Read Библия Церковнославянская г҃ ца́рствъ 12 Bible Online

г҃ ца́рствъ 12 - Библия Церковнославянская bible

г҃ ца́рствъ 12

¹И҆ и҆́де ца́рь ровоа́мъ въ сїкі́мѹ, ѩ҆́кѡ въ сїкі́мѹ прїи́де ве́сь ї҆и҃ль воцари́ти є҆го̀.

²И҆ бы́сть є҆гда̀ ѹ҆слы́ша ї҆еровоа́мъ сы́нъ нава́товъ, сѹ́щѹ є҆мѹ̀ є҆щѐ во є҆гѵ́птѣ, ѩ҆́кѡ ѹ҆бѣ́глъ бѣ̀ ѿ лица̀ соломѡ́на, и҆ возврати́сѧ ї҆еровоа́мъ и҆з̾ є҆гѵ́пта:

³и҆ посла́ша, и҆ призва́ша є҆го̀. И҆ прїи́де ї҆еровоа́мъ и҆ ве́сь со́нмъ ї҆и҃левъ, и҆ реко́ша лю́дїе къ царю̀ ровоа́мѹ глаго́люще:

⁴ѻ҆те́цъ тво́й ѡ҆тѧгчѝ ѩ҆ре́мъ на́шъ, ты́ же нн҃ѣ ѡ҆блегчѝ ѿ рабо́ты ѻ҆тца̀ твоегѡ̀ же́стокїѧ и҆ ѿ ѩ҆рма̀ є҆гѡ̀ тѧ́жкагѡ, є҆го́же возложѝ на ны̀, и҆ порабо́таемъ тѝ.

⁵И҆ речѐ къ ни҄мъ: ѿиди́те (и҆ пребѹ́дите) до тре́тїѧгѡ днѐ, и҆ возврати́тесѧ ко мнѣ̀. И҆ и҆до́ша.

⁶И҆ возвѣстѝ ровоа́мъ ца́рь старѣ́йшинамъ, и҆̀же бы́ша предстоѧ́ще пред̾ соломѡ́номъ ѻ҆тце́мъ є҆гѡ̀, є҆щѐ жи́вѹ є҆мѹ̀ сѹ́щѹ, глаго́лѧ: ка́кѡ вы̀ мы́слите, да ѿвѣща́ю лю́демъ си҄мъ сло́во;

⁷И҆ рѣ́ша є҆мѹ̀, глаго́люще: а҆́ще въ дне́шнїй де́нь бѹ́деши ра́бъ лю́демъ си҄мъ и҆ порабо́таеши и҆̀мъ, и҆ рече́ши и҆̀мъ словеса̀ бла҄га, и҆ бѹ́дѹтъ тѝ рабѝ во всѧ҄ дни҄.

⁸И҆ пренебрежѐ совѣ́тъ старѣ́йшинъ, ѩ҆̀же совѣща́ша є҆мѹ̀, и҆ совѣ́това со ѻ҆́трѡки воспита́нными съ ни́мъ предстоѧ́вшими пред̾ лице́мъ є҆гѡ̀,

⁹и҆ речѐ и҆̀мъ: что̀ вы̀ совѣщава́ете; и҆ что̀ ѿвѣща́ю лю́демъ си҄мъ, и҆̀же рѣ́ша ко мнѣ̀, глаго́люще: ѡ҆блегчѝ на́шъ ѩ҆ре́мъ, є҆го́же возложѝ ѻ҆те́цъ тво́й на ны̀;

¹⁰И҆ глаго́лаша къ немѹ̀ ѻ҆́троцы воспита́ннїи съ ни́мъ и҆ рѣ́ша є҆мѹ̀: си́це да глаго́леши лю́демъ си҄мъ, и҆̀же рѣ́ша къ тебѣ̀, глаго́люще: ѻ҆те́цъ тво́й ѡ҆тѧгчѝ ѩ҆ре́мъ на́шъ: ты́ же нн҃ѣ ѡ҆блегчѝ ѿ на́съ: сїѧ҄ рече́ши къ ни҄мъ: ю҆́ность моѧ̀ толстѣ́е чре́слъ ѻ҆тца̀ моегѡ̀:

¹¹и҆ нн҃ѣ ѻ҆те́цъ мо́й наложѝ на вы̀ ѩ҆ре́мъ тѧ́жекъ, а҆́зъ же приложѹ̀ къ ѩ҆рмѹ̀ ва́шемѹ: ѻ҆те́цъ мо́й наказа̀ вы̀ ра́нами, а҆́зъ же накажѹ̀ вы̀ скорпїо́нами.

¹²И҆ прїи́де ве́сь ї҆и҃ль къ царю̀ ровоа́мѹ въ де́нь тре́тїй, ѩ҆́коже речѐ и҆̀мъ ца́рь, глаго́лѧ: возврати́тесѧ ко мнѣ̀ въ де́нь тре́тїй.

¹³И҆ ѿвѣща̀ ца́рь къ лю́демъ же́стокѡ: и҆ ѡ҆ста́ви ца́рь ровоа́мъ совѣ́тъ старѣ́йшинъ, ѩ҆̀же совѣща́ша є҆мѹ̀,

¹⁴и҆ речѐ къ ни҄мъ по совѣ́тѹ ѻ҆трокѡ́въ, глаго́лѧ: ѻ҆те́цъ мо́й ѡ҆тѧгчѝ ѩ҆ре́мъ ва́шъ, а҆́зъ же приложѹ̀ къ ѩ҆рмѹ̀ ва́шемѹ: ѻ҆те́цъ мо́й наказа̀ вы̀ ра́нами, а҆́зъ же накажѹ̀ вы̀ скорпїо́нами.

¹⁵И҆ не послѹ́ша ца́рь люді́й, ѩ҆́кѡ бѣ̀ превраще́нїе ѿ гд҇а, ѩ҆́кѡ да ѹ҆тверди́тъ гл҃го́лъ сво́й, є҆го́же гл҃а рѹко́ю а҆хі́и силѡні́тѧнина ѡ҆ ї҆еровоа́мѣ сы́нѣ нава́товѣ.

¹⁶И҆ ви́дѣ ве́сь ї҆и҃ль, ѩ҆́кѡ не послѹ́ша ца́рь гла́са и҆́хъ, и҆ ѿвѣща́ша лю́дїе царю̀, глаго́люще: ка́ѧ на́мъ ча́сть въ даві́дѣ; и҆ нѣ́сть на́мъ наслѣ́дїѧ въ сы́нѣ ї҆ессе́овѣ: бѣжѝ, ї҆и҃лю, въ кро́вы своѧ҄: нн҃ѣ пасѝ до́мъ тво́й, даві́де. И҆ ѿи́де ї҆и҃ль въ кро́вы своѧ҄.

¹⁷Над̾ сынми́ же ї҆и҃левыми, и҆̀же живѧ́хѹ во градѣ́хъ ї҆ѹ́диныхъ, воцари́сѧ ровоа́мъ над̾ ни́ми.

¹⁸И҆ посла̀ ца́рь ровоа́мъ а҆дѡнїра́ма, и҆́же над̾ да́нїю, и҆ побѝ є҆го̀ ка́менїемъ ве́сь ї҆и҃ль, и҆ ѹ҆́мре. Ца́рь же ровоа́мъ потща́сѧ взы́ти на колесни́цѹ ѹ҆бѣжа́ти во ї҆ер҇ли́мъ.

¹⁹И҆ ѿложи́сѧ ї҆и҃ль ѿ до́мѹ даві́дова да́же до дне́сь.

²⁰И҆ бы́сть є҆гда̀ ѹ҆слы́ша ве́сь ї҆и҃ль, ѩ҆́кѡ возврати́сѧ ї҆еровоа́мъ ѿ є҆гѵ́пта, и҆ посла́ша, и҆ призва́ша є҆го̀ на собо́ръ, и҆ воцари́ша є҆го̀ над̾ ї҆и҃лемъ: и҆ не бѣ̀ в̾слѣ́дъ до́мѹ даві́дова, то́кмѡ хорѹ́гвь ї҆ѹ́дина и҆ венїамі́нова.

²¹И҆ ровоа́мъ вни́де во ї҆ер҇ли́мъ и҆ собра̀ ве́сь со́нмъ ї҆ѹ́динъ и҆ хорѹ́гвь венїамі́ню, сто̀ и҆ два́десѧть ты́сѧщъ ю҆́ношей, творѧ́щихъ бра́нь, ра́товати на до́мъ ї҆и҃левъ, є҆́же возврати́ти ца́рство ровоа́мѹ сы́нѹ соломѡ́ню.

²²И҆ бы́сть сло́во гд҇не ко саме́ю человѣ́кѹ бж҃їю, гл҃ѧ:

²³рцы̀ къ ровоа́мѹ сы́нѹ соломѡ́ню царю̀ ї҆ѹ́динѹ и҆ ко всемѹ̀ до́мѹ ї҆ѹ́динѹ и҆ венїамі́новѹ и҆ ко ѡ҆ста́вшымсѧ лю́демъ, глаго́лѧ:

²⁴та́кѡ гл҃етъ гд҇ь: не восходи́те, нижѐ ра́тѹйте на бра́тїю ва́шѹ, на сы́ны ї҆и҃лєвы: но возврати́тесѧ кі́йждо въ до́мы своѧ҄, ѩ҆́кѡ ѿ менє̀ бы́сть гл҃го́лъ се́й. И҆ послѹ́шаша словесѐ гд҇нѧ, и҆ преста́ша и҆тѝ по гл҃го́лѹ гд҇ню.

²⁵И҆ созда̀ ї҆еровоа́мъ сїкі́мѹ въ горѣ̀ є҆фре́мли, и҆ всели́сѧ въ не́й, и҆ и҆зы́де ѿтѹ́дѹ, и҆ созда̀ фанѹи́ла.

²⁶И҆ речѐ ї҆еровоа́мъ въ се́рдцы свое́мъ: сѐ, нн҃ѣ возврати́тсѧ ца́рство въ до́мъ даві́довъ,

²⁷а҆́ще взы́дѹтъ лю́дїе сі́и вознестѝ же́ртвѹ въ хра́мѣ гд҇ни во ї҆ер҇ли́мъ, и҆ ѡ҆брати́тсѧ се́рдце люді́й ко гд҇ѹ и҆ господи́нѹ своемѹ̀, къ ровоа́мѹ царю̀ ї҆ѹ́динѹ, и҆ ѹ҆бїю́тъ мѧ̀, и҆ возвратѧ́тсѧ къ ровоа́мѹ царю̀ ї҆ѹ́динѹ.

²⁸И҆ ѹ҆совѣ́това ца́рь, и҆ сотворѝ двѣ̀ ю҆́ницы зла҄ты, и҆ речѐ къ лю́демъ: довлѣ́етъ ва́мъ восходи́ти во ї҆ер҇ли́мъ: сѐ, бо́зи твоѝ, ї҆и҃лю, и҆зве́дшїи тѧ̀ и҆з̾ землѝ є҆гѵ́петскїѧ.

²⁹И҆ поста́ви є҆ди́нѹ въ веѳи́ли, а҆ дрѹгѹ́ю въ да́нѣ.

³⁰И҆ бы́сть сло́во сїѐ на согрѣше́нїе, и҆ и҆дѧ́хѹ лю́дїе пред̾ лице́мъ ю҆́ницы є҆ди́ныѧ да́же до да́на, и҆ ѡ҆ста́виша хра́мъ гд҇ень.

³¹И҆ сотворѝ ка҄пища на высо́кихъ, и҆ сотворѝ жерцѡ́въ ча́сть ѿ люді́й, и҆̀же не бѣ́ша ѿ сынѡ́въ леѵі́иныхъ.

³²И҆ сотворѝ ї҆еровоа́мъ пра́здникъ въ ѻ҆смы́й мц҇ъ въ пѧтыйна́десѧть де́нь мц҇а, по пра́здникѹ, и҆́же въ землѝ бѣ̀ ї҆ѹ́динѣ, и҆ взы́де на ѻ҆лта́рь, є҆го́же сотворѝ въ веѳи́ли, жре́ти ю҆́ницамъ, ѩ҆̀же сотворѝ, и҆ поста́ви въ веѳи́ли жерцы̀ на высо́кихъ, ѩ҆̀же сотворѝ.

³³И҆ взы́де на ѻ҆лта́рь, є҆го́же сотворѝ въ веѳи́ли, въ ѻ҆смы́й мц҇ъ, въ пѧтыйна́десѧть де́нь въ пра́здникъ, є҆го́же соста́ви по се́рдцѹ своемѹ̀: и҆ сотворѝ пра́здникъ сынѡ́мъ ї҆и҃лєвымъ, и҆ взы́де на ѻ҆лта́рь є҆́же пожре́ти.