Read Библия Церковнославянская г҃ ца́рствъ 7 Bible Online

г҃ ца́рствъ 7 - Библия Церковнославянская bible

г҃ ца́рствъ 7

¹И҆ до́мъ сво́й созда̀ соломѡ́нъ тремина́десѧть лѣ́ты, и҆ совершѝ соломѡ́нъ ве́сь до́мъ сво́й.

²И҆ созда̀ до́мъ дре́вомъ лїва́нскимъ, сто̀ лакѡ́тъ долгота̀ є҆гѡ̀, и҆ три́десѧть лакѡ́тъ высота̀ є҆гѡ̀, и҆ пѧтьдесѧ́тъ лакѡ́тъ широта̀ є҆гѡ̀, и҆ трѝ рѧ́ды столпѡ́въ ке́дровыхъ, и҆ ра́мена ке́дрѡва столпѡ́мъ.

³И҆ покры̀ дска́ми ке́дровыми до́мъ свы́ше над̾ страна́ми столпѡ́въ: и҆ число̀ столпѡ́въ четы́редесѧть и҆ пѧ́ть,

⁴по пѧтина́десѧти рѧ́дъ: и҆ ѻ҆́конъ трѝ рѧда̀, и҆ кама́ра над̾ кама́рою трегѹ́бѡ.

⁵И҆ всѧ҄ двє́ри и҆ кама҄ры четвероѹгѡ́лны притворе́ни: ѿ две́рїй над̾ две́рми трегѹ́бѡ.

⁶И҆ є҆ла́мъ столпѡ́въ, пѧтьдесѧ́тъ лакѡ́тъ въ долготѹ̀, и҆ три́десѧть лакѡ́тъ въ широтѹ̀ привѧ́зани ко є҆ла́мѹ пред̾ лице́мъ и҆́хъ: и҆ столпѝ и҆ толстота̀ пред̾ лице́мъ тогѡ̀ є҆ла́ма.

⁷И҆ є҆ла́мъ престо́лѡвъ и҆дѣ́же сѹди́ти, є҆ла́мъ сѹди́лища, и҆ покры̀ и҆̀ ѿ землѝ да́же до верха̀ дщи́цами ке́дровыми.

⁸И҆ до́мъ въ не́мже живѧ́ше, дво́ръ є҆ди́нъ распросте́ртъ си҄мъ по дѣ́лѹ семѹ̀: и҆ до́мъ созда̀ дще́ри фараѡ́ни, ю҆́же взѧ̀ соломѡ́нъ, по є҆ла́мѹ семѹ̀.

⁹Всѧ҄ сїѧ҄ бѧ́хѹ ѿ ка́меней драгоцѣ́нныхъ и҆зва҄ѧна ѿ разстоѧ́нїѧ внѹтрьѹ́дѹ, и҆ ѿ ѡ҆снова́нїѧ до кро́ва.

¹⁰И҆ внѣѹ́дѹ ко дворѹ̀ вели́комѹ ѡ҆снова́номѹ ка́менїемъ драги́мъ вели́кимъ, ка́менїемъ десѧтѝ лакѡ́тъ и҆ ѻ҆смѝ лакѡ́тъ,

¹¹и҆ съ верхѹ̀ честны́мъ ка́менїемъ, по то́йже мѣ́рѣ несѣ́ченыхъ, и҆ ке́драми.

¹²Ѡ҆́крестъ двора̀ вели́кагѡ трѝ рѧда̀ нете́саныхъ, и҆ рѧ́дъ те́санагѡ ке́дра: и҆ созда̀ дво́ръ хра́ма внѹ́треннѣйшїй притво́ра до́мѹ сѹ́щагѡ пред̾ лице́мъ хра́ма.

¹³И҆ посла̀ ца́рь соломѡ́нъ въ тѵ́ръ, и҆ взѧ̀ хїра́ма ѿ тѵ́ра,

¹⁴сы́на жены̀ вдови́цы, и҆ то́й бѣ̀ ѿ колѣ́на нефѳалі́млѧ: и҆ ѻ҆те́цъ є҆гѡ̀ бѣ̀ мѹ́жъ тѵ́рїнъ, дѣ́латель мѣ́ди, и҆ и҆спо́лненъ хѹдо́жества и҆ ра́зѹма и҆ вѣ́дѣнїѧ, є҆́же дѣ́лати всѧ́ко дѣ́ло мѣ́дѧное. И҆ приведо́ша є҆го̀ ко царю̀ соломѡ́нѹ: и҆ сотворѝ всѧ҄ дѣла̀:

¹⁵и҆ слїѧ̀ два̀ столпа҄ є҆ла́мѹ хра́ма, ѻ҆смина́десѧти лакѡ́тъ высота̀ столпа̀, и҆ ѡ҆́крестъ мѣ́ра є҆гѡ̀ четырена́десѧтихъ лакѡ́тъ ѡ҆крѹжа́ше є҆го̀ толстота̀ столпа̀: четы́рехъ пе́рстѡвъ вглѹблє́нїѧ: та́кожде бѣ̀ и҆ вторы́й сто́лпъ:

¹⁶и҆ два̀ возложє́нїѧ сотворѝ, лежа́ти на глава́хъ столпѡ́въ и҆злїѧ҄ннаѧ ѿ мѣ́ди: пѧтѝ лакѡ́тъ высота̀ возложе́нїѧ є҆ди́нагѡ, и҆ пѧтѝ лакѡ́тъ высота̀ возложе́нїѧ втора́гѡ:

¹⁷и҆ сотворѝ двѣ̀ мрє́жи є҆́же покры́ти возложє́нїѧ столпѡ́въ: и҆ мре́жѹ возложе́нїю є҆ди́номѹ, и҆ мре́жѹ возложе́нїю второ́мѹ:

¹⁸и҆ дѣ́ло ви́симо, два̀ рѧда̀ ѩ҆́блѡкъ мѣ́дѧныхъ сомре́жєны, дѣ́ло ви́симо, рѧ́дъ над̾ рѧ́домъ: та́кожде сотворѝ возложе́нїю второ́мѹ:

¹⁹и҆ возложє́нїѧ на глава́хъ столпѡ́въ, подѡ́бна крі́нѹ, ѩ҆́коже во є҆ла́мѣ, четы́рехъ лакѡ́тъ:

²⁰и҆ строе́нїе над̾ ѻ҆бои́ми столпа́ми, и҆ свы́ше стра́нъ возложе́нїе строе́нїѧ, и҆ ѩ҆́блокѡвъ двѣ́сти рѧдѡ́въ ѡ҆́колѡ на вторѣ́й главѣ̀.

²¹И҆ поста́ви столпы̀ во є҆ла́мѣ хра́ма: и҆ поста́ви сто́лпъ є҆ди́нъ и҆ наречѐ и҆́мѧ є҆мѹ̀ ї҆ахѹ́нъ, и҆ поста́ви сто́лпъ вторы́й и҆ наречѐ и҆́мѧ є҆мѹ̀ воѡ́съ.

²²И҆ на глава́хъ столпѡ́въ дѣ́ло крі́ново, и҆ сконча̀ дѣ́ло столпѡ́въ.

²³И҆ сотворѝ мо́ре лїѧ́но де́сѧть лакѡ́тъ ѿ кра́ѧ до кра́ѧ є҆гѡ̀, крѹгло̀ ѡ҆́крестъ є҆гѡ̀: пѧ́ть лакѡ́тъ высота̀ є҆гѡ̀, и҆ ѡ҆б̾ѧ́тїе є҆гѡ̀ три́десѧть ла́ктей ѡ҆крѹжа́ше є҆̀ ѡ҆́крестъ:

²⁴и҆ подкрѣплє́нїѧ под̾ кра́емъ є҆гѡ̀ ѡ҆́крестъ, ѡ҆крѹжа́хѹ є҆̀ де́сѧть лакѡ́тъ ѡ҆́колѡ: два̀ рѧда̀ подкрѣпле́нїй сли҄ты во слїѧ́нїи є҆гѡ̀ стѡѧ́ща.

²⁵И҆ двана́десѧть волѡ́въ под̾ мо́ремъ, трѝ зрѧ́щїи на сѣ́веръ, и҆ трѝ зрѧ́щїи на ю҆́гъ, и҆ трѝ на за́падъ, и҆ трѝ на восто́къ, и҆ всѧ҄ за҄днѧѧ и҆́хъ внѹтрьѹ́дѹ, и҆ мо́ре верхѹ̀ и҆́хъ.

²⁶И҆ ѹ҆́стїе є҆гѡ̀ бѧ́ше ѩ҆́кѡ ѹ҆́стїе потирѧ̀ прозѧба́ющагѡ крі́на, и҆ толстота̀ є҆гѡ̀ на дла́нь.

²⁷И҆ сотворѝ де́сѧть мехѡнѡ́ѳѡвъ мѣ́дѧныхъ, пѧ́ть лакѡ́тъ долгота̀ мехѡнѡ́ѳа є҆ди́нагѡ, и҆ четы́ри ла҄кти широта̀ є҆гѡ̀, и҆ ше́сть лакѡ́тъ высота̀ є҆гѡ̀:

²⁸и҆ сїѐ дѣ́ло мехѡнѡ́ѳѡвъ, спое́ное ѡ҆ себѣ̀ и҆ спое́ное посредѣ̀ произница́ющихъ:

²⁹и҆ на спое́нїихъ и҆́хъ посредѣ̀ произница́ющихъ львы̀ и҆ волы̀ и҆ херѹві́мы, и҆ над̾ произница́ющими, та́кожде и҆ свы́ше и҆ сни́зѹ львѡ́въ и҆ волѡ́въ мѣста̀, дѣ́ло низхожде́нїѧ:

³⁰и҆ четы́ри коле́са мѣ҄дна и҆ мехѡнѡ́ѳѹ коемѹ́ждо, и҆ придержа҄нїѧ мѣ҄дѧна, и҆ четы́ри ча҄сти и҆́хъ, и҆ ра́мена и҆́хъ под̾ ѹ҆мыва́лницами, и҆ ра́мена слїѧ҄наѧ ѡ҆б̾ ѻ҆нѹ̀ странѹ̀ коегѡ́ждо прилежа́ще.

³¹И҆ ѹ҆ста̀ є҆гѡ̀ внѹ́трь главы̀, и҆ вы́ше є҆ди́нагѡ ла́ктѧ, и҆ ѹ҆ста̀ є҆гѡ̀ крѹ҄гла: дѣ́ло та́кожде ла́ктѧ є҆ди́нагѡ и҆ по́лъ ла́ктѧ: и҆ на ѹ҆ста́хъ є҆гѡ̀ и҆зва҄ѧнїѧ, и҆ междѹстѡ́лпїѧ и҆́хъ четвероѹгѡ́лна, а҆ не крѹ҄гла.

³²И҆ четы́ри коле́са под̾ междѹсто́лпїѧми, и҆ рѹ́цѣ въ колесѣ́хъ въ мехѡнѡ́ѳѣ: и҆ высота̀ є҆ди́нагѡ колеса̀ ла́коть и҆ по́лъ.

³³И҆ дѣ́ло коле́съ, ѩ҆́кѡ дѣ́ло коле́съ колесни́цы: рѹ́цѣ и҆́хъ и҆ вы҄и и҆́хъ, и҆ хребты̀ и҆́хъ и҆ дѣ҄ланїѧ и҆́хъ всѧ҄ лїѧ҄на.

³⁴Четы́ри ра́мена на четы́рехъ ѹ҆глѣ́хъ мехѡнѡ́ѳа є҆ди́нагѡ, и҆ ѿ мехѡнѡ́ѳа ра́мена є҆гѡ̀.

³⁵И҆ на главѣ̀ мехѡнѡ́ѳа по́лъ ла́ктѧ вели́чество є҆гѡ̀, крѹгло̀ ѡ҆́крестъ над̾ главо́ю мехѡнѡ́ѳовою: и҆ нача́ло рѹ́къ є҆гѡ̀ и҆ спаѧ҄нїѧ є҆гѡ̀ ѿ негѡ̀: и҆ ѿверза́шесѧ въ нача́лѣхъ рѹ́къ свои́хъ.

³⁶И҆ спаѧ҄нїѧ є҆гѡ̀ подѡ́бїѧ херѹві́мѡвъ и҆ львѡ́въ и҆ фі́нїкѡвъ стѡѧ́щаѧ, держа́щеесѧ ко́еждо проти́вѹ лица̀ є҆гѡ̀ внѹ́трь и҆ ѡ҆́крестъ.

³⁷По томѹ́жде сотворѝ всѧ҄ де́сѧть мехѡнѡ́ѳы, по чи́нѹ є҆ди́номѹ и҆ по мѣ́рѣ є҆ди́нѣй, мѣ́ра є҆ди́на всѣ҄мъ.

³⁸И҆ сотворѝ де́сѧть коно́бѡвъ мѣ́дѧныхъ вмѣща́ющихъ по четы́редесѧти мѣ́ръ во є҆ди́нъ коно́бъ, мѣ́рою четы́рехъ ла́ктей: коно́бъ є҆ди́нъ на ко́емждо мехѡнѡ́ѳѣ, ѿ десѧтѝ мехѡнѡ́ѳѡвъ.

³⁹И҆ поста́ви пѧ́ть мехѡнѡ́ѳѡвъ по деснѣ́й странѣ̀ хра́ма на восто́къ, и҆ пѧ́ть по лѣ́вѣй странѣ̀ хра́ма: и҆ мо́ре ѿ страны̀ хра́ма ѡ҆деснѹ́ю на восто́ки въ ѹ҆́глѣ полѹ́деннѣмъ.

⁴⁰И҆ сотворѝ хїра́мъ коно́бы и҆ тепли҄цы и҆ фїа́лы: и҆ сконча̀ хїра́мъ всѧ҄ дѣла̀ творѧ̀, ѩ҆̀же творѧ́ше царе́ви соломѡ́нѹ во хра́мѣ гд҇ни:

⁴¹стѡлпа̀ два̀, и҆ ѡ҆бви҄тїѧ столпѡ́въ над̾ глава́ми столпѡ́въ два̀: и҆ мрє́жи двѣ̀, є҆́же покрыва́ти ѻ҆́ба ѡ҆бви҄тїѧ и҆зва́ѧныхъ, ѩ҆̀же на столпѣ́хъ сѹ́ть:

⁴²ѩ҆́блокѡвъ мѣ́дѧныхъ четы́реста ѻ҆бѣ́ма мре́жема, два̀ рѧда̀ ѩ҆́блокѡвъ мре́жи є҆ди́нѣй, покрыва́ти ѻ҆́ба ѡ҆бви҄тїѧ мехѡнѡ́ѳа, ѩ҆̀же на ѻ҆бои́хъ столпѣ́хъ:

⁴³и҆ мехѡнѡ́ѳѡвъ де́сѧть и҆ коно́бѡвъ де́сѧть на мехѡнѡ́ѳѣ:

⁴⁴и҆ мо́ре є҆ди́но, и҆ волѡ́въ двана́десѧть под̾ мо́ремъ:

⁴⁵и҆ коно́бы и҆ тепли҄цы и҆ фїа́лы, и҆ всѧ҄ сосѹ́ды, ѩ҆̀же сотворѝ хїра́мъ царю̀ соломѡ́нѹ во хра́мѣ гд҇ни: и҆ столпѡ́въ четы́редесѧть и҆ ѻ҆́смь до́мѹ царе́ва и҆ до́мѹ гд҇нѧ: всѧ҄ дѣла̀ царє́ва, ѩ҆̀же сотворѝ хїра́мъ, бы́ша мѣ҄дѧна всѧ҄.

⁴⁶Бли́з̾ ї҆ѻрда́на слїѧ̀ и҆̀хъ ца́рь въ толстотѣ̀ землѝ, междѹ̀ сокхѡ́ѳомъ и҆ междѹ̀ сїра́момъ.

⁴⁷Не бѣ̀ вѣ́са мѣ́ди, ѿ неѧ́же творѧ́ше всѧ҄ дѣла̀ сїѧ҄, ѿ мно́жества ѕѣлѡ̀, не бѣ̀ предѣ́ла вѣ́сѹ мѣ́ди.

⁴⁸И҆ дадѐ ца́рь соломѡ́нъ всѧ҄ сосѹ́ды, ѩ҆̀же сотворѝ во хра́мъ гд҇ень: ѻ҆лта́рь златы́й и҆ трапе́зѹ, на не́йже хлѣ́бы приноше́нїѧ, златѹ́ю,

⁴⁹и҆ свѣ́щники пѧ́ть ѡ҆деснѹ́ю и҆ пѧ́ть ѡ҆шѹ́юю пред̾ лице́мъ даві́ра (ст҃а҄ѧ ст҃ы́хъ) златы҄ѧ спа҄ѧны, и҆ лампа҄ды, и҆ свѣти́лники, и҆ щипцы̀ златы҄ѧ,

⁵⁰и҆ преддве́рїе, и҆ гво́здїе, и҆ фїа́лы и҆ блю҄да и҆ кади҄лницы зла҄ты спа҄ѧны: и҆ верєѝ вра́тъ до́мѹ внѹ́треннѧгѡ ст҃а́гѡ ст҃ы́хъ, и҆ двє́ри хра́ма златы҄ѧ.

⁵¹И҆ соверши́сѧ дѣ́ло, є҆́же сотворѝ соломѡ́нъ во хра́мѣ гд҇ни: и҆ внесѐ соломѡ́нъ ст҃а҄ѧ даві́да ѻ҆тца̀ своегѡ̀ и҆ всѧ҄ ст҃а҄ѧ соломѡ́нѡва, сребро̀ и҆ зла́то, и҆ сосѹ́ды дадѐ въ сокро́вище хра́ма гд҇нѧ.