Read Библия Церковнославянская Бытїѐ 41 Bible Online

Бытїѐ 41 - Библия Церковнославянская bible

Бытїѐ 41

¹Бы́сть же по двою̀ лѣ҄тѹ дні́й, фараѡ́нъ ви́дѣ со́нъ: мнѧ́шесѧ стоѧ́ти при рѣцѣ̀:

²и҆ сѐ, а҆́ки и҆з̾ рѣкѝ и҆схожда́хѹ се́дмь кра́въ дѡбры̀ ви́домъ и҆ и҆збра҄нны тѣлесы̀, и҆ пасѧ́хѹсѧ по бре́гѹ:

³дрѹгї҄ѧ же се́дмь кра́въ и҆зыдо́ша по си́хъ и҆з̾ рѣкѝ, ѕлы҄ ви́домъ и҆ тѣлесы̀ хѹ҄ды, и҆ пасѧ́хѹсѧ съ кра́вами по бре́гѹ рѣ́чномѹ:

⁴и҆ поѧдо́ша се́дмь кра҄вы ѕлы҄ѧ и҆ хѹды҄ѧ тѣлесы̀ се́дмь кра́въ до́брыхъ ви́домъ и҆ и҆збра́нныхъ тѣлесы̀: (и҆ сїѧ҄ неви҄димы бы́ша, ѩ҆́кѡ внидо́ша въ чре́сла и҆́хъ). Воста́ же фараѡ́нъ.

⁵И҆ ви́дѣ со́нъ вторы́й: и҆ сѐ, се́дмь кла́си и҆схожда́хѹ и҆з̾ сте́блїѧ є҆ди́нагѡ и҆збра҄нны и҆ добры҄:

⁶дрѹзі́и же се́дмь кла́си то́нцыи, и҆стонче́ни вѣ́тромъ, и҆зраста́хѹ по ни́хъ:

⁷и҆ пожро́ша се́дмь кла́си то́нцыи и҆ и҆стонче́ни вѣ́тромъ се́дмь кла́сѡвъ и҆збра́нныхъ и҆ по́лныхъ. Воста́ же фараѡ́нъ, и҆ бѧ́ше со́нъ.

⁸Бы́сть же заѹ́тра, и҆ возмѹти́сѧ дѹша̀ є҆гѡ̀: и҆ посла́въ, созва̀ всѧ҄ сказа́тєли є҆гѵ́пєтскїѧ и҆ всѧ҄ мѹ҄дрыѧ є҆гѡ̀: и҆ повѣ́да и҆̀мъ фараѡ́нъ со́нъ сво́й: и҆ не бѧ́ше сказѹ́ѧй тогѡ̀ фараѡ́нѹ.

⁹И҆ речѐ старѣ́йшина вїна́рскъ къ фараѡ́нѹ, глаго́лѧ: грѣ́хъ мо́й воспомина́ю дне́сь:

¹⁰фараѡ́нъ разгнѣ́васѧ на рабы҄ своѧ҄ и҆ вве́рже на́съ въ темни́цѹ въ домѹ̀ а҆рхїмагі́ра, менѐ и҆ старѣ́йшинѹ жита́рска:

¹¹и҆ ви́дѣхомъ со́нъ ѻ҆́ба є҆ди́ныѧ но́щи а҆́зъ и҆ ѻ҆́нъ, кі́йждо сво́й со́нъ ви́дѣхомъ:

¹²бѧ́ше же та́мѡ съ на́ми ю҆́ноша, ѻ҆́трокъ є҆вре́инъ а҆рхїмагі́ровъ, и҆ повѣ́дахомъ є҆мѹ̀, и҆ разсѹдѝ на́мъ:

¹³бы́сть же, ѩ҆́коже сказа̀ на́мъ, та́кѡ и҆ слѹчи́сѧ, мнѣ̀ па́ки бы́ти во свое́мъ старѣ́йшинствѣ, а҆ ѻ҆́номѹ повѣ́шенѹ.

¹⁴Посла́въ же фараѡ́нъ, призва̀ ї҆ѡ́сифа: и҆ и҆зведо́ша є҆го̀ и҆з̾ тверды́ни, и҆ ѡ҆стриго́ша є҆го̀, и҆ и҆змѣни́ша ри҄зы є҆мѹ̀, и҆ прїи́де къ фараѡ́нѹ.

¹⁵Рече́ же фараѡ́нъ ї҆ѡ́сифѹ: со́нъ ви́дѣхъ, и҆ сказѹ́ѧй є҆го̀ нѣ́сть: а҆́зъ же слы́шахъ ѡ҆ тебѣ̀ глаго́лющихъ, ѩ҆́кѡ слы́шавъ сны̀ разсѹжда́еши ты҄ѧ.

¹⁶Ѿвѣща́въ же ї҆ѡ́сифъ фараѡ́нѹ, речѐ: без̾ бг҃а не ѿвѣща́етсѧ спⷭнїе фараѡ́нѹ.

¹⁷Рече́ же фараѡ́нъ ї҆ѡ́сифѹ, глаго́лѧ: во снѣ̀ мое́мъ мнѧ́хсѧ стоѧ́ти на бре́зѣ рѣ́чнѣмъ:

¹⁸и҆ а҆́ки и҆з̾ рѣкѝ и҆схожда́хѹ се́дмь кра҄вы дѡбры̀ ви́домъ и҆ и҆збра҄нны тѣлесы̀, и҆ пасѧ́хѹсѧ по бре́гѹ:

¹⁹и҆ сѐ, дрѹгї҄ѧ се́дмь кра́въ и҆схожда́хѹ в̾слѣ́дъ и҆́хъ и҆з̾ рѣкѝ, ѕлы҄ и҆ недѡбры̀ ви́домъ и҆ хѹ҄ды тѣлесы̀, ѩ҆ковы́хъ не ви́дѣ таковы́хъ во все́й землѝ є҆гѵ́петстѣй хѹ́ждшихъ:

²⁰и҆ и҆з̾ѧдо́ша се́дмь кра҄вы ѕлы҄ѧ и҆ хѹды҄ѧ се́дмь кра́въ пе́рвыхъ до́брыхъ и҆ и҆збра́нныхъ:

²¹и҆ внидо́ша во ѹ҆трѡ́бы и҆́хъ, и҆ не ѩ҆ви́шасѧ, ѩ҆́кѡ внидо́ша во ѹ҆трѡ́бы и҆́хъ: и҆ ѡ҆бли҄чїѧ и҆́хъ ѕла҄ бы́ша, ѩ҆́кѡ и҆ и҆спе́рва. Воста́въ же, (па́ки) ѹ҆снѹ́хъ,

²²и҆ ви́дѣхъ па́ки во снѣ̀ мое́мъ, и҆ а҆́ки се́дмь кла́си и҆схожда́хѹ и҆з̾ є҆ди́нагѡ сте́блїѧ пѡ́лны и҆ добры҄:

²³дрѹзі́и же се́дмь кла́си то́нцыи и҆ вѣ́тромъ и҆стонче́ни и҆зница́хѹ в̾слѣ́дъ и҆́хъ:

²⁴и҆ пожро́ша се́дмь кла́си то́нцыи и҆ вѣ́тромъ и҆стонче́ни се́дмь кла́сѡвъ до́брыхъ и҆ по́лныхъ. Рѣ́хъ ѹ҆́бѡ сказа́телємъ, и҆ не бы́сть повѣ́даѧй мнѣ̀ тогѡ̀.

²⁵И҆ речѐ ї҆ѡ́сифъ фараѡ́нѹ: со́нъ фараѡ́новъ є҆ди́нъ є҆́сть: є҆ли҄ка бг҃ъ твори́тъ, показа̀ фараѡ́нѹ:

²⁶се́дмь кра҄вы дѡ́брыѧ се́дмь лѣ́тъ сѹ́ть: и҆ се́дмь кла́си до́брїи се́дмь лѣ́тъ сѹ́ть: со́нъ фараѡ́новъ є҆ди́нъ є҆́сть:

²⁷и҆ се́дмь кра҄вы хѹды҄ѧ, ѩ҆̀же и҆зыдо́ша по си́хъ, се́дмь лѣ́тъ сѹ́ть, и҆ се́дмь кла́си то́нцыи и҆ и҆стонче́ни вѣ́тромъ се́дмь лѣ́тъ сѹ́ть: бѹ́дѹтъ се́дмь лѣ́тъ гла́да:

²⁸сло́во же є҆́же рѣ́хъ фараѡ́нѹ, є҆ли҄ка бг҃ъ твори́тъ, показа̀ фараѡ́нѹ:

²⁹сѐ, се́дмь лѣ́тъ прихо́дитъ, ѻ҆би́лность мно́га во все́й землѝ є҆гѵ́петстѣй:

³⁰прїи́дѹтъ же се́дмь лѣ́тъ гла́да по си́хъ, и҆ забѹ́дѹтъ сы́тости бѹ́дѹщїѧ во все́мъ є҆гѵ́птѣ, и҆ погѹби́тъ гла́дъ зе́млю,

³¹и҆ не позна́етсѧ ѻ҆би́лїе на землѝ ѿ гла́да бѹ́дѹщагѡ по си́хъ: си́ленъ бо бѹ́детъ ѕѣлѡ̀:

³²повтори́сѧ же со́нъ фараѡ́нѹ два́жды, ѩ҆́кѡ и҆́стинно бѹ́детъ сло́во є҆́же ѿ бг҃а, и҆ ѹ҆скори́тъ бг҃ъ сотвори́ти ѻ҆́но:

³³нн҃ѣ ѹ҆̀бо ѹ҆смотрѝ человѣ́ка мѹ́дра и҆ смы́слена и҆ поста́ви є҆го̀ над̾ земле́ю є҆гѵ́петскою:

³⁴и҆ да сотвори́тъ фараѡ́нъ и҆ поста́витъ мѣстонача́лники по землѝ, и҆ да собира́ютъ пѧ́тѹю ча́сть ѿ всѣ́хъ плодѡ́въ землѝ є҆гѵ́петскїѧ седмѝ лѣ́тъ ѻ҆би́лныхъ,

³⁵и҆ да соберѹ́тъ всѧ́кѹю пи́щѹ седмѝ лѣ́тъ грѧдѹ́щихъ до́брыхъ си́хъ: и҆ да собере́тсѧ пшени́ца под̾ рѹ́кѹ фараѡ́ню, пи́ща во градѣ́хъ да храни́тсѧ:

³⁶и҆ бѹ́детъ пи́ща соблюде́на землѝ на се́дмь лѣ́тъ гла́дныхъ, ѩ҆̀же и҆́мѹтъ бы́ти въ землѝ є҆гѵ́петстѣй, да не потреби́тсѧ землѧ̀ въ гла́дѣ.

³⁷Ѹ҆го́дно же бы́сть сло́во пред̾ фараѡ́номъ и҆ пред̾ всѣ́ми рабы҄ є҆гѡ̀.

³⁸И҆ речѐ фараѡ́нъ всѣ҄мъ рабѡ́мъ свои҄мъ: є҆да̀ ѡ҆брѧ́щемъ человѣ́ка сицева́го, и҆́же и҆́мать дх҃а бж҃їѧ въ себѣ̀;

³⁹Рече́ же фараѡ́нъ ї҆ѡ́сифѹ: поне́же показа̀ бг҃ъ тебѣ̀ всѧ҄ сїѧ҄, нѣ́сть человѣ́ка мѹдрѣ́йша и҆ смы́сленнѣйша па́че тебє̀:

⁴⁰ты̀ бѹ́деши въ домѹ̀ мое́мъ, и҆ ѹ҆́стъ твои́хъ да послѹ́шаютъ всѝ лю́дїе моѝ, ра́звѣ престо́ломъ а҆́зъ бо́лѣе тебє̀ бѹ́дѹ.

⁴¹Рече́ же фараѡ́нъ ї҆ѡ́сифѹ: сѐ, поставлѧ́ю тѧ̀ дне́сь над̾ все́ю земле́ю є҆гѵ́петскою.

⁴²И҆ сне́мъ фараѡ́нъ пе́рстень съ рѹкѝ своеѧ̀, возложѝ є҆го̀ на рѹ́кѹ ї҆ѡ́сифовѹ, и҆ ѡ҆блечѐ є҆го̀ въ ри́зѹ червле́нѹ, и҆ возложѝ гри́внѹ зла́тѹ на вы́ю є҆гѡ̀,

⁴³и҆ всадѝ є҆го̀ на колесни́цѹ свою̀ вторѹ́ю, и҆ проповѣ́да пред̾ ни́мъ проповѣ́дникъ: и҆ поста́ви є҆го̀ над̾ все́ю земле́ю є҆гѵ́петскою.

⁴⁴Рече́ же фараѡ́нъ ї҆ѡ́сифѹ: а҆́зъ фараѡ́нъ: без̾ тебє̀ не воздви́гнетъ рѹкѝ своеѧ̀ никто́же во все́й землѝ є҆гѵ́петстѣй.

⁴⁵И҆ наречѐ фараѡ́нъ и҆́мѧ ї҆ѡ́сифѹ ѱонѳомфани́хъ: и҆ дадѐ є҆мѹ̀ а҆сене́ѳѹ, дще́рь петефрі́а жреца̀ и҆лїопо́льскагѡ, є҆мѹ̀ въ женѹ̀.

⁴⁶Ї҆ѡ́сифъ же бѧ́ше лѣ́тъ три́десѧти, є҆гда̀ предста̀ фараѡ́нѹ царю̀ є҆гѵ́петскомѹ. И҆зы́де же ї҆ѡ́сифъ ѿ лица̀ фараѡ́нѧ и҆ про́йде всю̀ зе́млю є҆гѵ́петскѹю.

⁴⁷И҆ сотворѝ землѧ̀ въ седмѝ лѣ́тѣхъ ѻ҆би́лнѹ жа́твѹ.

⁴⁸И҆ собра̀ всѧ́кѹю пи́щѹ седмѝ лѣ́тъ, въ ни́хже бѧ́ше ѻ҆би́лность въ землѝ є҆гѵ́петстѣй: и҆ положѝ пи́щѹ во градѣ́хъ: пи́щы пѡ́ль гра́да, сѹ́щихъ ѡ҆́крестъ є҆гѡ̀, положѝ въ не́мъ.

⁴⁹И҆ собра̀ ї҆ѡ́сифъ пшени́цѹ ѩ҆́кѡ песо́къ морскі́й мно́гѹ ѕѣлѡ̀, до́ндеже не можа́хѹ и҆счестѝ: без̾ числа́ бо бѧ́ше.

⁵⁰Ї҆ѡ́сифѹ же бѣ́ста два̀ сы҄на, пре́жде прише́ствїѧ седмѝ лѣ́тъ гла́дныхъ, и҆̀хже родѝ є҆мѹ̀ а҆сене́ѳа, дще́рь петефрі́а жреца̀ и҆лїопо́льска:

⁵¹нарече́ же ї҆ѡ́сифъ и҆́мѧ пе́рвенцѹ манассі́а, (глаго́лѧ:) ѩ҆́кѡ забы́ти мнѣ̀ сотворѝ бг҃ъ всѧ҄ болѣ҄зни моѧ҄, и҆ всѧ҄, ѩ҆̀же ѻ҆тца̀ моегѡ̀.

⁵²И҆́мѧ же второ́мѹ наречѐ є҆фраі́мъ, (глаго́лѧ:) ѩ҆́кѡ возрасти́ мѧ бг҃ъ въ землѝ смире́нїѧ моегѡ̀.

⁵³Минѹ́ша же се́дмь лѣ́тъ ѻ҆би́лныхъ, ѩ҆̀же бы́ша въ землѝ є҆гѵ́петстѣй,

⁵⁴и҆ нача́ша се́дмь лѣ́тъ гла́дныхъ приходи́ти, ѩ҆́коже речѐ ї҆ѡ́сифъ. И҆ бы́сть гла́дъ по все́й землѝ: во все́й же землѝ є҆гѵ́петстѣй бы́ша {пред̾ глаго́ломъ си́мъ [бы́ша] въ є҆ди́нѣй а҆леѯандрі́йстѣй [не], но и҆ то̀ во вмѣсти́телныхъ} хлѣ́бы.

⁵⁵И҆ взалка̀ всѧ̀ землѧ̀ є҆гѵ́петскаѧ: возопи́ же наро́дъ къ фараѡ́нѹ ѡ҆ хлѣ́бѣхъ. Рече́ же фараѡ́нъ всѣ҄мъ є҆гѵ́птѧнѡмъ: и҆ди́те ко ї҆ѡ́сифѹ, и҆ є҆́же рече́тъ ва́мъ, сотвори́те.

⁵⁶И҆ гла́дъ бѧ́ше на лицы̀ всеѧ̀ землѝ. Ѿве́рзе же ї҆ѡ́сифъ всѧ҄ жи҄тницы, и҆ продаѧ́ше всѣ҄мъ є҆гѵ́птѧнѡмъ:

⁵⁷и҆ всѧ҄ страны҄ прихожда́хѹ во є҆гѵ́петъ, кѹпова́ти ко ї҆ѡ́сифѹ: ѡ҆бдержа́ше бо гла́дъ всю̀ зе́млю.