Read Библия Церковнославянская д҃ ца́рствъ 14 Bible Online

д҃ ца́рствъ 14 - Библия Церковнославянская bible

д҃ ца́рствъ 14

¹Въ лѣ́то второ́е ї҆ѡа́са сы́на ї҆ѡаха́за царѧ̀ ї҆и҃лева, и҆ воцари́сѧ а҆мессі́а сы́нъ ї҆ѡа́совъ, ца́рь ї҆ѹ́динъ:

²сы́нъ два́десѧти пѧтѝ лѣ́тъ бѣ̀, внегда̀ ца́рствовати є҆мѹ̀ и҆ два́десѧть пѧ́ть лѣ́тъ ца́рствова во ї҆ер҇ли́мѣ. И҆́мѧ же ма́тере є҆гѡ̀ ї҆ѡаді́на ѿ ї҆ер҇ли́ма.

³И҆ сотворѝ пра́вое пред̾ ѻ҆чи́ма гд҇нима, ѻ҆ба́че не ѩ҆́коже даві́дъ ѻ҆те́цъ є҆гѡ̀: по всѣ҄мъ, є҆ли҄ка сотворѝ ѻ҆те́цъ є҆гѡ̀ ї҆ѡа́съ, сотворѝ,

⁴то́кмѡ высо́кихъ не разрѹшѝ: є҆щѐ лю́дїе жрѧ́хѹ и҆ кадѧ́хѹ на высо́кихъ.

⁵И҆ бы́сть є҆гда̀ ѹ҆тверди́сѧ ца́рство въ рѹкѹ є҆гѡ̀, и҆ и҆збѝ рабы҄ своѧ҄ ѹ҆би́вшыѧ ѻ҆тца̀ є҆гѡ̀:

⁶сынѡ́въ же ѹ҆бі́йцъ тѣ́хъ не и҆збѝ, ѩ҆́коже пи́сано въ кни́зѣ зако́на мѡѷсе́ова, ѩ҆́коже заповѣ́да гд҇ь, гл҃ѧ: да не ѹ҆мира́ютъ ѻ҆тцы̀ за сы́ны, и҆ сы́нове да не ѹ҆мира́ютъ за ѻ҆тцы҄, но то́кмѡ кі́йждо за своѧ҄ грѣхѝ да ѹ҆́мретъ.

⁷Се́й поразѝ є҆дѡ́ма въ геме́лѣ де́сѧть ты́сѧщъ и҆ взѧ̀ ка́мень и҆ на бра́ни, и҆ наречѐ и҆́мѧ є҆мѹ̀ ї҆еѳои́лъ до дне́шнѧгѡ днѐ.

⁸Тогда̀ посла̀ а҆мессі́а послы̀ ко ї҆ѡа́сѹ сы́нѹ ї҆ѡаха́за сы́на ї҆иѹ́а царѧ̀ ї҆и҃лева, глаго́лѧ: прїидѝ, да ви́димсѧ въ лицѐ.

⁹И҆ посла̀ ї҆ѡа́съ ца́рь ї҆и҃левъ ко а҆мессі́и царю ї҆ѹ́динѹ, глаго́лѧ: те́рнъ, и҆́же въ лїва́нѣ, посла̀ къ ке́дрови сѹ́щемѹ въ лїва́нѣ, глаго́лѧ: да́ждь дще́рь твою̀ сы́нѹ моемѹ̀ въ женѹ̀: и҆ прїидо́ша ѕвѣ́рїе лѹ́жнїи, и҆̀же въ лїва́нѣ, и҆ попра́ша те́рнїе::

¹⁰побива́ѧ порази́лъ є҆сѝ ї҆дѹме́ю, и҆ вознесѐ тѧ̀ се́рдце твоѐ, просла́висѧ сѣдѧ̀ въ домѹ̀ твое́мъ, и҆ почто̀ любопри́шисѧ въ ѕло́бѣ твое́й; и҆ паде́ши ты̀, и҆ ї҆ѹ́да съ тобо́ю.

¹¹И҆ не послѹ́ша а҆мессі́а. И҆ взы́де ї҆ѡа́съ ца́рь ї҆и҃левъ, и҆ ви́дѣстасѧ лице́мъ то́й и҆ а҆мессі́а ца́рь ї҆ѹ́динъ въ веѳсамѵ́сѣ ї҆ѹ́динѣ.

¹²И҆ падѐ ї҆ѹ́да пред̾ лице́мъ ї҆и҃левымъ, и҆ побѣжѐ кі́йждо въ до́мы своѧ҄.

¹³И҆ а҆мессі́ю сы́на ї҆ѡа́сова, сы́на ѻ҆хозі́и, царѧ̀ ї҆ѹ́дина, ѩ҆́тъ ї҆ѡа́съ сы́нъ ї҆ѡаха́зовъ ца́рь ї҆и҃левъ въ веѳсамѵ́сѣ: и҆ прїи́де во ї҆ер҇ли́мъ, и҆ разбѝ стѣ́нѹ ї҆ер҇ли́мѹ ѿ вра́тъ є҆фре́млихъ до вра́тъ ѹ҆го́лныхъ, на четы́реста лакѡ́тъ:

¹⁴и҆ взѧ̀ сребро̀ и҆ зла́то, и҆ всѧ҄ сосѹ́ды ѡ҆брѣ҄теныѧ въ домѹ̀ гд҇ни и҆ въ сокро́вищахъ до́мѹ царе́ва, и҆ сы́ны смѣси́вшихсѧ, и҆ возврати́сѧ въ самарі́ю.

¹⁵И҆ прѡ́чаѧ слове́съ ї҆ѡа́совыхъ, є҆ли҄ка сотворѝ въ си́лѣ свое́й, ѩ҆́коже бра́сѧ со а҆мессі́ею царе́мъ ї҆ѹ́диныхъ, не сїѧ҄ ли пи҄сана въ кни́зѣ слове́съ дні́й царе́й ї҆и҃левыхъ;

¹⁶И҆ ѹ҆́спе ї҆ѡа́съ со ѻ҆тцы҄ свои́ми и҆ погребе́нъ бы́сть въ самарі́и съ цари҄ и҆ ї҆и҃левыми. И҆ воцари́сѧ ї҆еровоа́мъ сы́нъ є҆гѡ̀ вмѣ́стѡ є҆гѡ̀.

¹⁷И҆ поживѐ а҆мессі́а сы́нъ ї҆ѡа́совъ, ца́рь ї҆ѹ́динъ, по ѹ҆ме́ртвїи ї҆ѡа́са сы́на ї҆ѡаха́за царѧ̀ ї҆и҃лева пѧтьна́десѧть лѣ́тъ.

¹⁸И҆ прѡ́чаѧ слове́съ а҆мессі́евыхъ, и҆ всѧ҄ є҆ли҄ка сотворѝ, не сїѧ҄ ли пи҄сана въ кни́зѣ слове́съ дні́й царе́й ї҆ѹ́диныхъ;

¹⁹И҆ воста́ша на него̀ полкѝ во ї҆ер҇ли́мѣ: и҆ ѹ҆бѣжѐ въ лахі́сы, и҆ посла́ша вслѣ́дъ є҆гѡ̀ въ лахі́сы, и҆ ѹ҆би́ша є҆го̀ тѹ̀:

²⁰и҆ взѧ́ша є҆го̀ на ко́ни, и҆ погребе́нъ бы́сть со ѻ҆тцы҄ свои́ми во ї҆ер҇ли́мѣ во гра́дѣ даві́довѣ.

²¹И҆ поѧ́ша всѝ лю́дїе ї҆ѹ҄дины а҆зарі́ю, и҆ то́й сы́нъ шести́надесѧти лѣ́тъ, и҆ поста́виша є҆го̀ царе́мъ вмѣ́стѡ ѻ҆тца̀ є҆гѡ̀ а҆мессі́и:

²²то́й созда̀ є҆лѡ́ѳъ, и҆ возвратѝ є҆го̀ ї҆ѹ́дѣ по ѹ҆ме́ртвїи царѧ̀ со ѻ҆тцы҄ є҆гѡ̀.

²³Въ лѣ́то пѧтоена́десѧть а҆мессі́и сы́на ї҆ѡа́са царѧ̀ ї҆ѹ́дина, ца́рствова ї҆еровоа́мъ сы́нъ ї҆ѡа́совъ над̾ ї҆и҃лемъ въ самарі́и четы́редесѧть и҆ є҆ди́но лѣ́то,

²⁴и҆ сотворѝ лѹка́вое пред̾ гд҇емъ: не ѿстѹпѝ ѿ всѣ́хъ грѣхѡ́въ ї҆еровоа́ма сы́на нава́това, и҆́же въ грѣ́хъ введѐ ї҆и҃лѧ:

²⁵то́й привратѝ предѣ́лъ ї҆и҃левъ ѿ вхо́да є҆ма́ѳова да́же и҆ до мо́рѧ а҆рави́тскагѡ, по гл҃ѹ гд҇а бг҃а ї҆и҃лева, є҆го́же гл҃а и҆ рѹко́ю раба̀ своегѡ̀ ї҆ѡ́ны, сы́на а҆маѳі́ина, проро́ка, и҆́же ѿ геѳахове́ра,

²⁶ѩ҆́кѡ ви́дѣ гд҇ь смире́нїе ї҆и҃лево го́рько ѕѣлѡ̀, и҆ ма́лѡ содержи́мыхъ, и҆ ѹ҆ма́ленныхъ, и҆ ѡ҆ста́вленыхъ, и҆ не бѣ̀ помога́ющагѡ и҆̀мъ.

²⁷И҆ не гл҃а гд҇ь и҆скорени́ти сѣ́мене ї҆и҃лева под̾ небесе́мъ: и҆ сп҃сѐ ѧ҆̀ рѹко́ю ї҆еровоа́ма сы́на ї҆ѡа́сова.

²⁸И҆ прѡ́чаѧ слове́съ ї҆еровоа́мовыхъ, и҆ всѧ҄ є҆ли҄ка сотворѝ, и҆ си҄лы є҆гѡ̀, є҆ли҄ка повоева̀, и҆ ка́кѡ возвратѝ дама́скъ и҆ є҆ма́ѳъ ї҆ѹ́дѣ во ї҆и҃ли, не сїѧ҄ ли пи҄сана въ кни́зѣ слове́съ дні́й царе́й ї҆и҃левыхъ;

²⁹И҆ ѹ҆́спе ї҆еровоа́мъ со ѻ҆тцы҄ свои́ми, со цари҄ ї҆и҃левыми: и҆ воцари́сѧ заха́рїа сы́нъ є҆гѡ̀ вмѣ́стѡ є҆гѡ̀.