Read Библия Церковнославянская Бытїѐ 43 Bible Online

Бытїѐ 43 - Библия Церковнославянская bible

Бытїѐ 43

¹Гла́дъ же ѡ҆долѣ̀ на землѝ.

²Бы́сть же є҆гда̀ сконча́ша пшени́цѹ ѩ҆дѹ́ще, ю҆́же принесо́ша и҆з̾ є҆гѵ́пта: и҆ речѐ и҆̀мъ ѻ҆те́цъ и҆́хъ: па́ки ше́дше кѹпи́те на́мъ ма́лѡ пи́щи.

³Рече́ же є҆мѹ̀ ї҆ѹ́да, глаго́лѧ: клѧ́твою засвидѣ́телствова на́мъ мѹ́жъ господи́нъ землѝ (тоѧ̀) глаго́лѧ: не ѹ҆́зрите лица̀ моегѡ̀, а҆́ще бра́тъ ва́шъ ме́ншїй не прїи́детъ съ ва́ми:

⁴а҆́ще ѹ҆́бѡ по́слеши бра́та на́шего съ на́ми, по́йдемъ и҆ кѹ́пимъ тебѣ̀ пи́щи:

⁵а҆́ще же не по́слеши бра́та на́шего съ на́ми, не по́йдемъ: мѹ́жъ бо речѐ на́мъ, глаго́лѧ: не ѹ҆́зрите лица̀ моегѡ̀, а҆́ще бра́тъ ва́шъ ме́ншїй не прїи́детъ съ ва́ми.

⁶Рече́ же ї҆и҃ль: почто̀ ѕло̀ сотвори́сте мѝ, повѣ́давше мѹ́жѹ, ѩ҆́кѡ є҆́сть ва́мъ бра́тъ;

⁷Ѻ҆ни́ же рѣ́ша: вопроша́ѧ вопросѝ на́съ мѹ́жъ и҆ ро́да на́шегѡ, глаго́лѧ: а҆́ще є҆щѐ ѻ҆те́цъ ва́шъ жи́въ є҆́сть, и҆ а҆́ще є҆́сть ва́мъ бра́тъ; и҆ повѣ́дахомъ є҆мѹ̀ по вопро́сѹ семѹ̀: є҆да̀ вѣ́дѣхомъ, ѩ҆́кѡ рече́тъ на́мъ: приведи́те бра́та ва́шего;

⁸Рече́ же ї҆ѹ́да ко ї҆и҃лю, ѻ҆тцѹ̀ своемѹ̀: ѿпѹстѝ ѻ҆́трочища со мно́ю: и҆ воста́вше по́йдемъ, да жи́ви бѹ́демъ и҆ не ѹ҆́мремъ, и҆ мы̀ и҆ ты̀ и҆ и҆мѣ́нїе на́ше:

⁹а҆́зъ же возмѹ̀ є҆го̀: ѿ рѹкѹ̀ моє́ю взыщѝ є҆го̀: а҆́ще не приведѹ̀ є҆гѡ̀ къ тебѣ̀, и҆ поста́влю є҆го̀ пред̾ тобо́ю, грѣ́шенъ бѹ́дѹ къ тебѣ̀ всѧ҄ дни҄:

¹⁰а҆́ще бо бы́хомъ не ѹ҆ме́длили, ѹ҆жѐ возврати́лисѧ бы два́жды.

¹¹Рече́ же и҆̀мъ ї҆и҃ль ѻ҆те́цъ и҆́хъ: а҆́ще та́кѡ є҆́сть, сїѐ сотвори́те: возми́те ѿ плодѡ́въ земны́хъ въ сосѹ́ды своѧ҄ и҆ донеси́те человѣ́кѹ да́ры, риті́нѹ {тѹ́къ масти́тый и҆з̾ дре́ва текѹ́щїй}, ме́дъ, ѳѷмїа́ма же и҆ ста́кти, и҆ тереві́нѳъ и҆ ѻ҆рѣ́хи:

¹²и҆ сребро̀ сѹгѹ́бо возми́те въ рѹ́цѣ своѝ, и҆ сребро̀ ѡ҆брѣ́тенное во вре́тищахъ ва́шихъ возврати́те съ собо́ю, да не ка́кѡ невѣ́дѣнїе є҆́сть:

¹³и҆ бра́та своего̀ поими́те, и҆ воста́вше и҆ди́те къ мѹ́жѹ:

¹⁴бг҃ъ же мо́й да да́стъ ва́мъ блгдть пред̾ мѹ́жемъ и҆ ѿпѹ́ститъ бра́та ва́шего є҆ди́наго, и҆ венїамі́на: а҆́зъ бо ѩ҆́коже ѡ҆безча́дѣхъ, ѡ҆безча́дѣхъ.

¹⁵Взе́мше же мѹ́жїе да́ры сїѧ҄, и҆ сребро̀ сѹгѹ́бое взѧ́ша въ рѹ́цѣ своѝ, и҆ венїамі́на: и҆ воста́вше прїидо́ша во є҆гѵ́петъ, и҆ ста́ша пред̾ ї҆ѡ́сифомъ.

¹⁶Ви́дѣ же и҆̀хъ ї҆ѡ́сифъ, и҆ венїамі́на бра́та своего̀ є҆динома́тернѧ, и҆ речѐ строи́телю до́мѹ своегѡ̀: введѝ мѹ́жы (сїѧ҄) въ до́мъ, и҆ заколѝ ѿ скота̀, и҆ ѹ҆гото́вай: со мно́ю бо ѩ҆́сти и҆́мѹтъ мѹ́жїе (сі́и) хлѣ́бъ въ полѹ́дне.

¹⁷Сотвори́ же человѣ́къ, ѩ҆́коже речѐ ї҆ѡ́сифъ, и҆ введѐ мѹ́жы въ до́мъ ї҆ѡ́сифовъ.

¹⁸Ви́дѣвше же мѹ́жїе, ѩ҆́кѡ введо́ша и҆̀хъ въ до́мъ ї҆ѡ́сифовъ, рѣ́ша: сребра̀ ра́ди возвраще́ннагѡ во вре́тищахъ на́шихъ пе́рвѣе, вво́дѧтъ ны̀, є҆́же бы ѡ҆клевета́ти на́съ и҆ нанестѝ на ны̀, да по́ймѹтъ на́съ въ рабы҄, и҆ ѻ҆слы̀ на́шѧ.

¹⁹Пристѹпи́вше же къ человѣ́кѹ сѹ́щемѹ над̾ до́момъ ї҆ѡ́сифовымъ, реко́ша є҆мѹ̀ при вратѣ́хъ до́мѹ,

²⁰глаго́люще: мо́лимъ тѧ̀, господи́не: прїидо́хомъ пе́рвѣе кѹпи́ти пи́щи:

²¹бы́сть же є҆гда̀ прїидо́хомъ на ста́нъ и҆ ѿрѣши́хомъ врє́тища своѧ҄, и҆ сѐ, сребро̀ коегѡ́ждо во вре́тищи є҆гѡ̀: то́е сребро̀ на́ше вѣ́сомъ возврати́хомъ нн҃ѣ рѹка́ми на́шими:

²²и҆ сребро̀ дрѹго́е принесо́хомъ съ собо́ю кѹпи́ти пи́щи: не вѣ́мы, кто̀ вложѝ сребро̀ во врє́тища на҄ша.

²³Рече́ же и҆̀мъ: ми́ръ ва́мъ, не бо́йтесѧ: бг҃ъ ва́шъ и҆ бг҃ъ ѻ҆тє́цъ ва́шихъ дадѐ ва́мъ сокрѡ́вища во вре́тищахъ ва́шихъ: а҆ сребро̀ ва́ше за прїѧ́тое и҆мѣ́ю. И҆ и҆зведѐ къ ни҄мъ сѷмеѡ́на:

²⁴и҆ принесѐ во́дѹ ѡ҆мы́ти но́зѣ и҆̀мъ, и҆ дадѐ па҄жити ѻ҆слѡ́мъ и҆́хъ.

²⁵Ѹ҆гото́ваша же да́ры, до́ндеже прїи́детъ ї҆ѡ́сифъ въ полѹ́дне: слы́шаша бо, ѩ҆́кѡ та́мѡ и҆́мать ѡ҆бѣ́дати.

²⁶Прїи́де же ї҆ѡ́сифъ въ до́мъ: и҆ принесо́ша є҆мѹ̀ да́ры, ѩ҆̀же и҆мѧ́хѹ въ рѹка́хъ свои́хъ, въ до́мъ: и҆ поклони́шасѧ є҆мѹ̀ лице́мъ до землѝ.

²⁷И҆ вопросѝ и҆̀хъ: здра́ви ли є҆стѐ; И҆ речѐ и҆̀мъ: здра́въ ли є҆́сть ѻ҆те́цъ ва́шъ, ста́рецъ, є҆го́же реко́сте, є҆ще́ ли жи́въ є҆́сть;

²⁸Ѻ҆ни́ же реко́ша: здра́въ є҆́сть ра́бъ тво́й, ѻ҆те́цъ на́шъ, є҆щѐ жи́въ є҆́сть. И҆ речѐ: блгⷭве́нъ человѣ́къ ѻ҆́ный бг҃ѹ. И҆ прини́кше поклони́шасѧ є҆мѹ̀.

²⁹Воззрѣ́въ же ѻ҆чи́ма свои́ма ї҆ѡ́сифъ, ви́дѣ венїамі́на бра́та своего̀ є҆динома́тернѧ и҆ речѐ: се́й ли є҆́сть бра́тъ ва́шъ ю҆нѣ́йшїй, є҆го́же реко́сте ко мнѣ̀ привестѝ; И҆ речѐ: бг҃ъ да поми́лѹетъ тѧ̀, ча́до.

³⁰Возмѹти́сѧ же ї҆ѡ́сифъ: подви́жесѧ бо ѹ҆тро́ба є҆гѡ̀ ѡ҆ бра́тѣ свое́мъ, и҆ и҆ска́ше пла́кати: вше́дъ же въ ло́жницѹ, пла́касѧ та́мѡ.

³¹И҆ ѹ҆мы́въ лицѐ, и҆зше́дъ ѹ҆держа́сѧ и҆ речѐ: предложи́те хлѣ́бы.

³²И҆ предложи́ша є҆мѹ̀ є҆ди́номѹ, и҆ ѡ҆́нымъ ѻ҆со́бнѡ, и҆ є҆гѵ́птѧнѡмъ, и҆̀же съ ни́мъ ѩ҆дѧ́хѹ, ѻ҆со́бнѡ: не можа́хѹ бо є҆гѵ́птѧне ѩ҆́сти хлѣ́ба со є҆врє́и: ме́рзость бо є҆́сть є҆гѵ́птѧнѡмъ (*всѧ́къ пастѹ́хъ ѻ҆́вчїй).

³³Сѣдо́ша же прѧ́мѡ є҆мѹ̀ пе́рвенецъ по старѣ́йшинствѹ своемѹ̀ и҆ ме́ншїй по ме́ншествѹ своемѹ̀, и҆ дивлѧ́хѹсѧ мѹ́жїе кі́йждо ко бра́тѹ своемѹ̀:

³⁴и҆ взѧ́ша ча҄сти ѿ негѡ̀ къ себѣ̀: вѧ́щшаѧ же бы́сть ча́сть венїамі́нова па́че всѣ́хъ часте́й пѧтери́цею, не́же ѻ҆́ныхъ: пи́ша же и҆ ѹ҆пи́шасѧ съ ни́мъ.