Read Библия Церковнославянская Бытїѐ 9 Bible Online

Бытїѐ 9 - Библия Церковнославянская bible

Бытїѐ 9

¹И҆ блгⷭвѝ бг҃ъ нѡ́а и҆ сы́ны є҆гѡ̀ и҆ речѐ и҆̀мъ: расти́тесѧ и҆ мно́житесѧ, и҆ напо́лните зе́млю и҆ ѡ҆блада́йте є҆́ю:

²и҆ стра́хъ и҆ тре́петъ ва́шъ бѹ́детъ на всѣ́хъ ѕвѣре́хъ земны́хъ (и҆ на всѣ́хъ скотѣ́хъ земны́хъ), на всѣ́хъ пти́цахъ небе́сныхъ и҆ на всѣ́хъ дви́жѹщихсѧ по землѝ и҆ на всѣ́хъ ры́бахъ морски́хъ: въ рѹ́цѣ ва́шы вда́хъ (ѧ҆̀).

³И҆ всѧ́кое дви́жѹщеесѧ, є҆́же є҆́сть жи́во, ва́мъ бѹ́детъ въ снѣ́дь: ѩ҆́кѡ ѕе́лїе травно́е да́хъ ва́мъ всѐ.

⁴То́чїю мѧ́са въ кро́ви дѹшѝ да не снѣ́сте.

⁵Кро́ви бо ва́шей, дѹ́шъ ва́шихъ, ѿ рѹкѝ всѧ́кагѡ ѕвѣ́рѧ и҆зыщѹ̀ (є҆ѧ̀): и҆ ѿ рѹкѝ человѣ́ка бра́та и҆зыщѹ̀ є҆ѧ̀.

⁶Пролива́ѧй кро́вь человѣ́чѹ, въ є҆ѧ̀ мѣ́стѡ є҆гѡ̀ пролїе́тсѧ: ѩ҆́кѡ во ѡ҆́бразъ бж҃їй сотвори́хъ человѣ́ка.

⁷Вы́ же расти́тесѧ и҆ мно́житесѧ, и҆ напо́лните зе́млю, и҆ мно́житесѧ на не́й.

⁸И҆ речѐ бг҃ъ нѡ́еви и҆ сынѡ́мъ є҆гѡ̀ съ ни́мъ, гл҃ѧ:

⁹сѐ, а҆́зъ поставлѧ́ю завѣ́тъ мо́й ва́мъ и҆ сѣ́мени ва́шемѹ по ва́съ,

¹⁰и҆ всѧ́кой дѹшѝ живѹ́щей съ ва́ми ѿ пти́цъ и҆ ѿ скѡ́тъ и҆ всѣ҄мъ ѕвѣрє́мъ зємны́мъ, є҆ли҄ка съ ва́ми (сѹ́ть) ѿ всѣ́хъ и҆зше́дшихъ и҆з̾ ковче́га:

¹¹и҆ поста́влю завѣ́тъ мо́й съ ва́ми: и҆ не ѹ҆́мретъ всѧ́ка пло́ть ктомѹ̀ ѿ воды̀ пото́пныѧ, и҆ ктомѹ̀ не бѹ́детъ пото́пъ водны́й, є҆́же и҆стли́ти всю̀ зе́млю.

¹²И҆ речѐ гдⷭь бг҃ъ нѡ́еви: сїѐ зна́менїе завѣ́та, є҆́же а҆́зъ даю̀ междѹ̀ мно́ю и҆ ва́ми, и҆ междѹ̀ всѧ́кою дѹше́ю живо́ю, ѩ҆́же є҆́сть съ ва́ми, въ ро́ды вѣ҄чныѧ:

¹³дѹгѹ̀ мою̀ полага́ю во ѡ҆́блацѣ, и҆ бѹ́детъ въ зна́менїе завѣ́та (вѣ́чнагѡ) междѹ̀ мно́ю и҆ земле́ю.

¹⁴И҆ бѹ́детъ є҆гда̀ наведѹ̀ ѡ҆́блаки на зе́млю, ѩ҆ви́тсѧ дѹга̀ моѧ̀ во ѡ҆́блацѣ:

¹⁵и҆ помѧнѹ̀ завѣ́тъ мо́й, и҆́же є҆́сть междѹ̀ мно́ю и҆ ва́ми, и҆ междѹ̀ всѧ́кою дѹше́ю живѹ́щею во всѧ́кой пло́ти, и҆ не бѹ́детъ ктомѹ̀ вода̀ въ пото́пъ, ѩ҆́кѡ потреби́ти всѧ́кѹ пло́ть.

¹⁶И҆ бѹ́детъ дѹга̀ моѧ̀ во ѡ҆́блацѣ: и҆ ѹ҆зрю̀ ю҆̀, є҆́же помѧнѹ́ти завѣ́тъ вѣ́чный междѹ̀ мно́ю и҆ земле́ю, и҆ междѹ̀ всѧ́кою дѹше́ю живѹ́щею во всѧ́кой пло́ти, ѩ҆́же є҆́сть на землѝ.

¹⁷И҆ речѐ бг҃ъ нѡ́еви: сїѐ зна́менїе завѣ́та, є҆го́же положи́хъ междѹ̀ мно́ю и҆ междѹ̀ всѧ́кою пло́тїю, ѩ҆́же є҆́сть на землѝ.

¹⁸Бы́ша же сы́нове нѡ́євы и҆зше́дшїи и҆з̾ ковче́га, си́мъ, ха́мъ, ї҆а́феѳъ: ха́мъ же бѧ́ше ѻ҆те́цъ ханаа́нь.

¹⁹Трїѐ сі́и сѹ́ть сы́нове нѡ́євы: ѿ си́хъ разсѣ́ѧшасѧ по все́й землѝ.

²⁰И҆ нача́тъ нѡ́е человѣ́къ дѣ́латель (бы́ти) землѝ, и҆ насадѝ вїногра́дъ:

²¹и҆ и҆спѝ ѿ вїна̀, и҆ ѹ҆пи́сѧ, и҆ ѡ҆бнажи́сѧ въ домѹ̀ свое́мъ.

²²И҆ ви́дѣ ха́мъ ѻ҆те́цъ ханаа́нь наготѹ̀ ѻ҆тца̀ своегѡ̀, и҆ и҆зше́дъ во́нъ повѣ́да ѻ҆бѣ́ма бра́тома свои́ма.

²³И҆ взе́мше си́мъ и҆ ї҆а́феѳъ ри́зѹ, возложи́ша (ю҆̀) на ѻ҆́бѣ ра҄мѣ своѝ, и҆ и҆до́ша вспѧ́ть зрѧ́ще, и҆ покры́ша наготѹ̀ ѻ҆тца̀ своегѡ̀: и҆ лицѐ и҆́хъ вспѧ́ть зрѧ̀, и҆ наготы̀ ѻ҆тца̀ своегѡ̀ не ви́дѣша.

²⁴И҆стрезви́сѧ же нѡ́е ѿ вїна̀, и҆ разѹмѣ̀ є҆ли҄ка сотворѝ є҆мѹ̀ сы́нъ є҆гѡ̀ ю҆нѣ́йшїй,

²⁵и҆ речѐ: про́клѧтъ (бѹ́ди) ханаа́нъ ѻ҆́трокъ: ра́бъ бѹ́детъ бра́тїѧмъ свои҄мъ.

²⁶И҆ речѐ: блгⷭве́нъ гдⷭь бг҃ъ си́мовъ: и҆ бѹ́детъ ханаа́нъ ѻ҆́трокъ ра́бъ є҆мѹ̀:

²⁷да распространи́тъ бг҃ъ ї҆а́феѳа, и҆ да всели́тсѧ въ селе́нїихъ си́мовыхъ, и҆ да бѹ́детъ ханаа́нъ ра́бъ є҆мѹ̀.

²⁸Поживе́ же нѡ́е по пото́пѣ лѣ́тъ три́ста пѧтьдесѧ́тъ.

²⁹И҆ бы́ша всѝ дні́е нѡ́євы лѣ́тъ де́вѧть сѡ́тъ пѧтьдесѧ́тъ: и҆ ѹ҆́мре.