Read Библия Церковнославянская Бытїѐ 35 Bible Online

Бытїѐ 35 - Библия Церковнославянская bible

Бытїѐ 35

¹Рече́ же бг҃ъ ко ї҆а́кѡвѹ: воста́въ взы́ди на мѣ́сто веѳи́ль, и҆ живѝ та́мѡ, и҆ сотворѝ та́мѡ же́ртвенникъ бг҃ѹ ѩ҆́вльшемѹсѧ тебѣ̀, є҆гда̀ бѣжа́лъ є҆сѝ ѿ лица̀ и҆са́ѵа бра́та твоегѡ̀.

²Рече́ же ї҆а́кѡвъ до́мѹ своемѹ̀ и҆ всѣ҄мъ и҆̀же съ ни́мъ: пове́рзите бо́ги чѹжды҄ѧ, и҆̀же съ ва́ми, ѿ среды̀ ва́съ и҆ ѡ҆чи́ститесѧ, и҆ и҆змѣни́те ри҄зы своѧ҄:

³и҆ воста́вше взы́демъ въ веѳи́ль и҆ сотвори́мъ та́мѡ же́ртвенникъ бг҃ѹ послѹ́шавшемѹ менѐ въ де́нь скорбѣ́нїѧ, и҆́же бѣ̀ со мно́ю и҆ сп҃се́ мѧ на пѹтѝ, въ ѻ҆́ньже ходи́хъ.

⁴И҆ вда́ша ї҆а́кѡвѹ бо́ги чѹжды҄ѧ, и҆̀же бѧ́хѹ въ рѹка́хъ и҆́хъ, и҆ ѹ҆серѧ҄зи ѩ҆̀же во ѹ҆шесѣ́хъ и҆́хъ: и҆ скры̀ ѧ҆̀ ї҆а́кѡвъ под̾ тереві́нѳомъ и҆́же въ сїкі́мѣхъ: и҆ погѹбѝ ѧ҆̀ до дне́шнѧгѡ днѐ.

⁵И҆ воздви́жесѧ ї҆и҃ль ѿ сїкі́мѡвъ, и҆ бы́сть стра́хъ бж҃їй на градѣ́хъ, и҆̀же ѡ҆́крестъ и҆́хъ: и҆ не гна́ша в̾слѣ́дъ сынѡ́въ ї҆и҃левыхъ.

⁶Прїи́де же ї҆а́кѡвъ въ лѹ́зѹ, ѩ҆́же є҆́сть въ землѝ ханаа́нстѣй, ѩ҆́же є҆́сть веѳи́ль, са́мъ и҆ всѝ лю́дїе, и҆̀же бѧ́хѹ съ ни́мъ,

⁷и҆ созда̀ та́мѡ же́ртвенникъ, и҆ прозва̀ и҆́мѧ мѣ́стѹ томѹ̀ веѳи́ль: та́мѡ бо ѩ҆ви́сѧ є҆мѹ̀ бг҃ъ, є҆гда̀ бѣжа́ше ѻ҆́нъ ѿ лица̀ и҆са́ѵа бра́та своегѡ̀.

⁸Ѹ҆́мре же девѡ́ра, дои́лица реве́ккина, и҆ погребо́ша ю҆̀ ни́же веѳи́лѧ под̾ дѹ́бомъ, и҆ прозва̀ и҆́мѧ є҆мѹ̀ [дѹ́бъ пла́ча].

⁹ѩ҆ви́сѧ же бг҃ъ ї҆а́кѡвѹ є҆щѐ въ лѹ́зѣ, є҆гда̀ прїи́де ѿ месопота́мїи сѵ́рскїѧ, и҆ блгⷭвѝ є҆го̀ бг҃ъ

¹⁰и҆ речѐ є҆мѹ̀ бг҃ъ: и҆́мѧ твоѐ не прозове́тсѧ ктомѹ̀ ї҆а́кѡвъ, но ї҆и҃ль бѹ́детъ и҆́мѧ тебѣ̀. И҆ наречѐ и҆́мѧ є҆мѹ̀ ї҆и҃ль.

¹¹Рече́ же є҆мѹ̀ бг҃ъ: а҆́зъ бг҃ъ тво́й: растѝ и҆ мно́жисѧ: ѩ҆зы́цы и҆ собра҄нїѧ ѩ҆зы́кѡвъ бѹ́дѹтъ ѿ тебє̀, и҆ ца́рїе и҆з̾ чре́слъ твои́хъ и҆зы́дѹтъ:

¹²и҆ зе́млю, ю҆́же да́хъ а҆враа́мѹ и҆ ї҆саа́кѹ, тебѣ̀ да́хъ ю҆̀, тебѣ̀ бѹ́детъ, и҆ сѣ́мени твоемѹ̀ по тебѣ̀ да́мъ зе́млю сїю̀.

¹³Взы́де же бг҃ъ ѿ негѡ̀ ѿ мѣ́ста, и҆дѣ́же гл҃а съ ни́мъ:

¹⁴и҆ поста́ви ї҆а́кѡвъ сто́лпъ на мѣ́стѣ, и҆дѣ́же гл҃а съ ни́мъ бг҃ъ, сто́лпъ ка́менный, и҆ пожрѐ на не́мъ же́ртвѹ и҆ возлїѧ̀ на него̀ є҆ле́й:

¹⁵и҆ прозва̀ ї҆а́кѡвъ и҆́мѧ мѣ́стѹ томѹ̀, и҆дѣ́же гл҃а съ ни́мъ бг҃ъ, веѳи́ль.

¹⁶(*Воста́въ же (*ї҆а́кѡвъ) ѿ веѳи́лѧ, и҆ поста́ви кѹ́щѹ свою̀ да́лѣе столпа̀ гаде́ръ.) Бы́сть же є҆гда̀ прибли́жисѧ къ хавра́ѳѣ прїитѝ до землѝ є҆фра́ѳа, родѝ рахи́ль и҆ возбѣ́дствова въ рожде́нїи:

¹⁷бы́сть же внегда̀ же́стокѡ є҆́й роди́ти, речѐ є҆́й ба́ба: дерза́й, и҆́бо се́й тебѣ̀ є҆́сть сы́нъ.

¹⁸Бы́сть же є҆гда̀ ѡ҆ставлѧ́ше ю҆̀ дѹша̀, ѹ҆мира́ше бо, прозва̀ и҆́мѧ є҆мѹ̀ [сы́нъ болѣ́зни моеѧ̀]: ѻ҆те́цъ же прозва̀ и҆́мѧ є҆мѹ̀ венїамі́нъ.

¹⁹Ѹ҆́мре же рахи́ль, и҆ погребо́ша ю҆̀ на пѹтѝ ї҆пподро́ма є҆фра́ѳы: сїѧ̀ є҆́сть виѳлее́мъ:

²⁰и҆ поста́ви ї҆а́кѡвъ сто́лпъ на гро́бѣ є҆ѧ̀: се́й є҆́сть сто́лпъ над̾ гро́бомъ рахи́линымъ да́же до днѐ сегѡ̀.

²¹И҆зы́де же ѿтѹ́дѹ ї҆и҃ль и҆ поста́ви кѹ́щѹ свою̀ за столпо́мъ гаде́ръ.

²²Бы́сть же є҆гда̀ всели́сѧ ї҆и҃ль въ землѝ то́й, и҆́де рѹви́мъ и҆ спа̀ съ ва́ллою, нало́жницею ѻ҆тца̀ своегѡ̀ ї҆а́кѡва. И҆ слы́ша ї҆и҃ль, и҆ ѕло̀ ѩ҆ви́сѧ пред̾ ни́мъ. Бѣ́ша же сы́нове ї҆а҄кѡвли двана́десѧть.

²³Сы́нове лї҄ины: рѹви́мъ, пе́рвенецъ ї҆а́кѡвль, сѷмеѡ́нъ, леѵі́й, ї҆ѹ́да, ї҆ссаха́ръ, завѹлѡ́нъ.

²⁴Сы́нове же рахи҄лины: ї҆ѡ́сифъ и҆ венїамі́нъ.

²⁵Сы́нове же ва́ллы, рабы̀ рахи́лины: да́нъ и҆ нефѳалі́мъ.

²⁶Сы́нове же зе́лфы, рабы̀ лі́ины: га́дъ и҆ а҆си́ръ. Сі́и сы́нове ї҆а҄кѡвли, и҆̀же роди́шасѧ є҆мѹ̀ въ месопота́мїи сѵ́рстѣй.

²⁷Прїи́де же ї҆а́кѡвъ ко ї҆саа́кѹ ѻ҆тцѹ̀ своемѹ̀ (є҆щѐ жи́вѹ сѹ́щѹ є҆мѹ̀) въ мамврі́ю, во гра́дъ по́льный: се́й є҆́сть хеврѡ́нъ въ землѝ ханаа́нстѣй, и҆дѣ́же ѡ҆бита̀ а҆враа́мъ и҆ ї҆саа́къ.

²⁸Бы́ша же дні́е ї҆саа́кѡвы, ѩ҆̀же поживѐ, сто̀ ѻ҆́смьдесѧтъ лѣ́тъ:

²⁹и҆ ѡ҆слабѣ́въ ї҆саа́къ ѹ҆́мре, и҆ приложи́сѧ къ ро́дѹ своемѹ̀ ста́ръ и҆спо́лнь дні́й: и҆ погребо́ста є҆го̀ и҆са́ѵъ и҆ ї҆а́кѡвъ, сы́нове є҆гѡ̀.