Read Библия Церковнославянская Бытїѐ 27 Bible Online

Бытїѐ 27 - Библия Церковнославянская bible

Бытїѐ 27

¹Бы́сть же, повнегда̀ состарѣ́тисѧ ї҆саа́кови, и҆ притѹпи́шасѧ ѻ҆́чи є҆гѡ̀ є҆́же ви́дѣти: и҆ призва̀ и҆са́ѵа сы́на своего̀ старѣ́йшаго, и҆ речѐ є҆мѹ̀: сы́не мо́й. И҆ речѐ: сѐ, а҆́зъ.

²И҆ речѐ ї҆саа́къ: сѐ, состарѣ́хсѧ, и҆ не вѣ́мъ днѐ сконча́нїѧ моегѡ̀:

³нн҃ѣ ѹ҆̀бо возмѝ ѻ҆рѹ́дїе твоѐ, тѹ́лъ же и҆ лѹ́къ, и҆ и҆зы́ди на по́ле, и҆ ѹ҆лови́ ми ло́въ:

⁴и҆ сотвори́ ми снѣ҄ди, ѩ҆́коже люблю̀ а҆́зъ: и҆ принеси́ ми, да ѩ҆́мъ, ѩ҆́кѡ да бл҃гослови́тъ тѧ̀ дѹша̀ моѧ̀, пре́жде да́же не ѹ҆мрѹ̀.

⁵Реве́кка же слы́ша глаго́люща ї҆саа́ка ко и҆са́ѵѹ сы́нѹ своемѹ̀. И҆зы́де же и҆са́ѵъ на по́ле ѹ҆лови́ти ло́въ ѻ҆тцѹ̀ своемѹ̀.

⁶Реве́кка же речѐ ко ї҆а́кѡвѹ сы́нѹ своемѹ̀ ме́ншемѹ: сѐ, а҆́зъ слы́шахъ ѻ҆тца̀ твоего̀ бесѣ́дѹюща ко и҆са́ѵѹ бра́тѹ твоемѹ̀, глаго́люща:

⁷принеси́ ми ло́въ, и҆ сотвори́ ми снѣ҄ди, да ѩ҆ды́й бл҃гословлю́ тѧ пред̾ гдⷭемъ, пре́жде не́же ѹ҆мре́ти мѝ:

⁸нн҃ѣ ѹ҆̀бо, сы́не мо́й, послѹ́шай менѐ, ѩ҆́коже а҆́зъ заповѣ́даю тѝ:

⁹и҆ ше́дъ во ѻ҆́вцы, поимѝ мнѣ̀ ѿтѹ́дѹ два̀ кѡ́злища мѧ҄гка и҆ дѡбра̀, и҆ сотворю̀ ѧ҆̀ снѣ҄ди ѻ҆тцѹ̀ твоемѹ̀, ѩ҆́коже лю́битъ:

¹⁰и҆ внесе́ши ѻ҆тцѹ̀ твоемѹ̀, и҆ бѹ́детъ ѩ҆́сти, ѩ҆́кѡ да бл҃гослови́тъ тѧ̀ ѻ҆те́цъ тво́й, пре́жде да́же не ѹ҆́мретъ.

¹¹Рече́ же ї҆а́кѡвъ къ реве́кцѣ ма́тери свое́й: и҆са́ѵъ бра́тъ мо́й є҆́сть мѹ́жъ косма́тъ, а҆́зъ же мѹ́жъ гла́дкїй:

¹²да не ка́кѡ ѡ҆сѧ́жетъ мѧ̀ ѻ҆те́цъ мо́й, и҆ бѹ́дѹ пред̾ ни́мъ ѩ҆́кѡ презира́ѧй, и҆ наведѹ̀ на себѐ клѧ́твѹ, а҆ не бл҃гослове́нїе.

¹³Рече́ же є҆мѹ̀ ма́ти: на мнѣ̀ клѧ́тва твоѧ̀, ча́до: то́чїю послѹ́шай гла́са моегѡ̀, и҆ ше́дъ принеси́ ми.

¹⁴Ше́дъ же взѧ̀ и҆ принесѐ ма́тери, и҆ сотворѝ ма́ти є҆гѡ̀ снѣ҄ди, ѩ҆́коже люблѧ́ше ѻ҆те́цъ є҆гѡ̀.

¹⁵И҆ взе́мши реве́кка ѻ҆де́ждѹ и҆са́ѵа сы́на своегѡ̀ старѣ́йшагѡ до́брѹю, ѩ҆́же бы́сть ѹ҆ неѧ̀ въ домѹ̀, ѡ҆блечѐ ѻ҆́ною ї҆а́кѡва сы́на своего̀ ме́ншаго,

¹⁶и҆ ко́жицами козлѧ́чими ѡ҆бложѝ мы҄шцы є҆гѡ̀, и҆ наго́е вы́и є҆гѡ̀:

¹⁷и҆ дадѐ снѣ҄ди и҆ хлѣ́бы, ѩ҆̀же сотворѝ, въ рѹ́цѣ ї҆а́кѡвѹ сы́нѹ своемѹ̀.

¹⁸И҆ внесѐ ѻ҆тцѹ̀ своемѹ̀ и҆ речѐ: ѻ҆́тче. Ѻ҆́нъ же речѐ: сѐ, а҆́зъ: кто̀ є҆сѝ ты̀, ча́до;

¹⁹И҆ речѐ ї҆а́кѡвъ ѻ҆тцѹ̀: а҆́зъ и҆са́ѵъ пе́рвенецъ тво́й, сотвори́хъ, ѩ҆́коже ре́клъ мѝ є҆сѝ: воста́въ сѧ́ди и҆ ѩ҆́ждь ѿ ло́ва моегѡ̀, ѩ҆́кѡ да бл҃гослови́тъ мѧ̀ дѹша̀ твоѧ̀.

²⁰Рече́ же ї҆саа́къ сы́нѹ своемѹ̀: что̀ сїѐ, є҆́же ско́рѡ ѡ҆брѣ́лъ є҆сѝ, ѽ ча́до; Ѻ҆́нъ же речѐ: є҆́же дадѐ гдⷭь бг҃ъ тво́й предо мно́ю.

²¹Рече́ же ї҆саа́къ ї҆а́кѡвѹ: прибли́жисѧ ко мнѣ̀, и҆ ѡ҆сѧжѹ́ тѧ, ча́до, а҆́ще ты̀ є҆сѝ сы́нъ мо́й и҆са́ѵъ, и҆лѝ нѝ.

²²Прибли́жисѧ же ї҆а́кѡвъ ко ї҆саа́кѹ ѻ҆тцѹ̀ своемѹ̀, и҆ ѡ҆сѧза̀ є҆го̀ и҆ речѐ: гла́съ ѹ҆́бѡ гла́съ ї҆а́кѡвль, рѹ́цѣ же рѹ́цѣ и҆са́ѵѡвѣ.

²³И҆ не позна̀ є҆гѡ̀: бѣ́стѣ бо рѹ́цѣ є҆гѡ̀, ѩ҆́кѡ рѹ́цѣ и҆са́ѵа бра́та є҆гѡ̀ косма҄тѣ. И҆ бл҃гословѝ є҆го̀

²⁴и҆ речѐ: ты́ ли є҆сѝ сы́нъ мо́й и҆са́ѵъ; Ѻ҆́нъ же речѐ: а҆́зъ.

²⁵И҆ речѐ: принеси́ ми, и҆ ѩ҆́мъ ѿ ло́ва твоегѡ̀, ча́до, да бл҃гослови́тъ тѧ̀ дѹша̀ моѧ̀. И҆ принесѐ є҆мѹ̀, и҆ ѩ҆дѐ, и҆ принесѐ є҆мѹ̀ вїно̀, и҆ пѝ.

²⁶И҆ речѐ є҆мѹ̀ ї҆саа́къ ѻ҆те́цъ є҆гѡ̀: прибли́жисѧ ко мнѣ̀ и҆ ѡ҆блобыза́й мѧ̀, ча́до.

²⁷И҆ прибли́живсѧ лобыза̀ є҆го̀: и҆ ѡ҆бонѧ̀ воню̀ ри́зъ є҆гѡ̀, и҆ бл҃гословѝ є҆го̀ и҆ речѐ: сѐ, вонѧ̀ сы́на моегѡ̀, ѩ҆́кѡ вонѧ̀ ни́вы и҆спо́лнены, ю҆́же блгⷭвѝ гдⷭь:

²⁸и҆ да да́стъ тебѣ̀ бг҃ъ ѿ росы̀ небе́сныѧ и҆ ѿ тѹ́ка землѝ, и҆ мно́жество пшени́цы и҆ вїна̀:

²⁹и҆ да порабо́таютъ тебѣ̀ ѩ҆зы́цы, и҆ да покло́нѧтсѧ тебѣ̀ кнѧ҄зи, и҆ бѹ́ди господи́нъ бра́тѹ твоемѹ̀, и҆ покло́нѧтсѧ тебѣ̀ сы́нове ѻ҆тца̀ твоегѡ̀: проклина́ѧй тѧ̀ про́клѧтъ, бл҃гословлѧ́ѧй же тѧ̀ бл҃гослове́нъ.

³⁰И҆ бы́сть по є҆́же преста́ти ї҆саа́кѹ бл҃гословлѧ́ющѹ ї҆а́кѡва сы́на своего̀: и҆ бы́сть є҆гда̀ и҆зы́де ї҆а́кѡвъ ѿ лица̀ ї҆саа́ка ѻ҆тца̀ своегѡ̀, и҆ и҆са́ѵъ бра́тъ є҆гѡ̀ прїи́де съ лови́твы.

³¹Сотвори́ же и҆ то́й снѣ҄ди и҆ принесѐ ѻ҆тцѹ̀ своемѹ̀, и҆ речѐ ѻ҆тцѹ̀: да воста́нетъ ѻ҆те́цъ мо́й, и҆ да ѩ҆́стъ ѿ ло́ва сы́на своегѡ̀, ѩ҆́кѡ да бл҃гослови́тъ мѧ̀ дѹша̀ твоѧ̀.

³²И҆ речѐ є҆мѹ̀ ї҆саа́къ ѻ҆те́цъ є҆гѡ̀: кто̀ є҆сѝ ты̀; Ѻ҆́нъ же речѐ: а҆́зъ є҆́смь сы́нъ тво́й пе́рвенецъ и҆са́ѵъ.

³³Ѹ҆жасе́сѧ же ї҆саа́къ ѹ҆́жасомъ ве́лїимъ ѕѣлѡ̀ и҆ речѐ: кто̀ ѹ҆̀бо ѹ҆лови́вый мнѣ̀ ло́въ и҆ принесы́й мѝ; и҆ ѩ҆до́хъ ѿ всѣ́хъ, пре́жде не́же прїитѝ тебѣ̀, и҆ бл҃гослови́хъ є҆го̀, и҆ бл҃гослове́нъ бѹ́детъ.

³⁴Бы́сть же є҆гда̀ ѹ҆слы́ша и҆са́ѵъ глаго́лы ѻ҆тца̀ своегѡ̀ ї҆саа́ка, возопѝ гла́сомъ ве́лїимъ и҆ го́рькимъ ѕѣлѡ̀, и҆ речѐ: бл҃гословѝ ѹ҆́бѡ и҆ менѐ, ѻ҆́тче.

³⁵Рече́ же є҆мѹ̀: прише́дъ бра́тъ тво́й съ ле́стїю, взѧ̀ бл҃гослове́нїе твоѐ.

³⁶И҆ речѐ (и҆са́ѵъ): пра́веднѡ нарече́сѧ и҆́мѧ є҆мѹ̀ ї҆а́кѡвъ: запѧ́ бо мѧ̀ сѐ ѹ҆жѐ втори́цею, и҆ пе́рвенство моѐ взѧ̀, и҆ нн҃ѣ взѧ̀ бл҃гослове́нїе моѐ. И҆ речѐ и҆са́ѵъ ѻ҆тцѹ̀ своемѹ̀: не ѡ҆ста́вилъ ли є҆сѝ (и҆) мнѣ̀ бл҃гослове́нїѧ, ѻ҆́тче;

³⁷Ѿвѣща́въ же ї҆саа́къ, речѐ и҆са́ѵѹ: а҆́ще господи́на є҆го̀ сотвори́хъ тебѣ̀, и҆ всю̀ бра́тїю є҆гѡ̀ сотвори́хъ рабы҄ є҆мѹ̀, пшени́цею и҆ вїно́мъ ѹ҆тверди́хъ є҆го̀: тебѣ́ же что̀ сотворю̀, ча́до;

³⁸Рече́ же и҆са́ѵъ ко ѻ҆тцѹ̀ своемѹ̀: є҆да̀ є҆ди́но є҆́сть бл҃гослове́нїе ѹ҆ тебє̀, ѻ҆́тче; бл҃гословѝ ѹ҆́бѡ и҆ менѐ, ѻ҆́тче. Ѹ҆мили́вшѹсѧ же ї҆саа́кѹ, возопѝ гла́сомъ ве́лїимъ и҆са́ѵъ и҆ воспла́касѧ.

³⁹Ѿвѣща́въ же ї҆саа́къ ѻ҆те́цъ є҆гѡ̀, речѐ є҆мѹ̀: сѐ, ѿ тѹ́ка землѝ бѹ́детъ вселе́нїе твоѐ, и҆ ѿ росы̀ небе́сныѧ свы́ше:

⁴⁰и҆ мече́мъ твои́мъ жи́ти бѹ́деши, и҆ бра́тѹ твоемѹ̀ порабо́таеши: бѹ́детъ же (вре́мѧ) є҆гда̀ низложи́ши и҆ ѿрѣши́ши ѩ҆ре́мъ є҆гѡ̀ ѿ вы́и твоеѧ̀.

⁴¹И҆ враждова́ше и҆са́ѵъ на ї҆а́кѡва ѡ҆ бл҃гослове́нїи, и҆́мже бл҃гословѝ є҆го̀ ѻ҆те́цъ є҆гѡ̀. Рече́ же и҆са́ѵъ во ѹ҆мѣ̀ свое́мъ: да прибли́жатсѧ дні́е пла́ча ѻ҆тца̀ моегѡ̀, да бы́хъ ѹ҆би́лъ ї҆а́кѡва бра́та моего̀.

⁴²Возвѣщє́на же бы́ша реве́кцѣ словеса̀ и҆са́ѵа сы́на є҆ѧ̀ старѣ́йшагѡ: и҆ посла́вши призва̀ ї҆а́кѡва сы́на своего̀ ю҆нѣ́йшаго и҆ речѐ є҆мѹ̀: сѐ, и҆са́ѵъ бра́тъ тво́й грози́тъ тебѣ̀ ѹ҆би́ти тѧ̀:

⁴³нн҃ѣ ѹ҆̀бо, ча́до, послѹ́шай моегѡ̀ гла́са, и҆ воста́въ бѣжѝ въ месопота́мїю къ лава́нѹ бра́тѹ моемѹ̀ въ харра́нъ,

⁴⁴и҆ поживѝ съ ни́мъ дни҄ нѣ҄кїѧ, до́ндеже ѿврати́тсѧ ѩ҆́рость и҆ гнѣ́въ бра́та твоегѡ̀ ѿ тебє̀,

⁴⁵и҆ забѹ́детъ ѩ҆̀же є҆мѹ̀ сотвори́лъ є҆сѝ, и҆ посла́вши приведѹ̀ тѧ̀ ѿтѹ́дѹ, да не когда̀ безча́дна бѹ́дѹ ѿ ѻ҆бои́хъ ва́съ въ де́нь є҆ди́нъ.

⁴⁶Рече́ же реве́кка ко ї҆саа́кѹ: стѹжи́хъ сѝ жи́знїю мое́ю дще́рей ра́ди сынѡ́въ хетте́йскихъ: а҆́ще по́йметъ ї҆а́кѡвъ женѹ̀ ѿ дще́рей землѝ сеѧ̀, то̀ вскѹ́ю мѝ жи́ти;