Read Библия Церковнославянская в҃ ца́рствъ 2 Bible Online

в҃ ца́рствъ 2 - Библия Церковнославянская bible

в҃ ца́рствъ 2

¹И҆ бы́сть по си́хъ, и҆ вопросѝ даві́дъ гд҇а, глаго́лѧ: вни́дѹ ли въ є҆ди́нъ ѿ градѡ́въ ї҆ѹ́диныхъ; И҆ речѐ гд҇ь къ немѹ̀: и҆ вни́ди. И҆ речѐ даві́дъ: ка́мѡ вни́дѹ; И҆ речѐ: въ хеврѡ́нъ.

²И҆ и҆́де та́мѡ даві́дъ въ хеврѡ́нъ, и҆ ѻ҆́бѣ жєны̀ є҆гѡ̀, а҆хїнаа́мъ ї҆езраилі́тынѧ и҆ а҆вїге́а (бы́вшаѧ) жена̀ нава́ла карми́лскагѡ,

³и҆ мѹ́жїе и҆̀же съ ни́мъ кі́йждо, и҆ до́мове и҆́хъ, и҆ нача́ша жи́ти во градѣ́хъ хеврѡ́нскихъ.

⁴И҆ прїидо́ша мѹ́жїе ѿ ї҆ѹде́и и҆ пома́заша та́мѡ даві́да, да ца́рствѹетъ над̾ до́момъ ї҆ѹ́динымъ. И҆ возвѣсти́ша даві́дѹ, глаго́люще: ѩ҆́кѡ мѹ́жїе ї҆аві́са галаадїті́тскагѡ погребо́ша саѹ́ла.

⁵И҆ посла̀ даві́дъ послы̀ къ старѣ́йшинамъ ї҆аві́са галаадїті́тскагѡ и҆ речѐ къ ни҄мъ даві́дъ: блг҇ве́ни вы̀ гд҇ѹ, ѩ҆́кѡ сотвори́сте ми́лость сїю̀ над̾ господи́номъ ва́шимъ саѹ́ломъ, хрїсто́мъ гд҇нимъ, и҆ погребо́сте є҆го̀ и҆ ї҆ѡнаѳа́на сы́на є҆гѡ̀:

⁶и҆ нн҃ѣ да сотвори́тъ гд҇ь съ ва́ми мл҇ть и҆ и҆́стинѹ: и҆ а҆́зъ сотворю̀ съ ва́ми сїѐ благо́е, поне́же сотвори́сте глаго́лъ се́й:

⁷и҆ нн҃ѣ да ѹ҆крѣпѧ́тсѧ рѹ́ки ва́шѧ, и҆ да бѹ́дете сы́нове си́льнїи, ѩ҆́кѡ ѹ҆́мре господи́нъ ва́шъ саѹ́лъ, мене́ же пома́за до́мъ ї҆ѹ́динъ, да ца́рствѹю над̾ ни́ми.

⁸И҆ а҆вени́ръ сы́нъ ни́ровъ, нача́лный воево́да саѹ́ловъ, взѧ̀ ї҆евосѳе́а сы́на саѹ́лѧ, и҆ и҆зведѐ є҆го̀ и҆з̾ полка̀ въ манае́мъ,

⁹и҆ воцарѝ є҆го̀ над̾ галааді́тїею и҆ над̾ ѳасїрі́ею и҆ над̾ ї҆езраи́лемъ и҆ над̾ є҆фре́момъ и҆ над̾ венїамі́номъ и҆ над̾ всѣ́мъ ї҆и҃лемъ.

¹⁰Четы́редесѧть лѣ́тъ ї҆евосѳе́ю бѣ̀ сы́нѹ саѹ́ловѹ, є҆гда̀ нача̀ ца́рствовати над̾ ї҆и҃лемъ, и҆ два̀ лѣ҄та ца́рствова, кромѣ̀ до́мѹ ї҆ѹ́дина, и҆́же бы́сть за даві́домъ.

¹¹И҆ бы́ша дні́е, въ нѧ́же даві́дъ ца́рствова въ хеврѡ́нѣ над̾ до́момъ ї҆ѹ́динымъ, се́дмь лѣ́тъ и҆ ше́сть мц҇ъ.

¹²И҆ и҆зы́де а҆вени́ръ сы́нъ ни́ровъ и҆ ѻ҆́троцы ї҆евосѳе́а сы́на саѹ́лѧ и҆з̾ манае́ма въ гаваѡ́нъ.

¹³И҆ ї҆ѡа́въ сы́нъ сарѹі́евъ и҆ ѻ҆́троцы даві́дѡвы и҆зыдо́ша ѿ хеврѡ́на и҆ срѣто́шасѧ съ ни́ми ѹ҆ пото́ка гаваѡ́нѧ кѹ́пнѡ, и҆ сѣдо́ша сі́и над̾ пото́комъ ѿсю́дѹ, и҆ ті́и ѿтѹ́дѹ.

¹⁴И҆ речѐ а҆вени́ръ ко ї҆ѡа́вѹ: да воста́нѹтъ нн҃ѣ ѻ҆́троцы и҆ да поигра́ютъ пред̾ на́ми. И҆ речѐ ї҆ѡа́въ: да воста́нѹтъ.

¹⁵И҆ воста́ша и҆ преидо́ша ѿ ѻ҆́трѡкъ венїамі́новыхъ, число́мъ двана́десѧть ї҆евосѳе́а сы́на саѹ́лѧ, и҆ ѿ ѻ҆́трѡкъ даві́довыхъ двана́десѧть:

¹⁶и҆ взѧ̀ кі́йждо рѹко́ю за главѹ̀ и҆́скреннѧгѡ своегѡ̀, и҆ ме́чь є҆гѡ̀ въ ре́бра и҆́скреннѧгѡ є҆гѡ̀, и҆ падо́ша вкѹ́пѣ: и҆ нарече́сѧ и҆́мѧ мѣ́стѹ томѹ̀ ча́сть навѣ́тникѡвъ, ѩ҆́же є҆́сть въ гаваѡ́нѣ.

¹⁷И҆ бы́сть бра́нь же́стока ѕѣлѡ̀ въ то́й де́нь: и҆ падѐ а҆вени́ръ и҆ мѹ́жїе ї҆и҃лстїи пред̾ ѻ҆́трѡки даві́дѡвы.

¹⁸И҆ бы́ша та́мѡ трѝ сы́нове сарѹі́євы, ї҆ѡа́въ и҆ а҆ве́сса и҆ а҆саи́лъ: а҆саи́лъ же бѣ̀ лего́къ нога́ма свои́ма, ѩ҆́кѡ є҆ди́на се́рна ѿ сѹ́щихъ на селѣ̀.

¹⁹И҆ погна̀ а҆саи́лъ в̾слѣ́дъ а҆вени́ра, и҆ не ѹ҆клони́сѧ ни на де́сно ни на лѣ́во, но в̾слѣ́дъ а҆вени́ра:

²⁰и҆ ѡ҆зрѣ́сѧ а҆вени́ръ наза́дъ себє̀ и҆ речѐ: ты́ ли є҆сѝ са́мъ, а҆саи́ле; И҆ речѐ: а҆́зъ є҆́смь.

²¹И҆ речѐ є҆мѹ̀ а҆вени́ръ: ѹ҆клони́сѧ ты̀ на де́сно и҆лѝ на шѹ́ее, и҆ возмѝ себѣ̀ є҆ди́наго ѿ ѻ҆́трѡкъ, и҆ возмѝ себѣ̀ всѐ ѻ҆рѹ́жїе є҆гѡ̀. И҆ не восхотѣ̀ а҆саи́лъ ѹ҆клони́тисѧ ѿ негѡ̀.

²²И҆ приложѝ є҆щѐ а҆вени́ръ глаго́лати ко а҆саи́лѹ: ѿстѹпѝ ѿ менє̀, да не поражѹ́ тѧ ѡ҆ зе́млю: и҆ ка́кѡ ѩ҆влю̀ лицѐ моѐ ко ї҆ѡа́вѹ;

²³и҆ гдѣ̀ сѹ́ть сїѧ҄; возврати́сѧ ко ї҆ѡа́вѹ бра́тѹ твоемѹ̀. И҆ не хотѧ́ше ѿстѹпи́ти. И҆ ѹ҆да́ри є҆го̀ а҆вени́ръ копїе́мъ созадѝ въ лѧ́двїѧ: и҆ про́йде копїѐ сквозѣ̀ є҆го̀, и҆ падѐ та́мѡ и҆ ѹ҆́мре пред̾ ни́мъ: и҆ бы́сть всѧ́къ приходѧ́й до мѣ́ста, и҆дѣ́же падѐ а҆саи́лъ и҆ ѹ҆́мре, и҆ ѡ҆становлѧ́шесѧ.

²⁴И҆ погна́ша ї҆ѡа́въ и҆ а҆ве́сса в̾слѣ́дъ а҆вени́ра, и҆ со́лнце заходѧ́ше: и҆ ті́и прїидо́ша да́же до холма̀ а҆мма̀, и҆́же є҆́сть пред̾ лице́мъ га́и, пѹ́ть пѹсты́ни гаваѡ́ни.

²⁵И҆ собра́шасѧ сы́нове венїамі́нѡвы за а҆вени́ромъ и҆ бы́ша въ сни́тїи є҆ди́нѣмъ, и҆ ста́ша на версѣ̀ холма̀ є҆ди́нагѡ.

²⁶И҆ воззва̀ а҆вени́ръ ко ї҆ѡа́вѹ и҆ речѐ: є҆да̀ въ побѣ́дѹ поѧ́стъ ме́чь; и҆лѝ не вѣ́си, ѩ҆́кѡ гѡрька̀ бѹ́дѹтъ послѣ҄днѧѧ; и҆ доко́лѣ не рече́ши лю́демъ возврати́тисѧ созадѝ бра́тїй на́шихъ;

²⁷И҆ речѐ ї҆ѡа́въ: жи́въ гд҇ь, ѩ҆́кѡ, а҆́ще бы не ре́клъ є҆сѝ, тогда̀ ѿ ѹ҆́тра бы лю́дїе моѝ преста́ли гонѧ́ще кі́йждо в̾слѣ́дъ бра́та своегѡ̀.

²⁸И҆ вострѹбѝ ї҆ѡа́въ трѹбо́ю, и҆ ста́ша всѝ лю́дїе, и҆ не погна́ша в̾слѣ́дъ ї҆и҃лтѧнъ, и҆ не приложи́ша ктомѹ̀ ра́товати.

²⁹А҆вени́ръ же и҆ мѹ́жїе є҆гѡ̀ и҆до́ша на за́падъ всю̀ но́щь ѻ҆́нѹ, и҆ преидо́ша ї҆ѻрда́нъ, и҆ проидо́ша всю̀ странѹ̀ тѹ̀, и҆ прїидо́ша въ по́лкъ.

³⁰И҆ ї҆ѡа́въ возврати́сѧ вспѧ́ть ѿ а҆вени́ра, и҆ собра̀ всѧ҄ лю́ди, и҆ и҆счи́слиша ѻ҆́трѡкъ даві́довыхъ (па́дшихъ) девѧтьна́десѧть мѹже́й, и҆ а҆саи́ла.

³¹Ѻ҆́троцы же даві́дѡвы ѹ҆би́ша сынѡ́въ венїамі́нихъ мѹже́й а҆вени́ровыхъ три́ста и҆ шестьдесѧ́тъ мѹже́й.

³²И҆ взѧ́ша а҆саи́ла, и҆ погребо́ша є҆го̀ во гро́бѣ ѻ҆тца̀ є҆гѡ̀ въ виѳлее́мѣ. И҆ и҆́де ї҆ѡа́въ и҆ мѹ́жїе є҆гѡ̀ съ ни́мъ всю̀ но́щь, и҆ ѡ҆свѣто́ша въ хеврѡ́нѣ.