Read Библия Церковнославянская д҃ ца́рствъ 20 Bible Online

д҃ ца́рствъ 20 - Библия Церковнославянская bible

д҃ ца́рствъ 20

¹Во дне́хъ ѻ҆́нѣхъ разболѣ́сѧ є҆зекі́а (ца́рь) да сме́рти. И҆ вни́де къ немѹ̀ и҆са́їа про҇ро́къ сы́нъ а҆мѡ́совъ и҆ речѐ къ немѹ̀: та́кѡ гл҃етъ гд҇ь: заповѣ́ждь до́мѹ твоемѹ̀, ѹ҆́мреши бо ты̀ и҆ не бѹ́деши жи́въ.

²И҆ ѡ҆братѝ є҆зекі́а лицѐ своѐ ко стѣнѣ̀ и҆ помоли́сѧ ко гд҇ѹ, глаго́лѧ:

³гд҇и помѧнѝ нн҃ѣ, ѩ҆́кѡ и҆́стиною ходи́хъ пред̾ тобо́ю и҆ се́рдцемъ соверше́ннымъ, и҆ ѹ҆гѡ́днаѧ пред̾ ѻ҆чи́ма твои́ма сотвори́хъ. И҆ пла́касѧ є҆зекі́а пла́чемъ вели́кимъ.

⁴И҆ бѧ́ше и҆са́їа є҆щѐ посредѣ̀ двора̀, и҆ бы́сть сло́во гд҇не къ немѹ̀, гл҃ѧ:

⁵возврати́сѧ и҆ рцы̀ є҆зекі́и вождѹ̀ люді́й мои́хъ: та́кѡ гл҃етъ гд҇ь бг҃ъ даві́да ѻ҆тца̀ твоегѡ̀: ѹ҆слы́шахъ моли́твѹ твою̀ и҆ ви́дѣхъ сле́зы твоѧ҄: сѐ, а҆́зъ и҆зцѣлю́ тѧ̀, и҆ въ де́нь тре́тїй взы́деши въ до́мъ гд҇ень:

⁶и҆ приложѹ̀ къ лѣ́тѡмъ твои҄мъ лѣ́тъ пѧтьна́десѧть, и҆ ѿ рѹкѝ царѧ̀ а҆ссѷрі́йска и҆зба́влю тѧ̀ и҆ гра́дъ се́й, и҆ защищѹ̀ гра́дъ се́й менє̀ ра́ди и҆ даві́да ра́ди раба̀ моегѡ̀.

⁷И҆ речѐ и҆са́їа: да во́змѹтъ перевѧ́сло смо́квей и҆ да положа́тъ на вре́дъ, и҆ и҆зцѣлѣ́етъ.

⁸И҆ речѐ є҆зекі́а ко и҆са́їи: ко́е зна́менїе, ѩ҆́кѡ и҆зцѣли́тъ мѧ̀ гд҇ь и҆ взы́дѹ въ до́мъ гд҇ень въ де́нь тре́тїй;

⁹И҆ речѐ и҆са́їа: сїѐ зна́менїе ѿ гд҇а, ѩ҆́кѡ сотвори́тъ гд҇ь сло́во, є҆́же гл҃а: (хо́щеши ли да) по́йдетъ стѣ́нь де́сѧть степе́нїй, и҆лѝ возврати́тсѧ де́сѧть степе́нїй;

¹⁰И҆ речѐ є҆зекі́а: ѹ҆до́бно стѣ́ни ѹ҆клони́тисѧ де́сѧть степе́нїй: ни, но да возврати́тсѧ стѣ́нь на де́сѧть степе́нїй вспѧ́ть.

¹¹И҆ возопѝ и҆са́їа про҇ро́къ ко гд҇ѹ, и҆ возврати́сѧ стѣ́нь по числѹ̀ наза́дъ де́сѧть степе́нїй.

¹²Во вре́мѧ ѻ҆́но посла̀ марѡда́хъ валада́нъ, сы́нъ валада́новъ, ца́рь вавѷлѡ́нскїй, кни҄ги и҆ да́ры ко є҆зекі́и: слы́ша бо, ѩ҆́кѡ разболѣ́сѧ (ца́рь) є҆зекі́а.

¹³И҆ пора́довасѧ є҆зекі́а ѡ҆ ни́хъ, и҆ показа̀ и҆̀мъ ве́сь до́мъ сво́й сокро́вищный, сребро̀ и҆ зла́то, и҆ а҆рѡма́ты и҆ є҆ле́й до́брый, и҆ до́мъ сосѹ́дѡвъ и҆ є҆ли҄ка ѡ҆брѣто́шасѧ въ сокро́вищихъ є҆гѡ̀: и҆ не бѣ̀ мѣ́ста, є҆гѡ́же не показа̀ и҆̀мъ є҆зекі́а въ домѹ̀ свое́мъ и҆ во все́й ѻ҆́бласти свое́й.

¹⁴И҆ вни́де и҆са́їа про҇ро́къ ко є҆зекі́и царю̀ и҆ речѐ къ немѹ̀: что̀ глаго́лаша мѹ́жїе сі́и, и҆ ѿкѹ́дѹ прїидо́ша къ тебѣ̀; и҆ речѐ є҆зекі́а: ѿ землѝ да́льнїѧ прїидо́ша ко мнѣ̀, ѿ вавѷлѡ́на.

¹⁵И҆ речѐ: что̀ ви́дѣша въ домѹ̀ твое́мъ; и҆ речѐ є҆зекі́а: всѧ҄, є҆ли҄ка въ домѹ̀ мое́мъ, ви́дѣша: нѣ́сть въ домѹ̀ мое́мъ, є҆гѡ́же и҆̀мъ не показа́хъ, но и҆ ѩ҆̀же въ сокро́вищихъ мои́хъ (ви́дѣша).

¹⁶И҆ речѐ и҆са́їа ко є҆зекі́и: слы́ши сло́во гд҇не:

¹⁷сѐ, дні́е грѧдѹ́тъ, речѐ гд҇ь, взѧта҄ бѹ́дѹтъ всѧ҄, ѩ҆̀же въ домѹ̀ твое́мъ, и҆ всѧ҄, ѩ҆̀же собра́ша ѻ҆тцы̀ твоѝ до днѐ сегѡ̀, вни́дѹтъ въ вавѷлѡ́нъ: и҆ не ѡ҆ста́нетсѧ сло́во, є҆́же речѐ гд҇ь.

¹⁸И҆ сы́нове твоѝ, и҆̀же и҆зы́дѹтъ и҆з̾ тебє̀, и҆̀хже роди́ши, во́змѹтсѧ и҆ бѹ́дѹтъ скопцы̀ въ домѹ̀ царѧ̀ вавѷлѡ́нскагѡ.

¹⁹И҆ речѐ є҆зекі́а ко и҆са́їи: бла́го сло́во гд҇не є҆́же гл҃а: да бѹ́дѹтъ ми́ръ во дни҄ моѧ҄.

²⁰И҆ прѡ́чаѧ слове́съ є҆зекі́евыхъ, и҆ всѧ҄ си́ла є҆гѡ̀, и҆ є҆ли҄ка сотворѝ, и҆сто́чникъ и҆ водоте́чь, и҆ введѐ во́дѹ во гра́дъ, не сѐ ли, сїѧ҄ напи҄сана въ кни́зѣ слове́съ дні́й царе́й ї҆ѹ́диныхъ;

²¹И҆ ѹ҆́спе є҆зекі́а со ѻ҆тцы҄ свои́ми, и҆ погребе́нъ бы́сть во гра́дѣ даві́довѣ. И҆ воцари́сѧ манассі́а сы́нъ є҆гѡ̀ вмѣ́стѡ є҆гѡ̀.