Read Библия Церковнославянская Бытїѐ 42 Bible Online

Бытїѐ 42 - Библия Церковнославянская bible

Бытїѐ 42

¹Ви́дѣвъ же ї҆а́кѡвъ, ѩ҆́кѡ кѹ́плѧ є҆́сть (пшени́цы) во є҆гѵ́птѣ, речѐ сынѡ́мъ свои҄мъ: почто̀ не радитѐ;

²сѐ, слы́шахъ, ѩ҆́кѡ є҆́сть пшени́ца во є҆гѵ́птѣ: и҆ди́те та́мѡ и҆ кѹпи́те на́мъ ма́лѡ пи́щи, да жи́ви бѹ́демъ и҆ не ѹ҆́мремъ.

³И҆до́ша же бра́тїѧ ї҆ѡ́сифѡвы де́сѧть кѹпи́ти пшени́цы во є҆гѵ́петъ.

⁴Венїамі́на же, бра́та ї҆ѡ́сифова, не ѿпѹстѝ съ бра́тїею є҆гѡ̀, рече́ бо: да не когда̀ слѹчи́тсѧ (на пѹтѝ) є҆мѹ̀ ѕло̀.

⁵Прїидо́ша же сы́нове ї҆и҃лєвы кѹпи́ти съ приходѧ́щими: бѧ́ше бо гла́дъ въ землѝ ханаа́нстѣй.

⁶Ї҆ѡ́сифъ же бѧ́ше кнѧ́зь землѝ: се́й продаѧ́ше всѣ҄мъ лю́демъ землѝ (тоѧ̀). Прише́дше же бра́тїѧ ї҆ѡ́сифѡвы, поклони́шасѧ є҆мѹ̀ лице́мъ до землѝ.

⁷Ви́дѣвъ же ї҆ѡ́сифъ бра́тїю свою̀, позна̀: и҆ ѿчѹжда́шесѧ и҆́хъ, и҆ глаго́лаше и҆̀мъ же́стокѡ, и҆ речѐ и҆̀мъ: ѿкѹ́дѹ прїидо́сте; Ѻ҆ни́ же рѣ́ша: ѿ землѝ ханаа́нскїѧ кѹпи́ти пи́щи.

⁸Позна́ же ї҆ѡ́сифъ бра́тїю свою̀: ѻ҆ни́ же не позна́ша є҆гѡ̀.

⁹И҆ помѧнѹ̀ ї҆ѡ́сифъ сны̀ своѧ҄, ѩ҆̀же ви́дѣ ѻ҆́нъ: и҆ речѐ и҆̀мъ: соглѧда҄таи є҆стѐ, соглѧ́дати пѹті́й страны̀ (сеѧ̀) прїидо́сте.

¹⁰Ѻ҆ни́ же рѣ́ша: нѝ, господи́не, рабѝ твоѝ прїидо́хомъ кѹпи́ти пи́щи:

¹¹всѝ є҆смы̀ сы́нове є҆ди́нагѡ человѣ́ка: ми́рницы є҆смы̀, не сѹ́ть рабѝ твоѝ соглѧда҄таи.

¹²Рече́ же и҆̀мъ: нѝ, но пѹти҄ землѝ (сеѧ̀) прїидо́сте соглѧ́дати.

¹³Ѻ҆ни́ же рѣ́ша: двана́десѧть є҆смы̀ бра́тїѧ рабѝ твоѝ въ землѝ ханаа́ни: и҆ сѐ, ме́ншїй (ѿ на́съ) со ѻ҆тце́мъ на́шимъ дне́сь, а҆ дрѹга́гѡ нѣ́сть.

¹⁴Рече́ же и҆̀мъ ї҆ѡ́сифъ: сїѐ є҆́сть, є҆́же реко́хъ ва́мъ, глаго́лѧ, ѩ҆́кѡ соглѧда҄таи є҆стѐ:

¹⁵въ се́мъ ѩ҆вите́сѧ: та́кѡ мѝ здра́вїѧ фараѡ́нѧ, не и҆зы́дете ѿсю́дѹ, а҆́ще бра́тъ ва́шъ ме́ншїй не прїи́детъ сѣ́мѡ:

¹⁶посли́те ѿ себє̀ є҆ди́наго, и҆ возми́те бра́та ва́шего: вы́ же держи́ми бѹ́дите, до́ндеже ѩ҆́вѣ бѹ́дѹтъ словеса̀ ва҄ша, а҆́ще и҆́стинствѹете, и҆лѝ нѝ: а҆́ще же нѝ, та́кѡ мѝ здра́вїѧ фараѡ́нѧ, вои́стиннѹ соглѧда҄таи є҆стѐ.

¹⁷И҆ дадѐ ѧ҆̀ под̾ стра́жѹ на трѝ дни҄.

¹⁸Рече́ же и҆̀мъ въ де́нь тре́тїй: сїѐ сотвори́те, и҆ жи́ви бѹ́дете: бг҃а бо а҆́зъ бою́сѧ:

¹⁹а҆́ще ми́рницы є҆стѐ, бра́тъ ва́шъ да ѹ҆де́ржитсѧ є҆ди́нъ под̾ стра́жею: са́ми же и҆ди́те и҆ ѿвези́те кѹ́пленѹю пшени́цѹ ва́шѹ,

²⁰и҆ бра́та ва́шего ме́ншаго приведи́те ко мнѣ̀, и҆ вѣ҄рна бѹ́дѹтъ словеса̀ ва҄ша: а҆́ще же нѝ, ѹ҆́мрете. И҆ сотвори́ша та́кѡ.

²¹И҆ речѐ кі́йждо къ бра́тѹ своемѹ̀: є҆́й, во грѣсѣ́хъ бо є҆смы̀ бра́та ра́ди на́шегѡ, ѩ҆́кѡ презрѣ́хомъ скорбѣ́нїе дѹшѝ є҆гѡ̀, є҆гда̀ молѧ́шесѧ на́мъ, и҆ не послѹ́шахомъ є҆гѡ̀: и҆ сегѡ̀ ра́ди прїи́де на ны̀ скорбѣ́нїе сїѐ.

²²Ѿвѣща́въ же рѹви́мъ, речѐ и҆̀мъ: не рѣ́хъ ли ва́мъ, глаго́лѧ: не преѡби́дите дѣ́тища; и҆ не послѹ́шасте менѐ: и҆ сѐ, кро́вь є҆гѡ̀ взыскѹ́етсѧ.

²³Ті́и же не вѣ́дѣша, ѩ҆́кѡ разѹмѣ́етъ ї҆ѡ́сифъ: толма́чь бо междѹ̀ и҆́ми бѧ́ше.

²⁴Ѿврати́всѧ же ѿ ни́хъ, пропла́касѧ ї҆ѡ́сифъ: и҆ па́ки прїи́де къ ни҄мъ и҆ речѐ и҆̀мъ. И҆ поѧ̀ сѷмеѡ́на ѿ ни́хъ, и҆ свѧза̀ є҆го̀ пред̾ ни́ми.

²⁵Повелѣ́ же ї҆ѡ́сифъ напо́лнити сосѹ́ды и҆́хъ пшени́цы и҆ возврати́ти сребро̀ и҆́хъ комѹ́ждо во вре́тище своѐ и҆ да́ти и҆̀мъ бра́шно на пѹ́ть. И҆ бы́сть и҆̀мъ та́кѡ.

²⁶И҆ возложи́вше пшени́цѹ на ѻ҆слы̀ своѧ҄, ѿидо́ша ѿтѹ́дѹ.

²⁷Ѿрѣши́въ же є҆ди́нъ вре́тище своѐ да́ти пи́щѹ ѻ҆слѡ́мъ свои҄мъ, и҆дѣ́же ста́ша, и҆ ви́дѣ ѹ҆́золъ сребра̀ своегѡ̀, и҆ бѣ̀ верхѹ̀ ѹ҆́стїѧ вре́тищнагѡ.

²⁸И҆ речѐ бра́тїи свое́й: возвращено́ ми є҆́сть сребро̀, и҆ сѐ, сїѐ во вре́тищи мое́мъ. И҆ ѹ҆жасе́сѧ се́рдце и҆́хъ: и҆ возмѧто́шасѧ, дрѹ́гъ ко дрѹ́гѹ глаго́люще: что̀ сїѐ сотворѝ бг҃ъ на́мъ;

²⁹Прїидо́ша же ко ї҆а́кѡвѹ, ѻ҆тцѹ̀ своемѹ̀, въ зе́млю ханаа́ню и҆ повѣ́даша є҆мѹ̀ всѧ҄ слѹчи҄вшаѧсѧ и҆̀мъ, глаго́люще:

³⁰глаго́ла мѹ́жъ господи́нъ землѝ (ѻ҆́ныѧ) къ на́мъ же́стокѡ и҆ вве́рже на́съ въ темни́цѹ, а҆́ки соглѧ́дающихъ зе́млю:

³¹рѣ́хомъ же є҆мѹ̀: ми́рницы є҆смы̀, нѣ́смы соглѧда҄таи:

³²двана́десѧть бра́тїѧ є҆смы̀, сы́нове ѻ҆тца̀ на́шегѡ: є҆ди́нагѡ нѣ́сть, а҆ ме́ншїй со ѻ҆тце́мъ на́шимъ дне́сь въ землѝ ханаа́ни:

³³рече́ же на́мъ мѹ́жъ господи́нъ землѝ (тоѧ̀): по семѹ̀ ѹ҆вѣ́мъ, ѩ҆́кѡ ми́рницы є҆стѐ: бра́та є҆ди́наго ѡ҆ста́вите здѣ̀ ѹ҆ менє̀, а҆ кѹ́пленѹю пшени́цѹ до́мѹ ва́шемѹ взе́мше ѿиди́те

³⁴и҆ приведи́те ко мнѣ̀ бра́та ва́шего ме́ншаго: и҆ ѹ҆вѣ́мъ, ѩ҆́кѡ не соглѧда҄таи є҆стѐ, но ѩ҆́кѡ ми́рницы є҆стѐ: и҆ бра́та ва́шего ѿда́мъ ва́мъ, и҆ кѹ́плю твори́те въ землѝ.

³⁵Бы́сть же є҆гда̀ и҆спразднѧ́хѹ врє́тища своѧ҄, и҆ бѧ́ше ѹ҆́золъ сребра̀ во вре́тищи коегѡ́ждо и҆́хъ: и҆ ви́дѣша ѹ҆́злы сребра̀ своегѡ̀ са́ми и҆ ѻ҆те́цъ и҆́хъ, и҆ ѹ҆боѧ́шасѧ.

³⁶Рече́ же и҆̀мъ ї҆а́кѡвъ ѻ҆те́цъ и҆́хъ: менѐ безча́дна сотвори́сте: ї҆ѡ́сифа нѣ́сть, сѷмеѡ́на нѣ́сть, и҆ венїамі́на ли по́ймете; на мѧ̀ бы́ша сїѧ҄ всѧ҄.

³⁷Рече́ же рѹви́мъ ѻ҆тцѹ̀ своемѹ̀, глаго́лѧ: двои́хъ сынѡ́въ мои́хъ ѹ҆бі́й, а҆́ще не приведѹ̀ є҆гѡ̀ къ тебѣ̀: да́ждь є҆го̀ въ рѹ́цѣ моѝ, и҆ а҆́зъ приведѹ̀ є҆го̀ къ тебѣ̀.

³⁸Ѻ҆́нъ же речѐ: не по́йдетъ сы́нъ мо́й съ ва́ми, ѩ҆́кѡ бра́тъ є҆гѡ̀ ѹ҆́мре, и҆ то́й є҆ди́нъ ѡ҆ста̀: и҆ слѹчи́тсѧ є҆мѹ̀ ѕло̀ на пѹтѝ, въ ѻ҆́ньже а҆́ще по́йдете, и҆ сведе́те ста́рость мою̀ съ печа́лїю во а҆́дъ.