Read Библия Церковнославянская Бытїѐ 8 Bible Online

Бытїѐ 8 - Библия Церковнославянская bible

Бытїѐ 8

¹И҆ помѧнѹ̀ бг҃ъ нѡ́а, и҆ всѧ҄ ѕвѣ҄ри, и҆ всѧ҄ скоты̀, и҆ всѧ҄ пти҄цы, и҆ всѧ҄ га́ды пресмыка́ющыѧсѧ, є҆ли҄ка бѣ́хѹ съ ни́мъ въ ковче́зѣ: и҆ наведѐ бг҃ъ дѹ́хъ на зе́млю, и҆ преста̀ вода̀.

²И҆ заключи́шасѧ и҆сто́чницы бе́здны и҆ хлѧ҄би небє́сныѧ: и҆ ѹ҆держа́сѧ до́ждь ѿ небесѐ.

³И҆ вспѧ́ть по́йде вода̀ и҆дѹ́щаѧ ѿ землѝ: и҆ ѹ҆малѧ́шесѧ вода̀ по стѣ̀ пѧти́десѧтихъ дне́хъ.

⁴И҆ сѣ́де ковче́гъ въ мцⷭъ седмы́й, въ два́десѧть седмы́й де́нь мцⷭа, на гора́хъ а҆рара́тскихъ.

⁵Вода́ же ѹ҆ходѧ́щи ѹ҆малѧ́шесѧ да́же до десѧ́тагѡ мцⷭа: и҆ въ десѧ́тый мцⷭъ, въ пе́рвый де́нь мцⷭа ѩ҆ви́шасѧ версѝ го́ръ.

⁶И҆ бы́сть по четы́редесѧтихъ дне́хъ ѿве́рзе нѡ́е ѻ҆ко́нце ковче́га, є҆́же сотворѝ,

⁷и҆ посла̀ вра́на (*ви́дѣти, а҆́ще ѹ҆стѹпи́ла вода̀ ѿ лица̀ землѝ): и҆ и҆зше́дъ не возврати́сѧ, до́ндеже и҆зсѧ́че вода̀ ѿ землѝ.

⁸И҆ посла̀ голѹби́цѹ по не́мъ ви́дѣти, а҆́ще ѹ҆стѹпи́ла вода̀ ѿ лица̀ землѝ:

⁹и҆ не ѡ҆брѣ́тши голѹби́ца поко́ѧ нога́ма свои́ма, возврати́сѧ къ немѹ̀ въ ковче́гъ, ѩ҆́кѡ вода̀ бѧ́ше по всемѹ̀ лицѹ̀ всеѧ̀ землѝ: и҆ просте́ръ рѹ́кѹ свою̀, прїѧ́тъ ю҆̀ и҆ внесѐ ю҆̀ къ себѣ̀ въ ковче́гъ.

¹⁰И҆ преме́дливъ є҆щѐ се́дмь дні́й, па́ки посла̀ голѹби́цѹ и҆з̾ ковче́га.

¹¹И҆ возврати́сѧ къ немѹ̀ голѹби́ца къ ве́черѹ, и҆ и҆мѣ́ѧше сѹче́цъ ма́сличенъ съ ли́ствїемъ во ѹ҆стѣ́хъ свои́хъ: и҆ позна̀ нѡ́е, ѩ҆́кѡ ѹ҆стѹпѝ вода̀ ѿ лица̀ землѝ.

¹²И҆ преме́дливъ є҆щѐ се́дмь дні́й дрѹги́хъ, па́ки посла̀ голѹби́цѹ, и҆ не приложѝ возврати́тисѧ къ немѹ̀ пото́мъ.

¹³И҆ бы́сть въ пе́рвое и҆ шестьсо́тное лѣ́то житїѧ̀ нѡ́ева, въ пе́рвый де́нь пе́рвагѡ мцⷭа, и҆зсѧ́че вода̀ ѿ лица̀ землѝ: и҆ ѿкры̀ нѡ́е покро́въ ковче́га, є҆го́же сотворѝ, и҆ ви́дѣ, ѩ҆́кѡ и҆зсѧ́че вода̀ ѿ лица̀ землѝ.

¹⁴Въ мцⷭъ же вторы́й, въ два́десѧть седмы́й де́нь мцⷭа и҆́зсше землѧ̀.

¹⁵И҆ речѐ гдⷭь бг҃ъ нѡ́еви, гл҃ѧ:

¹⁶и҆зы́ди и҆з̾ ковче́га ты̀ и҆ жена̀ твоѧ̀, и҆ сы́нове твоѝ и҆ жєны̀ сынѡ́въ твои́хъ съ тобо́ю:

¹⁷и҆ всѧ҄ ѕвѣ҄ри, є҆ли́цы сѹ́ть съ тобо́ю, и҆ всѧ́кѹ пло́ть ѿ пти́цъ да́же до скотѡ́въ, и҆ всѧ́къ га́дъ дви́жѹщїйсѧ по землѝ и҆зведѝ съ собо́ю: и҆ расти́тесѧ и҆ мно́житесѧ на землѝ.

¹⁸И҆ и҆зы́де нѡ́е и҆ жена̀ є҆гѡ̀, и҆ сы́нове є҆гѡ̀ и҆ жєны̀ сынѡ́въ є҆гѡ̀ съ ни́мъ,

¹⁹и҆ всѝ ѕвѣ́рїе, и҆ всѝ ско́ти, и҆ всѧ҄ пти҄цы и҆ всѝ га́ди дви́жѹщїисѧ по ро́дѹ своемѹ̀ на землѝ и҆зыдо́ша и҆з̾ ковче́га.

²⁰И҆ созда̀ нѡ́е же́ртвенникъ гдⷭеви: и҆ взѧ̀ ѿ всѣ́хъ скотѡ́въ чи́стыхъ и҆ ѿ всѣ́хъ пти́цъ чи́стыхъ и҆ вознесѐ во всесожже́нїе на же́ртвенникъ.

²¹И҆ ѡ҆бонѧ̀ гдⷭь воню̀ благоѹха́нїѧ. И҆ речѐ гдⷭь бг҃ъ размы́сливъ: не приложѹ̀ ктомѹ̀ проклѧ́ти зе́млю за дѣла̀ человѣ́чєскаѧ, занѐ прилежи́тъ помышле́нїе человѣ́кѹ прилѣ́жнѡ на ѕла҄ѧ ѿ ю҆́ности є҆гѡ̀: не приложѹ̀ ѹ҆̀бо ктомѹ̀ порази́ти всѧ́кѹю пло́ть живѹ́щѹю, ѩ҆́коже сотвори́хъ:

²²во всѧ҄ дни҄ землѝ сѣ́ѧтва и҆ жа́тва, зима̀ и҆ зно́й, лѣ́то и҆ весна̀, де́нь и҆ но́щь не преста́нѹтъ.