ пеще́рѣ, ю҆́же притѧжа̀ а҆враа́мъ ѿ сынѡ́въ хетте́овыхъ: та́мѡ погребо́ша а҆враа́ма и҆ са́ррѹ женѹ̀ є҆гѡ̀.

¹¹Бы́сть же по ѹ҆ме́ртвїи а҆враа́мли, блгⷭвѝ бг҃ъ ї҆саа́ка сы́на є҆гѡ̀: и҆ всели́сѧ ї҆саа́къ ѹ҆ кла́дѧзѧ видѣ́нїѧ.

¹²Сїѧ҄ же бытїѧ҄ ї҆сма́ила сы́на а҆враа́млѧ, є҆го́же родѝ а҆́гарь є҆гѵ́птѧнынѧ, раба̀ са́ррина, а҆враа́мѹ:

¹³и҆ сїѧ҄ и҆мена̀ сынѡ́въ ї҆сма́илихъ, по и҆менѡ́мъ родѡ́въ є҆гѡ̀: пе́рвенецъ ї҆сма́иловъ наваїѡ́ѳъ, и҆ кида́ръ и҆ навдеи́лъ, и҆ масса́мъ

¹⁴и҆ масма̀, и҆ дѹма̀ и҆ массѝ,

¹⁵и҆ ходда́нъ и҆ ѳема́нъ, и҆ ї҆етѹ́ръ и҆ нафе́съ и҆ кедма̀.

¹⁶Сі́и сѹ́ть сы́нове ї҆сма҄или: и҆ сїѧ҄ и҆мена̀ и҆́хъ въ ски́нїѧхъ и҆́хъ и҆ въ се́лѣхъ и҆́хъ: двана́десѧть кнѧ҄зи въ ѩ҆зы́цѣхъ и҆́хъ.

¹⁷И҆ сїѧ҄ лѣ҄та житїѧ̀ ї҆сма́илова, сто̀ три́десѧть се́дмь лѣ́тъ: и҆ ѡ҆слабѣ́въ ѹ҆́мре, и҆ приложи́сѧ къ ро́дѹ своемѹ̀.

¹⁸Всели́сѧ же ѿ є҆ѵїла́та да́же до сѹ́ра, и҆́же є҆́сть въ лицѐ є҆гѵ́птѹ, да́же доитѝ ко а҆ссѷрі́ѡмъ: пред̾ лице́мъ всѣ́хъ бра́тїй свои́хъ всели́сѧ.

¹⁹И҆ сїѧ҄ бытїѧ҄ ї҆саа́ка сы́на а҆враа́млѧ: а҆враа́мъ родѝ ї҆саа́ка.

²⁰Бѧ́ше же ї҆саа́къ лѣ́тъ четы́редесѧти, є҆гда̀ поѧ̀ реве́ккѹ дще́рь ваѳѹи́ла сѵ́рїна ѿ месопота́мїи сѵ́рскїѧ, сестрѹ̀ лава́на сѵ́рїна, себѣ̀ въ женѹ̀.

²¹Молѧ́шесѧ же ї҆саа́къ гдⷭеви ѡ҆ реве́кцѣ женѣ̀ свое́й, ѩ҆́кѡ непло́ды бѧ́ше: послѹ́ша же є҆го̀ бг҃ъ, и҆ зача́тъ во ѹ҆тро́бѣ реве́кка жена̀ є҆гѡ̀.

²²И҆гра́ста же младє́нца въ не́й, и҆ речѐ: а҆́ще та́кѡ мѝ хо́щетъ бы́ти, почто́ ми сїѐ; И҆ и҆́де вопроша́ти гдⷭа.

²³И҆ речѐ є҆́й гдⷭь: два̀ ѩ҆зы҄ка во ѹ҆тро́бѣ твое́й сѹ́ть, и҆ дво́и лю́дїе ѿ ѹ҆тро́бы твоеѧ̀ разлѹча́тсѧ: и҆ лю́дїе люді́й превзы́дѹтъ, и҆ бо́лшїй порабо́таетъ ме́ншемѹ.

²⁴И҆ и҆спо́лнишасѧ дні́е роди́ти є҆́й, и҆ бѧ́хѹ се́й близнѧ́та во ѹ҆тро́бѣ є҆ѧ̀:

²⁵и҆зы́де же сы́нъ пе́рвенецъ че́рменъ, ве́сь, ѩ҆́кѡ ко́жа, косма́тъ: и҆ наречѐ и҆́мѧ є҆мѹ̀ и҆са́ѵъ:

²⁶и҆ посе́мъ и҆зы́де бра́тъ є҆гѡ̀, рѹка́ же є҆гѡ̀ придержа́сѧ пѧтѣ̀ и҆са́ѵовѣ: и҆ наречѐ и҆́мѧ є҆мѹ̀ ї҆а́кѡвъ. Ї҆саа́кѹ же бѣ̀ шестьдесѧ́тъ лѣ́тъ, є҆гда̀ родѝ и҆̀хъ реве́кка.

²⁷Возрасто́ша же ю҆́нѡши: и҆ бы́сть и҆са́ѵъ человѣ́къ вѣ́дый лови́ти, се́лный: ї҆а́кѡвъ же бы́сть человѣ́къ нелѹка́въ, живы́й въ домѹ̀.

²⁸И҆ возлюбѝ ї҆саа́къ и҆са́ѵа, ѩ҆́кѡ лови́тва є҆гѡ̀ бѧ́ше бра́шно є҆мѹ̀: реве́кка же люблѧ́ше ї҆а́кѡва.

²⁹Свари́ же ї҆а́кѡвъ варе́нїе: и҆ прїи́де и҆са́ѵъ съ по́лѧ и҆знемо́гъ,

³⁰и҆ речѐ и҆са́ѵъ ї҆а́кѡвѹ: напита́й мѧ̀ варе́нїемъ со́чива сегѡ̀, ѩ҆́кѡ и҆знемога́ю. Сегѡ̀ ра́ди прозва́сѧ и҆́мѧ є҆мѹ̀ є҆дѡ́мъ.

³¹И҆ речѐ ї҆а́кѡвъ и҆са́ѵѹ: ѿда́ждь мѝ дне́сь пе́рвенство своѐ.

³²Рече́ же и҆са́ѵъ: сѐ, а҆́зъ и҆дѹ̀ ѹ҆мре́ти, и҆ вскѹ́ю мѝ пе́рвенство сїѐ;

³³И҆ речѐ ї҆а́кѡвъ є҆мѹ̀: клени́сѧ мѝ дне́сь. И҆ клѧ́сѧ є҆мѹ̀, и҆ ѿдадѐ и҆са́ѵъ ї҆а́кѡвѹ пе́рвенство своѐ.

³⁴Ї҆а́кѡвъ же дадѐ и҆са́ѵѹ хлѣ́бъ и҆ варе́нїе со́чевно: ѩ҆де́ же и҆ пѝ, и҆ воста́въ ѿи́де: и҆ нивочто́же вмѣнѝ себѣ̀ и҆са́ѵъ пе́рвенство.