Read Библия Церковнославянская в҃ ца́рствъ 23 Bible Online

в҃ ца́рствъ 23 - Библия Церковнославянская bible

в҃ ца́рствъ 23

¹И҆ сїѧ҄ словеса̀ даві́дѡва послѣ҄днѧѧ. Вѣ́ренъ даві́дъ сы́нъ ї҆ессе́овъ, и҆ вѣ́ренъ мѹ́жъ, є҆го́же возста́ви гд҇ь въ хрїста̀ бг҃а ї҆а́кѡвлѧ, и҆ благолѣ҄пны ѱалмы̀ ї҆и҃лєвы.

²И҆ дх҃ъ гд҇ень гл҃а во мнѣ̀, и҆ сло́во є҆гѡ̀ на ѧ҆зы́цѣ мое́мъ.

³Гл҃етъ бг҃ъ ї҆и҃левъ: мнѣ̀ гл҃а храни́тель ї҆и҃левъ при́тчѹ: рѣ́хъ въ человѣ́цѣхъ: ка́кѡ ѹ҆держитѐ стра́хъ бж҃їй;

⁴И҆ во свѣ́тѣ бж҃їи ѹ҆́треннѣмъ, и҆ возсїѧ̀ со́лнце заѹ́тра, не пре́йде ѿ сїѧ́нїѧ, и҆ ѩ҆́кѡ ѿ дождѧ̀ ѕла́чна ѿ землѝ.

⁵Не та́кѡ бо до́мъ мо́й съ крѣ́пкимъ: завѣ́тъ бо вѣ́ченъ положи́ ми, гото́въ во всѧ́комъ вре́мени сохране́нъ: ѩ҆́кѡ всѐ сп҇нїе моѐ и҆ всѐ хотѣ́нїе во гд҇ѣ, ѩ҆́кѡ не и҆́мать прозѧ́бнѹти беззако́нный.

⁶ѩ҆́коже те́рнїе и҆зве́ржено всѝ сі́и, ѩ҆́кѡ не во́змѹтсѧ рѹко́ю,

⁷и҆ мѹ́жъ не потрѹди́тсѧ въ ни́хъ: и҆ мно́жество желѣ́за, и҆ дре́во копі́йное, и҆ ѻ҆гне́мъ сожже́тъ, и҆ попалѧ́тсѧ въ срамотѹ̀ свою̀.

⁸Сїѧ҄ и҆мена̀ си́льныхъ даві́довыхъ: ї҆евосѳе́й ханане́анинъ кнѧ́зь тре́тїѧгѡ є҆́сть: а҆дїнѡ́нъ а҆сѡне́й, се́й ѡ҆бнажѝ ме́чь сво́й на ѻ҆́смь сѡ́тъ во́инѡвъ (и҆ побѣдѝ) є҆ди́ною.

⁹И҆ по не́мъ є҆леаза́ръ, сы́нъ ѻ҆тца̀ бра́та є҆гѡ̀, въ трїе́хъ си́льныхъ бра́тїѧхъ, се́й бѣ̀ со даві́домъ (во сирра́нѣ) внегда̀ поноси́ти є҆мѹ̀ во и҆ноплеме́нницѣхъ: и҆ и҆ноплемє́нницы собра́шасѧ та́мѡ на бра́нь,

¹⁰и҆ и҆зыдо́ша мѹ́жїе ї҆и҃лєвы проти́вѹ лица̀ и҆́хъ, и҆ то́й воста̀ и҆ ѹ҆бива́ше и҆ноплеме́нники, до́ндеже ѹ҆трѹди́сѧ рѹка̀ є҆гѡ̀ и҆ прильпѐ рѹка̀ є҆гѡ̀ къ мечѹ̀: и҆ сотворѝ гд҇ь сп҇нїе вели́ко въ то́й де́нь: и҆ лю́дїе ѡ҆брати́шасѧ в̾слѣ́дъ є҆гѡ̀ то́кмѡ совлача́ти.

¹¹И҆ по не́мъ самаі́а сы́нъ а҆́сы, а҆рѹхе́йскїй: и҆ собра́шасѧ и҆ноплемє́нницы во ѳирі́ю: и҆ бѣ̀ та́мѡ ча́сть села̀ и҆спо́лнь лѧ́щи: и҆ лю́дїе бѣжа́ша ѿ лица̀ и҆ноплеме́ннича:

¹²и҆ ста̀ а҆́ки сто́лпъ посредѣ̀ ча́сти, и҆ и҆схи́ти ю҆̀, и҆ поразѝ и҆ноплеме́нники: и҆ сотворѝ гд҇ь сп҇нїе вели́ко.

¹³И҆ снидо́ша трѝ кнѧ҄зи ѿ три́десѧтихъ, и҆ прїидо́ша въ касѡ́нъ къ даві́дѹ въ верте́пъ ѻ҆долла́мъ: и҆ чи́нове и҆ноплемє́нникъ ѡ҆полчи́шасѧ во ю҆до́ли рафаі́нстѣй.

¹⁴И҆ даві́дъ тогда̀ бѣ̀ во ѡ҆бдержа́нїи, и҆ ста́нъ и҆ноплеме́нническъ бѣ̀ тогда̀ въ виѳлее́мѣ.

¹⁵И҆ возжада̀ даві́дъ и҆ речѐ: кто̀ напои́тъ мѧ̀ водо́ю и҆з̾ ро́ва, и҆́же въ виѳлее́мѣ при вратѣ́хъ; ста́нъ же бѣ̀ тогда̀ и҆ноплеме́нничь въ виѳлее́мѣ.

¹⁶И҆ расторго́ша трїѐ си́льнїи ѡ҆полче́нїе и҆ноплеме́нничо, и҆ почерпо́ша воды̀ и҆з̾ ро́ва виѳлее́мскагѡ, и҆́же при вратѣ́хъ: и҆ взѧ́ша, и҆ прїидо́ша ко даві́дѹ, и҆ не восхотѣ̀ пи́ти є҆ѧ̀: и҆ возлїѧ̀ ю҆̀ гд҇ѹ

¹⁷и҆ речѐ: мл҇тивъ мнѣ̀, гд҇и, є҆́же сотвори́ти сїѐ, кро́вь ли мѹже́й поше́дшихъ въ дѹша́хъ свои́хъ пи́ти и҆́мамъ; И҆ не восхотѣ̀ пи́ти є҆ѧ̀. Сїѧ҄ сотвори́ша трїѐ си́льнїи.

¹⁸И҆ а҆ве́сса бра́тъ ї҆ѡа́вль сы́нъ сарѹ́инъ, се́й бѣ̀ кнѧ́зь въ трїе́хъ, и҆ се́й воздви́же копїѐ своѐ на три́ста ѩ҆́звеныхъ, и҆ томѹ̀ и҆́мѧ є҆́сть въ трїе́хъ.

¹⁹Ѿ трїе́хъ ѻ҆́ныхъ сла́вный, и҆ бы́сть и҆̀мъ кнѧ́зь, и҆ да́же до трїе́хъ не прїи́де.

²⁰И҆ ване́а сы́нъ ї҆ѡда́евъ, мѹ́жъ се́й премно́гъ въ дѣ́лѣхъ, ѿ кавасаи́ла, и҆ се́й ѹ҆бѝ два̀ сы҄на а҆рїи́ла мѡа́вскагѡ: и҆ то́й сни́де, и҆ ѹ҆бѝ льва̀ посредѣ̀ ро́ва въ де́нь снѣ́женъ:

²¹и҆ то́й поразѝ мѹ́жа є҆гѵ́птѧнина, мѹ́жа кра́сна, въ рѹцѣ́ же є҆гѵ́птѧнина копїѐ ѩ҆́кѡ дре́во лѣ́ствицы кора́бленыѧ: и҆ сни́де къ немѹ̀ со па́лицею, и҆ и҆сто́рже копїѐ и҆з̾ рѹкѹ̀ є҆гѵ́птѧнина, и҆ ѹ҆бѝ є҆го̀ копїе́мъ є҆гѡ̀:

²²сїѧ҄ сотворѝ ване́а сы́нъ ї҆ѡда́евъ, и҆ томѹ̀ и҆́мѧ въ трїе́хъ си́льныхъ,

²³ѿ трїе́хъ сла́вный, и҆ ко трїе́мъ не прїи́де: и҆ поста́ви є҆го̀ даві́дъ над̾ таи҄нники свои́ми.

²⁴И҆ сїѧ҄ и҆мена̀ си́льныхъ даві́да царѧ̀: а҆саи́лъ бра́тъ ї҆ѡа́вль, се́й въ три́десѧтихъ: є҆леана́нъ сы́нъ ѻ҆тца̀ бра́та є҆гѡ̀ ѿ виѳлее́ма:

²⁵семо́ѳъ а҆родїи́нъ:

²⁶хелли́съ келѡѳі́йскїй: ї҆ра̀ сы́нъ є҆ккі́са ѳекѡі́тскагѡ:

²⁷а҆вїезе́ръ а҆наѳѡѳі́тскїй: савѹхе́й и҆́же ѿ а҆сѡѳі́ты:

²⁸є҆ллѡ́нъ а҆лѡні́тскїй: мое́й нетѡфаѳі́тѧнинъ:

²⁹є҆лѝ сы́нъ ваа́нь, и҆́же ѿ нетѡфаѳї҄тъ: є҆ѳѳї̀ сы́нъ рїва́нь ѿ гаваѡ́на сынѡ́въ венїамі́нихъ:

³⁰ване́асъ фараѳѡні́тскїй: ѹ҆рі́й ѿ наалге́а:

³¹а҆рїи́лъ сы́нъ а҆равѡѳі́тѧнина: заѡ́ръ варсамі́тскїй:

³²є҆леа́са сы́нъ салавѡні́тскїй: васе́й гони́тскїй:

³³ї҆ѡнаѳа́нъ сы́нъ сама́на а҆рѡрі́тскагѡ: а҆хїа́нъ сы́нъ а҆ратѝ а҆раѳѹ́рскагѡ:

³⁴є҆лїфала́ѳъ сы́нъ маахїа́вль: є҆лїа́въ сы́нъ а҆хїтофе́ла гелѡні́тскагѡ:

³⁵а҆сараї̀ карми́лскїй: ѹ҆ре́мъ сы́нъ а҆свѝ:

³⁶и҆ га́ла сы́нъ наѳа́новъ: и҆ ваа́нъ сы́нъ а҆гарі́нъ:

³⁷є҆́лли а҆ммані́тскїй: гелѡре́й вирѡѳі́йскїй, носѧ́й ѻ҆рѹ́жїе ї҆ѡа́ва сы́на сарѹ́ина:

³⁸ї҆ра́съ є҆ѳѳі́рскїй: гаре́въ ї҆ерѳе́йскїй: и҆ ѹ҆рі́а геѳе́йскїй.

³⁹Всѣ́хъ три́десѧть и҆ се́дмь.