Read Библия Церковнославянская Бытїѐ 49 Bible Online

Бытїѐ 49 - Библия Церковнославянская bible

Бытїѐ 49

¹Призва́ же ї҆а́кѡвъ сы́ны своѧ҄ и҆ речѐ и҆̀мъ: собери́тесѧ, да возвѣщѹ̀ ва́мъ, что̀ срѧ́щетъ ва́съ въ послѣ҄днїѧ дни҄:

²собери́тесѧ и҆ послѹ́шайте менє̀, сы́нове ї҆а҄кѡвли, послѹ́шайте ї҆и҃лѧ, послѹ́шайте ѻ҆тца̀ ва́шегѡ.

³Рѹви́мъ, пе́рвенецъ мо́й, ты̀ крѣ́пость моѧ̀ и҆ нача́ло ча҄дъ мои́хъ: же́стокъ терпѣ́ти и҆ же́стокъ ѹ҆по́рникъ:

⁴досади́лъ є҆сѝ ѩ҆́кѡ вода̀, да не воскипи́ши: возше́лъ бо є҆сѝ на ло́же ѻ҆тца̀ твоегѡ̀, тогда̀ ѡ҆скверни́лъ є҆сѝ посте́лю, и҆дѣ́же возше́лъ є҆сѝ.

⁵Сѷмеѡ́нъ и҆ леѵі́й бра́тїѧ соверши́ста ѡ҆би́дѹ ѿ во́ли своеѧ̀:

⁶въ совѣ́тъ и҆́хъ да не прїи́детъ дѹша̀ моѧ̀, и҆ къ собра́нїю и҆́хъ да не прилѣпѧ́тсѧ внѹ́трєннѧѧ моѧ҄: ѩ҆́кѡ во гнѣ́вѣ свое́мъ и҆зби́ста человѣ́ки, и҆ въ по́хоти свое́й прерѣ́заста жи҄лы ю҆нца̀:

⁷проклѧта̀ ѩ҆́рость и҆́хъ, ѩ҆́кѡ ѹ҆по́рна, и҆ гнѣ́въ и҆́хъ, ѩ҆́кѡ ѡ҆жесточи́сѧ: раздѣлю̀ и҆̀хъ во ї҆а́кѡвѣ и҆ разсѣ́ю и҆̀хъ во ї҆и҃ли.

⁸Ї҆ѹ́до, тебѐ похва́лѧтъ бра́тїѧ твоѧ҄, рѹ́цѣ твоѝ на плещѹ҄ вра҄гъ твои́хъ: покло́нѧтсѧ тебѣ̀ сы́нове ѻ҆тца̀ твоегѡ̀:

⁹скѵ́менъ льво́въ ї҆ѹ́да: ѿ лѣ́торасли, сы́не мо́й, возше́лъ є҆сѝ: возле́гъ ѹ҆снѹ́лъ є҆сѝ ѩ҆́кѡ ле́въ и҆ ѩ҆́кѡ скѵ́менъ: кто̀ возбѹ́дитъ є҆го̀;

¹⁰не ѡ҆скѹдѣ́етъ кнѧ́зь ѿ ї҆ѹ́ды и҆ во́ждь ѿ чре́слъ є҆гѡ̀, до́ндеже прїи́дѹтъ ѿложє́наѧ є҆мѹ̀, и҆ то́й ча́ѧнїе ѩ҆зы́кѡвъ:

¹¹привѧзѹ́ѧй къ лозѣ̀ жребѧ̀ своѐ и҆ къ ві́нничїю жребца̀ ѻ҆слѧ́те своегѡ̀, и҆спере́тъ вїно́мъ ѻ҆де́ждѹ свою̀ и҆ кро́вїю гро́здїѧ ѡ҆дѣѧ́нїе своѐ:

¹²радостотвѡ́рны ѻ҆́чи є҆гѡ̀ па́че вїна̀, и҆ бѣлы҄ зѹ́бы є҆гѡ̀ па́че млека̀.

¹³Завѹлѡ́нъ при мо́ри всели́тсѧ, и҆ то́й на приста́нищи корабле́й, и҆ простре́тсѧ да́же до сїдѡ́на.

¹⁴Ї҆ссаха́ръ до́брое возжела̀, почива́ѧ посредѣ̀ предѣ́лѡвъ,

¹⁵и҆ ви́дѣвъ поко́й, ѩ҆́кѡ до́бръ, и҆ зе́млю, ѩ҆́кѡ тѹчна̀, подложѝ ра́мы своѝ на трѹ́дъ, и҆ бы́сть мѹ́жъ земледѣ́лецъ.

¹⁶Да́нъ сѹди́ти и҆́мать лю́ди своѧ҄, ѩ҆́кѡ и҆ є҆ди́но пле́мѧ во ї҆и҃ли,

¹⁷и҆ да бѹ́детъ да́нъ ѕмі́й на пѹтѝ, сѣдѧ́й на распѹ́тїи, ѹ҆грыза́ѧ пѧ́тѹ ко́нскѹ:

¹⁸и҆ паде́тъ ко́нникъ вспѧ́ть, спⷭнїѧ жды́й гдⷭнѧ.

¹⁹Га́дъ, и҆скѹше́нїе и҆скѹ́ситъ є҆го̀: ѻ҆́нъ же и҆скѹ́ситъ того̀ при нога́хъ.

²⁰А҆си́ръ, тѹ́ченъ є҆гѡ̀ хлѣ́бъ, и҆ то́й да́стъ пи́щѹ кнѧзє́мъ.

²¹Нефѳалі́мъ сте́бль распѹща́ющаѧсѧ, и҆здаѧ́й во ѿ́расли добро́тѹ.

²²Сы́нъ возраще́нъ ї҆ѡ́сифъ, сы́нъ возраще́нъ мо́й ре́вностный, сы́нъ мо́й ю҆нѣ́йшїй, ко мнѣ̀ ѡ҆брати́сѧ:

²³на него́же совѣ́тѹюще ѹ҆корѧ́хѹ и҆ налѧца́хѹ на́нь госпо́дїе стрѣлѧ́нїй,

²⁴и҆ сотро́шасѧ съ крѣ́постїю лѹ́ки и҆́хъ, и҆ разслабѣ́ша жи҄лы мы́шцей рѹ́къ и҆́хъ, рѹко́ю си́льнагѡ ї҆а́кѡва: ѿтѹ́дѹ ѹ҆крѣпи́сѧ ї҆и҃ль ѿ бг҃а ѻ҆тца̀ твоегѡ̀,

²⁵и҆ помо́же тебѣ̀ бг҃ъ мо́й, и҆ блгⷭви́ тѧ блгⷭве́нїемъ нбⷭнымъ свы́ше и҆ блгⷭве́нїемъ землѝ и҆мѹ́щїѧ всѧ҄: блгⷭве́нїѧ ра́ди сосцє́въ и҆ ложе́снъ,

²⁶блгⷭве́нїѧ ѻ҆тца̀ твоегѡ̀ и҆ ма́тере твоеѧ̀: преѡдолѣ̀ па́че блгⷭве́нїѧ го́ръ пребыва́ющихъ и҆ блгⷭве́нїѧ холмѡ́въ вѣ́чныхъ: бѹ́дѹтъ на главѣ̀ ї҆ѡ́сифовѣ и҆ на версѣ̀ (главы̀) бра́тїй, и҆́миже ѡ҆блада́ше.

²⁷Венїамі́нъ во́лкъ хи́щникъ, ра́нѡ ѩ҆́стъ є҆щѐ и҆ на ве́черъ дае́тъ пи́щѹ.

²⁸Всѝ сі́и сы́нове ї҆а҄кѡвли двана́десѧть: и҆ сїѧ҄ глаго́ла и҆̀мъ ѻ҆те́цъ и҆́хъ, и҆ благословѝ и҆̀хъ: коего́ждо по благослове́нїю є҆гѡ̀ благословѝ и҆̀хъ,

²⁹и҆ речѐ и҆̀мъ: а҆́зъ прилага́юсѧ къ лю́демъ мои҄мъ: погреби́те мѧ̀ со ѻ҆тцы҄ мои́ми въ пеще́рѣ, ѩ҆́же є҆́сть въ селѣ̀ є҆фрѡ́на хетте́анина,

³⁰въ пеще́рѣ сѹгѹ́бѣй, ѩ҆́же прѧ́мѡ мамврі́и въ землѝ ханаа́ни, ю҆́же стѧжа̀ а҆враа́мъ пеще́рѹ ѹ҆ є҆фрѡ́на хетте́анина въ стѧжа́нїе гро́ба.

³¹Та́мѡ погребо́ша а҆враа́ма и҆ са́ррѹ женѹ̀ є҆гѡ̀, та́мѡ погребо́ша ї҆саа́ка и҆ реве́ккѹ женѹ̀ є҆гѡ̀, та́мѡ погребо́ша лі́ю,

³²въ стѧжа́нїи села̀ и҆ пеще́ры, ѩ҆́же є҆́сть въ не́мъ ѹ҆ сынѡ́въ хетте́овыхъ.

³³И҆ преста̀ ї҆а́кѡвъ завѣща́ѧ сынѡ́мъ свои҄мъ, и҆ возложи́въ ї҆а́кѡвъ но́зѣ своѝ на ѻ҆́дръ ѹ҆́мре, и҆ приложи́сѧ къ лю́демъ свои҄мъ.