Read Библия Церковнославянская д҃ ца́рствъ 18 Bible Online

д҃ ца́рствъ 18 - Библия Церковнославянская bible

д҃ ца́рствъ 18

¹И҆ бы́сть въ лѣ́то тре́тїе ѡ҆сі́и сы́на и҆лы̀ царѧ̀ ї҆и҃лева, воцари́сѧ є҆зекі́а сы́нъ а҆ха́за царѧ̀ ї҆ѹ́дина:

²сы́нъ два́десѧти пѧтѝ лѣ́тъ бѣ̀ є҆гда̀ нача̀ ца́рствовати, и҆ два́десѧть де́вѧть лѣ́ть ца́рствова во ї҆ер҇ли́мѣ. И҆́мѧ же ма́тере є҆гѡ̀ а҆вѹ́ѳа дщѝ заха́рїина.

³И҆ сотворѝ пра́вое пред̾ ѻ҆чи́ма гд҇нима, по всѣ҄мъ є҆ли҄ка сотворѝ ѻ҆те́цъ є҆гѡ̀ даві́дъ:

⁴то́й разрѹшѝ высѡ́каѧ, и҆ сокрѹшѝ всѧ҄ ка҄пища, и҆ и҆скоренѝ дѹбра҄вы и҆ ѕмїю̀ мѣ́дѧнѹю, ю҆́же сотворѝ мѡѷсе́й, ѩ҆́кѡ и҆ до дні́й тѣ́хъ сы́нове ї҆и҃лєвы бѣ́хѹ кадѧ́ще є҆́й: и҆ назва̀ и҆́мѧ є҆́й нееста́нъ.

⁵На гд҇а бг҃а ї҆и҃лева ѹ҆пова̀, и҆ но не́мъ не бы́сть подо́бенъ є҆мѹ̀ въ царе́хъ ї҆ѹ́диныхъ и҆ въ бы́вшихъ пре́жде є҆го̀:

⁶и҆ прилѣпи́сѧ гд҇еви, не ѿстѹпѝ ѿ негѡ̀, и҆ сохранѝ за́пѡвѣди є҆гѡ̀, є҆ли҄ки заповѣ́да мѡѷсе́й:

⁷и҆ бѣ̀ гд҇ь съ ни́мъ, и҆ во всѣ́хъ, ѩ҆̀же творѧ́ше, смы́слѧше. И҆ сопроти́висѧ царю̀ а҆ссѷрі́йскомѹ и҆ не порабо́та є҆мѹ̀:

⁸то́й побѣдѝ и҆ноплеме́нники да́же до га́зы и҆ до предѣ́лъ є҆ѧ̀, ѿ столпа̀ стрегѹ́щихъ и҆ да́же и҆ гра́да тве́рда.

⁹И҆ бы́сть въ лѣ́то четве́ртое царѧ̀ є҆зекі́и, сїе́ же лѣ́то седмо́е ѡ҆сі́и, сы́нѹ и҆лы̀, царю̀ ї҆и҃левѹ, взы́де саламанасса́ръ ца́рь а҆ссѷрі́йскъ на самарі́ю и҆ ѡ҆бсѣ́де ю҆̀,

¹⁰и҆ взѧ̀ ю҆̀ при концы̀ трїе́хъ лѣ́тъ, въ шесто́е лѣ́то є҆зекі́ево, сїѐ лѣ́то девѧ́тое ѡ҆сі́и царѧ̀ ї҆и҃лева, и҆ плѣне́на бы́сть самарі́а.

¹¹И҆ преведѐ ца́рь а҆ссѷрі́йскїй самарѧ́ны во а҆ссѷрі́ю, и҆ посадѝ ѧ҆̀ на а҆ла́и и҆ на а҆вѡ́рѣ, рѣка́хъ гѡза́нскихъ, и҆ въ предѣ́лѣхъ ми́дскихъ:

¹²поне́же не послѹ́шаша гла́са гд҇а бг҃а своегѡ̀ и҆ престѹпи́ша завѣ́тъ є҆гѡ̀, всѧ҄ є҆ли҄ка заповѣ́да мѡѷсе́й ра́бъ гд҇ень, и҆ не послѹ́шаша, и҆ не сотвори́ша.

¹³И҆ въ четвертоена́десѧть лѣ́то царѧ̀ є҆зекі́и, взы́де сеннахирі́мъ ца́рь а҆ссѷрі́йскїй на гра́ды ї҆ѹ́дины твє́рдыѧ и҆ взѧ́тъ ѧ҆̀.

¹⁴И҆ посла̀ є҆зекі́а ца́рь ї҆ѹ́динъ послы̀ къ царю̀ а҆ссѷрі́йскѹ въ лахі́съ, глаго́лѧ: согрѣши́хъ, возврати́сѧ ѿ менє̀: є҆́же а҆́ще возложи́ши на мѧ̀, то̀ понесѹ̀. И҆ возложѝ ца́рь а҆ссѷрі́йскїй на є҆зекі́ю царѧ̀ ї҆ѹ́дина три́ста тала́нтъ сребра̀ и҆ три́десѧть тала́нтѡвъ зла́та.

¹⁵И҆ дадѐ є҆зекі́а всѐ сребро̀ ѡ҆брѣ́тшеесѧ въ домѹ̀ гд҇ни и҆ въ сокро́вищихъ до́мѹ царе́ва.

¹⁶Во вре́мѧ ѻ҆́но ссѣчѐ є҆зекі́а ца́рь ї҆ѹ́динъ двє́ри хра́ма гд҇нѧ и҆ ѹ҆твержє́нїѧ, ѩ҆̀же позлатѝ є҆зекі́а ца́рь ї҆ѹ́динъ, и҆ дадѐ и҆̀хъ царю̀ а҆ссѷрі́йскѹ.

¹⁷И҆ посла̀ ца́рь а҆ссѷрі́йскъ ѳарѳа́на и҆ равоса́иа и҆ раѱа́ка ѿ лахі́са на ї҆ер҇ли́мъ къ царю̀ є҆зекі́и съ си́лою тѧ́жкою ѕѣлѡ̀. И҆ взыдо́ша, и҆ прїидо́ша ко ї҆ер҇ли́мѹ, и҆ ста́ша ѹ҆ водоте́чи кѹпѣ́ли вы́шнїѧ, ѩ҆́же є҆́сть на пѹтѝ села̀ бѣли́лнагѡ,

¹⁸и҆ возопи́ша ко є҆зекі́и. И҆ и҆зы́де къ ни҄мъ є҆лїакі́мъ сы́нъ хелкі́евъ строи́тель, и҆ сѡмна́съ книго́чїй, и҆ ї҆ѡа́съ сы́нъ сафа́товъ воспомина́тель.

¹⁹И҆ речѐ къ ни҄мъ раѱа́къ: рцы́те нн҃ѣ ко є҆зекі́и: си́це глаго́летъ ца́рь вели́кїй, ца́рь а҆ссѷрі́йскїй: что̀ ѹ҆пова́нїе сїѐ, на не́же ѹ҆пова́еши;

²⁰ре́клъ є҆сѝ: то́кмѡ словеса̀ ѹ҆сте́нъ, совѣ́тъ и҆ си́ла на бра́нь: нн҃ѣ ѹ҆̀бо на кого̀ надѣ́ждѹ ѿве́рглъ є҆сѝ менѐ;

²¹нн҃ѣ съ, надѣ́ешисѧ ты̀ на же́злъ тро́стѧный сло́мленый се́й, на є҆гѵ́петъ ли; на́ньже а҆́ще ѡ҆пре́тсѧ мѹ́жъ, вни́детъ въ рѹ́кѹ є҆гѡ̀ и҆ пронзе́тъ ю҆̀: та́кѡ фараѡ́нъ ца́рь є҆гѵ́петскїй всѣ҄мъ надѣ́ющымсѧ на́нь:

²²и҆ а҆́ще мнѣ̀ рече́те: на гд҇а бг҃а надѣ́емсѧ: не то́й ли се́й, є҆гѡ́же и҆ ѿста́ви є҆зекі́а высѡ́каѧ є҆гѡ̀ и҆ же́ртвенники є҆гѡ̀, и҆ речѐ ї҆ѹ́дѣ и҆ ї҆ер҇ли́мѹ: покло́нитесѧ пред̾ же́ртвенникомъ си́мъ во ї҆ер҇ли́мѣ;

²³и҆ нн҃ѣ соедини́тесѧ съ господи́номъ мои́мъ царе́мъ а҆ссѷрі́йскимъ, и҆ да́мъ тебѣ̀ двѣ̀ ты́сѧщы ко́ней, а҆́ще мо́жеши и҆мѣ́ти вса́дники на нѧ̀:

²⁴и҆ ка́кѡ ѿврати́ши лицѐ топа́рха є҆ди́нагѡ ѿ рабѡ́въ господи́на моегѡ̀ малѣ́йшихъ, и҆ ѹ҆пова́лъ є҆сѝ са́мъ на є҆гѵ́петъ, на колєсни́цы и҆ ко́ни;

²⁵и҆ нн҃ѣ ѹ҆̀бо є҆да̀ без̾ гд҇а взыдо́хомъ на мѣ́сто сїѐ, є҆́же потреби́ти и҆ речѐ бо гд҇ь ко мнѣ̀: взы́ди на зе́млю сїю̀ и҆ потребѝ ю҆̀.

²⁶И҆ речѐ є҆лїакі́мъ сы́нъ хелкі́инъ и҆ сѡмна́съ и҆ ї҆ѡа́съ ко раѱа́кѹ: глаго́ли нн҃ѣ ко ѻ҆трокѡ́мъ твои҄мъ сѵ́рски, ѩ҆́кѡ слы́шимъ мы̀, а҆ не глаго́ли къ на́мъ ї҆ѹде́йски, и҆ почто̀ глаго́леши во ѹ҆́шы люді́й, и҆̀же на стѣнѣ̀;

²⁷И҆ речѐ къ ни҄мъ раѱа́къ: є҆да̀ къ господи́нѹ твоемѹ̀ и҆ къ тебѣ̀ посла́ мѧ господи́нъ мо́й глаго́лати словеса̀ сїѧ҄; не къ мѹжє́мъ ли сѣдѧ́щымъ на стѣнѣ̀, є҆́же ѩ҆́сти и҆̀мъ гно́й сво́й и҆ пи́ти и҆̀мъ се́чь свою̀ съ ва́ми вкѹ́пѣ;

²⁸И҆ ста̀ раѱа́къ, и҆ возопѝ гла́сомъ вели́кимъ ї҆ѹде́йски, и҆ глаго́ла, и҆ речѐ: слы́шите словеса̀ вели́кагѡ царѧ̀ а҆ссѷрі́йска:

²⁹си́це глаго́летъ ца́рь: да не возно́ситъ ва́съ ца́рь є҆зекі́а словесы̀, поне́же не возмо́жетъ ва́съ и҆з̾ѧ́ти и҆з̾ рѹкѝ моеѧ̀:

³⁰и҆ да не ѡ҆бнаде́живаетъ ва́съ є҆зекі́а гд҇емъ, глаго́лѧ: и҆з̾има́ѧ и҆́зметъ вы̀ гд҇ь, и҆ не и҆́мать преда́тисѧ гра́дъ се́й въ рѹцѣ̀ царѧ̀ а҆ссѷрі́йска:

³¹не послѹ́шайте є҆зекі́и, ѩ҆́кѡ си́це глаго́летъ ца́рь а҆ссѷрі́йскїй: сотвори́те со мно́ю благослове́нїе и҆ и҆зыди́те ко мнѣ̀, и҆ да пїе́тъ мѹ́жъ ѿ вїногра́да своегѡ̀, и҆ мѹ́жъ вкѹ́ситъ ѿ смо́квей свои́хъ, и҆ да пїе́тъ во́дѹ ѿ ро́ва своегѡ̀,

³²до́ндеже прїидѹ̀ и҆ поимѹ̀ вы̀ въ зе́млю (таковѹ̀) ѩ҆́коже землѧ̀ ва́ша, землѧ̀ пшени́цы и҆ вїна̀, и҆ хлѣ́бѡвъ и҆ вїногра́дѡвъ, землѧ̀ ма́сличинъ є҆ле́а и҆ ме́да, и҆ жи́ви бѹ́дете и҆ не ѹ҆́мрете: и҆ не послѹ́шайте є҆зекі́и, ѩ҆́кѡ прельща́етъ вы̀, глаго́лѧ: гд҇ь ны̀ и҆зба́витъ:

³³є҆да̀ и҆збавлѧ́юще и҆зба́виша бо́зи ѩ҆зы́кѡвъ кі́йждо и҆́хъ свою̀ странѹ̀ и҆з̾ рѹкѝ царѧ̀ а҆ссѷрі́йска;

³⁴гдѣ̀ є҆́сть бо́гъ є҆ма́ѳа и҆ а҆рфа́да; гдѣ̀ є҆́сть бо́гъ сепфарѹі́ма, а҆на̀ и҆ а҆ва̀; є҆да̀ и҆зба́виша самарі́ю и҆з̾ рѹкѹ̀ моє́ю;

³⁵кто̀ во всѣ́хъ бозѣ́хъ земны́хъ, и҆́же и҆зба́виша зе́мли и҆ ѿ рѹкѝ моеѧ̀; и҆ ка́кѡ и҆́зметъ гд҇ь ї҆ер҇ли́ма и҆з̾ рѹкѝ моеѧ̀;

³⁶И҆ ѹ҆молко́ша лю́дїе и҆ не ѿвѣща́ша є҆мѹ̀ сло́ва, ѩ҆́кѡ заповѣ́да и҆̀мъ ца́рь глаго́лѧ: не ѿвѣща́йте є҆мѹ̀.

³⁷И҆ вни́де є҆лїакі́мъ сы́нъ хелкі́инъ строи́тель, и҆ сѡмна́съ книго́чїй, и҆ ї҆ѡа́съ сы́нъ сафа́товъ воспомина́тель ко є҆зекі́и, раздра́вше ри҄зы своѧ҄, и҆ возвѣсти́ша є҆мѹ̀ словеса̀ раѱа́кѡва.