Read Библия Церковнославянская г҃ ца́рствъ 4 Bible Online

г҃ ца́рствъ 4 - Библия Церковнославянская bible

г҃ ца́рствъ 4

¹И҆ бѣ̀ ца́рь соломѡ́нъ ца́рствѹѧй над̾ ї҆и҃лемъ.

²И҆ сі́и старѣ҄йшины и҆̀же бѣ́ша съ ни́мъ:

³а҆за́рїа сы́нъ садѡ́ковъ, жре́цъ: є҆лїа́фъ и҆ а҆хі́а сы́нове си҄вины, книгѡ́чїи: и҆ ї҆ѡсафа́тъ сы́нъ а҆хїлѹ́довъ, напомина́тель:

⁴и҆ ване́а сы́нъ ї҆ѡда́евъ над̾ си́лою: и҆ садѡ́къ и҆ а҆вїа́ѳаръ, ї҆ере́є:

⁵и҆ а҆за́рїа сы́нъ наѳа́нь над̾ настоѧ́телми: и҆ завѹ́ѳъ сы́нъ наѳа́нь дрѹ́гъ царе́въ:

⁶и҆ а҆хїса́ръ бѣ̀ строи́тель, и҆ є҆лїа́въ сы́нъ сафа́товъ над̾ ѻ҆те́чествомъ: и҆ а҆дѡнїра́мъ сы́нъ а҆вдѡ́новъ над̾ да́ньми.

⁷И҆ ѹ҆ соломѡ́на бѧ́хѹ двана́десѧть приста҄вникъ над̾ всѣ́мъ ї҆и҃лемъ, є҆́же подаѧ́ти царю̀ и҆ до́мѹ є҆гѡ̀: по мц҇ѹ въ лѣ́тѣ быва́ше є҆ди́нъ, є҆́же подаѧ́ти,

⁸и҆ сїѧ҄ и҆мена̀ и҆́хъ: ве́нъ сы́нъ ѡ҆́ровъ на горѣ̀ є҆фре́мли, є҆ди́нъ:

⁹сы́нъ дака́рь во махема́тѣ и҆ во висаламі́нѣ и҆ веѳсамѵ́сѣ и҆ є҆лѡ́нѣ, да́же до веѳана́на, є҆ди́нъ:

¹⁰сы́нъ се́довъ во а҆равѡ́ѳѣ, сегѡ̀ сѡхѡ̀ и҆ всѧ̀ землѧ̀ ѻ҆фе́рова:

¹¹сы́на а҆мїнада́влѧ всѧ̀ нефѳадѡ́ръ: тефа́ѳъ дщѝ соломѡ́нѧ бѣ̀ є҆мѹ̀ въ женѹ̀, є҆ди́нъ:

¹²вана̀ сы́нъ а҆хїлѹ́ѳовъ во ї҆ѳаана́хѣ и҆ магеддѡ̀ и҆ ве́сь до́мъ саны́и, и҆́же при сесаѳа́нѣ под̾ є҆зрае́лемъ, и҆ ѿ виѳса́на да́же до савелмаѹ́ла, да́же до маеве́ръ лѹка́мъ, є҆ди́нъ:

¹³сы́нъ наве́ровъ въ равѡ́ѳѣ галаа́дстѣмъ: семѹ̀ ѻ҆́бласть є҆рга́въ въ васа́нѣ, шестьдесѧ́тъ градѡ́въ вели́кихъ ѡ҆гражде́нныхъ стѣна́ми, и҆ верєѝ мѣ҄дѧны, є҆ди́нъ:

¹⁴а҆хїнада́въ сы́нъ са́ддовъ во маанаі́мѣ:

¹⁵а҆хїмаа́съ въ нефѳалі́мѣ: и҆ се́й поѧ́тъ васема́ѳѹ дще́рь соломѡ́ню въ женѹ̀, є҆ди́нъ:

¹⁶ваана̀ сы́нъ хѹсі́инъ во а҆си́рѣ и҆ во ваалѡ́ѳѣ, є҆ди́нъ:

¹⁷ї҆ѡсафа́тъ сы́нъ фарѹ́евъ во ї҆ссаха́рѣ,

¹⁸семе́й сы́нъ и҆лы̀ во венїамі́нѣ,

¹⁹гаве́ръ сы́нъ а҆да́евъ въ землѝ галаа́дѣ, въ землѝ сиѡ́на царѧ̀ є҆севѡ́нска и҆ ѡ҆́га царѧ̀ васа́нска, и҆ наси́фъ є҆ди́нъ въ землѝ ї҆ѹ́довѣ.

²⁰Ї҆ѹ́да и҆ ї҆и҃ль мно́зи а҆́ки песо́къ и҆́же при мо́ри во мно́жествѣ, ѩ҆дѹ́ще и҆ пїю́ще и҆ веселѧ́щесѧ.

²¹И҆ соломѡ́нъ бѣ̀ нача́лствѹѧй во всѣ́хъ ца́рствахъ, ѿ рѣкѝ землѝ фѷлїсті́мскїѧ и҆ да́же до предѣ҄лъ є҆гѵ́петскихъ, (и҆ бѧ́хѹ) приносѧ́ще да́ры и҆ рабо́тающе соломѡ́нѹ во всѧ҄ дни҄ живота̀ є҆гѡ̀.

²²И҆ сїѧ҄ потрє́бнаѧ соломѡ́нѹ въ де́нь є҆ди́нъ: три́десѧть мѣ́ръ мѹкѝ семїда́лныѧ и҆ шестьдесѧ́тъ мѣ́ръ мѹкѝ смѣ́шаныѧ,

²³де́сѧть телцє́въ и҆збра́нныхъ и҆ два́десѧть волѡ́въ тѹ́чныхъ и҆ сто̀ ѻ҆ве́цъ, кромѣ̀ є҆ле́ней и҆ се́рнъ и҆ пти́цъ, и҆збра҄нна ѿ и҆збра́нныхъ тѹ҄чна.

²⁴Поне́же бѣ̀ нача́лствѹѧй во всѣ́хъ ѡ҆б̾ ѡ҆́нъ по́лъ рѣкѝ ѿ ѳа́ѱы и҆ да́же до га́зы, над̾ всѣ́ми цармѝ ѡ҆б̾ ѡ҆́нъ по́лъ рѣкѝ, и҆ ми́ръ бѣ̀ є҆мѹ̀ ѿ всѣ́хъ стра́нъ ѡ҆́крестъ.

²⁵И҆ живѧ́хѹ ї҆ѹ́да и҆ ї҆и҃ль безпеча́льнѡ, кі́йждо под̾ вїногра́домъ свои́мъ и҆ под̾ смоко́вницею свое́ю, ѩ҆дѹ́ще и҆ пїю́ще, ѿ да́на и҆ да́же до вирсаві́и, во всѧ҄ дни҄ соломѡ́на.

²⁶И҆ бѧ́ше ѹ҆ соломѡ́на четы́редесѧть ты́сѧщъ кобыли́цъ въ колєсни́цы и҆ два́десѧть ты́сѧщъ кѡ́нникъ.

²⁷И҆ та́кѡ подаѧ́хѹ приста́вники царю̀ соломѡ́нѹ, и҆ всѧ҄ повелѣ҄ннаѧ на трапе́зѹ царе́вѹ, кі́йждо въ мц҇ъ сво́й, не премѣнѧ́юще словесѐ:

²⁸и҆ ѩ҆чме́нь и҆ плє́вы ко́нємъ, и҆ колесни́цами привозѧ́хѹ на мѣ́сто, и҆дѣ́же бѣ̀ ца́рь, кі́йждо по чи́нѹ своемѹ̀.

²⁹И҆ дадѐ гд҇ь смы́слъ и҆ мѹ́дрость соломѡ́нѹ мно́гѹ ѕѣлѡ̀, и҆ широтѹ̀ се́рдца, ѩ҆́кѡ песо́къ и҆́же при мо́ри:

³⁰и҆ ѹ҆мно́жисѧ мѹ́дрость соломѡ́нова ѕѣлѡ̀, па́че смы́сла всѣ́хъ дре́внихъ человѣ҄къ и҆ па́че всѣ́хъ смы́сленныхъ є҆гѵ́петскихъ:

³¹и҆ ѹ҆мѹдри́сѧ па́че всѣ́хъ человѣ҄къ, и҆ ѹ҆мѹдри́сѧ па́че геѳа́на є҆зраилі́тнна и҆ є҆ма́на, и҆ халка́да и҆ да́рды, сы́на сама́дова, и҆ просла́висѧ и҆́мѧ є҆гѡ̀ во всѣ́хъ страна́хъ ѡ҆́крестъ.

³²И҆ и҆зглаго́ла соломѡ́нъ трѝ ты́сѧщы при́тчей, и҆ бы́ша пѣ҄сни є҆гѡ̀ пѧ́ть ты́сѧщъ:

³³и҆ глаго́ла ѡ҆ дре́вѣхъ, ѿ ке́дра и҆́же въ лїва́нѣ и҆ да́же до ѵ҆ссѡ́па и҆сходѧ́щагѡ и҆з̾ стѣны̀: и҆ глаго́ла ѡ҆ скотѣ́хъ и҆ ѡ҆ пти́цахъ и҆ ѡ҆ га́дѣхъ и҆ ѡ҆ ры́бахъ.

³⁴И҆ прихожда́хѹ всѝ лю́дїе слы́шати премѹ́дрость соломѡ́ню: и҆ прїима́ше да́ры ѿ всѣ́хъ царе́й земны́хъ, є҆ли́цы слы́шахѹ премѹ́дрость є҆гѡ̀.