Read Библия Церковнославянская в҃ ца́рствъ 7 Bible Online

в҃ ца́рствъ 7 - Библия Церковнославянская bible

в҃ ца́рствъ 7

¹И҆ бы́сть є҆гда̀ сѧ́де ца́рь въ домѹ̀ свое́мъ, и҆ гд҇ь ѹ҆наслѣ́ди є҆го̀ ѡ҆́крестъ ѿ всѣ́хъ врагѡ́въ є҆гѡ̀ ѡ҆кре́стныхъ,

²и҆ речѐ ца́рь къ наѳа́нѹ про҇ро́кѹ: сѐ, нн҃ѣ а҆́зъ живѹ̀ въ домѹ̀ ке́дровѣмъ, кївѡ́тъ же бж҃їй стои́тъ посредѣ̀ ски́нїи.

³И҆ речѐ наѳа́нъ къ царю̀: всѧ҄ є҆ли҄ка сѹ́ть въ се́рдцы твое́мъ, и҆дѝ и҆ творѝ, ѩ҆́кѡ гд҇ь съ тобо́ю.

⁴И҆ бы́сть въ нощѝ то́й, и҆ бы́сть сло́во гд҇не къ наѳа́нѹ, гл҃ѧ:

⁵и҆дѝ и҆ рцы̀ рабѹ̀ моемѹ̀ даві́дѹ: сїѧ҄ гл҃етъ гд҇ь: не ты̀ сози́ждеши мнѣ̀ до́мъ, є҆́же ѡ҆бита́ти мнѣ̀:

⁶ѩ҆́кѡ не ѡ҆бита́хъ въ домѹ̀, ѿ негѡ́же днѐ и҆зведо́хъ сы́ны ї҆и҃лєвы и҆з̾ землѝ є҆гѵ́петскїѧ до днѐ сегѡ̀, но бѣ́хъ ходѧ̀ во ѡ҆бита́лищи и҆ въ кѹ́щи,

⁷во всѣ́хъ и҆дѣ́же хожда́хъ во все́мъ ї҆и҃ли: а҆́ще гл҃ѧ гл҃ахъ ко є҆ди́номѹ колѣ́нѹ ї҆и҃левѹ, є҆мѹ́же заповѣ́дахъ пастѝ лю́ди моѧ҄ ї҆и҃лѧ, гл҃ѧ: почто̀ не созда́сте мѝ до́мѹ ке́дрова;

⁸и҆ нн҃ѣ сїѧ҄ рече́ши рабѹ̀ моемѹ̀ даві́дѹ: си́це гл҃етъ гд҇ь вседержи́тель: поѧ́хъ тѧ̀ ѿ па́жити ѻ҆́вчїѧ на властели́нство лю́демъ мои҄мъ ї҆и҃лю,

⁹и҆ бѣ́хъ съ тобо́ю во всѣ́хъ, а҆́може ходи́лъ є҆сѝ, и҆ и҆скорени́хъ всѧ҄ врагѝ твоѧ҄ ѿ лица̀ твоегѡ̀, и҆ сотвори́хъ тѧ̀ и҆мени́та по и҆́мени вели́кихъ и҆̀же на землѝ,

¹⁰и҆ положѹ̀ мѣ́сто лю́демъ мои҄мъ ї҆и҃лю, и҆ насаждѹ̀ и҆̀хъ, и҆ вселѧ́тсѧ ѡ҆ себѣ̀ са́ми, и҆ не попекѹ́тсѧ ктомѹ̀: и҆ не приложи́тъ сы́нъ непра́вды ѡ҆би́дѣти и҆̀хъ, ѩ҆́коже и҆спе́рва,

¹¹и҆ ѿ дні́й въ нѧ́же поста́вихъ сѹдїи҄ въ лю́дехъ мои́хъ во ї҆и҃ли: и҆ ѹ҆поко́ю тѧ̀ ѿ всѣ́хъ вра҄гъ твои́хъ: и҆ возвѣсти́тъ тѝ гд҇ь, ѩ҆́кѡ сози́ждеши до́мъ є҆мѹ̀:

¹²и҆ бѹ́детъ є҆гда̀ и҆спо́лнѧтсѧ дні́е твоѝ, и҆ ѹ҆́снеши со ѻ҆тцы҄ твои́ми, и҆ возста́влю сѣ́мѧ твоѐ по тебѣ̀, и҆́же бѹ́детъ ѿ чре́ва твоегѡ̀, и҆ ѹ҆гото́влю ца́рство є҆гѡ̀:

¹³то́й сози́ждетъ до́мъ и҆́мени моемѹ̀, и҆ ѹ҆пра́влю престо́лъ є҆гѡ̀ до вѣ́ка:

¹⁴а҆́зъ бѹ́дѹ є҆мѹ̀ во ѻ҆тца̀, и҆ то́й бѹ́детъ мѝ въ сы́на: и҆ а҆́ще прїи́детъ непра́вда є҆гѡ̀, и҆ ѡ҆бличѹ̀ є҆го̀ жезло́мъ мѹже́й и҆ ѩ҆́звами сынѡ́въ человѣ́ческихъ:

¹⁵мл҇ти же моеѧ̀ не ѿста́влю ѿ негѡ̀, ѩ҆́коже ѿста́вихъ ѿ тѣ́хъ, и҆̀хже ѿста́вихъ ѿ лица̀ моегѡ̀:

¹⁶и҆ вѣ́ренъ бѹ́детъ до́мъ є҆гѡ̀ и҆ ца́рство є҆гѡ̀ до вѣ́ка предо мно́ю: и҆ престо́лъ є҆гѡ̀ бѹ́детъ и҆спра́вленъ во вѣ́къ.

¹⁷По всѣ҄мъ словесє́мъ си҄мъ и҆ по всемѹ̀ видѣ́нїю семѹ̀, та́кѡ глаго́ла наѳа́нъ ко даві́дѹ.

¹⁸И҆ вни́де ца́рь даві́дъ и҆ сѣ́де пред̾ гд҇емъ и҆ речѐ: кто́ є҆смь а҆́зъ, гд҇и мо́й, гд҇и; и҆ что̀ до́мъ мо́й, ѩ҆́кѡ возлюби́лъ мѧ̀ є҆сѝ да́же до си́хъ;

¹⁹и҆ ма҄ла сїѧ҄ пред̾ тобо́ю сѹ́ть, гд҇и мо́й, гд҇и, и҆ гл҃алъ є҆сѝ ѡ҆ до́мѣ раба̀ твоегѡ̀ вдале́кѡ: се́й же зако́нъ человѣ́ка, гд҇и мо́й, гд҇и:

²⁰и҆ что̀ приложи́тъ даві́дъ є҆щѐ глаго́лати къ тебѣ̀; и҆ нн҃ѣ ты̀ вѣ́си раба̀ твоего̀, гд҇и мо́й, гд҇и,

²¹и҆ раба̀ твоегѡ̀ ра́ди сотвори́лъ є҆сѝ и҆ по се́рдцѹ твоемѹ̀ сотвори́лъ є҆сѝ всѐ вели́чество сїѐ, сказа́ти рабѹ̀ твоемѹ̀,

²²вели́чїѧ ра́ди твоегѡ̀, гд҇и мо́й, гд҇и: нѣ́сть бо и҆́нъ ѩ҆́коже ты̀, и҆ нѣ́сть бг҃а ра́звѣ тебє̀ во всѣ́хъ, ѩ҆̀же слы́шахомъ ѹ҆ши́ма на́шима:

²³и҆ кто̀ ѩ҆́коже лю́дїе твоѝ ї҆и҃ль ѩ҆зы́къ и҆́нъ на землѝ; ѩ҆́кѡ наста́ви и҆́хъ бг҃ъ, є҆́же и҆зба́вити себѣ̀ люді́й, є҆́же положи́ти тебѣ̀ и҆́мѧ, є҆́же сотвори́ти вели́чїе и҆ просвѣще́нїе, є҆́же и҆зри́нѹти тебѣ̀ ѿ лица̀ люді́й твои́хъ, и҆̀хже и҆зба́вилъ є҆сѝ себѣ̀ ѿ є҆гѵ́пта, ѩ҆зы́ки и҆ селє́нїѧ,

²⁴и҆ ѹ҆гото́валъ є҆сѝ себѣ̀ лю́ди твоѧ҄ ї҆и҃лѧ въ лю́ди до вѣ́ка, и҆ ты̀, гд҇и, бы́лъ є҆сѝ и҆̀мъ въ бг҃а:

²⁵и҆ нн҃ѣ, гд҇и мо́й, гд҇и, сло́во, є҆́же гл҃алъ є҆сѝ ѡ҆ рабѣ̀ твое́мъ и҆ ѡ҆ до́мѣ є҆гѡ̀, ѹ҆вѣ́ри до вѣ́ка, ѩ҆́коже гл҃алъ є҆сѝ, сотворѝ:

²⁶и҆ нн҃ѣ да возвели́читсѧ и҆́мѧ твоѐ до вѣ́ка, глаго́лѧ: гд҇ь вседержи́тель бг҃ъ над̾ ї҆и҃лемъ, и҆ до́мъ раба̀ твоегѡ̀ даві́да да бѹ́детъ и҆спра́вленъ пред̾ тобо́ю:

²⁷ѩ҆́кѡ ты̀ гд҇ь вседержи́тель бг҃ъ ї҆и҃левъ, ѿве́рзлъ є҆сѝ ѹ҆́хо рабѹ̀ твоемѹ̀, гл҃ѧ: до́мъ сози́ждѹ тебѣ̀: сегѡ̀ ра́ди ѡ҆брѣ́те ра́бъ тво́й се́рдце своѐ є҆́же помоли́тисѧ къ тебѣ̀ моли́твою се́ю:

²⁸и҆ нн҃ѣ, гд҇и мо́й, гд҇и, ты̀ є҆сѝ бг҃ъ, и҆ словеса̀ твоѧ҄ бѹ́дѹтъ и҆́стинна, и҆ гл҃алъ є҆сѝ ѡ҆ рабѣ̀ твое́мъ блага҄ѧ сїѧ҄,

²⁹и҆ нн҃ѣ начнѝ и҆ блг҇вѝ до́мъ раба̀ твоегѡ̀, є҆́же бы́ти є҆мѹ̀ во вѣ́къ пред̾ тобо́ю, ѩ҆́кѡ ты̀, гд҇и мо́й, гд҇и, гл҃алъ є҆сѝ, и҆ ѿ блг҇ве́нїѧ твоегѡ̀ да блг҇ви́тсѧ до́мъ раба̀ твоегѡ̀, є҆́же бы́ти во вѣ́къ пред̾ тобо́ю.