Read Библия Церковнославянская Бытїѐ 30 Bible Online

Бытїѐ 30 - Библия Церковнославянская bible

Бытїѐ 30

¹Ви́дѣвши же рахи́ль, ѩ҆́кѡ не родѝ ї҆а́кѡвѹ, и҆ поревнова̀ рахи́ль сестрѣ̀ свое́й и҆ речѐ ї҆а́кѡвѹ: да́ждь мѝ ча҄да: а҆́ще же нѝ, ѹ҆мрѹ̀ а҆́зъ.

²Разгнѣ́вавсѧ же ї҆а́кѡвъ на рахи́ль, речѐ є҆́й: є҆да̀ вмѣ́стѡ бг҃а а҆́зъ є҆́смь, и҆́же лиши́ тѧ плода̀ ѹ҆тро́бнагѡ;

³Рече́ же рахи́ль ї҆а́кѡвѹ: сѐ, раба̀ моѧ̀ ва́лла: вни́ди къ не́й, и҆ да роди́тъ на колѣ́нахъ мои́хъ, и҆ ча́до сотворю̀ и҆ а҆́зъ ѿ неѧ̀.

⁴И҆ дадѐ є҆мѹ̀ ва́ллѹ рабѹ̀ свою̀ є҆мѹ̀ въ женѹ̀: и҆ вни́де къ не́й ї҆а́кѡвъ.

⁵И҆ зача̀ ва́лла раба̀ рахи́лина и҆ родѝ ї҆а́кѡвѹ сы́на.

⁶И҆ речѐ рахи́ль: сѹди́ ми бг҃ъ и҆ послѹ́ша гла́са моегѡ̀, и҆ даде́ ми сы́на. Сегѡ̀ ра́ди прозва̀ и҆́мѧ є҆мѹ̀ да́нъ.

⁷И҆ зача́тъ є҆щѐ ва́лла раба̀ рахи́лина и҆ родѝ сы́на втора́го ї҆а́кѡвѹ.

⁸И҆ речѐ рахи́ль: под̾ѧ́ мѧ бг҃ъ, и҆ сравни́хсѧ съ сестро́ю мое́ю, и҆ возмого́хъ. И҆ прозва̀ и҆́мѧ є҆гѡ̀ нефѳалі́мъ.

⁹Ви́дѣ же лі́а, ѩ҆́кѡ преста̀ ражда́ти, и҆ взѧ̀ зе́лфѹ рабѹ̀ свою̀ и҆ дадѐ ю҆̀ ї҆а́кѡвѹ въ женѹ̀: и҆ вни́де къ не́й.

¹⁰И҆ зача́тъ зе́лфа раба̀ лі́ина и҆ родѝ ї҆а́кѡвѹ сы́на.

¹¹И҆ речѐ лі́а: бла́го мнѣ̀ слѹчи́сѧ. И҆ наречѐ и҆́мѧ є҆мѹ̀ га́дъ.

¹²И҆ зача́тъ є҆щѐ зе́лфа раба̀ лі́ина и҆ родѝ ї҆а́кѡвѹ сы́на втора́го.

¹³И҆ речѐ лі́а: блаже́на а҆́зъ, ѩ҆́кѡ ѹ҆блажа́тъ мѧ̀ жєны̀. И҆ прозва̀ и҆́мѧ є҆мѹ̀ а҆си́ръ.

¹⁴И҆́де же рѹви́мъ въ де́нь жа́твы пшени́цы и҆ ѡ҆брѣ́те ѩ҆́блѡка мандраго́рѡва на по́ли, и҆ принесѐ ѧ҆̀ къ лі́и ма́тери свое́й. Рече́ же рахи́ль къ лі́и сестрѣ̀ свое́й: да́ждь мѝ ѿ мандраго́рѡвъ сы́на твоегѡ̀.

¹⁵Рече́ же лі́а: не дово́лно ли тебѣ̀, ѩ҆́кѡ взѧла̀ є҆сѝ мѹ́жа моего̀; є҆да̀ и҆ мандраго́ры сы́на моегѡ̀ во́змеши; Рече́ же рахи́ль: не та́кѡ: да бѹ́детъ сеѧ̀ но́щи съ тобо́ю за мандраго́ры сы́на твоегѡ̀.

¹⁶Прїи́де же ї҆а́кѡвъ съ по́лѧ въ ве́черъ, и҆ и҆зы́де лі́а во срѣ́тенїе є҆мѹ̀ и҆ речѐ: ко мнѣ̀ вни́деши дне́сь: наѧ́ла бо тѧ̀ є҆́смь за мандраго́ры сы́на моегѡ̀. И҆ бы́сть съ не́ю тоѧ̀ но́щи.

¹⁷И҆ послѹ́ша бг҃ъ лі́ю, и҆ заче́нши родѝ ї҆а́кѡвѹ сы́на пѧ́таго.

¹⁸И҆ речѐ лі́а: даде́ ми бг҃ъ мздѹ̀ мою̀, занѐ да́хъ рабѹ̀ мою̀ мѹ́жѹ моемѹ̀. И҆ прозва̀ и҆́мѧ є҆мѹ̀ ї҆ссаха́ръ, є҆́же є҆́сть мзда̀.

¹⁹И҆ зача́тъ є҆щѐ лі́а и҆ родѝ сы́на шеста́го ї҆а́кѡвѹ.

²⁰И҆ речѐ лі́а: дарова́ ми бг҃ъ да́ръ до́бръ въ нн҃ѣшнее вре́мѧ: возлю́битъ мѧ̀ мѹ́жъ мо́й: роди́хъ бо є҆мѹ̀ ше́сть сынѡ́въ. И҆ прозва̀ и҆́мѧ є҆мѹ̀ завѹлѡ́нъ.

²¹И҆ посе́мъ родѝ дще́рь, и҆ прозва̀ и҆́мѧ є҆́й ді́на.

²²Помѧнѹ́ же бг҃ъ рахи́ль, и҆ ѹ҆слы́ша ю҆̀ бг҃ъ, и҆ ѿве́рзе ѹ҆тро́бѹ є҆ѧ̀:

²³и҆ заче́нши, родѝ ї҆а́кѡвѹ сы́на. И҆ речѐ рахи́ль: ѿѧ̀ бг҃ъ ѹ҆кори́знѹ мою̀.

²⁴И҆ наречѐ и҆́мѧ є҆мѹ̀ ї҆ѡ́сифъ, глаго́лющи: да прида́стъ мѝ бг҃ъ сы́на дрѹга́го.

²⁵Бы́сть же ѩ҆́кѡ родѝ рахи́ль ї҆ѡ́сифа, речѐ ї҆а́кѡвъ лава́нѹ: ѿпѹсти́ мѧ, да и҆дѹ̀ на мѣ́сто моѐ и҆ въ зе́млю мою̀:

²⁶ѿда́ждь мѝ жєны̀ моѧ҄ и҆ дѣ́ти моѧ҄, и҆́хже ра́ди рабо́тахъ тебѣ̀, да ѿидѹ̀: ты́ бо вѣ́си рабо́тѹ, ю҆́же рабо́тахъ тѝ.

²⁷Рече́ же є҆мѹ̀ лава́нъ: а҆́ще ѡ҆брѣто́хъ благода́ть пред̾ тобо́ю: ѹ҆смотри́хъ бо, ѩ҆́кѡ блгⷭви́ мѧ бг҃ъ прише́ствїемъ твои́мъ:

²⁸раздѣлѝ мздѹ̀ свою̀ ѹ҆ менє̀, и҆ да́мъ тѝ.

²⁹Рече́ же ї҆а́кѡвъ: ты̀ вѣ́си, ѩ҆̀же рабо́тахъ тебѣ̀, и҆ коли́кѡ бѣ̀ скота̀ твоегѡ̀ ѹ҆ менє̀:

³⁰ма́лѡ бо бѣ̀ є҆ли́кѡ твоегѡ̀ ѹ҆ менє̀ и҆ возрастѐ во мно́жество: и҆ блгⷭви́ тѧ гдⷭь прише́ствїемъ мои́мъ: нн҃ѣ ѹ҆̀бо когда̀ сотворю̀ и҆ а҆́зъ себѣ̀ до́мъ;

³¹И҆ речѐ къ немѹ̀ лава́нъ: что́ ти да́мъ; Рече́ же є҆мѹ̀ ї҆а́кѡвъ: не да́си мѝ ничто́же: а҆́ще сотвори́ши мѝ глаго́лъ се́й, па́ки пастѝ и҆́мамъ ѻ҆́вцы твоѧ҄, и҆ сохраню̀:

³²ѡ҆б̾идѝ всѧ҄ ѻ҆́вцы твоѧ҄ нн҃ѣ и҆ разлѹчѝ ѿтѹ́дѹ всѧ́кѹю ѻ҆́вцѹ пеле́сѹю во ѻ҆вца́хъ, и҆ всѧ́кѹ бѣлова́тѹю и҆ пе́стрѹю въ коза́хъ, бѹ́детъ мѝ мзда̀ (и҆ бѹ́детъ моѐ):

³³и҆ послѹ́шаетъ менѐ пра́вда моѧ̀ во ѹ҆́трешнїй де́нь, ѩ҆́кѡ є҆́сть мзда̀ моѧ̀ пред̾ тобо́ю: всѐ є҆́же а҆́ще не бѹ́детъ пестро̀ и҆ бѣлова́тое въ коза́хъ, и҆ пеле́со во ѻ҆вца́хъ, за ѹ҆кра́деное бѹ́детъ мно́ю.

³⁴Рече́ же є҆мѹ̀ лава́нъ: бѹ́ди по словесѝ твоемѹ̀.

³⁵И҆ разлѹчѝ въ то́й де́нь козлы̀ пє́стрыѧ и҆ бѣлова҄тыѧ, и҆ всѧ҄ ко́зы пє́стрыѧ и҆ бѣлѡва́тыѧ, и҆ всѐ є҆́же бѣ̀ пеле́со во ѻ҆вца́хъ, и҆ всѐ є҆́же бѧ́ше бѣ́лое въ ни́хъ: и҆ дадѐ въ рѹ́цѣ сынѡ́мъ свои҄мъ:

³⁶и҆ разста́ви пѹте́мъ тре́хъ дні́й, и҆ междѹ̀ и҆́ми и҆ междѹ̀ ї҆а́кѡвомъ: ї҆а́кѡвъ же пасѧ́ше ѻ҆́вцы лава́нѡвы ѡ҆ста́вшыѧсѧ.

³⁷Взѧ́ же ї҆а́кѡвъ себѣ̀ же́злъ стѷракі́новъ зеле́ный, и҆ ѻ҆рѣ́ховъ, и҆ ѩ҆́воровый: и҆ ѡ҆строга̀ ѧ҆̀ ї҆а́кѡвъ пестре́нїемъ бѣ́лымъ, сострога́ѧ корѹ̀: ѩ҆влѧ́шесѧ же на жезла́хъ бѣ́лое, є҆́же ѡ҆строга̀, пестро̀.

³⁸И҆ положѝ жезлы̀, ѩ҆̀же ѡ҆строга̀, въ пои́лныхъ коры́тѣхъ воды̀: да є҆гда̀ прїи́дѹтъ ѻ҆́вцы пи́ти, пред̾ жезлы҄ прише́дшымъ и҆̀мъ пи́ти, зачнѹ́тъ ѻ҆́вцы по жезлѡ́мъ:

³⁹и҆ зачина́хѹ ѻ҆́вцы по жезлѡ́мъ, и҆ ражда́хѹ ѻ҆́вцы бѣлѡва́тыѧ и҆ пє́стрыѧ и҆ пепелови҄дныѧ пє́стрыѧ.

⁴⁰А҆́гницы же разлѹчѝ ї҆а́кѡвъ и҆ поста́ви прѧ́мѡ ѻ҆вца́мъ ѻ҆вна̀ бѣлова́таго, и҆ всѧ́кое пе́строе во а҆́гнцахъ: и҆ разлѹчѝ себѣ̀ стада̀ по себѣ̀, и҆ не смѣсѝ си́хъ со ѻ҆вца́ми лава́новыми.

⁴¹Бы́сть же во вре́мѧ, въ не́же зачина́хѹ ѻ҆́вцы во чре́вѣ прїе́млющѧ, положѝ ї҆а́кѡвъ жезлы̀ пред̾ ѻ҆вца́ми въ коры́тѣхъ, є҆́же зачина́ти и҆̀мъ по жезлѡ́мъ:

⁴²є҆гда́ же ражда́хѹ ѻ҆́вцы, не полага́ше: бы́ша же неназнамена҄ныѧ лава́нѡвы, а҆ знамена҄ныѧ ї҆а҄кѡвли.

⁴³И҆ разбогатѣ̀ человѣ́къ ѕѣлѡ̀ ѕѣлѡ̀: и҆ бы́ша є҆мѹ̀ ско́ти мно́зи, и҆ воло́ве, и҆ рабѝ, и҆ рабы҄ни, и҆ велблю́ды, и҆ ѻ҆слы̀.