Read Библия Церковнославянская Бытїѐ 6 Bible Online

Бытїѐ 6 - Библия Церковнославянская bible

Бытїѐ 6

¹И҆ бы́сть є҆гда̀ нача́ша человѣ́цы мно́зи быва́ти на землѝ, и҆ дщє́ри роди́шасѧ и҆̀мъ:

²ви́дѣвше же сы́нове бж҃їи дщє́ри человѣ҄чи, ѩ҆́кѡ добры҄ сѹ́ть, поѧ́ша себѣ̀ жєны̀ ѿ всѣ́хъ, ѩ҆̀же и҆збра́ша.

³И҆ речѐ гдⷭь бг҃ъ: не и҆́мать дх҃ъ мо́й пребыва́ти въ человѣ́цѣхъ си́хъ во вѣ́къ, занѐ сѹ́ть пло́ть: бѹ́дѹтъ же дні́е и҆́хъ лѣ́тъ сто̀ два́десѧть.

⁴И҆споли́ни же бѧ́хѹ на землѝ во дни҄ ѡ҆́ны: и҆ пото́мъ, є҆гда̀ вхожда́хѹ сы́нове бж҃їи къ дще́ремъ человѣ́чєскимъ, и҆ ражда́хѹ себѣ̀: ті́и бѧ́хѹ и҆споли́ни, и҆̀же ѿ вѣ́ка, человѣ́цы и҆мени́тїи.

⁵Ви́дѣвъ же гдⷭь бг҃ъ, ѩ҆́кѡ ѹ҆мно́жишасѧ ѕлѡ́бы человѣ́кѡвъ на землѝ: и҆ всѧ́къ помышлѧ́етъ въ се́рдцы свое́мъ прилѣ́жнѡ на ѕла҄ѧ во всѧ҄ дни҄:

⁶и҆ помы́сли бг҃ъ, ѩ҆́кѡ сотворѝ человѣ́ка на землѝ, и҆ размы́сли.

⁷И҆ речѐ бг҃ъ: потреблю̀ человѣ́ка, є҆го́же сотвори́хъ, ѿ лица̀ землѝ, ѿ человѣ́ка да́же до скота̀, и҆ ѿ га҄дъ да́же до пти́цъ небе́сныхъ: занѐ размы́слихъ, ѩ҆́кѡ сотвори́хъ ѧ҆̀.

⁸Нѡ́е же ѡ҆брѣ́те блгдть пред̾ гдⷭемъ бг҃омъ.

⁹Сїѧ҄ же бытїѧ҄ нѡ́єва: нѡ́е человѣ́къ првднъ, соверше́нъ сы́й въ ро́дѣ свое́мъ, бг҃ѹ ѹ҆годѝ нѡ́е.

¹⁰Роди́ же нѡ́е трѝ сы́ны, си́ма, ха́ма, ї҆а́феѳа.

¹¹Растлѣ́сѧ же землѧ̀ пред̾ бг҃омъ, и҆ напо́лнисѧ землѧ̀ непра́вды.

¹²И҆ ви́дѣ гдⷭь бг҃ъ зе́млю, и҆ бѣ̀ растлѣ́нна: ѩ҆́кѡ растлѝ всѧ́ка пло́ть пѹ́ть сво́й на землѝ.

¹³И҆ речѐ гдⷭь бг҃ъ нѡ́ю: вре́мѧ всѧ́кагѡ человѣ́ка прїи́де пред̾ мѧ̀, ѩ҆́кѡ и҆спо́лнисѧ землѧ̀ непра́вды ѿ ни́хъ: и҆ сѐ, а҆́зъ погѹблю̀ и҆̀хъ и҆ зе́млю.

¹⁴Сотворѝ ѹ҆̀бо себѣ̀ ковче́гъ ѿ дре́въ (негнїю́щихъ) четвероѹго́лныхъ: гнѣ́зда сотвори́ши въ ковче́зѣ, и҆ посмоли́ши є҆го̀ внѹтрьѹ́дѹ и҆ внѣѹ́дѹ смоло́ю.

¹⁵И҆ та́кѡ сотвори́ши ковче́гъ: тре́хъ сѡ́тъ лакте́й долгота̀ ковче́га, и҆ пѧти́десѧти лакте́й широта̀, и҆ три́десѧти лакте́й высота̀ є҆гѡ̀.

¹⁶Собира́ѧ сво́домъ сотвори́ши ковче́гъ, и҆ въ ла́коть сверши́ши є҆го̀ свы́ше: две́рь же ковче́га сотвори́ши ѿ страны̀: ѡ҆бита҄лища двокрѡ́вна и҆ трекрѡ́вна сотвори́ши въ не́мъ.

¹⁷А҆́зъ же, сѐ, наведѹ̀ пото́пъ, во́дѹ на зе́млю, погѹби́ти всѧ́кѹ пло́ть, въ не́йже є҆́сть дѹ́хъ жи́зни под̾ небесе́мъ: и҆ є҆ли҄ка сѹ́ть на землѝ, сконча́ютсѧ.

¹⁸И҆ поста́влю завѣ́тъ мо́й съ тобо́ю: вни́деши же въ ковче́гъ ты̀ и҆ сы́нове твоѝ, и҆ жена̀ твоѧ̀ и҆ жєны̀ сынѡ́въ твои́хъ съ тобо́ю.

¹⁹И҆ ѿ всѣ́хъ скотѡ́въ и҆ ѿ всѣ́хъ га҄дъ, и҆ ѿ всѣ́хъ ѕвѣре́й, и҆ ѿ всѧ́кїѧ пло́ти, два̀ два̀ ѿ всѣ́хъ введе́ши въ ковче́гъ, да пита́еши съ собо́ю: мѹ́жескїй по́лъ и҆ же́нскїй бѹ́дѹтъ.

²⁰Ѿ всѣ́хъ пти́цъ перна́тыхъ по ро́дѹ, и҆ ѿ всѣ́хъ скотѡ́въ по ро́дѹ, и҆ ѿ всѣ́хъ гадѡ́въ по́лзающихъ по землѝ по ро́дѹ и҆́хъ, два̀ два̀ ѿ всѣ́хъ вни́дѹтъ къ тебѣ̀, пита́тисѧ съ тобо́ю, мѹ́жескїй по́лъ и҆ же́нскїй.

²¹Ты́ же возмѝ себѣ̀ ѿ всѣ́хъ бра́шенъ, ѩ҆̀же и҆́мате ѩ҆́сти, и҆ собере́ши къ себѣ̀, и҆ бѹ́дѹтъ тебѣ̀ и҆ ѡ҆́нымъ бра́шно.

²²И҆ сотворѝ нѡ́е всѧ҄ є҆ли҄ка заповѣ́да є҆мѹ̀ гдⷭь бг҃ъ, та́кѡ сотворѝ.