Read Библия Церковнославянская Бытїѐ 48 Bible Online

Бытїѐ 48 - Библия Церковнославянская bible

Бытїѐ 48

¹Бы́сть же по глаго́лѣхъ си́хъ, и҆ повѣ́дано бы́сть ї҆ѡ́сифѹ, ѩ҆́кѡ ѻ҆те́цъ тво́й и҆знемога́етъ: и҆ пои́мъ два̀ сы҄на своѧ҄, манассі́ю и҆ є҆фре́ма, прїи́де ко ї҆а́кѡвѹ.

²Повѣ́даша же ї҆а́кѡвѹ, глаго́люще: сѐ, сы́нъ тво́й ї҆ѡ́сифъ грѧде́тъ къ тебѣ̀. И҆ ѹ҆крѣпи́всѧ ї҆и҃ль сѣ́де на ѻ҆дрѣ̀,

³и҆ речѐ ї҆а́кѡвъ ко ї҆ѡ́сифѹ: бг҃ъ мо́й ѩ҆ви́сѧ мнѣ̀ въ лѹ́зѣ, въ землѝ ханаа́ни, и҆ блгⷭви́ мѧ

⁴и҆ рече́ ми: сѐ, а҆́зъ возращѹ́ тѧ и҆ ѹ҆мно́жѹ тѧ̀, и҆ сотворю́ тѧ въ собра҄нїѧ ѩ҆зы́кѡвъ: и҆ да́мъ тѝ зе́млю сїю̀ и҆ сѣ́мени твоемѹ̀ по тебѣ̀ во ѡ҆держа́нїе вѣ́чное.

⁵Нн҃ѣ ѹ҆̀бо два̀ сы҄на твоѧ҄, и҆̀же бы́ша тебѣ̀ въ землѝ є҆гѵ́петстѣй пре́жде прише́ствїѧ моегѡ̀ къ тебѣ̀ во є҆гѵ́петъ, моѝ сѹ́ть: є҆фре́мъ и҆ манассі́а, а҆́ки рѹви́мъ и҆ сѷмеѡ́нъ бѹ́дѹтъ мнѣ̀:

⁶сы́ны же, ѩ҆̀же а҆́ще роди́ши по си́хъ, бѹ́дѹтъ тебѣ̀: во и҆́мѧ бра́тїи своеѧ̀ призовѹ́тсѧ ко жре́бїѧмъ ѻ҆́ныхъ:

⁷а҆́зъ же є҆гда̀ и҆дѧ́хъ ѿ месопота́мїи сѵ́рскїѧ, ѹ҆́мре рахи́ль ма́ти твоѧ̀ въ землѝ ханаа́ни, приближа́ющѹсѧ мѝ ко ї҆пподро́мѹ хавра́ѳы землѝ, є҆́же прїитѝ во є҆фра́ѳѹ: и҆ погребо́хъ ю҆̀ на пѹтѝ ї҆пподро́ма: се́й є҆́сть виѳлее́мъ.

⁸Ви́дѣвъ же ї҆и҃ль сы́ны ї҆ѡ́сифѡвы, речѐ: что̀ тебѣ̀ сі́и;

⁹Рече́ же ї҆ѡ́сифъ ѻ҆тцѹ̀ своемѹ̀: сы́нове моѝ сѹ́ть, ѩ҆̀же даде́ ми бг҃ъ здѣ̀. И҆ речѐ ї҆а́кѡвъ: приведи́ ми ѧ҆̀, да благословлю̀ и҆̀хъ.

¹⁰Ѻ҆́чи же ї҆и҃лю тѧ́жкѡ ви́дѣста ѿ ста́рости, и҆ не можа́ше ви́дѣти: и҆ прибли́жи и҆̀хъ къ немѹ̀, и҆ лобза̀ и҆̀хъ, и҆ ѡ҆б̾ѧ́тъ ѧ҆̀.

¹¹И҆ речѐ ї҆и҃ль ко ї҆ѡ́сифѹ: сѐ, лица̀ твоегѡ̀ не лиши́хсѧ, и҆ сѐ, показа́ ми бг҃ъ и҆ сѣ́мѧ твоѐ.

¹²И҆ ѿведѐ и҆̀хъ ї҆ѡ́сифъ ѿ колѣ́нъ є҆гѡ̀, и҆ поклони́шасѧ є҆мѹ̀ лице́мъ до землѝ.

¹³Пои́мъ же ї҆ѡ́сифъ два̀ сы҄на своѧ҄, є҆фре́ма въ десни́цѹ, прѧ́мѡ лѣви́цы ї҆и҃лѧ, манассі́ю же въ лѣ́вѹю, прѧ́мѡ десни́цы ї҆и҃левы, прибли́жи и҆̀хъ къ немѹ̀.

¹⁴Просте́ръ же ї҆и҃ль рѹ́кѹ деснѹ́ю, возложѝ на главѹ̀ є҆фре́млю, се́й же бѧ́ше ме́ншїй, а҆ лѣ́вѹю на главѹ̀ манассі́инѹ, премѣни́въ рѹ́цѣ,

¹⁵и҆ благословѝ ѧ҆̀ и҆ речѐ: бг҃ъ, є҆мѹ́же бл҃гоѹгоди́ша ѻ҆тцы̀ моѝ пред̾ ни́мъ, а҆враа́мъ и҆ ї҆саа́къ, бг҃ъ, и҆́же пита́етъ мѧ̀ и҆змла́да да́же до днѐ сегѡ̀,

¹⁶а҆́гг҃лъ, и҆́же мѧ̀ и҆збавлѧ́етъ ѿ всѣ́хъ ѕѡ́лъ, да блгⷭви́тъ дѣ҄тища сїѧ҄, и҆ прозове́тсѧ въ ни́хъ и҆́мѧ моѐ, и҆ и҆́мѧ ѻ҆тє́цъ мои́хъ, а҆враа́ма и҆ ї҆саа́ка, и҆ да ѹ҆мно́жатсѧ во мно́жество мно́гое на землѝ.

¹⁷Ви́дѣвъ же ї҆ѡ́сифъ, ѩ҆́кѡ возложѝ ѻ҆те́цъ є҆гѡ̀ рѹ́кѹ деснѹ́ю свою̀ на главѹ̀ є҆фре́млю, тѧ́жко є҆мѹ̀ ѩ҆ви́сѧ: и҆ прїѧ̀ ї҆ѡ́сифъ рѹ́кѹ ѻ҆тца̀ своегѡ̀ ѿѧ́ти ю҆̀ ѿ главы̀ є҆фре́мли на главѹ̀ манассі́инѹ,

¹⁸и҆ речѐ ї҆ѡ́сифъ ѻ҆тцѹ̀ своемѹ̀: не та́кѡ, ѻ҆́тче: се́й бо (є҆́сть) пе́рвенецъ, возложѝ рѹ́кѹ деснѹ́ю твою̀ на главѹ̀ є҆гѡ̀.

¹⁹И҆ не хотѧ́ше, но речѐ: вѣ́мъ, ча́до, вѣ́мъ: и҆ се́й бѹ́детъ въ лю́ди, и҆ се́й вознесе́тсѧ: но бра́тъ є҆гѡ̀ ме́ншїй бо́лїй є҆гѡ̀ бѹ́детъ, и҆ сѣ́мѧ є҆гѡ̀ бѹ́детъ во мно́жество ѩ҆зы́кѡвъ.

²⁰И҆ благословѝ ѧ҆̀ въ то́мъ днѝ, глаго́лѧ: въ ва́съ благослови́тсѧ ї҆и҃ль, глаго́люще: да сотвори́тъ тѧ̀ бг҃ъ ѩ҆́коже є҆фре́ма и҆ ѩ҆́кѡ манассі́ю. И҆ поста́ви є҆фре́ма вы́шше манассі́и.

²¹Рече́ же ї҆и҃ль ї҆ѡ́сифѹ: сѐ, а҆́зъ ѹ҆мира́ю, и҆ бѹ́детъ бг҃ъ съ ва́ми, и҆ возврати́тъ ва́съ ѿ землѝ сеѧ̀ на зе́млю ѻ҆тє́цъ ва́шихъ:

²²а҆́зъ же даю́ ти сїкі́мѹ и҆збра́ннѹю свы́ше бра́тїи твоеѧ̀, ю҆́же взѧ́хъ и҆з̾ рѹкѝ а҆морре́йски мече́мъ мои́мъ и҆ лѹ́комъ.