Read Библия Церковнославянская Бытїѐ 32 Bible Online

Бытїѐ 32 - Библия Церковнославянская bible

Бытїѐ 32

¹И҆ ї҆а́кѡвъ и҆́де въ пѹ́ть сво́й. И҆ воззрѣ́въ ви́дѣ по́лкъ бж҃їй воѡполчи́вшїйсѧ: и҆ срѣто́ша є҆го̀ а҆́гг҃ли бж҃їи.

²Рече́ же ї҆а́кѡвъ, є҆гда̀ ви́дѣ и҆̀хъ: по́лкъ бж҃їй се́й. И҆ прозва̀ и҆́мѧ мѣ́стѹ томѹ̀ [полкѝ].

³Посла́ же ї҆а́кѡвъ послы̀ пред̾ собо́ю ко и҆са́ѵѹ бра́тѹ своемѹ̀ въ зе́млю сиі́ръ, въ странѹ̀ є҆дѡ́мъ,

⁴и҆ заповѣ́да и҆̀мъ глаго́лѧ: та́кѡ рцы́те господи́нѹ моемѹ̀ и҆са́ѵѹ: та́кѡ глаго́летъ ра́бъ тво́й ї҆а́кѡвъ: ѹ҆ лава́на ѡ҆бита́хъ и҆ ѹ҆ме́длихъ да́же до нн҃ѣ:

⁵и҆ бы́ша мѝ воло́ве и҆ ѻ҆слы̀ и҆ ѻ҆́вцы, и҆ рабѝ и҆ рабы҄ни: и҆ посла́хъ повѣ́дати господи́нѹ моемѹ̀ и҆са́ѵѹ, дабы̀ ѡ҆брѣ́лъ ра́бъ тво́й благода́ть пред̾ тобо́ю.

⁶И҆ возврати́шасѧ послы̀ ко ї҆а́кѡвѹ, глаго́люще: ходи́хомъ ко бра́тѹ твоемѹ̀ и҆са́ѵѹ, и҆ сѐ, са́мъ и҆́детъ во срѣ́тенїе тебѣ̀, и҆ четы́риста мѹже́й съ ни́мъ.

⁷Ѹ҆боѧ́сѧ же ї҆а́кѡвъ ѕѣлѡ̀ и҆ въ недоѹмѣ́нїи бѣ̀: и҆ раздѣлѝ лю́ди сѹ́щыѧ съ собо́ю, и҆ волы̀ и҆ велблю́ды и҆ ѻ҆́вцы на два̀ полка҄,

⁸и҆ речѐ ї҆а́кѡвъ: а҆́ще прїи́детъ и҆са́ѵъ на є҆ди́нъ по́лкъ и҆ и҆зсѣче́тъ и҆̀, бѹ́детъ вторы́й по́лкъ во спасе́нїи.

⁹Рече́ же ї҆а́кѡвъ: бг҃ъ ѻ҆тца̀ моегѡ̀ а҆враа́ма и҆ бг҃ъ ѻ҆тца̀ моегѡ̀ ї҆саа́ка, гдⷭи бж҃е, ты̀ рекі́й мѝ: и҆дѝ въ зе́млю рожде́нїѧ твоегѡ̀, и҆ бла́го тебѣ̀ сотворю̀:

¹⁰довлѣ́етъ мѝ ѿ всеѧ̀ пра́вды и҆ ѿ всеѧ̀ и҆́стины, ю҆́же сотвори́лъ є҆сѝ рабѹ̀ твоемѹ̀: съ жезло́мъ бо си́мъ преидо́хъ ї҆ѻрда́нъ се́й, нн҃ѣ же бѣ́хъ въ два̀ полка҄:

¹¹и҆зми́ мѧ ѿ рѹкѝ бра́та моегѡ̀, ѿ рѹкѝ и҆са́ѵа: ѩ҆́кѡ бою́сѧ а҆́зъ є҆гѡ̀, да не когда̀ прише́дъ ѹ҆бїе́тъ мѧ̀ и҆ ма́терь съ ча́ды:

¹²ты́ же ре́клъ є҆сѝ: бла́го тебѣ̀ сотворю̀ и҆ положѹ̀ сѣ́мѧ твоѐ ѩ҆́кѡ песо́къ морскі́й, и҆́же не и҆зочте́тсѧ ѿ мно́жества.

¹³И҆ спа̀ та́мѡ но́щи тоѧ̀, и҆ взѧ̀, ѩ҆̀же и҆мѧ́ше да́ры, и҆ посла̀ и҆са́ѵѹ бра́тѹ своемѹ̀:

¹⁴ко́зъ двѣ́сти, козлѡ́въ два́десѧть, ѻ҆ве́цъ двѣ́сти, ѻ҆внѡ́въ два́десѧть,

¹⁵велблю́дѡвъ дойны́хъ, и҆ жребѧ́тъ и҆́хъ три́десѧть, волѡ́въ четы́редесѧть, ю҆нцѡ́въ де́сѧть, ѻ҆слѡ́въ два́десѧть и҆ жребѧ́тъ де́сѧть:

¹⁶и҆ дадѐ и҆̀хъ рабѡ́мъ свои҄мъ, (ко́еждо) ста́до ѻ҆со́бѡ, и҆ речѐ рабѡ́мъ свои҄мъ: и҆ди́те предо мно́ю, и҆ разстоѧ́нїе твори́те междѹ̀ ста́домъ и҆ ста́домъ.

¹⁷И҆ заповѣ́да пе́рвомѹ глаго́лѧ: а҆́ще тѧ̀ срѧ́щетъ и҆са́ѵъ бра́тъ мо́й и҆ вопро́ситъ тѧ̀ глаго́лѧ: чі́й є҆сѝ, и҆ ка́мѡ и҆́деши, и҆ чїѧ҄ сїѧ҄, ѩ҆̀же пред̾ тобо́ю и҆́дѹтъ;

¹⁸рече́ши: раба̀ твоегѡ̀ ї҆а́кѡва: да́ры посла̀ господи́нѹ моемѹ̀ и҆са́ѵѹ: и҆ сѐ, са́мъ за на́ми (и҆́детъ).

¹⁹И҆ заповѣ́да пе́рвомѹ, и҆ второ́мѹ, и҆ тре́тїемѹ, и҆ всѣ҄мъ пред̾идѹ́щымъ в̾слѣ́дъ ста́дъ си́хъ глаго́лѧ: по словесѝ семѹ̀ глаго́лите и҆са́ѵѹ, є҆гда̀ ѡ҆брѧ́щете є҆го̀ вы̀,

²⁰и҆ рцы́те: сѐ, ра́бъ тво́й ї҆а́кѡвъ и҆́детъ за на́ми: рече́ бо: ѹ҆крощѹ̀ лицѐ є҆гѡ̀ дара́ми пред̾идѹ́щими є҆го̀, и҆ посе́мъ ѹ҆зрю̀ лицѐ є҆гѡ̀: не́гли бо прїи́метъ лицѐ моѐ;

²¹И҆ пред̾идѧ́хѹ да́ры пред̾ лице́мъ є҆гѡ̀, са́мъ же преспа̀ тоѧ̀ но́щи въ полцѣ̀.

²²Воста́въ же тоѧ̀ но́щи, поѧ̀ ѻ҆́бѣ жєны̀ (своѧ҄) и҆ ѻ҆́бѣ рабы҄ни и҆ є҆динона́десѧть сынѡ́въ свои́хъ, и҆ пре́йде бро́дъ ї҆авѡ́къ:

²³и҆ взѧ̀ и҆̀хъ, и҆ пре́йде пото́къ, и҆ преведѐ всѧ҄ своѧ҄.

²⁴Ѡ҆ста́сѧ же ї҆а́кѡвъ є҆ди́нъ. И҆ борѧ́шесѧ съ ни́мъ чл҃вѣ́къ да́же до ѹ҆́тра.

²⁵Ви́дѣ же, ѩ҆́кѡ не мо́жетъ проти́вѹ є҆мѹ̀: и҆ прикоснѹ́сѧ широтѣ̀ стегна̀ є҆гѡ̀: и҆ ѡ҆терпѐ широта̀ стегна̀ ї҆а́кѡвлѧ, є҆гда̀ борѧ́шесѧ съ ни́мъ.

²⁶И҆ речѐ є҆мѹ̀: пѹсти́ мѧ: взы́де бо зарѧ̀. Ѻ҆́нъ же речѐ: не пѹщѹ̀ тебѐ, а҆́ще не блгⷭви́ши менѐ.

²⁷Рече́ же є҆мѹ̀: что́ ти и҆́мѧ є҆́сть; Ѻ҆́нъ же речѐ: ї҆а́кѡвъ.

²⁸И҆ речѐ є҆мѹ̀: не прозове́тсѧ ктомѹ̀ и҆́мѧ твоѐ ї҆а́кѡвъ, но [ї҆сра́иль] бѹ́детъ и҆́мѧ твоѐ: поне́же ѹ҆крѣпи́лсѧ є҆сѝ съ бг҃омъ и҆ съ человѣ҄ки си́ленъ бѹ́деши.

²⁹Вопроси́ же ї҆а́кѡвъ и҆ речѐ: повѣ́ждь мѝ и҆́мѧ твоѐ. И҆ речѐ: вскѹ́ю сїѐ вопроша́еши ты̀ и҆́мене моегѡ̀; є҆́же чѹ́дно є҆́сть. И҆ блгⷭвѝ є҆го̀ та́мѡ.

³⁰И҆ прозва̀ ї҆а́кѡвъ и҆́мѧ мѣ́стѹ томѹ̀ [ви́дъ бж҃їй]: ви́дѣхъ бо бг҃а лице́мъ къ лицѹ̀, и҆ сп҃се́сѧ дѹша̀ моѧ̀.

³¹Возсїѧ́ же є҆мѹ̀ со́лнце, є҆гда̀ пре́йде [ви́дъ бж҃їй]: ѻ҆́нъ же хрома́ше стегно́мъ свои́мъ.

³²Сегѡ̀ ра́ди не ѩ҆дѧ́тъ сы́нове ї҆и҃лєвы жи́лы, ѩ҆́же ѡ҆терпѐ, ѩ҆́же є҆́сть въ широтѣ̀ стегна̀, да́же до днѐ сегѡ̀: поне́же прикоснѹ́сѧ широтѣ̀ стегна̀ ї҆а́кѡвли жи́лы, ѩ҆́же ѡ҆терпѐ.