Read Библия Церковнославянская г҃ ца́рствъ 15 Bible Online

г҃ ца́рствъ 15 - Библия Церковнославянская bible

г҃ ца́рствъ 15

¹И҆ во ѻ҆смоена́десѧть лѣ́то ца́рства ї҆еровоа́ма сы́на нава́това, воцари́сѧ а҆ві́а сы́нъ ровоа́мль над̾ ї҆ѹ́дою,

²и҆ трѝ лѣ҄та ца́рствова во ї҆ер҇ли́мѣ. И҆́мѧ же ма́тере є҆гѡ̀ мааха̀, дщѝ а҆вессалѡ́млѧ.

³И҆ хожда́ше во всѣ́хъ грѣсѣ́хъ ѻ҆тца̀ своегѡ̀, ѩ҆̀же сотворѝ пред̾ ни́мъ, и҆ не бѣ̀ се́рдце є҆гѡ̀ соверше́но съ гд҇емъ бг҃омъ є҆гѡ̀, ѩ҆́коже се́рдце даві́да ѻ҆тца̀ є҆гѡ̀:

⁴ѩ҆́кѡ даві́да ра́ди ѡ҆ста́ви є҆мѹ̀ гд҇ь бг҃ъ є҆гѡ̀ ѡ҆ста́нокъ во ї҆ер҇ли́мѣ, да возста́витъ по не́мъ ча҄да є҆гѡ̀ и҆ ѹ҆тверди́тъ ї҆ер҇ли́мъ,

⁵поне́же сотворѝ даві́дъ пра́вое пред̾ гд҇емъ и҆ не ѹ҆клони́сѧ ѿ всѣ́хъ, ѩ҆̀же заповѣ́да є҆мѹ̀ всѧ҄ дни҄ живота̀ є҆гѡ̀, кромѣ̀ сло́ва ѹ҆рі́и хетте́анина.

⁶И҆ бра́нь бѣ̀ междѹ̀ ровоа́момъ и҆ междѹ̀ ї҆еровоа́момъ во всѧ҄ дни҄ живота̀ и҆́хъ.

⁷И҆ прѡ́чаѧ слове́съ а҆ві́иныхъ, и҆ всѧ҄ ѩ҆̀же сотворѝ, не се́ ли, сїѧ҄ напи҄сана въ кни́зѣ сло́въ дні́й царе́й ї҆ѹ́диныхъ; И҆ бра́нь бѣ̀ междѹ̀ а҆ві́ею и҆ междѹ̀ ї҆еровоа́момъ.

⁸И҆ ѹ҆́спе а҆ві́а со ѻ҆тцы҄ свои́ми въ двадесѧ́тое лѣ́то ї҆еровоа́ма, и҆ погребо́ша є҆го̀ со ѻ҆тцы҄ є҆гѡ̀ во гра́дѣ даві́довѣ. И҆ воцари́сѧ а҆́са сы́нъ є҆гѡ̀ вмѣ́стѡ є҆гѡ̀.

⁹И҆ въ лѣ́то двадесѧ́тое ї҆еровоа́ма царѧ̀ ї҆и҃лева, ца́рствоваше а҆́са над̾ ї҆ѹ́дою,

¹⁰и҆ четы́редесѧть и҆ є҆ди́но лѣ́то ца́рствова во ї҆ер҇ли́мѣ. И҆́мѧ же ма́тере є҆гѡ̀ а҆на̀, дщѝ а҆вессалѡ́млѧ.

¹¹И҆ сотворѝ а҆́са пра́вое пред̾ гд҇емъ, ѩ҆́коже даві́дъ ѻ҆те́цъ є҆гѡ̀,

¹²и҆ ѿѧ̀ сквє́рнаѧ ѿ землѝ, и҆ и҆скоренѝ всѧ҄ и҆зва҄ѧннаѧ, ѩ҆̀же сотвори́ша ѻ҆тцы̀ є҆гѡ̀,

¹³и҆ а҆нѹ̀ ма́терь свою̀ ѿста́ви є҆́же не владѣ́ти є҆́й, поне́же сотворѝ со́нмище въ дѹбра́вѣ свое́й: и҆ и҆зсѣчѐ а҆́са га́й є҆ѧ̀ и҆ сожжѐ ѻ҆гне́мъ въ пото́цѣ ке́дрстѣмъ:

¹⁴высо́кихъ же не и҆скоренѝ, ѻ҆ба́че се́рдце а҆́сы бѣ̀ соверше́нно пред̾ гд҇емъ во всѧ҄ дни҄ є҆гѡ̀:

¹⁵и҆ внесѐ столпы̀ ѻ҆тца̀ своегѡ̀, и҆ столпы̀ своѧ҄ внесѐ во хра́мъ гд҇ень срє́брѧны и҆ зла҄ты, и҆ сосѹ́ды.

¹⁶И҆ бра́нь бѣ̀ междѹ̀ а҆́сою и҆ междѹ̀ ваа́сомъ царе́мъ ї҆и҃левымъ во всѧ҄ дни҄ и҆́хъ.

¹⁷И҆ взы́де ваа́са ца́рь ї҆и҃левъ на ї҆ѹ́дѹ и҆ созда̀ ра́мѹ, ѩ҆́кѡ не бы́ти на и҆схожде́нїе и҆ вхожде́нїе а҆́сѣ царю̀ ї҆ѹ́динѹ.

¹⁸И҆ взѧ̀ а҆́са всѐ сребро̀ и҆ зла́то ѡ҆брѣ́тшеесѧ въ сокро́вищахъ до́мѹ гд҇нѧ и҆ въ сокро́вищахъ до́мѹ царе́ва и҆ дадѐ ѧ҆̀ въ рѹ́цѣ ѻ҆́трѡкъ свои́хъ: и҆ посла̀ и҆̀хъ ца́рь а҆́са ко сы́нѹ а҆де́ровѹ сы́нѹ тавере́ма во рамма́нъ, ко сы́нѹ а҆заи́ла, царѧ̀ сѵ́рскагѡ, живѹ́щагѡ въ дама́сцѣ, глаго́лѧ:

¹⁹положѝ завѣ́тъ междѹ̀ мно́ю и҆ тобо́ю, и҆ междѹ̀ ѻ҆тце́мъ мои́мъ и҆ ѻ҆тце́мъ твои́мъ: сѐ, посла́хъ тѝ да́ры, сребро̀ и҆ зла́то: прїидѝ, разрѹшѝ завѣ́тъ тво́й, и҆́же со ваа́сою царе́мъ ї҆и҃левымъ, да ѿи́детъ ѿ менє̀.

²⁰И҆ послѹ́ша сы́нъ а҆де́ровъ царѧ̀ а҆́сы, и҆ посла̀ воевѡ́ды си́лъ свои́хъ на гра́ды ї҆и҃лєвы, и҆ порази́ша а҆і́на и҆ да́на, и҆ а҆ве́лѧ, до́мѹ маахі́ина, и҆ ве́сь хеннере́ѳъ, да́же до всеѧ̀ землѝ нефѳалі́мли.

²¹И҆ бы́сть ѩ҆́кѡ ѹ҆слы́ша ваа́са, и҆ ѡ҆ста́ви созида́ти ра́мѹ, и҆ возврати́сѧ во ѳе́рсѹ.

²²Ца́рь же а҆́са заповѣ́да всемѹ̀ ї҆ѹ́дѣ во є҆накі́мѣ, и҆ взѧ́ша ка́менїе и҆з̾ ра́мы и҆ древа̀ є҆ѧ̀, и҆́миже ѡ҆снова̀ ваа́са, и҆ созда̀ въ ни́хъ ца́рь а҆́са всѧ́къ хо́лмъ венїамі́нь и҆ стра҄жбища.

²³Прѡ́чаѧ же слове́съ а҆́синыхъ, и҆ всѧ҄ си́ла є҆гѡ̀, и҆ всѧ҄ ѩ҆̀же сотворѝ, и҆ гра́ды ѩ҆̀же созда̀, не се́ ли, сїѧ҄ пи҄сана сѹ́ть въ кни́зѣ слове́съ дні́й царе́й ї҆ѹ́диныхъ; Ѻ҆ба́че во вре́мѧ ста́рости своеѧ̀ нача́тъ болѣ́ти нога́ма свои́ма:

²⁴и҆ ѹ҆́спе а҆́са со ѻ҆тцы҄ свои́ми, и҆ погребе́нъ бы́сть во гра́дѣ даві́да ѻ҆тца̀ своегѡ̀. И҆ воцари́сѧ ї҆ѡсафа́тъ сы́нъ є҆гѡ̀ вмѣ́стѡ є҆гѡ̀.

²⁵Нава́тъ же сы́нъ ї҆еровоа́мль нача̀ ца́рствовати над̾ ї҆и҃лемъ во второ́е лѣ́то а҆́сы царѧ̀ ї҆ѹ́дина, и҆ ца́рствова над̾ ї҆и҃лемъ два̀ лѣ҄та,

²⁶и҆ сотворѝ лѹка́вое пред̾ гд҇емъ, и҆ хожда́ше пѹте́мъ ѻ҆тца̀ своегѡ̀ и҆ во грѣсѣ́хъ є҆гѡ̀, и҆́миже согрѣши́ти сотворѝ ї҆и҃лю.

²⁷И҆ ѡ҆бсѣ́де є҆го̀ ваа́са сы́нъ а҆хі́инъ въ домѹ̀ велаа́на сы́на а҆хі́ина, и҆ ѹ҆бѝ є҆го̀ во гаваѳѡ́нѣ и҆ноплеме́нничи: нава́тъ же и҆ ве́сь ї҆и҃ль ѡ҆бсѣдо́ша гаваѳѡ́нъ.

²⁸И҆ ѹ҆мертвѝ є҆го̀ ваа́са въ лѣ́то тре́тїе а҆́сы царѧ̀ ї҆ѹ́дина, и҆ воцари́сѧ вмѣ́стѡ є҆гѡ̀.

²⁹И҆ бы́сть є҆гда̀ воцари́сѧ, и҆збѝ ве́сь до́мъ ї҆еровоа́мль и҆ не ѡ҆ста́ви ничто́же ѿ всегѡ̀ дыха́нїѧ ї҆еровоа́млѧ, до́ндеже и҆скоренѝ и҆̀хъ по гл҃ѹ гд҇ню, є҆го́же гл҃а рѹко́ю раба̀ своегѡ̀ а҆хі́и силѡні́тскагѡ,

³⁰грѣ҄хъ ра́ди ї҆еровоа́млихъ, и҆́же согрѣшѝ, и҆́же введѐ во грѣ́хъ ї҆и҃лѧ, и҆ въ прогнѣ́ванїи є҆гѡ̀, и҆́мже прогнѣ́ва гд҇а бг҃а ї҆и҃лева.

³¹И҆ прѡ́чаѧ словеса̀ нава́та, и҆ всѧ҄ ѩ҆̀же сотворѝ, не се́ ли, сїѧ҄ пи҄сана сѹ́ть въ кни́зѣ слове́съ дні́й царе́й ї҆и҃левыхъ;

³²И҆ бѧ́ше бра́нь междѹ̀ а҆́сою (царе́мъ ї҆ѹ́динымъ) и҆ ваа́сою царе́мъ ї҆и҃левымъ во всѧ҄ дни҄ и҆́хъ.

³³И҆ въ тре́тїе лѣ́то а҆́сы царѧ̀ ї҆ѹ́дина ца́рствова ваа́са сы́нъ а҆хі́инъ над̾ всѣ́мъ ї҆и҃лемъ во ѳе́рсѣ два́десѧть и҆ четы́ре лѣ҄та,

³⁴и҆ сотворѝ лѹка́вое пред̾ гд҇емъ, и҆ и҆́де пѹте́мъ ї҆еровоа́ма сы́на нава́това, и҆ во грѣсѣ́хъ є҆гѡ̀, и҆́миже въ согрѣше́нїе приведѐ ї҆и҃лѧ.