Read Библия Церковнославянская Бытїѐ 26 Bible Online

Бытїѐ 26 - Библия Церковнославянская bible

Бытїѐ 26

¹Бы́сть же гла́дъ на землѝ, кромѣ̀ гла́да бы́вшагѡ пре́жде во вре́мѧ а҆враа́мле. Ѿи́де же ї҆саа́къ ко а҆вїмеле́хѹ царю̀ фѷлїсті́мскѹ въ гера́рѹ:

²ѩ҆ви́сѧ же є҆мѹ̀ гдⷭь и҆ речѐ: не ходѝ во є҆гѵ́петъ, всели́сѧ же въ землѝ, въ не́йже тѝ рекѹ̀,

³и҆ ѡ҆бита́й въ землѝ то́й, и҆ бѹ́дѹ съ тобо́ю, и҆ блгⷭвлю́ тѧ: тебѣ́ бо и҆ сѣ́мени твоемѹ̀ да́мъ всю̀ зе́млю сїю̀, и҆ поста́влю клѧ́твѹ мою̀, є҆́юже клѧ́хсѧ а҆враа́мѹ ѻ҆тцѹ̀ твоемѹ̀:

⁴и҆ ѹ҆мно́жѹ сѣ́мѧ твоѐ, ѩ҆́кѡ ѕвѣ́зды небє́сныѧ, и҆ да́мъ сѣ́мени твоемѹ̀ всю̀ зе́млю сїю̀: и҆ блгⷭвѧ́тсѧ ѡ҆ сѣ́мени твое́мъ всѝ ѩ҆зы́цы земні́и:

⁵поне́же послѹ́ша ѻ҆те́цъ тво́й а҆враа́мъ моегѡ̀ гла́са и҆ соблюдѐ за́пѡвѣди моѧ҄ и҆ повелѣ҄нїѧ моѧ҄, и҆ ѡ҆правда҄нїѧ моѧ҄ и҆ зако́ны моѧ҄.

⁶Всели́сѧ же ї҆саа́къ въ гера́рѣхъ.

⁷Вопроси́ша же мѹ́жїе мѣ́ста тогѡ̀ ѡ҆ реве́кцѣ женѣ̀ є҆гѡ̀, и҆ речѐ: сестра́ ми є҆́сть. Ѹ҆боѧ́сѧ бо рещѝ, ѩ҆́кѡ жена́ ми є҆́сть, да не когда̀ ѹ҆бїю́тъ є҆го̀ мѹ́жїе мѣ́ста тогѡ̀ реве́кки ра́ди, поне́же бѣ̀ доброзра́чна.

⁸Бы́сть же мно́го вре́мѧ та́мѡ: и҆ прини́кнѹвъ а҆вїмеле́хъ ца́рь гера́рскїй ѻ҆кно́мъ, ви́дѣ ї҆саа́ка и҆гра́юща съ реве́ккою жено́ю свое́ю.

⁹Призва́ же а҆вїмеле́хъ ї҆саа́ка и҆ речѐ є҆мѹ̀: ѹ҆̀бо жена̀ твоѧ̀ є҆́сть; почто̀ ре́клъ є҆сѝ, ѩ҆́кѡ сестра́ ми є҆́сть; Рече́ же є҆мѹ̀ ї҆саа́къ: рѣ́хъ бо, да не ѹ҆мрѹ̀ є҆ѧ̀ ра́ди.

¹⁰Рече́ же є҆мѹ̀ а҆вїмеле́хъ: что̀ сїѐ сотвори́лъ є҆сѝ на́мъ; вма́лѣ не бы́сть нѣ́кто ѿ ро́да моегѡ̀ съ жено́ю твое́ю, и҆ наве́лъ бы є҆сѝ на ны̀ невѣ́дѣнїе.

¹¹Заповѣ́да же а҆вїмеле́хъ всѣ҄мъ лю́демъ свои҄мъ, глаго́лѧ: всѧ́къ, и҆́же прико́снетсѧ мѹ́жѹ семѹ̀, и҆лѝ женѣ̀ є҆гѡ̀, сме́рти пови́ненъ бѹ́детъ.

¹²Сѣ́ѧ же ї҆саа́къ въ землѝ то́й, и҆ приѡбрѣ́те въ то̀ лѣ́то стокра́тный пло́дъ ѩ҆чме́нѧ: блгⷭви́ же є҆го̀ гдⷭь.

¹³И҆ возвы́сисѧ человѣ́къ, и҆ преѹспѣва́ѧ бо́лшїй быва́ше, до́ндеже вели́къ бы́сть ѕѣлѡ̀.

¹⁴Бы́ша же є҆мѹ̀ ско́ти ѻ҆ве́цъ и҆ ско́ти волѡ́въ и҆ земледѣ҄лїѧ мнѡ́га. Позави́дѣша же є҆мѹ̀ фѷлїсті́млѧне:

¹⁵и҆ всѧ҄ кла҄дѧзи, ѩ҆̀же и҆скопа́ша рабѝ ѻ҆тца̀ є҆гѡ̀, во вре́мѧ ѻ҆тца̀ є҆гѡ̀, загради́ша ѧ҆̀ фѷлїсті́млѧне и҆ напо́лниша ты҄ѧ земле́ю.

¹⁶Рече́ же а҆вїмеле́хъ ко ї҆саа́кѹ: ѿидѝ ѿ на́съ, ѩ҆́кѡ си́льнѣйшїй сотвори́лсѧ є҆сѝ ѿ на́съ ѕѣлѡ̀.

¹⁷И҆ ѿи́де ѿтѹ́дѹ ї҆саа́къ и҆ ѡ҆бита̀ въ де́бри гера́рстѣй, и҆ всели́сѧ та́мѡ.

¹⁸И҆ па́ки ї҆саа́къ и҆скопа̀ кла҄дѧзи вѡ́дныѧ, ѩ҆̀же и҆скопа́ша рабѝ а҆враа́ма ѻ҆тца̀ є҆гѡ̀, и҆ загради́ша ты҄ѧ фѷлїсті́млѧне, по ѹ҆ме́ртвїи а҆враа́ма ѻ҆тца̀ є҆гѡ̀: и҆ прозва̀ и҆̀мъ и҆мена̀, по и҆мена́мъ, и҆́миже прозва̀ а҆враа́мъ ѻ҆те́цъ є҆гѡ̀.

¹⁹И҆ и҆скопа́ша рабѝ ї҆саа́кѡвы въ де́бри гера́рстѣй, и҆ ѡ҆брѣто́ша та́мѡ кла́дѧзь воды̀ жи́вы.

²⁰И҆ прѧ́хѹсѧ па́стырїе гера́рстїи съ па́стырьми ї҆саа́ковыми, глаго́люще: на́ша є҆́сть вода̀. И҆ прозва̀ и҆́мѧ кла́дѧзю томѹ̀ [ѡ҆би́да]: ѡ҆би́дѧхѹ бо є҆го̀.

²¹Ѿше́дъ же ѿтѹ́дѹ ї҆саа́къ, и҆скопа̀ кла́дѧзь дрѹгі́й. Прѧ́хѹсѧ же и҆ ѡ҆ то́мъ: и҆ прозва̀ и҆́мѧ є҆мѹ̀ [вражда̀].

²²Ѿше́дъ же ѿтѹ́дѹ, и҆скопа̀ кла́дѧзь дрѹгі́й. И҆ не прѧ́хѹсѧ ѡ҆ то́мъ, и҆ прозва̀ и҆́мѧ є҆мѹ̀ [простра́нство], глаго́лѧ: ѩ҆́кѡ нн҃ѣ распространѝ гдⷭь на́мъ и҆ возрастѝ на́съ на землѝ.

²³Взы́де же ѿтѹ́дѹ ко кла́дѧзю клѧ́твенномѹ:

²⁴и҆ ѩ҆ви́сѧ є҆мѹ̀ гдⷭь въ тѹ̀ но́щь и҆ речѐ: а҆́зъ є҆́смь бг҃ъ а҆враа́ма ѻ҆тца̀ твоегѡ̀, не бо́йсѧ, съ тобо́ю бо є҆́смь: и҆ блгⷭвлю́ тѧ, и҆ ѹ҆мно́жѹ сѣ́мѧ твоѐ а҆враа́ма ра́ди ѻ҆тца̀ твоегѡ̀.

²⁵И҆ созда̀ та́мѡ же́ртвенникъ, и҆ призва̀ и҆́мѧ гдⷭне: и҆ поста́ви та́мѡ ски́нїю свою̀: и҆скопа́ша же та́мѡ рабѝ ї҆саа́кѡвы кла́дѧзь въ де́бри гера́рстѣй.

²⁶И҆ а҆вїмеле́хъ прїи́де къ немѹ̀ ѿ гера́ръ, и҆ ѻ҆хоза́ѳъ невѣстоводи́тель є҆гѡ̀, и҆ фїхо́лъ воево́да си́лъ є҆гѡ̀.

²⁷И҆ речѐ и҆̀мъ ї҆саа́къ: вскѹ́ю прїидо́сте ко мнѣ̀; вы́ же возненави́дѣсте менѐ и҆ ѿсла́сте мѧ̀ ѿ себє̀.

²⁸Ѻ҆ни́ же рѣ́ша: ви́дѣвше ѹ҆зрѣ́хомъ, ѩ҆́кѡ бѣ̀ гдⷭь съ тобо́ю, и҆ рѣ́хомъ: бѹ́ди клѧ́тва междѹ̀ на́ми и҆ междѹ̀ тобо́ю, и҆ завѣща́имъ съ тобо́ю завѣ́тъ,

²⁹да не сотвори́ши съ на́ми ѕла̀, ѩ҆́коже не возгнѹша́хомсѧ тобо́ю мы̀, и҆ ѩ҆́коже сотвори́хомъ тебѣ̀ добро̀, и҆ ѿпѹсти́хомъ тѧ̀ съ ми́ромъ: и҆ нн҃ѣ блгⷭве́нъ ты̀ ѿ гдⷭа.

³⁰И҆ сотворѝ и҆̀мъ пи́ръ, и҆ ѩ҆до́ша и҆ пи́ша.

³¹И҆ воста́вше заѹ́тра, клѧ́тсѧ кі́йждо бли́жнемѹ: и҆ ѿпѹстѝ ѧ҆̀ ї҆саа́къ, и҆ ѿидо́ша ѿ негѡ̀ здра҄вы.

³²Бы́сть же въ то́й де́нь, и҆ прише́дше рабѝ ї҆саа́кѡвы повѣ́даша є҆мѹ̀ ѡ҆ кла́дѧзѣ, є҆го́же и҆скопа́ша, и҆ реко́ша: не ѡ҆брѣто́хомъ воды̀.

³³И҆ прозва̀ є҆го̀ [клѧ́тва]. Сегѡ̀ ра́ди прозва̀ и҆́мѧ гра́дѹ ѻ҆́номѹ [кла́дѧзь клѧ́твенный], да́же до дне́шнѧгѡ днѐ.

³⁴Бѧ́ше же и҆са́ѵъ лѣ́тъ четы́редесѧти: и҆ поѧ̀ женѹ̀ ї҆ѹді́ѳѹ, дще́рь веѡ́ха хетте́ина, и҆ васема́ѳѹ, дще́рь є҆лѡ́на хетте́ина {въ нѣ́которыхъ: є҆ѵе́ова}.

³⁵И҆ бы́ша проти́вѧщесѧ ї҆саа́кови и҆ реве́кцѣ.