Read Библия Церковнославянская г҃ ца́рствъ 5 Bible Online

г҃ ца́рствъ 5 - Библия Церковнославянская bible

г҃ ца́рствъ 5

¹И҆ посла̀ хїра́мъ ца́рь тѵ́рскїй ѻ҆́троки своѧ҄ къ соломѡ́нѹ: ѹ҆слы́ша бо, ѩ҆́кѡ пома́заша є҆го̀ на ца́рство вмѣ́стѡ даві́да ѻ҆тца̀ є҆гѡ̀, ѩ҆́кѡ любѧ́ше хїра́мъ даві́да во всѧ҄ дни҄.

²И҆ посла̀ соломѡ́нъ къ хїра́мѹ, глаго́лѧ:

³ты̀ вѣ́си ѻ҆тца̀ моего̀ даві́да, ѩ҆́кѡ не возмо́же созда́ти до́мѹ и҆́мени гд҇а бг҃а моегѡ̀, ѿ лица̀ проти́вныхъ, ѡ҆крѹжи́вшихъ є҆го̀, до́ндеже дадѐ ѧ҆̀ гд҇ь под̾ стѡпы̀ но́гъ є҆гѡ̀:

⁴и҆ нн҃ѣ ѹ҆поко́и гд҇ь бг҃ъ мо́й мнѣ̀ ѡ҆́крестъ, нѣ́сть навѣ́тника, нижѐ сопроти́вника лѹка́вагѡ:

⁵и҆ сѐ, а҆́зъ глаго́лю созда́ти до́мъ и҆́мени гд҇а бг҃а моегѡ̀, ѩ҆́коже гл҃а гд҇ь бг҃ъ къ даві́дѹ ѻ҆тцѹ̀ моемѹ̀, гл҃ѧ: сы́нъ тво́й, є҆го́же да́мъ вмѣ́стѡ тебє̀ на престо́лъ тво́й, то́й сози́ждетъ до́мъ и҆́мени моемѹ̀:

⁶и҆ нн҃ѣ заповѣ́ждь, да насѣкѹ́тъ мѝ дре́въ ѿ лїва́на, и҆ сѐ, рабѝ моѝ съ рабы҄ твои́ми, и҆ мздѹ̀ трѹдѡ́въ твои́хъ да́мъ тѝ по всемѹ̀ є҆ли҄ка рече́ши, поне́же ты̀ вѣ́си, ѩ҆́кѡ нѣ́сть на́мъ вѣ́дѹщагѡ древа̀ сѣщѝ, ѩ҆́коже сїдѡ́нѧне.

⁷И҆ бы́сть є҆гда̀ ѹ҆слы́ша хїра́мъ словеса̀ соломѡ҄нѧ, возра́довасѧ ѕѣлѡ̀ и҆ речѐ: блг҇ве́нъ бг҃ъ дне́сь, и҆́же дадѐ даві́дѹ сы́на разѹ́мна над̾ людьмѝ си́ми мно́гими.

⁸И҆ посла̀ хїра́мъ къ соломѡ́нѹ, глаго́лѧ: слы́шахъ ѡ҆ всѣ́хъ, и҆́хже ра́ди посла́лъ є҆сѝ ко мнѣ̀: а҆́зъ сотворю̀ всѐ хотѣ́нїе твоѐ ѡ҆ древа́хъ ке́дровыхъ и҆ пе́ѵговыхъ:

⁹слѹги҄ моѝ и҆знесѹ́тъ ѧ҆̀ ѿ лїва́на къ мо́рю, и҆ а҆́зъ положѹ̀ ѧ҆̀ въ складє́нїѧ на мѣ́сто, и҆дѣ́же возвѣсти́ши мнѣ̀, и҆ довезѹ̀ ѧ҆̀ та́мѡ: и҆ ты̀ во́змеши, и҆ сотвори́ши хотѣ́нїе моѐ, є҆́же да́ти хлѣ́бы до́мѹ моемѹ̀.

¹⁰И҆ бѣ̀ хїра́мъ даѧ̀ соломѡ́нѹ ке́дры и҆ пе́ѵги и҆ всю̀ во́лю є҆гѡ̀.

¹¹И҆ дадѐ соломѡ́нъ хїра́мѹ два́десѧть ты́сѧщъ мѣ́ръ пшени́цы, и҆ пи́щѹ до́мѹ є҆гѡ̀, и҆ два́десѧть ты́сѧщъ мѣ́ръ є҆ле́а чи́стагѡ: по семѹ̀ дава́ше соломѡ́нъ хїра́мѹ на всѧ́ко лѣ́то.

¹²И҆ гд҇ь дадѐ соломѡ́нѹ премѹ́дрость, ѩ҆́коже гл҃а є҆мѹ̀. И҆ бѣ̀ ми́ръ междѹ̀ хїра́момъ и҆ междѹ̀ соломѡ́номъ, и҆ положи́ша завѣ́тъ междѹ̀ собо́ю.

¹³И҆ взѧ̀ ца́рь да́нь ѿ всегѡ̀ ї҆и҃лѧ, и҆ бѣ̀ да́нь три́десѧть ты́сѧщъ мѹже́й.

¹⁴И҆ посла̀ ѧ҆̀ въ лїва́нъ, де́сѧть ты́сѧщъ на мц҇ъ въ премѣ́нѹ: мц҇ъ бы́ша въ лїва́нѣ и҆ два̀ мц҇а въ домѹ̀ свое́мъ: и҆ бѧ́ше а҆дѡнїра́мъ над̾ да́нїю.

¹⁵И҆ бѧ́ше соломѡ́нѹ се́дмьдесѧтъ ты́сѧщъ носѧ́щихъ бремена̀ и҆ ѻ҆́смьдесѧтъ ты́сѧщъ сѣкѹ́щихъ ка́менїе въ горѣ̀,

¹⁶кромѣ̀ старѣ́йшинъ приста́вленыхъ над̾ дѣла́ми соломѡ́ними, трѝ ты́сѧщы и҆ ше́сть сѡ́тъ приста҄вникъ дѣ́лающихъ дѣла̀.

¹⁷И҆ заповѣ́да ца́рь, и҆ взѧ́ша ка́менїе вели́кое, ка́менїе честно́е на ѡ҆снова́нїе хра́ма, и҆ ка́менїе нете́саное.

¹⁸И҆ и҆стеса́ша сы́нове соломѡ҄ни и҆ сы́нове хїра҄мли и҆ каменосѣ́чцы гева́лстїи: и҆ и҆згото́виша ка́мєнїѧ и҆ древа̀ въ трѝ лѣ҄та.