Read Библия Церковнославянская д҃ ца́рствъ 13 Bible Online

д҃ ца́рствъ 13 - Библия Церковнославянская bible

д҃ ца́рствъ 13

¹Въ лѣ́то два́десѧть тре́тїе ї҆ѡа́са сы́на ѻ҆хозі́ина царѧ̀ ї҆ѹ́дина ца́рствова ї҆ѡаха́зъ сы́нъ ї҆иѹ́евъ над̾ ї҆и҃лемъ въ самарі́и седмьна́десѧть лѣ́тъ,

²и҆ сотворѝ лѹка́вое пред̾ ѻ҆чи́ма гд҇нима, и҆ и҆́де в̾слѣ́дъ грѣхѡ́въ ї҆еровоа́ма сы́на нава́това, и҆́же въ грѣ́хъ введѐ ї҆и҃лѧ и҆ не ѡ҆ста́сѧ ѕло́бы тоѧ̀.

³И҆ разгнѣ́васѧ гд҇ь гнѣ́вомъ на ї҆и҃лѧ, и҆ вдадѐ и҆̀хъ въ рѹ́цѣ а҆заи́лѹ царю̀ сѵ́рскѹ и҆ въ рѹ́цѣ сы́на а҆де́ра, сы́на а҆заи́лева, во всѧ҄ дни҄.

⁴И҆ помоли́сѧ ї҆ѡаха́зъ лицѹ̀ гд҇ню, и҆ ѹ҆слы́ша є҆го̀ гд҇ь, ѩ҆́кѡ ви́дѣ ско́рбь ї҆и҃левѹ, поне́же ѡ҆скорбѝ и҆̀хъ ца́рь сѵ́рскїй.

⁵И҆ дадѐ гд҇ь сп҇нїе ї҆и҃лю, и҆ и҆збы́ша ѿ рѹкѹ̀ сѵ́рскѹ: и҆ всели́шасѧ и҆ сы́нове ї҆и҃лєвы въ селє́нїѧ своѧ҄ ѩ҆́коже и҆ вчера̀ и҆ тре́тїѧгѡ днѐ:

⁶ѻ҆ба́че не ѿстѹпи́ша ѿ грѣхѡ́въ до́мѹ ї҆еровоа́ма сы́на нава́това, и҆́же и҆ въ грѣ́хъ введѐ ї҆и҃лѧ, въ не́мъ ходѧ́хѹ: и҆ дѹбра́ва стоѧ́ше въ самарі́и.

⁷ѩ҆́кѡ не ѡ҆ста́шасѧ ї҆ѡаха́зѹ лю́дїе, но то́кмѡ пѧтьдесѧ́тъ кѡ́нникъ, и҆ де́сѧть колесни́цъ, и҆ де́сѧть ты́сѧщъ пѣшцє́въ, ѩ҆́кѡ и҆згѹби́лъ и҆̀хъ ца́рь сѵ́рскїй, и҆ положѝ ѧ҆̀ ѩ҆́кѡ пра́хъ на попра́нїе.

⁸И҆ прѡ́чаѧ слове́съ ї҆ѡаха́зовыхъ, и҆ всѧ҄ є҆ли҄ка сотворѝ, и҆ си҄лы є҆гѡ̀, не сїѧ҄ ли пи҄сана въ кни́зѣ слове́съ дні́й царе́й ї҆и҃левыхъ;

⁹И҆ ѹ҆́спе ї҆ѡаха́зъ со ѻ҆тцы҄ свои́ми, и҆ погребо́ша є҆го̀ въ самарі́и: и҆ воцари́сѧ ї҆ѡа́съ сы́нъ є҆гѡ̀ вмѣ́стѡ є҆гѡ̀.

¹⁰Въ лѣ́то три́десѧть седмо́е ї҆ѡа́са царѧ̀ ї҆ѹ́дина ца́рствова ї҆ѡа́съ сы́нъ ї҆ѡаха́зовъ над̾ ї҆и҃лемъ въ самарі́и шестьна́десѧть лѣ́тъ,

¹¹и҆ сотворѝ лѹка́вое пред̾ ѻ҆чи́ма гд҇нима: и҆ ѿстѹпѝ ѿ всѣ́хъ грѣхѡ́въ ї҆еровоа́ма сы́на нава́това, и҆́же въ грѣ́хъ введѐ ї҆и҃лѧ, въ то́мъ хожда́ше.

¹²И҆ прѡ́чаѧ слове́съ ї҆ѡа́совыхъ и҆ всѧ҄ є҆ли҄ка сотворѝ, и҆ си҄лы є҆гѡ̀, ѩ҆̀же сотворѝ со а҆мессі́емъ царе́мъ ї҆ѹ́динымъ, не сїѧ҄ ли пи҄сана въ кни́зѣ слове́съ дні́й царе́й ї҆и҃левыхъ;

¹³И҆ ѹ҆́спе ї҆ѡа́съ со ѻ҆тцы҄ свои́ми, ї҆еровоа́мъ же сѣ́де на престо́лѣ є҆гѡ̀: и҆ погребе́нъ бы́сть ї҆ѡа́съ въ самарі́и съ цармѝ ї҆и҃левыми.

¹⁴И҆ є҆лїссе́й разболѣ́сѧ болѣ́знїю свое́ю, ѿ неѧ́же ѹ҆́мре. И҆ прїи́де къ немѹ̀ ї҆ѡа́съ ца́рь ї҆и҃левъ, и҆ пла́касѧ над̾ лице́мъ є҆гѡ̀, и҆ речѐ: ѻ҆́тче, ѻ҆́тче, колесни́ца ї҆и҃лева и҆ ко́ни є҆гѡ̀.

¹⁵И҆ речѐ є҆мѹ̀ є҆лїссе́й возмѝ лѹ́къ и҆ стрѣ́лы. И҆ взѧ̀ къ себѣ̀ лѹ́къ и҆ стрѣ́лы.

¹⁶И҆ речѐ царю̀: возложѝ рѹ́кѹ свою̀ на лѹ́къ. И҆ возложѝ ї҆ѡа́съ рѹ́кѹ свою̀ на лѹ́къ, и҆ є҆лїссе́й возложѝ рѹ́ки своѧ҄ на рѹ́ки царє́вы,

¹⁷и҆ речѐ: ѿве́рзи ѻ҆кно̀ є҆́же на восто́къ. И҆ ѿве́рзе. И҆ речѐ є҆лїссе́й: стрѣлѝ. И҆ стрѣлѝ (ца́рь). И҆ речѐ є҆лїссе́й: стрѣла̀ сп҇нїѧ гд҇нѧ и҆ стрѣла̀ спасе́нїѧ на сѷрі́ю, и҆ побѣди́ши сѷрі́ю во а҆фе́кѣ да́же до сконча́нїѧ.

¹⁸И҆ речѐ є҆мѹ̀ є҆лїссе́й: возмѝ лѹ́къ. И҆ взѧ̀. И҆ речѐ царю̀ ї҆и҃левѹ: ѹ҆да́ри на зе́млю. И҆ ѹ҆да́ри ца́рь три́жды, и҆ ста̀.

¹⁹И҆ ѡ҆скорбѣ̀ человѣ́къ бж҃їй ѡ҆ не́мъ и҆ речѐ: а҆́ще бы ѹ҆да́рилъ є҆сѝ пѧти́щи и҆лѝ шести́щи, тогда́ бы є҆сѝ порази́лъ сѷрі́ю до сконча́нїѧ, нн҃ѣ же побѣди́ши сѷрі́ю три́жды.

²⁰И҆ ѹ҆́мре є҆лїссе́й, и҆ погребо́ша є҆го̀. Во́ини же мѡа́вли прїидо́ша въ зе́млю настава́ющѹ лѣ́тѹ томѹ̀.

²¹И҆ бы́сть и҆̀мъ погреба́ющимъ мѹ́жа, и҆ сѐ, ви́дѣша во́инѡвъ, и҆ поверго́ша мѹ́жа во гро́бѣ є҆лїссе́овѣ: (и҆ впадѐ тѣ́ло человѣ́ка ме́ртва,) и҆ прикоснѹ́сѧ косте́мъ є҆лїссе́ѡвымъ, и҆ ѡ҆живѐ и҆ воста̀ на но́ги своѧ҄.

²²А҆заи́лъ же ѡ҆скорблѧ́ше ї҆и҃лѧ во всѧ҄ дни҄ ї҆ѡаха́зѡвы.

²³И҆ поми́лова и҆ гд҇ь, и҆ ѹ҆ще́дри ѧ҆̀, и҆ призрѣ̀ на нѧ̀ завѣ́та ра́ди своегѡ̀, и҆́же со а҆враа́момъ и҆ ї҆саа́комъ и҆ ї҆а́кѡвомъ, и҆ не восхотѣ̀ гд҇ь потреби́ти и҆́хъ, нижѐ ѿве́рже и҆́хъ ѿ лица̀ своегѡ̀.

²⁴И҆ ѹ҆́мре а҆заи́лъ ца́рь сѵ́рскїй, и҆ воцари́сѧ а҆де́ръ сы́нъ є҆гѡ̀ вмѣ́стѡ є҆гѡ̀.

²⁵И҆ возврати́сѧ ї҆ѡа́съ сы́нъ ї҆ѡаха́зовъ, и҆ взѧ̀ гра́ды ѿ рѹкѝ а҆де́ра сы́на а҆заи́лева, и҆̀хже взѧ̀ ѿ рѹкѹ̀ ї҆ѡаха́за ѻ҆тца̀ є҆гѡ̀ въ бра́ни: три́жды побѣдѝ є҆го̀ ї҆ѡа́съ, и҆ возвратѝ гра́ды ї҆и҃лєвы.