Read Библия Церковнославянская в҃ ца́рствъ 5 Bible Online

в҃ ца́рствъ 5 - Библия Церковнославянская bible

в҃ ца́рствъ 5

¹И҆ прїидо́ша всѧ҄ племена̀ ї҆и҃лєва къ даві́дѹ въ хеврѡ́нъ и҆ глаго́лаша є҆мѹ̀: сѐ, кѡ́сти твоѧ҄ и҆ пло́ть твоѧ̀ мы̀ є҆смы̀:

²и҆ вчера̀ и҆ тре́тїѧгѡ днѐ саѹ́лѹ сѹ́щѹ царю̀ над̾ на́ми, ты̀ бы́лъ є҆сѝ вводѧ́й и҆ и҆зводѧ́й ї҆и҃лѧ, и҆ речѐ гд҇ь къ тебѣ̀: ты̀ ѹ҆пасе́ши лю́ди моѧ҄ ї҆и҃лѧ и҆ ты̀ бѹ́деши во́ждь лю́демъ мои҄мъ ї҆и҃лю.

³И҆ прїидо́ша всѝ старѣ҄йшины ї҆и҃лєвы къ царю̀ въ хеврѡ́нъ, и҆ положѝ и҆̀мъ ца́рь даві́дъ завѣ́тъ въ хеврѡ́нѣ пред̾ гд҇емъ: и҆ пома́заша даві́да на ца́рство над̾ всѣ́мъ ї҆и҃лемъ.

⁴Сы́нъ три́десѧти лѣ́тъ даві́дъ внегда̀ воцари́тисѧ є҆мѹ̀, и҆ ца́рствова четы́редесѧть лѣ́тъ:

⁵се́дмь лѣ́тъ и҆ мц҇ей ше́сть ца́рствова въ хеврѡ́нѣ над̾ ї҆ѹ́дою, и҆ три́десѧть трѝ лѣ҄та ца́рствова над̾ всѣ́мъ ї҆и҃лемъ и҆ ї҆ѹ́дою во ї҆ер҇ли́мѣ.

⁶И҆ по́йде даві́дъ и҆ всѝ мѹ́жїе є҆гѡ̀ во ї҆ер҇ли́мъ ко ї҆евѹсе́ю, живѹ́щемѹ на землѝ то́й. И҆ рѣ́ша даві́дѹ: не вни́деши сѣ́мѡ, ѩ҆́кѡ воста́ша хромі́и и҆ слѣпі́и глаго́люще: ѩ҆́кѡ не вни́детъ даві́дъ сѣ́мѡ.

⁷И҆ взѧ̀ даві́дъ крѣ́пость сїѡ́ню: сїѧ̀ є҆́сть гра́дъ даві́довъ.

⁸И҆ речѐ даві́дъ въ де́нь то́й: всѧ́къ поража́ѧй ї҆евѹсе́а да каса́етсѧ мече́мъ и҆ хромы́хъ и҆ слѣпы́хъ и҆ ненави́дѧщихъ дѹшѝ даві́довы. Сегѡ̀ ра́ди рекѹ́тъ: слѣпі́и и҆ хромі́и не вни́дѹтъ въ до́мъ гд҇ень.

⁹И҆ сѣ́де даві́дъ въ крѣ́пости, и҆ нарече́сѧ сїѧ̀ гра́дъ даві́довъ: и҆ созда̀ то́й гра́дъ ѡ҆́колѡ ѿ краегра́дїѧ, и҆ до́мъ сво́й.

¹⁰И҆ и҆дѧ́ше даві́дъ и҆ды́й и҆ велича́емь, и҆ гд҇ь вседержи́тель съ ни́мъ.

¹¹И҆ посла̀ хїра́мъ ца́рь тѵ́рскїй послы̀ къ даві́дѹ, и҆ дре́ва ке́дрѡва, и҆ древодѣ́лей, и҆ каменодѣ́лателей, и҆ созда́ша до́мъ даві́дѹ.

¹²И҆ ѹ҆разѹмѣ̀ даві́дъ, ѩ҆́кѡ ѹ҆гото́ва є҆го̀ гд҇ь въ царѧ̀ над̾ ї҆и҃лемъ, и҆ ѩ҆́кѡ вознесе́сѧ ца́рство є҆гѡ̀ люді́й є҆гѡ̀ ра́ди ї҆и҃лѧ.

¹³И҆ поѧ́тъ даві́дъ є҆щѐ жєны̀ и҆ подлѡ́жницы ѿ ї҆ер҇ли́ма по прише́ствїи свое́мъ ѿ хеврѡ́на: и҆ бы́ша даві́дѹ є҆щѐ сы́нове и҆ дщє́ри.

¹⁴И҆ сїѧ҄ и҆мена̀ роди́вшымсѧ є҆мѹ̀ во ї҆ер҇ли́мѣ: самѹ́съ и҆ сѡва́въ, и҆ наѳа́нъ и҆ соломѡ́нъ,

¹⁵и҆ є҆веа́ръ и҆ є҆лїсѹ́е, и҆ нафе́къ и҆ ї҆ефїѐ,

¹⁶и҆ є҆лїсама̀ и҆ є҆лїдаѐ и҆ є҆лїфала́ѳъ, самаѐ, ї҆есїва́ѳъ, наѳа́нъ, галамаа́нъ, ї҆еваа́ръ, ѳеисѹ́съ, є҆лїфала́ѳъ, наге́ѳъ, нафе́къ, ї҆анаѳа́нъ и҆ леасамѵ́съ, ваалїма́ѳъ, є҆лїфаа́ѳъ.

¹⁷И҆ ѹ҆слы́шаша и҆ноплемє́нницы, ѩ҆́кѡ пома́засѧ даві́дъ ца́рь над̾ ї҆и҃лемъ, и҆ взыдо́ша всѝ и҆ноплемє́нницы и҆ска́ти даві́да. И҆ ѹ҆слы́ша даві́дъ, и҆ сни́де въ крѣ́пость.

¹⁸И҆ноплемє́нницы же прїидо́ша и҆ соедини́шасѧ во ю҆до́ли тїта́нстѣй.

¹⁹И҆ вопросѝ даві́дъ гд҇а, глаго́лѧ: взы́дѹ ли ко и҆ноплеме́нникѡмъ; и҆ преда́си ли ѧ҆̀ въ рѹ́цѣ моѝ; И҆ речѐ гд҇ь къ даві́дѹ: взы́ди, ѩ҆́кѡ предаѧ̀ преда́мъ и҆ноплеме́нники въ рѹ́цѣ твоѝ.

²⁰И҆ прїи́де даві́дъ съ вы́шнихъ сѣ́чей и҆ посѣчѐ и҆ноплеме́нники та́мѡ. И҆ речѐ даві́дъ: и҆зсѣчѐ гд҇ь врагѝ моѧ҄ и҆ноплеме́нники предо мно́ю, ѩ҆́коже пресѣка́ютсѧ во́ды. Сегѡ̀ ра́ди нарече́сѧ и҆́мѧ мѣ́ста тогѡ̀ свы́ше сѣ́чей.

²¹И҆ ѡ҆ста́виша та́мѡ (и҆ноплемє́нницы) бо́ги своѧ҄, и҆ взѧ̀ и҆̀хъ даві́дъ и҆ мѹ́жїе и҆̀же съ ни́мъ (и҆ речѐ даві́дъ сожещѝ и҆̀хъ во ѻ҆гнѝ).

²²И҆ приложи́ша па́ки прїитѝ и҆ноплемє́нницы и҆ собра́шасѧ на ю҆до́ли тїта́нстѣй.

²³И҆ вопросѝ даві́дъ гд҇а: взы́дѹ ли ко и҆ноплеме́нникѡмъ; и҆ преда́си ли и҆̀хъ въ рѹ́цѣ моѝ; И҆ речѐ є҆мѹ̀ гд҇ь: не и҆сходѝ на срѣ́тенїе и҆̀мъ, но ѹ҆клони́сѧ ѿ ни́хъ, и҆ пристѹ́пиши къ ни҄мъ бли́з̾ дѹбра́вы пла́ча:

²⁴и҆ бѹ́детъ, є҆гда̀ ѹ҆слы́шиши гла́съ шѹ́ма ѿ дѹбра́вы пла́ча, тогда̀ сни́деши къ ни҄мъ, ѩ҆́кѡ тогда̀ и҆зы́детъ гд҇ь пред̾ тобо́ю сѣщѝ на бра́ни и҆ноплеме́нники.

²⁵И҆ сотворѝ даві́дъ, ѩ҆́коже заповѣ́да є҆мѹ̀ гд҇ь, и҆ и҆збѝ и҆ноплеме́нники ѿ гаваѡ́на да́же до землѝ гази́ра.