Read Библия Церковнославянская Бытїѐ 5 Bible Online

Бытїѐ 5 - Библия Церковнославянская bible

Бытїѐ 5

¹Сїѧ̀ кни́га бытїѧ̀ человѣ́ча, въ ѻ҆́ньже де́нь сотворѝ бг҃ъ а҆да́ма, по ѡ҆́бразѹ бж҃їю сотворѝ є҆го̀,

²мѹ́жа и҆ женѹ̀ сотворѝ и҆̀хъ и҆ блгⷭвѝ и҆̀хъ: и҆ наречѐ и҆́мѧ є҆мѹ̀ а҆да́мъ, въ ѻ҆́ньже де́нь сотворѝ и҆̀хъ.

³Поживе́ же а҆да́мъ лѣ́тъ двѣ́стѣ три́десѧть и҆ родѝ сы́на по ви́дѹ своемѹ̀ и҆ по ѡ҆́бразѹ своемѹ̀, и҆ наречѐ и҆́мѧ є҆мѹ̀ си́ѳъ.

⁴Бы́ша же дні́е а҆да́мѡвы, ѩ҆̀же поживѐ, по є҆́же роди́ти є҆мѹ̀ си́ѳа, лѣ́тъ се́дмь сѡ́тъ, и҆ родѝ сы́ны и҆ дщє́ри.

⁵И҆ бы́ша всѝ дні́е а҆да́мѡвы, ѩ҆̀же поживѐ, лѣ́тъ де́вѧть сѡ́тъ и҆ три́десѧть: и҆ ѹ҆́мре.

⁶Поживе́ же си́ѳъ лѣ́тъ двѣ́стѣ пѧ́ть и҆ родѝ є҆нѡ́са.

⁷И҆ поживѐ си́ѳъ, по є҆́же роди́ти є҆мѹ̀ є҆нѡ́са, лѣ́тъ се́дмь сѡ́тъ и҆ се́дмь, и҆ родѝ сы́ны и҆ дщє́ри.

⁸И҆ бы́ша всѝ дні́е си́ѳѡвы лѣ́тъ де́вѧть сѡ́тъ и҆ двана́десѧть: и҆ ѹ҆́мре.

⁹И҆ поживѐ є҆нѡ́съ лѣ́тъ сто̀ де́вѧтьдесѧтъ и҆ родѝ каїна́на.

¹⁰И҆ поживѐ є҆нѡ́съ, по є҆́же роди́ти є҆мѹ̀ каїна́на, лѣ́тъ се́дмь сѡ́тъ и҆ пѧтьна́десѧть, и҆ родѝ сы́ны и҆ дщє́ри.

¹¹И҆ бы́ша всѝ дні́е є҆нѡ́сѡвы лѣ́тъ де́вѧть сѡ́тъ и҆ пѧ́ть: и҆ ѹ҆́мре.

¹²И҆ поживѐ каїна́нъ лѣ́тъ сто̀ се́дмьдесѧтъ и҆ родѝ малелеи́ла.

¹³И҆ поживѐ каїна́нъ, по є҆́же роди́ти є҆мѹ̀ малелеи́ла, лѣ́тъ се́дмь сѡ́тъ и҆ четы́редесѧть, и҆ родѝ сы́ны и҆ дщє́ри.

¹⁴И҆ бы́ша всѝ дні́е каїна́нѡвы лѣ́тъ де́вѧть сѡ́тъ и҆ де́сѧть: и҆ ѹ҆́мре.

¹⁵И҆ поживѐ малелеи́лъ лѣ́тъ сто̀ шестьдесѧ́тъ пѧ́ть и҆ родѝ ї҆а́реда.

¹⁶И҆ поживѐ малелеи́лъ, по є҆́же роди́ти є҆мѹ̀ ї҆а́реда, лѣ́тъ се́дмь сѡ́тъ и҆ три́десѧть, и҆ родѝ сы́ны и҆ дщє́ри.

¹⁷И҆ бы́ша всѝ дні́е малелеи́лѡвы лѣ́тъ ѻ҆́смь сѡ́тъ и҆ де́вѧтьдесѧтъ пѧ́ть: и҆ ѹ҆́мре.

¹⁸И҆ поживѐ ї҆а́редъ лѣ́тъ сто̀ шестьдесѧ́тъ два̀ и҆ родѝ є҆нѡ́ха.

¹⁹И҆ поживѐ ї҆а́редъ, по є҆́же роди́ти є҆мѹ̀ є҆нѡ́ха, лѣ́тъ ѻ҆́смь сѡ́тъ, и҆ родѝ сы́ны и҆ дщє́ри.

²⁰И҆ бы́ша всѝ дні́е ї҆а́редѡвы лѣ́тъ де́вѧть сѡ́тъ и҆ шестьдесѧ́тъ два̀: и҆ ѹ҆́мре.

²¹И҆ поживѐ є҆нѡ́хъ лѣ́тъ сто̀ шестьдесѧ́тъ пѧ́ть и҆ родѝ маѳѹса́ла.

²²Ѹ҆годи́ же є҆нѡ́хъ бг҃ѹ, и҆ поживѐ є҆нѡ́хъ, по є҆́же роди́ти є҆мѹ̀ маѳѹса́ла, лѣ́тъ двѣ́стѣ, и҆ родѝ сы́ны и҆ дщє́ри.

²³И҆ бы́ша всѝ дні́е є҆нѡ́хѡвы лѣ́тъ три́ста шестьдесѧ́тъ пѧ́ть.

²⁴И҆ ѹ҆годѝ є҆нѡ́хъ бг҃ѹ, и҆ не ѡ҆брѣта́шесѧ, занѐ преложѝ є҆го̀ бг҃ъ.

²⁵И҆ поживѐ маѳѹса́лъ лѣ́тъ сто̀ ѻ҆́смьдесѧтъ се́дмь и҆ родѝ ламе́ха.

²⁶И҆ поживѐ маѳѹса́лъ, по є҆́же роди́ти є҆мѹ̀ ламе́ха, лѣ́тъ се́дмь сѡ́тъ ѻ҆́смьдесѧтъ два̀, и҆ родѝ сы́ны и҆ дщє́ри.

²⁷И҆ бы́ша всѝ дні́е маѳѹса́лѡвы, ѩ҆̀же поживѐ, лѣ́тъ де́вѧть сѡ́тъ и҆ шестьдесѧ́тъ де́вѧть: и҆ ѹ҆́мре.

²⁸И҆ поживѐ ламе́хъ лѣ́тъ сто̀ ѻ҆́смьдесѧтъ ѻ҆́смь и҆ родѝ сы́на,

²⁹и҆ наречѐ и҆́мѧ є҆мѹ̀ нѡ́е, глаго́лѧ: се́й ѹ҆поко́итъ на́съ ѿ дѣ́лъ на́шихъ и҆ ѿ печа́ли рѹ́къ на́шихъ, и҆ ѿ землѝ, ю҆́же проклѧ̀ гдⷭь бг҃ъ.

³⁰И҆ поживѐ ламе́хъ, по є҆́же роди́ти є҆мѹ̀ нѡ́а, лѣ́тъ пѧ́ть сѡ́тъ и҆ шестьдесѧ́тъ пѧ́ть, и҆ родѝ сы́ны и҆ дщє́ри.

³¹И҆ бы́ша всѝ дні́е ламе́хѡвы лѣ́тъ се́дмь сѡ́тъ и҆ пѧтьдесѧ́тъ трѝ: и҆ ѹ҆́мре.

³²И҆ бѣ̀ нѡ́е лѣ́тъ пѧтѝ сѡ́тъ, и҆ родѝ сы́ны трѝ, си́ма, ха́ма, ї҆а́феѳа.