Read Библия Церковнославянская Бытїѐ 7 Bible Online

Бытїѐ 7 - Библия Церковнославянская bible

Бытїѐ 7

¹И҆ речѐ гдⷭь бг҃ъ къ нѡ́ю: вни́ди ты̀ и҆ ве́сь до́мъ тво́й въ ковче́гъ, ѩ҆́кѡ тѧ̀ ви́дѣхъ првдна предо мно́ю въ ро́дѣ се́мъ:

²ѿ скотѡ́въ же чи́стыхъ введѝ къ себѣ̀ се́дмь се́дмь, мѹ́жескїй по́лъ и҆ же́нскїй: ѿ скотѡ́въ же нечи́стыхъ два̀ два̀, мѹ́жескїй по́лъ и҆ же́нскїй:

³и҆ ѿ пти́цъ небе́сныхъ чи́стыхъ се́дмь се́дмь, мѹ́жескїй по́лъ и҆ же́нскїй: и҆ ѿ всѣ́хъ пти́цъ нечи́стыхъ двѣ̀ двѣ̀, мѹ́жескїй по́лъ и҆ же́нскїй, препита́ти сѣ́мѧ по все́й землѝ:

⁴є҆ще́ бо дні́й се́дмь, а҆́зъ наведѹ̀ до́ждь на зе́млю четы́редесѧть дні́й и҆ четы́редесѧть ноще́й: и҆ потреблю̀ всѧ́кое воста́нїе, є҆́же сотвори́хъ, ѿ лица̀ всеѧ̀ землѝ.

⁵И҆ сотворѝ нѡ́е всѧ҄, є҆ли҄ка заповѣ́да є҆мѹ̀ гдⷭь бг҃ъ.

⁶Нѡ́е же бѣ̀ лѣ́тъ шестѝ сѡ́тъ, и҆ пото́пъ водны́й бы́сть на землѝ.

⁷Вни́де же нѡ́е и҆ сы́нове є҆гѡ̀, и҆ жена̀ є҆гѡ̀ и҆ жєны̀ сынѡ́въ є҆гѡ̀ съ ни́мъ въ ковче́гъ, воды̀ ра́ди пото́па.

⁸И҆ ѿ пти́цъ чи́стыхъ и҆ ѿ пти́цъ нечи́стыхъ, и҆ ѿ скѡ́тъ чи́стыхъ и҆ ѿ скѡ́тъ нечи́стыхъ, (и҆ ѿ ѕвѣре́й,) и҆ ѿ всѣ́хъ гадѡ́въ пресмыка́ющихсѧ по землѝ,

⁹два̀ два̀ внидо́ша къ нѡ́ю въ ковче́гъ, мѹ́жескїй по́лъ и҆ же́нскїй, ѩ҆́коже заповѣ́да (гдⷭь) бг҃ъ нѡ́ю.

¹⁰И҆ бы́сть по седмѝ дне́хъ, и҆ вода̀ пото́пнаѧ бы́сть на землѝ.

¹¹Въ шестьсо́тное лѣ́то въ житїѝ нѡ́евѣ, втора́гѡ мцⷭа, въ два́десѧть седмы́й де́нь мцⷭа, въ де́нь то́й разверзо́шасѧ всѝ и҆сто́чницы бе́здны, и҆ хлѧ҄би небє́сныѧ ѿверзо́шасѧ:

¹²и҆ бы́сть до́ждь на зе́млю четы́редесѧть дні́й и҆ четы́редесѧть ноще́й.

¹³Въ де́нь то́й вни́де нѡ́е, си́мъ, ха́мъ, ї҆а́феѳъ, сы́нове нѡ́євы, и҆ жена̀ нѡ́ева, и҆ трѝ жєны̀ сынѡ́въ є҆гѡ̀ съ ни́мъ въ ковче́гъ.

¹⁴И҆ всѝ ѕвѣ́рїе земні́и по ро́дѹ, и҆ всѝ ско́ти по ро́дѹ, и҆ всѧ́кїй га́дъ дви́жѹщїйсѧ на землѝ по ро́дѹ, и҆ всѧ́каѧ пти́ца перна́таѧ по ро́дѹ своемѹ̀,

¹⁵внидо́ша къ нѡ́ю въ ковче́гъ два̀ два̀, мѹ́жескїй по́лъ и҆ же́нскїй, ѿ всѧ́кїѧ пло́ти, въ не́йже є҆́сть дѹ́хъ живо́тный:

¹⁶и҆ входѧ҄щаѧ мѹ́жескїй по́лъ и҆ же́нскїй ѿ всѧ́кїѧ пло́ти, внидо́ша къ нѡ́ю въ ковче́гъ, ѩ҆́коже заповѣ́да гдⷭь бг҃ъ нѡ́ю: и҆ затворѝ гдⷭь бг҃ъ ковче́гъ ѿвнѣ̀ є҆гѡ̀.

¹⁷И҆ бы́сть пото́пъ четы́редесѧть дні́й и҆ четы́редесѧть ноще́й на землѝ, и҆ ѹ҆мно́жисѧ вода̀ и҆ взѧ̀ ковче́гъ, и҆ возвы́сисѧ ѿ землѝ:

¹⁸и҆ возмога́ше вода̀, и҆ ѹ҆множа́шесѧ ѕѣлѡ̀ на землѝ, и҆ ноша́шесѧ ковче́гъ верхѹ̀ воды̀.

¹⁹Вода́ же возмога́ше ѕѣлѡ̀ ѕѣлѡ̀ на землѝ: и҆ покры̀ всѧ҄ го́ры высѡ́кїѧ, ѩ҆̀же бѧ́хѹ под̾ небесе́мъ:

²⁰пѧтьна́десѧть лакте́й горѣ̀ возвы́сисѧ вода̀, и҆ покры̀ всѧ҄ го́ры высѡ́кїѧ.

²¹И҆ ѹ҆́мре всѧ́каѧ пло́ть дви́жѹщаѧсѧ по землѝ пти́цъ и҆ скотѡ́въ и҆ ѕвѣре́й, и҆ всѧ́кїй га́дъ дви́жѹщїйсѧ на землѝ, и҆ всѧ́кїй человѣ́къ,

²²и҆ всѧ҄ є҆ли҄ка и҆́мѹтъ дыха́нїе жи́зни, и҆ всѐ є҆́же бѣ̀ на сѹ́ши ѹ҆́мре.

²³И҆ потреби́сѧ всѧ́кое воста́нїе, є҆́же бѧ́ше на лицы̀ всеѧ̀ землѝ, ѿ человѣ́ка да́же до скота̀ и҆ гадѡ́въ и҆ пти́цъ небе́сныхъ, и҆ потреби́шасѧ ѿ землѝ: и҆ ѡ҆ста̀ нѡ́е є҆ди́нъ, и҆ и҆̀же съ ни́мъ въ ковче́зѣ.

²⁴И҆ возвы́сисѧ вода̀ над̾ земле́ю дні́й сто̀ пѧтьдесѧ́тъ.