Read Библия Церковнославянская г҃ ца́рствъ 22 Bible Online

г҃ ца́рствъ 22 - Библия Церковнославянская bible

г҃ ца́рствъ 22

¹И҆ сѣ́де трѝ лѣ҄та, и҆ не бѣ̀ бра́ни междѹ̀ сѷрі́ею и҆ междѹ̀ ї҆и҃лемъ.

²И҆ бы́сть въ лѣ́то тре́тїе, и҆ сни́де ї҆ѡсафа́тъ ца́рь ї҆ѹ́динъ къ царю̀ ї҆и҃левѹ.

³И҆ речѐ ца́рь ї҆и҃левъ ко ѻ҆трокѡ́мъ свои҄мъ: вѣ́сте ли, ѩ҆́кѡ моѧ̀ є҆́сть ремма́ѳа галаа́дскаѧ, и҆ мы̀ молчи́мъ взѧ́ти ю҆̀ ѿ рѹкѝ царѧ̀ сѷрі́йска;

⁴И҆ речѐ ца́рь ї҆и҃левъ ко ї҆ѡсафа́тѹ: взы́деши ли съ на́ми въ ремма́ѳѹ галаа́дскѹю на бра́нь; И҆ речѐ ї҆ѡсафа́тъ: ѩ҆́коже а҆́зъ, та́кожде и҆ ты̀: ѩ҆́коже лю́дїе моѝ, лю́дїе твоѝ: ѩ҆́коже ко́ни моѝ, ко́ни твоѝ.

⁵И҆ речѐ ї҆ѡсафа́тъ ца́рь ї҆ѹ́динъ къ царю̀ ї҆и҃левѹ: вопроси́те ѹ҆̀бо дне́сь гд҇а.

⁶И҆ собра̀ ца́рь ї҆и҃левъ всѧ҄ проро́ки ѩ҆́кѡ четы́реста мѹже́й, и҆ речѐ ца́рь и҆̀мъ: взы́дѹ ли въ ремма́ѳѹ галаа́дскѹю на бра́нь, и҆лѝ ѡ҆ста́влю; И҆ рѣ́ша: взы́ди, ѩ҆́кѡ даѧ̀ преда́стъ гд҇ь въ рѹ́ки царє́вы.

⁷И҆ речѐ ї҆ѡсафа́тъ къ царю̀ ї҆и҃левѹ: нѣ́сть ли здѣ̀ про҇ро́ка гд҇нѧ, и҆ вопроси́ли бы́хомъ гд҇а и҆́мъ;

⁸И҆ речѐ ца́рь ї҆и҃левъ ко ї҆ѡсафа́тѹ: є҆щѐ є҆́сть є҆ди́нъ мѹ́жъ на вопроше́нїе и҆́мъ гд҇а, и҆ а҆́зъ возненави́дѣхъ є҆го̀, ѩ҆́кѡ не глаго́летъ ѡ҆ мнѣ̀ до́брѣ, но ѕла҄ѧ, мїхе́а сы́нъ ї҆емвлаа́нь. И҆ речѐ ца́рь ї҆ѡсафа́тъ ї҆ѹ́динъ: не глаго́ли, царю̀, та́кѡ.

⁹И҆ призва̀ ца́рь ї҆и҃левъ скопца̀ є҆ди́наго и҆ речѐ: ско́рѡ и҆дѝ по мїхе́ю сы́на ї҆емвлаа́нѧ.

¹⁰Ца́рь же ї҆и҃левъ и҆ ї҆ѡсафа́тъ ца́рь ї҆ѹ́динъ сѣдѧ́ста кі́йждо на престо́лѣ свое́мъ воѡрѹже́ни во вратѣ́хъ самарі́йскихъ, и҆ всѝ проро́цы прорица́хѹ пред̾ ни́ми.

¹¹И҆ сотворѝ себѣ̀ седекі́а сы́нъ ханаа́нь рога̀ жєлѣ́зна и҆ речѐ: та́кѡ гл҃етъ гд҇ь: си́ми рога́ми и҆збоде́ши сѷрі́ю, до́ндеже сконча́етсѧ.

¹²И҆ всѝ проро́цы прорица́хѹ та́кѡ, глаго́люще: взы́ди въ ремма́ѳѹ галаа́дскѹю, и҆ наста́витъ тѧ̀, и҆ преда́стъ гд҇ь въ рѹ́цѣ твоѝ царѧ̀ сѷрі́йскаго.

¹³И҆ посо́лъ ше́дъ призва́ти мїхе́ю, речѐ є҆мѹ̀, глаго́лѧ: сѐ, нн҃ѣ всѝ проро́цы ѹ҆сты҄ є҆ди́ными глаго́лютъ дѡ́браѧ ѡ҆ царѝ, бѹ́ди ѹ҆̀бо и҆ ты̀ въ словесѣ́хъ твои́хъ по словесе́мъ є҆ди́нагѡ ѿ си́хъ и҆ глаго́ли дѡ́браѧ.

¹⁴И҆ речѐ мїхе́а: жи́въ гд҇ь, ѩ҆́кѡ ѩ҆̀же рече́тъ гд҇ь ко мнѣ̀, сїѧ҄ возглаго́лю.

¹⁵И҆ прїи́де ко царю̀. И҆ речѐ є҆мѹ̀ ца́рь: мїхе́е, взы́дѹ ли въ ремма́ѳѹ галаа́дскѹю на бра́нь, и҆лѝ ѡ҆ста́влю; И҆ речѐ є҆мѹ̀: взы́ди, и҆ бл҃гопоспѣши́тъ гд҇ь въ рѹ́ки царє́вы.

¹⁶И҆ речѐ є҆мѹ̀ ца́рь: є҆щѐ а҆́зъ два́жды заклина́ю тѧ̀, да рече́ши и҆́стинѹ пред̾ гд҇емъ.

¹⁷И҆ речѐ мїхе́а: не та́кѡ: ви́дѣхъ всего̀ ї҆и҃лѧ разсѣ́ѧна по гора́мъ ѩ҆́коже стада̀, и҆̀мже нѣ́сть па́стырѧ: и҆ речѐ гд҇ь: не гд҇ь ли си҄мъ въ бг҃а; да возврати́тсѧ кі́йждо въ до́мъ сво́й съ ми́ромъ.

¹⁸И҆ речѐ ца́рь ї҆и҃левъ ко ї҆ѡсафа́тѹ царю̀ ї҆ѹ́динѹ: не рѣ́хъ ли тебѣ̀, ѩ҆́кѡ не прори́четъ се́й мѝ дѡ́браѧ, но то́кмѡ ѕла҄ѧ;

¹⁹И҆ речѐ мїхе́а: не та́кѡ: не а҆́зъ: слы́ши гл҃ъ гд҇ень: не та́кѡ: ви́дѣхъ гд҇а бг҃а ї҆и҃лева сѣдѧ́щаго на пр҇то́лѣ свое́мъ, и҆ всѐ во́инство нб҇ное стоѧ́ше ѡ҆́крестъ є҆гѡ̀ ѡ҆деснѹ́ю є҆гѡ̀ и҆ ѡ҆шѹ́юю є҆гѡ̀:

²⁰и҆ речѐ гд҇ь: кто̀ прельсти́тъ а҆хаа́ва царѧ̀ ї҆и҃лева, и҆ взы́детъ и҆ паде́тъ въ ремма́ѳѣ галаа́дстѣй; и҆ речѐ се́й та́кѡ, и҆ се́й та́кѡ:

²¹и҆ и҆зы́де дѹ́хъ, и҆ ста̀ пред̾ гд҇емъ, и҆ речѐ: а҆́зъ прельщѹ̀ и҆̀:

²²и҆ речѐ къ немѹ̀ гд҇ь: въ че́мъ; и҆ речѐ: и҆зы́дѹ и҆ бѹ́дѹ дѹ́хъ лжи́въ во ѹ҆стѣ́хъ всѣ́хъ прорѡ́къ є҆гѡ̀: и҆ речѐ: прельсти́ши и҆ возмо́жеши: и҆зы́ди и҆ сотворѝ та́кѡ:

²³и҆ сѐ, нн҃ѣ дадѐ гд҇ь дѹ́хъ лжи́въ во ѹ҆ста̀ всѣ́хъ прорѡ́къ твои́хъ си́хъ, и҆ гд҇ь гл҃а на тѧ̀ ѕла҄ѧ.

²⁴И҆ пристѹпѝ седекі́а сы́нъ ханаа́нь, и҆ поразѝ мїхе́ю въ лицѐ и҆ речѐ: каковы́й се́й пре́йде дх҃ъ гд҇ень ѿ менє̀, є҆́же глаго́лати въ тебѣ̀;

²⁵И҆ речѐ мїхе́а: сѐ, ты̀ ѹ҆́зриши въ де́нь ѡ҆́нъ, є҆гда̀ вни́деши въ ло́жницѹ сокро́вища твоегѡ̀, є҆́же скры́тисѧ тѹ̀.

²⁶И҆ речѐ ца́рь ї҆и҃левъ: поими́те мїхе́ю, и҆ возврати́те є҆го̀ ко а҆ммѡ́нѹ кнѧ́зю гра́да и҆ ко ї҆ѡа́сѹ сы́нѹ царе́вѹ,

²⁷и҆ рцы́те, да поса́дѧтъ є҆го̀ въ темни́цѹ, и҆ да ко́рмѧтъ є҆го̀ хлѣ́бомъ печа́льнымъ и҆ водо́ю печа́льною, до́ндеже возвращѹ́сѧ въ ми́рѣ.

²⁸И҆ речѐ мїхе́а: а҆́ще возвраща́ѧсѧ возврати́шисѧ въ ми́рѣ, то̀ не гл҃а гд҇ь мно́ю. И҆ речѐ: слы́шите, лю́дїе всѝ.

²⁹И҆ взы́де ца́рь ї҆и҃левъ и҆ ї҆ѡсафа́тъ ца́рь ї҆ѹ́динъ съ ни́мъ въ ремма́ѳѹ галаа́дскѹю.

³⁰И҆ речѐ ца́рь ї҆и҃левъ ко ї҆ѡсафа́тѹ царю̀ ї҆ѹ́динѹ: прикры́й мѧ̀, и҆ вни́дѹ въ сѣ́чь, и҆ ты̀ ѡ҆блецы́сѧ въ ри́зѹ мою̀. И҆ прикры́сѧ ца́рь ї҆и҃левъ и҆ вни́де въ сѣ́чь.

³¹Ца́рь же сѵ́рскїй заповѣ́да кнѧзє́мъ колесни́цъ свои́хъ три́десѧтимъ и҆ двѹ́мъ, глаго́лѧ: не бі́йтесѧ ни съ вели́кимъ ни съ ма́лымъ, но то́кмѡ съ царе́мъ ї҆и҃левымъ є҆ди́нымъ.

³²И҆ бы́сть є҆гда̀ ѹ҆зрѣ́ша воевѡ́ды колесни́цъ ї҆ѡсафа́та царѧ̀ ї҆ѹ́дина, и҆ рѣ́ша: ви́дитсѧ ца́рь ї҆и҃левъ се́й. И҆ ѡ҆бстѹпи́ша є҆го̀ є҆́же срази́тисѧ съ ни́мъ: и҆ возопѝ ї҆ѡсафа́тъ.

³³И҆ бы́сть є҆гда̀ ѹ҆зрѣ́ша воевѡ́ды колесни́цъ, ѩ҆́кѡ нѣ́сть ца́рь ї҆и҃левъ то́й, и҆ возврати́шасѧ ѿ негѡ̀:

³⁴и҆ налѧчѐ лѹ́къ є҆ди́нъ мѹ́жъ примѣ́тнѡ, и҆ поразѝ царѧ̀ ї҆и҃лева междѹ̀ ле́гкимъ и҆ щито́мъ. И҆ речѐ (ца́рь) вса́дникѹ своемѹ̀: ѡ҆братѝ рѹ́ки твоѧ҄, и҆ и҆зведи́ мѧ ѿ бра́ни, ѩ҆́кѡ ѩ҆́звенъ є҆́смь.

³⁵И҆ ѹ҆мно́жисѧ бра́нь въ то́й де́нь, и҆ ца́рь бѣ̀ стоѧ̀ на колесни́цѣ проти́вѹ сѷрі́анъ ѿ ѹ҆́тра да́же до ве́чера, и҆ лїѧ́шесѧ кро́вь и҆з̾ ѩ҆́звы въ нѣ́дра колесни́цы, и҆ ѹ҆́мре въ ве́черъ, и҆ и҆злива́шесѧ кро́вь ѿ ѩ҆́звы да́же до нѣ́дръ колесни́цы.

³⁶И҆ ста̀ проповѣ́дникъ ѡ҆ за́падѣ со́лнца, глаго́лѧ: кі́йждо ва́съ да и҆́детъ во сво́й гра́дъ и҆ во свою̀ зе́млю, ѩ҆́кѡ ѹ҆́мре ца́рь.

³⁷И҆ прїидо́ша въ самарі́ю, и҆ погребо́ша въ самарі́и царѧ̀.

³⁸И҆ ѡ҆мы́ша кро́вь съ колесни́цы на и҆сто́чницѣ самарі́йстѣмъ, и҆ полиза́ша свинїи҄ и҆ псѝ кро́вь є҆гѡ̀, и҆ блѹдни҄цы и҆змы́шасѧ въ кро́ви є҆гѡ̀, по гл҃ѹ гд҇ню, є҆го́же гл҃а.

³⁹Прѡ́чаѧ же слове́съ а҆хаа́влихъ, и҆ всѧ҄ ѩ҆̀же сотворѝ, и҆ хра́мъ слоно́вый, є҆го́же созда̀, и҆ всѧ҄ гра́ды, ѩ҆̀же сотворѝ, не се́ ли, сїѧ҄ пи҄сана бы́ша въ кни́зѣ слове́съ дні́й царе́й ї҆и҃левыхъ;

⁴⁰И҆ ѹ҆́спе а҆хаа́въ со ѻ҆тцы҄ свои́ми, и҆ воцари́сѧ ѻ҆хозі́а сы́нъ є҆гѡ̀ вмѣ́стѡ є҆гѡ̀.

⁴¹И҆ ї҆ѡсафа́тъ сы́нъ а҆́сы воцари́сѧ над̾ ї҆ѹ́дою въ четве́ртое лѣ́то а҆хаа́ва царѧ̀ ї҆и҃лева.

⁴²Ї҆ѡсафа́тъ сы́нъ три́десѧти пѧтѝ лѣ́тъ (бѣ̀), є҆гда̀ нача̀ ца́рствовати, и҆ два́десѧть пѧ́ть лѣ́тъ ца́рствова во ї҆ер҇ли́мѣ. И҆́мѧ же ма́тери є҆гѡ̀ а҆зѹва̀, дщѝ салаі́лѧ.

⁴³И҆ хожда́ше по всѣ҄мъ пѹтє́мъ а҆́сы ѻ҆тца̀ своегѡ̀, не ѹ҆клони́сѧ ѿ негѡ̀, творѧ̀ пра́вое пред̾ ѻ҆чи́ма гд҇нима, то́кмѡ высо́кихъ не разорѝ: є҆щѐ лю́дїе жрѧ́хѹ и҆ кадѧ́хѹ на высо́кихъ.

⁴⁴И҆ ѹ҆мири́сѧ ї҆ѡсафа́тъ съ царе́мъ ї҆и҃левымъ.

⁴⁵Прѡ́чаѧ же слове́съ ї҆ѡсафа́товыхъ, и҆ си҄лы є҆гѡ̀, є҆ли҄ка сотворѝ, не се́ ли, пи҄сана сѹ́ть въ кни́зѣ слове́съ дні́й царе́й ї҆ѹ́диныхъ;

⁴⁶И҆ про́чее ме́рзости, є҆́же ѡ҆ста́сѧ во дни҄ а҆́сы ѻ҆тца̀ є҆гѡ̀, ѿѧ̀ ѿ землѝ.

⁴⁷И҆ царѧ̀ не бѣ̀ во є҆дѡ́мѣ поста́вленнагѡ.

⁴⁸Ца́рь же ї҆ѡсафа́тъ сотворѝ корабли҄ ѳарсї҄йскїѧ, є҆́же и҆тѝ во ѡ҆фи́ръ по зла́то, но не поидо́ша, занѐ сокрѹши́шасѧ корабли҄ во а҆сеѡ́нъ-гаве́рѣ.

⁴⁹Тогда̀ речѐ ѻ҆хозі́а сы́нъ а҆хаа́вль ко ї҆ѡсафа́тѹ: да и҆́дѹтъ рабѝ моѝ съ рабы҄ твои́ми въ корабле́хъ. И҆ не восхотѣ̀ ї҆ѡсафа́тъ.

⁵⁰И҆ ѹ҆́мре ї҆ѡсафа́тъ со ѻ҆тцы҄ свои́ми, и҆ погребе́нъ бы́сть ѹ҆ ѻ҆тє́цъ свои́хъ во гра́дѣ даві́да ѻ҆тца̀ своегѡ̀. И҆ воцари́сѧ ї҆ѡра́мъ сы́нъ є҆гѡ̀ вмѣ́стѡ є҆гѡ̀.

⁵¹И҆ ѻ҆хозі́а сы́нъ а҆хаа́вовъ воцари́сѧ над̾ ї҆и҃лемъ въ самарі́и, въ лѣ́то седмоена́десѧть ї҆ѡсафа́та царѧ̀ ї҆ѹ́дина, и҆ ца́рствова над̾ ї҆и҃лемъ въ самарі́и лѣ҄та два̀,

⁵²и҆ сотворѝ лѹка́вое пред̾ гд҇емъ, и҆ нача̀ ходи́ти по пѹтє́мъ ѻ҆тца̀ своегѡ̀ а҆хаа́ва и҆ по пѹтѝ ї҆езаве́ли ма́тере своеѧ̀, и҆ во грѣсѣ́хъ до́мѹ ї҆еровоа́ма сы́на нава́това, и҆́же введѐ во грѣ́хъ ї҆и҃лѧ:

⁵³и҆ порабо́та ваа́лѹ, и҆ поклони́сѧ є҆мѹ̀, и҆ разгнѣ́ва гд҇а бг҃а ї҆и҃лева, по всѣ҄мъ бы́вшымъ пре́жде є҆гѡ̀.