Read Библия Церковнославянская д҃ ца́рствъ 21 Bible Online

д҃ ца́рствъ 21 - Библия Церковнославянская bible

д҃ ца́рствъ 21

¹Сы́нъ двана́десѧти лѣ́тъ манассі́а, є҆гда̀ нача̀ ца́рствовати, и҆ пѧтьдесѧ́тъ пѧ́ть лѣ́тъ ца́рствова во ї҆ер҇ли́мѣ. И҆́мѧ ма́тере є҆гѡ̀ ѻ҆фові́а.

²И҆ сотворѝ лѹка́вое пред̾ ѻ҆чи́ма гд҇нима, и҆ хожда́ше вслѣ́дъ ме́рзостей ѩ҆зы́кѡвъ, и҆̀хже ѿринѹ гд҇ь ѿ лица̀ сынѡ́въ ї҆и҃левыхъ:

³и҆ ѡ҆брати́сѧ, и҆ созда̀ высѡ́каѧ, и҆̀же разорѝ ѻ҆те́цъ є҆гѡ̀ є҆зекі́а, и҆ воздви́же же́ртвенникъ ваа́лѹ, и҆ сотворѝ дѹбра҄вы, ѩ҆̀же сотворѝ а҆хаа́въ ца́рь ї҆и҃левъ, и҆ поклони́сѧ все́й си́лѣ небе́снѣй и҆ порабо́та и҆̀мъ:

⁴и҆ созда̀ ѻ҆лта́рь въ домѹ̀ гд҇ни, ѩ҆́коже речѐ гд҇ь: во ї҆ер҇ли́мѣ положѹ̀ и҆́мѧ моѐ.

⁵И҆ сотворѝ ѻ҆лта́рь все́й си́лѣ небе́снѣй на двѹ̀ дворѹ̀ до́мѹ гд҇нѧ:

⁶и҆ провожда́ше сы́ны своѧ҄ чрез̾ ѻ҆́гнь, и҆ вража́ше, и҆ волшвє́нїѧ творѧ́ше, и҆ сотворѝ ка҄пища, и҆ волшє́бницы ѹ҆мно́жи твори́ти лѹка́вое пред̾ ѻ҆чи́ма гд҇нима, є҆́же прогнѣ́вати є҆го̀:

⁷и҆ поста́ви и҆зва́ѧное дѹбра́вы въ хра́мѣ, ѡ҆ не́мже речѐ гд҇ь къ даві́дѹ и҆ къ соломѡ́нѹ сы́нѹ є҆гѡ̀: въ хра́мѣ се́мъ и҆ во ї҆ер҇ли́мѣ, є҆го́же и҆збра́хъ ѿ всѣ́хъ колѣ́нъ ї҆и҃левыхъ, и҆ положѹ̀ тѹ̀ и҆́мѧ моѐ на вѣ́ки,

⁸и҆ не приложѹ̀ подви́гнѹтисѧ но́зѣ ї҆и҃левѣ ѿ землѝ, ю҆́же да́хъ ѻ҆тцє́мъ и҆́хъ, а҆́ще ті́и соблюдѹ́тъ всѧ҄ є҆ли҄ка заповѣ́дахъ, по все́й за́повѣди, ю҆́же заповѣ́да и҆̀мъ ра́бъ мо́й мѡѷсе́й.

⁹И҆ не послѹ́шаша, и҆ прельстѝ и҆̀хъ манассі́а, є҆́же сотвори́ти лѹка́вое пред̾ ѻ҆чи́ма гд҇нима па́че ѩ҆зы҄къ, ѩ҆̀же и҆стребѝ гд҇ь ѿ лица̀ сынѡ́въ ї҆и҃левыхъ.

¹⁰И҆ гл҃а гд҇ь рѹко́ю рабѡ́въ свои́хъ про҇ро́кѡвъ, гл҃ѧ:

¹¹за сїѧ҄, є҆ли҄ка сотворѝ манассі́а ца́рь ї҆ѹ́динъ ме́рзѡсти сїѧ҄ лѹка́выѧ, па́че всѣ́хъ ѩ҆̀же сотвори́ша а҆морре́є, и҆̀же пре́жде сегѡ̀ бы́ша, и҆ введѐ во грѣ́хъ и҆ ї҆ѹ́дѹ, въ кѹмі́рѣхъ свои́хъ:

¹²не та́кѡ: си́це гл҃етъ гд҇ь бг҃ъ ї҆и҃левъ: сѐ, а҆́зъ наведѹ̀ ѕла҄ѧ на ї҆ер҇ли́мъ и҆ на ї҆ѹ́дѹ, ѩ҆́кѡ всѧ́комѹ слы́шащемѹ пошѹмѧ́тъ ѻ҆боѧ҄ ѹ҆́ха є҆гѡ̀,

¹³и҆ прострѹ̀ на ї҆ер҇ли́мъ мѣ́рѹ самарі́йскѹю и҆ вѣсы̀ до́мѹ а҆хаа́влѧ: и҆ и҆стреблю̀ ї҆ер҇ли́ма, ѩ҆́коже и҆зглажда́етсѧ а҆лава́стръ и҆зглажда́емый и҆ превраща́етсѧ въ лицѐ своѐ:

¹⁴и҆ и҆зри́нѹ ѡ҆ста́нки достоѧ́нїѧ моегѡ̀ и҆ преда́мъ и҆́хъ въ рѹ́ки врагѡ́въ и҆̀хъ, и҆ бѹ́дѹтъ въ расхище́нїе и҆ въ плѣ́нъ всѣ҄мъ врагѡ́мъ свои҄мъ:

¹⁵поне́же сотвори́ша лѹка́вое пред̾ ѻ҆чи́ма мои́ма и҆ бы́ша прогнѣвлѧ́юще мѧ̀ ѿ днѐ, въ ѻ҆́ньже и҆зведо́хъ ѻ҆тцы̀ и҆̀хъ ѿ землѝ є҆гѵ́петскїѧ, и҆ до днѐ сегѡ̀.

¹⁶Е҆ще́ же кро́вь непови́ннѹю и҆злїѧ̀ манассі́а мно́гѹ ѕѣлѡ̀, до́ндеже напо́лни ї҆ер҇ли́мѹ ѹ҆ста̀ до ѹ҆́стъ, кромѣ̀ грѣхѡ́въ є҆гѡ̀, и҆́миже во грѣ́хъ введѐ ї҆ѹ́дѹ, сотвори́ти лѹка́вое пред̾ ѻ҆чи́ма гд҇нима.

¹⁷И҆ прѡ́чаѧ слове́съ манассі́иныхъ, и҆ всѧ҄ є҆ли҄ка сотворѝ, и҆ грѣ́хъ є҆гѡ̀, и҆́мже согрѣшѝ, не сїѧ҄ ли напи҄сана въ кни́зѣ слове́съ дні́й царе́й ї҆ѹ́диныхъ;

¹⁸И҆ ѹ҆́спе манассі́а со ѻ҆тцы҄ свои́ми, и҆ погребе́нъ бы́сть въ вертогра́дѣ до́мѹ своегѡ̀, въ вертогра́дѣ ѻ҆́зы. И҆ воцари́сѧ а҆ммѡ́нъ сы́нъ є҆гѡ̀ вмѣ́стѡ є҆гѡ̀:

¹⁹сы́нъ два́десѧти двѹ̀ лѣ́тъ бѣ̀ а҆ммѡ́нъ, є҆гда̀ нача̀ ца́рствовати и҆ два̀ лѣ҄та ца́рствова во ї҆ер҇ли́мѣ. И҆́мѧ же ма́тери є҆гѡ̀ месолла́мъ, дщѝ а҆рѹ́сова и҆з̾ ї҆ете́вы.

²⁰И҆ сотворѝ лѹка́вое пред̾ ѻ҆чи́ма гд҇нима, ѩ҆́коже сотворѝ манассі́а ѻ҆те́цъ є҆гѡ̀,

²¹и҆ хожда́ше по всемѹ̀ пѹтѝ, и҆́мже ходѝ ѻ҆тє́цъ є҆гѡ̀, и҆ порабо́та кѹмі́рѡмъ, и҆̀мже порабо́та ѻ҆те́цъ є҆гѡ̀, и҆ поклони́сѧ и҆̀мъ:

²²и҆ ѡ҆ста́ви гд҇а бг҃а ѻ҆тє́цъ свои́хъ, и҆ не ходѝ пѹте́мъ гд҇нимъ.

²³И҆ воста́ша ѻ҆́троцы а҆ммѡ́новы на́нь и҆ ѹ҆мертви́ша царѧ̀ въ домѹ̀ є҆гѡ̀.

²⁴Лю́дїе же землѝ (тоѧ̀) и҆зби́ша всѣ́хъ воста́вшихъ на царѧ̀ а҆ммѡ́на, и҆ воцари́ша лю́дїе землѝ тоѧ̀ ї҆ѡсі́ю сы́на є҆гѡ̀ вмѣ́стѡ є҆гѡ̀.

²⁵И҆ прѡ́чаѧ слове́съ а҆ммѡ́новыхъ, є҆ли҄ка сотворѝ, не сѐ ли, сїѧ҄ напи҄сана и҆ въ кни́зѣ слове́съ дні́й царе́й ї҆ѹ́диныхъ;

²⁶И҆ погребо́ша є҆го̀ во гро́бѣ є҆гѡ̀ въ вертогра́дѣ ѻ҆́зинѣ. И҆ воцари́сѧ ї҆ѡсі́а сы́нъ є҆гѡ̀ вмѣ́стѡ є҆гѡ̀.