Read Библия Церковнославянская Бытїѐ 44 Bible Online

Бытїѐ 44 - Библия Церковнославянская bible

Бытїѐ 44

¹И҆ заповѣ́да ї҆ѡ́сифъ домострои́телю своемѹ̀, глаго́лѧ: напо́лните врє́тища мѹжє́мъ пи́щи, є҆ли́кѡ мо́гѹтъ понестѝ: и҆ вложи́те комѹ́ждо сребро̀ верхѹ̀ ѹ҆́стїѧ вре́тища:

²и҆ ча́шѹ мою̀ сре́брѧнѹю вложи́те во вре́тище ме́ншагѡ, и҆ цѣ́нѹ пшени́цы є҆гѡ̀. Бы́сть же по словесѝ ї҆ѡ́сифовѹ, ѩ҆́коже речѐ.

³Ѹ҆́тро возсїѧ̀, и҆ мѹ́жїе ѿпѹсти́шасѧ са́ми, и҆ ѻ҆слѧ́та и҆́хъ.

⁴И҆зше́дше же ѻ҆нѝ и҆з̾ гра́да, не ѿидо́ша дале́че: и҆ речѐ ї҆ѡ́сифъ домострои́телю своемѹ̀: воста́въ гонѝ в̾слѣ́дъ мѹже́й и҆ пости́гни и҆̀хъ, и҆ рцы̀ и҆̀мъ: что̀ ѩ҆́кѡ возда́сте (*мѝ) ѕла҄ѧ за блага҄ѧ;

⁵вскѹ́ю ѹ҆крадо́сте ча́шѹ мою̀ сре́брѧнѹ; не сїѧ́ ли є҆́сть, и҆з̾ неѧ́же пїе́тъ господи́нъ мо́й; ѻ҆́нъ же и҆ волхвова́нїемъ волхвѹ́етъ въ не́й: ѕла҄ѧ соверши́сте, ѩ҆̀же сотвори́сте.

⁶Ѡ҆брѣ́тъ же и҆̀хъ, речѐ и҆̀мъ по словесе́мъ си҄мъ.

⁷Ѻ҆ни́ же рѣ́ша є҆мѹ̀: вскѹ́ю глаго́летъ господи́нъ словеса̀ сїѧ҄; не бѹ́ди рабѡ́мъ твои҄мъ сотвори́ти по словесѝ семѹ̀:

⁸а҆́ще сребро̀, є҆́же ѡ҆брѣто́хомъ во вре́тищахъ на́шихъ, возврати́хомъ къ тебѣ̀ ѿ землѝ ханаа́ни, ка́кѡ бы́хомъ ѹ҆кра́ли и҆з̾ до́мѹ господи́на твоегѡ̀ сребро̀ и҆лѝ зла́то;

⁹ѹ҆ негѡ́же а҆́ще ѡ҆брѧ́щеши ча́шѹ ѿ ра҄бъ твои́хъ, да ѹ҆́мретъ: и҆ мы̀ бѹ́демъ рабѝ господи́нѹ на́шемѹ.

¹⁰Ѻ҆́нъ же речѐ: и҆ нн҃ѣ, ѩ҆́коже глаго́лете, та́кѡ бѹ́детъ: ѹ҆ негѡ́же а҆́ще ѡ҆брѧ́щетсѧ ча́ша, бѹ́детъ мо́й ра́бъ, вы́ же бѹ́дете чи́сти.

¹¹И҆ потща́шасѧ, и҆ све́рже кі́йждо вре́тище своѐ на зе́млю, и҆ ѿверзо́ша кі́йждо вре́тище своѐ.

¹²И҆зыска́ же ѿ старѣ́йшагѡ заче́нъ, до́ндеже прїи́де до ме́ншагѡ, и҆ ѡ҆брѣ́те ча́шѹ во вре́тищи венїамі́ни.

¹³И҆ растерза́ша ри҄зы своѧ҄, и҆ возложи́ша кі́йждо вре́тище своѐ на ѻ҆слѧ̀ своѐ, и҆ возврати́шасѧ во гра́дъ.

¹⁴Вни́де же ї҆ѹ́да и҆ бра́тїѧ є҆гѡ̀ ко ї҆ѡ́сифѹ, є҆щѐ є҆мѹ̀ сѹ́щѹ тѹ̀, и҆ падо́ша пред̾ ни́мъ на зе́млю.

¹⁵Рече́ же и҆̀мъ ї҆ѡ́сифъ: что̀ дѣ́ло сїѐ сотвори́сте; не вѣ́дасте ли, ѩ҆́кѡ нѣ́сть волхвова́тель человѣ́къ, ѩ҆́коже а҆́зъ;

¹⁶Рече́ же ї҆ѹ́да: что̀ ѿвѣща́емъ господи́нѹ, и҆лѝ что̀ возглаго́лемъ, и҆лѝ чи́мъ ѡ҆правди́мсѧ; бг҃ъ же ѡ҆брѣ́те непра́вдѹ рабѡ́въ твои́хъ: сѐ, мы̀ є҆смы̀ рабѝ господи́нѹ на́шемѹ, и҆ мы̀, и҆ ѹ҆ негѡ́же ѡ҆брѣ́тесѧ ча́ша.

¹⁷Рече́ же ї҆ѡ́сифъ: не бѹ́ди мѝ сотвори́ти глаго́лъ се́й: мѹ́жъ, ѹ҆ негѡ́же ѡ҆брѣ́тесѧ ча́ша, то́й бѹ́детъ мѝ ра́бъ: вы́ же поиди́те въ цѣ́лости ко ѻ҆тцѹ̀ своемѹ̀.

¹⁸Пристѹпи́въ же къ немѹ̀ ї҆ѹ́да, речѐ: молю́ тѧ, господи́не, да рече́тъ ра́бъ тво́й сло́во пред̾ тобо́ю, и҆ не прогнѣ́вайсѧ на раба̀ твоего̀, ѩ҆́кѡ ты̀ є҆сѝ по фараѡ́нѣ:

¹⁹господи́не, ты̀ вопроша́лъ є҆сѝ рабѡ́въ твои́хъ, глаго́лѧ: а҆́ще и҆́мате ѻ҆тца̀, и҆лѝ бра́та;

²⁰И҆ рѣ́хомъ господи́нѹ: є҆́сть на́мъ ѻ҆те́цъ ста́ръ, и҆ ѻ҆́трочищь на ста́рость ме́ншїй є҆мѹ̀, а҆ бра́тъ є҆гѡ̀ ѹ҆́мре, ѻ҆́нъ же є҆ди́нъ ѡ҆ста́сѧ ѹ҆ ма́тере своеѧ̀, ѻ҆те́цъ же возлюбѝ є҆го̀.

²¹Ты́ же ре́клъ є҆сѝ рабѡ́мъ твои҄мъ: приведи́те є҆го̀ ко мнѣ̀, да ви́ждѹ є҆го̀.

²²И҆ рѣ́хомъ господи́нѹ: не возмо́жетъ ѻ҆́трочищь ѡ҆ста́вити ѻ҆тца̀ своего̀: а҆́ще же ѡ҆ста́витъ ѻ҆тца̀, ѹ҆́мретъ.

²³Ты́ же ре́клъ є҆сѝ рабѡ́мъ твои҄мъ: а҆́ще не прїи́детъ бра́тъ ва́шъ ме́ншїй съ ва́ми, не приложитѐ ктомѹ̀ ви́дѣти лица̀ моегѡ̀.

²⁴Бы́сть же є҆гда̀ прїидо́хомъ къ рабѹ̀ твоемѹ̀ ѻ҆тцѹ̀ на́шемѹ, повѣ́дахомъ є҆мѹ̀ словеса̀ господи́на на́шегѡ,

²⁵рече́ же на́мъ ѻ҆те́цъ на́шъ: и҆ди́те па́ки и҆ кѹпи́те на́мъ ма́лѡ пи́щи.

²⁶Мы́ же реко́хомъ: не возмо́жемъ и҆тѝ: но а҆́ще бра́тъ на́шъ ме́ншїй и҆́детъ съ на́ми, по́йдемъ: и҆́бо не возмо́жемъ ви́дѣти лицѐ мѹ́жа, бра́тѹ на́шемѹ ме́ншемѹ не сѹ́щѹ съ на́ми.

²⁷Рече́ же ра́бъ тво́й, ѻ҆те́цъ на́шъ къ на́мъ: вы̀ вѣ́сте, ѩ҆́кѡ двои́хъ родѝ мнѣ̀ жена̀:

²⁸и҆ ѿи́де є҆ди́нъ ѿ менє̀, и҆ реко́сте, ѩ҆́кѡ ѕвѣ́ремъ снѣде́нъ бы́сть, и҆ не ви́дѣхъ є҆гѡ̀ да́же до нн҃ѣ:

²⁹а҆́ще ѹ҆̀бо по́ймете и҆ сего̀ ѿ лица̀ моегѡ̀, и҆ слѹчи́тсѧ є҆мѹ̀ ѕло̀ на пѹтѝ, и҆ сведе́те ста́рость мою̀ съ печа́лїю во а҆́дъ.

³⁰Нн҃ѣ ѹ҆̀бо а҆́ще пойдѹ̀ къ рабѹ̀ твоемѹ̀, ѻ҆тцѹ́ же на́шемѹ, и҆ ѻ҆́трочища не бѹ́детъ съ на́ми: (*дѹша́ же є҆гѡ̀ свѧ́зана є҆́сть съ дѹше́ю сегѡ̀,)

³¹и҆ бѹ́детъ є҆гда̀ ѹ҆ви́дитъ ѻ҆́нъ не сѹ́ща ѻ҆́трочища съ на́ми, ѹ҆́мретъ: и҆ сведѹ́тъ рабѝ твоѝ ста́рость раба̀ твоегѡ̀, ѻ҆тца́ же на́шегѡ, съ печа́лїю во а҆́дъ:

³²ра́бъ бо тво́й ѿ ѻ҆тца̀ взѧ̀ ѻ҆́трочища, глаго́лѧ: а҆́ще не приведѹ̀ є҆го̀ къ тебѣ̀ и҆ поста́влю є҆го̀ пред̾ тобо́ю, грѣ́шенъ бѹ́дѹ ко ѻ҆тцѹ̀ всѧ҄ дни҄.

³³Нн҃ѣ ѹ҆̀бо пребѹ́дѹ тебѣ̀ ра́бъ вмѣ́стѡ ѻ҆́трочища, ра́бъ господи́нѹ: ѻ҆́трочищь же да и҆́детъ съ бра́тїею свое́ю:

³⁴ка́кѡ бо пойдѹ̀ ко ѻ҆тцѹ̀, ѻ҆́трочищѹ не сѹ́щѹ съ на́ми; да не ви́ждѹ ѕлы́хъ, ѩ҆̀же ѡ҆брѧ́щѹтъ ѻ҆тца̀ моего̀.