Read Библия Церковнославянская Бытїѐ 28 Bible Online

Бытїѐ 28 - Библия Церковнославянская bible

Бытїѐ 28

¹Призва́въ же ї҆саа́къ ї҆а́кѡва, бл҃гословѝ є҆го̀ и҆ заповѣ́да є҆мѹ̀, глаго́лѧ: да не по́ймеши жены̀ ѿ дще́рей ханане́йскихъ:

²воста́въ ѿбѣжѝ въ месопота́мїю въ до́мъ ваѳѹи́ла ѻ҆тца̀ ма́тере твоеѧ̀, и҆ поимѝ себѣ̀ ѿтѹ́дѹ женѹ̀ ѿ дще́рей лава́на бра́та ма́тере твоеѧ̀:

³бг҃ъ же мо́й да блгⷭви́тъ тѧ̀ и҆ возрасти́тъ тѧ̀ и҆ ѹ҆мно́житъ тѧ̀, и҆ бѹ́деши въ собра҄нїѧ ѩ҆зы́кѡвъ:

⁴и҆ да да́стъ тебѣ̀ блгⷭве́нїе а҆враа́ма ѻ҆тца̀ моегѡ̀, тебѣ̀ и҆ сѣ́мени твоемѹ̀ по тебѣ̀ наслѣ́дити зе́млю ѡ҆бита́нїѧ твоегѡ̀, ю҆́же дадѐ бг҃ъ а҆враа́мѹ.

⁵Посла́ же ї҆саа́къ ї҆а́кѡва: и҆ ѿи́де въ месопота́мїю къ лава́нѹ сы́нѹ ваѳѹи́ла сѵ́рїна, къ бра́тѹ же реве́кки ма́тере ї҆а́кѡвли и҆ и҆са́ѵли.

⁶Ви́дѣ же и҆са́ѵъ, ѩ҆́кѡ бл҃гословѝ ї҆саа́къ ї҆а́кѡва и҆ посла̀ въ месопота́мїю сѵ́рскѹю поѧ́ти ѿтѹ́дѹ себѣ̀ женѹ̀, є҆гда̀ бл҃гословѝ є҆го̀ и҆ заповѣ́да є҆мѹ̀, глаго́лѧ: да не по́ймеши жены̀ ѿ дще́рей ханане́йскихъ.

⁷И҆ послѹ́ша ї҆а́кѡвъ ѻ҆тца̀ и҆ ма́тере своеѧ̀, и҆ ѿи́де въ месопота́мїю сѵ́рскѹю.

⁸Ви́дѣвъ же и҆са́ѵъ, ѩ҆́кѡ ѕлы҄ сѹ́ть дщє́ри хананє́йскїѧ пред̾ ї҆саа́комъ ѻ҆тце́мъ є҆гѡ̀,

⁹ѿи́де и҆са́ѵъ ко ї҆сма́илѹ и҆ взѧ̀ маеле́ѳѹ дще́рь ї҆сма́ила сы́на а҆враа́млѧ, сестрѹ̀ навеѡ́ѳовѹ, женѹ̀ къ жена́мъ свои҄мъ.

¹⁰И҆ ѿи́де ї҆а́кѡвъ ѿ кла́дѧзѧ клѧ́твеннагѡ и҆ и҆́де въ харра́нъ,

¹¹и҆ ѡ҆брѣ́те мѣ́сто и҆ ѹ҆́спе та́мѡ, за́йде бо со́лнце: и҆ взѧ̀ ѿ ка́менїѧ мѣ́ста (тогѡ̀) и҆ положѝ въ возгла́вїе себѣ̀, и҆ спа̀ на мѣ́стѣ ѻ҆́нѣмъ.

¹²И҆ со́нъ ви́дѣ: и҆ сѐ, лѣ́ствица ѹ҆твержде́на на землѝ, є҆ѧ́же глава̀ досѧза́ше до небесѐ, и҆ а҆́гг҃ли бж҃їи восхожда́хѹ и҆ низхожда́хѹ по не́й:

¹³гдⷭь же ѹ҆твержда́шесѧ на не́й и҆ речѐ: а҆́зъ є҆́смь бг҃ъ а҆враа́ма ѻ҆тца̀ твоегѡ̀ и҆ бг҃ъ ї҆саа́ка, не бо́йсѧ: землѧ̀, и҆дѣ́же ты̀ спи́ши на не́й, тебѣ̀ да́мъ ю҆̀ и҆ сѣ́мени твоемѹ̀:

¹⁴и҆ бѹ́детъ сѣ́мѧ твоѐ ѩ҆́кѡ песо́къ земны́й, и҆ распространи́тсѧ на мо́ре, и҆ лі́вѹ, и҆ сѣ́веръ, и҆ на восто́ки: и҆ благословѧ́тсѧ ѡ҆ тебѣ̀ всѧ҄ колѣ҄на зємна́ѧ и҆ ѡ҆ сѣ́мени твое́мъ:

¹⁵и҆ сѐ, а҆́зъ є҆́смь съ тобо́ю, сохранѧ́ѧй тѧ̀ на всѧ́комъ пѹтѝ, а҆́може а҆́ще по́йдеши, и҆ возвращѹ́ тѧ въ зе́млю сїю̀: ѩ҆́кѡ не и҆́мамъ тебѐ ѡ҆ста́вити, до́ндеже сотвори́ти мѝ всѧ҄, є҆ли҄ка гл҃ахъ тебѣ̀.

¹⁶И҆ воста̀ ї҆а́кѡвъ ѿ сна̀ своегѡ̀ и҆ речѐ: ѩ҆́кѡ є҆́сть гдⷭь на мѣ́стѣ се́мъ, а҆́зъ же не вѣ́дѣхъ.

¹⁷И҆ ѹ҆боѧ́сѧ и҆ речѐ: ѩ҆́кѡ стра́шно мѣ́сто сїѐ: нѣ́сть сїѐ, но до́мъ бж҃їй, и҆ сїѧ҄ врата̀ нбⷭнаѧ.

¹⁸И҆ воста̀ ї҆а́кѡвъ заѹ́тра, и҆ взѧ̀ ка́мень, є҆го́же положѝ та́мѡ въ возгла́вїе себѣ̀: и҆ поста́ви є҆го̀ въ сто́лпъ, и҆ возлїѧ̀ є҆ле́й верхѹ̀ є҆гѡ̀.

¹⁹И҆ прозва̀ ї҆а́кѡвъ и҆́мѧ мѣ́стѹ томѹ̀ [до́мъ бж҃їй]: ѹ҆ламлѹ́зъ же бѣ̀ и҆́мѧ гра́дѹ пе́рвѣе.

²⁰И҆ положѝ ї҆а́кѡвъ ѡ҆бѣ́тъ, глаго́лѧ: а҆́ще бѹ́детъ гдⷭь бг҃ъ со мно́ю и҆ сохрани́тъ мѧ̀ на пѹтѝ се́мъ, въ ѻ҆́ньже а҆́зъ и҆дѹ̀, и҆ да́стъ мѝ хлѣ́бъ ѩ҆́сти, и҆ ри҄зы ѡ҆блещи́сѧ,

²¹и҆ возврати́тъ мѧ̀ здра́ва въ до́мъ ѻ҆тца̀ моегѡ̀, и҆ бѹ́детъ гдⷭь мнѣ̀ въ бг҃а:

²²и҆ ка́мень се́й, є҆го́же поста́вихъ въ сто́лпъ, бѹ́детъ мѝ до́мъ бж҃їй, и҆ ѿ всѣ́хъ, ѩ҆̀же мѝ да́си, десѧти́нѹ ѡ҆десѧ́тствѹю та҄ тебѣ̀.