Read Библия Церковнославянская д҃ ца́рствъ 15 Bible Online

д҃ ца́рствъ 15 - Библия Церковнославянская bible

д҃ ца́рствъ 15

¹Въ лѣ́то два́десѧть седмо́е ї҆еровоа́ма царѧ̀ ї҆и҃лева воцари́сѧ а҆зарі́а сы́нъ а҆мессі́и царѧ̀ ї҆ѹ́дина:

²сы́нъ шести́надесѧти лѣ́тъ бѣ̀, є҆гда̀ нача̀ ца́рствовати, и҆ пѧтьдесѧ́тъ два̀ лѣ́та ца́рствова во ї҆ер҇ли́мѣ. И҆́мѧ же ма́тере є҆гѡ̀ ї҆ехелі́а ѿ ї҆ер҇ли́ма.

³И҆ сотворѝ пра́вое пред̾ ѻ҆чи́ма гд҇нима по всемѹ̀, є҆ли҄ка сотворѝ ѻ҆те́цъ є҆гѡ̀ а҆мессі́а,

⁴ѻ҆ба́че высо́кихъ не разорѝ: є҆щѐ лю́дїе жрѧ́хѹ и҆ кадѧ́хѹ на высо́кихъ.

⁵И҆ коснѹ́сѧ гд҇ь царѧ̀, и҆ бы́сть прокаже́нъ до днѐ сме́рти своеѧ̀: и҆ ца́рствова въ домѹ̀ а҆пфѹсѡ́ѳъ. И҆ ї҆ѡаѳа́мъ сы́нъ царе́въ бѣ̀ над̾ до́момъ сѹдѧ̀ лю́демъ землѝ тоѧ̀.

⁶И҆ прѡ́чаѧ слове́съ а҆зарі́и, и҆ всѧ҄ є҆ли҄ка сотворѝ, нѐ сїѧ҄ ли напи҄сана въ кни́зѣ слове́съ дні́й царе́й ї҆ѹ́диныхъ;

⁷И҆ ѹ҆́спе а҆зарі́а со ѻ҆тцы҄ свои́ми, и҆ погребо́ша є҆го̀ со ѻ҆тцы҄ є҆гѡ̀ во гра́дѣ даві́довѣ. И҆ воцари́сѧ ї҆ѡаѳа́мъ сы́нъ є҆гѡ̀ вмѣ́стѡ є҆гѡ̀.

⁸Въ лѣ́то три́десѧть ѻ҆смо́е а҆зарі́и царѧ̀ ї҆ѹ́дина ца́рствова заха́рїа сы́нъ ї҆еровоа́мль над̾ ї҆и҃лемъ въ самарі́и ше́сть мц҇ъ.

⁹и҆ сотворѝ лѹка́вое пред̾ ѻ҆чи́ма гд҇нима, ѩ҆́коже сотвори́ша ѻ҆тцы̀ є҆гѡ̀, не ѿстѹпѝ ѿ всѣ́хъ грѣхѡ́въ ї҆еровоа́ма сы́на нава́това, и҆́же въ грѣ́хъ введѐ ї҆и҃лѧ.

¹⁰И҆ воста́ста на́нь селлѹ́мъ сы́нъ ї҆аві́совъ и҆ кевлаа́мъ, и҆ порази́ста є҆го̀, и҆ ѹ҆мертви́ста є҆го̀: и҆ воцари́сѧ селлѹ́мъ вмѣ́стѡ є҆гѡ̀.

¹¹И҆ прѡ́чаѧ слове́съ заха́рїевыхъ, сѐ, сѹ́ть напи҄сана въ кни́зѣ слове́съ дні́й царе́й ї҆и҃левыхъ.

¹²сїѐ сло́во гд҇не, є҆́же гл҃а ко ї҆иѹ́ю, рекі́й: сы́нове четве́ртїи сѧ́дѹтъ тебѣ̀ и҆ на престо́лѣ ї҆и҃левѣ. И҆ бы́сть та́кѡ.

¹³И҆ селлѹ́мъ сы́нъ ї҆аві́совъ воцари́сѧ во ї҆и҃ли: и҆ въ лѣ́то три́десѧть девѧ́тое а҆зарі́и царѧ̀ ї҆ѹ́дина, ца́рствова селлѹ́мъ мц҇ъ дні́й въ самарі́и.

¹⁴И҆ взы́де манаи́мъ сы́нъ гадді́инъ ѿ ѳерсі́лы, и҆ прїи́де въ самарі́ю, и҆ ѹ҆бѝ селлѹ́ма сы́на ї҆аві́сова въ самарі́и, и҆ ѹ҆мертвѝ є҆го̀, и҆ воцари́сѧ вмѣ́стѡ є҆гѡ̀.

¹⁵И҆ прѡ́чаѧ слове́съ селлѹ́мовыхъ, и҆ совѣща́нїе є҆гѡ̀, и҆́мже совѣща́сѧ, сѐ, сѹ́ть пи҄сана въ кни́зѣ слове́съ дні́й царе́й ї҆и҃левыхъ.

¹⁶Тогда̀ поразѝ манаи́мъ и҆ ѳе́рсѹ, и҆ всѧ҄, ѩ҆̀же въ не́й, и҆ предѣ́лы є҆ѧ̀ ѿ ѳе́рсы, поне́же не ѿверзо́ша є҆мѹ̀, и҆ разбѝ ю҆̀ и҆ всѣ́хъ, и҆̀же въ не́й, и҆ и҆мѹ́щихъ во чре́вѣ разсѣчѐ.

¹⁷Въ лѣ́то три́десѧть девѧ́тое а҆зарі́и царѧ̀ ї҆ѹ́дина, ца́рствова манаи́мъ сы́нъ гадді́инъ над̾ ї҆и҃лемъ де́сѧть лѣ́тъ въ самарі́и,

¹⁸и҆ сотворѝ лѹка́вое пред̾ ѻ҆чи́ма гд҇нима, (во всѧ҄ дни҄ своѧ҄) не ѿстѹпѝ ѿ всѣ́хъ грѣхѡ́въ ї҆еровоа́ма сы́на нава́това, и҆́же въ грѣ́хъ введѐ ї҆и҃лѧ.

¹⁹Во дни҄ є҆гѡ̀ взы́де фѹ́ла ца́рь а҆ссѷрі́йскїй на зе́млю (ї҆и҃левѹ), и҆ манаи́мъ дадѐ фѹ́лѣ ты́сѧщѹ тала҄нтъ сребра̀, да бѹ́детъ рѹка̀ є҆гѡ̀ съ ни́мъ, (є҆́же ѹ҆крѣпи́ти ца́рство въ рѹкѹ̀ є҆гѡ̀).

²⁰И҆ возложѝ манаи́мъ да́нь на ї҆и҃лѧ, на всѣ́хъ си́льныхъ, да́ти царю̀ а҆ссѷрі́йскѹ пѧтьдесѧ́тъ сї҄кль сребра̀ мѹ́жѹ коемѹ́ждо: и҆ возврати́сѧ ца́рь а҆ссѷрі́йскъ, и҆ не ста̀ та́мѡ въ землѝ.

²¹И҆ прѡ́чаѧ слове́съ манаи́мовыхъ, и҆ всѧ҄ є҆ли҄ка сотворѝ, не сѐ ли, сїѧ҄ напи҄сана въ кни́зѣ слове́съ дні́й царе́й ї҆и҃левыхъ;

²²И҆ ѹ҆́спе манаи́мъ со ѻ҆тцы҄ свои́ми, и҆ воцари́сѧ факі́а сы́нъ є҆гѡ̀ вмѣ́стѡ є҆гѡ̀.

²³Въ лѣ́то пѧтьдесѧ́тое а҆зарі́и царѧ̀ ї҆ѹ́дина, ца́рствова факі́а сы́нъ манаи́мль над̾ ї҆и҃лемъ въ самарі́и лѣ҄та два̀,

²⁴и҆ сотворѝ лѹка́вое пред̾ ѻ҆чи́ма гд҇нима, и҆ ѿстѹпѝ ѿ грѣхѡ́въ ї҆еровоа́ма сы́на нава́това, и҆́же въ грѣ́хъ введѐ ї҆и҃лѧ.

²⁵И҆ воста̀ на него̀ факе́й сы́нъ ромелі́инъ, трїста́тъ є҆гѡ̀, и҆ ѹ҆бѝ є҆го̀ въ самарі́и бли́з̾ до́мѹ царе́ва, со а҆рго́вомъ и҆ со а҆рі́емъ, и҆ съ ни́мъ (бѧ́хѹ) пѧтьдесѧ́тъ мѹже́й ѿ галааді́тѡвъ, и҆ ѹ҆мертвѝ є҆го̀, и҆ воцари́сѧ вмѣ́стѡ є҆гѡ̀.

²⁶И҆ прѡ́чаѧ слове́съ факі́евыхъ, и҆ всѧ҄ є҆ли҄ка сотворѝ сѐ, сѹ́ть, пи҄сана въ кни́зѣ слове́съ дні́й царе́й ї҆и҃левыхъ.

²⁷Въ лѣ́то пѧтьдесѧ́тъ второ́е а҆зарі́и царѧ̀ ї҆ѹ́дина, ца́рствова факе́й сы́нъ ромелі́инъ над̾ ї҆и҃лемъ въ самарі́и два́десѧть лѣ́тъ,

²⁸и҆ сотворѝ лѹка́вое пред̾ ѻ҆чи́ма гд҇нима, не ѿстѹпѝ ѿ всѣ́хъ грѣхѡ́въ ї҆еровоа́ма сы́на нава́това, и҆́же въ грѣ́хъ введѐ ї҆и҃лѧ.

²⁹Во дни҄ факе́а царѧ̀ ї҆и҃лева прїи́де ѳелгаѳфелласа́ръ ца́рь а҆ссѷрі́йскїй, и҆ взѧ̀ а҆і́нъ и҆ а҆велвеѳмааха̀, и҆ а҆ѡ́ха и҆ кене́зѹ, и҆ а҆сѡ́ра и҆ галаа́дъ и҆ галїле́ю, всю̀ зе́млю нефѳалі́млю, и҆ приведѐ ѧ҆̀ ко а҆ссѷрі́анѡмъ.

³⁰И҆ воста̀ ѡ҆сі́а сы́нъ и҆лы̀ на факе́а сы́на ромелі́ина, и҆ поразѝ є҆го̀, и҆ ѹ҆мертвѝ є҆го̀, и҆ воцари́сѧ вмѣ́стѡ є҆гѡ̀ въ два́десѧтое лѣ́то ї҆ѡаѳа́ма сы́на а҆зарі́ина.

³¹И҆ прѡ́чаѧ слове́съ факе́евыхъ, и҆ всѧ҄ є҆ли҄ка сотворѝ, сѐ, сїѧ҄ напи҄сана въ кни́зѣ слове́съ дні́й царе́й ї҆и҃левыхъ.

³²Въ лѣ́то второ́е факе́а сы́на ромелі́ина царѧ̀ ї҆и҃лева воцари́сѧ ї҆ѡаѳа́мъ, сы́нъ а҆зарі́и царѧ̀ ї҆ѹ́дина:

³³сы́нъ два́десѧти пѧтѝ лѣ́тъ бѣ̀, є҆гда̀ нача̀ ца́рствовати, и҆ шестьна́десѧть лѣ́тъ ца́рствова во ї҆ер҇ли́мѣ. И҆́мѧ же ма́тере є҆гѡ̀ ї҆ерѹса̀ дщѝ садѡ́кова.

³⁴И҆ сотворѝ пра́вое пред̾ ѻ҆чи́ма гд҇нима, по всемѹ̀ є҆ли҄ка сотворѝ ѻ҆те́цъ є҆гѡ̀ а҆зарі́а,

³⁵ѻ҆ба́че высо́кихъ не разорѝ: є҆щѐ лю́дїе жрѧ́хѹ и҆ кадѧ́хѹ на высо́кихъ. То́й созда̀ двє́ри хра́мѹ гд҇ню вы҄шнїѧ.

³⁶И҆ прѡ́чаѧ слове́съ ї҆ѡаѳа́мовыхъ, и҆ всѧ҄ є҆ли҄ка сотворѝ, не сїѧ҄ ли напи҄сана въ кни́зѣ слове́съ дні́й царе́й ї҆ѹ́диныхъ;

³⁷Во дни҄ ѡ҆́ны нача́тъ гд҇ь посыла́ти на ї҆ѹ́дѹ раассѡ́на царѧ̀ сѵ́рска и҆ факе́а сы́на ромелі́ина.

³⁸И҆ ѹ҆́спе ї҆ѡаѳа́мъ со ѻ҆тцы҄ свои́ми, и҆ погребе́нъ бы́сть со ѻ҆тцы҄ свои́ми во гра́дѣ даві́да ѻ҆тца̀ своегѡ̀. И҆ воцари́сѧ а҆ха́зъ сы́нъ є҆гѡ̀ вмѣ́стѡ є҆гѡ̀.