Read Библия Церковнославянская д҃ ца́рствъ 24 Bible Online

д҃ ца́рствъ 24 - Библия Церковнославянская bible

д҃ ца́рствъ 24

¹Во дне́хъ є҆гѡ̀ взы́де навѹходоно́соръ ца́рь вавѷлѡ́нскїй, и҆ бы́сть є҆мѹ̀ ї҆ѡакі́мъ ра́бъ трѝ лѣ҄та, и҆ ѿврати́сѧ, и҆ ѿве́ржесѧ є҆гѡ̀.

²И҆ посла̀ гд҇ь є҆мѹ̀ є҆динопоѧ́сники халдє́йскїѧ и҆ є҆динопоѧ́сники сѷрі́йскїѧ, поѧ́сники сынѡ́въ а҆ммѡ́нихъ, и҆ посла̀ и҆́хъ въ зе́млю ї҆ѹ́довѹ на побѣжде́нїе по словесѝ гд҇ню, є҆́же гл҃а рѹко́ю рабѡ́въ свои́хъ про҇ро́кѡвъ.

³Ѻ҆ба́че прїи́де по гнѣ́вѹ гд҇ню на ї҆ѹ́дѹ, є҆́же ѿста́вити є҆го̀ ѿ лица̀ своегѡ̀ грѣ҄хъ ра́ди манассі́иныхъ, по всѣ҄мъ є҆ли҄ка сотворѝ,

⁴и҆ кро́вь непови́ннѹю пролїѧ̀, и҆ напо́лни ї҆ер҇ли́мъ кро́ве непови́нныѧ, сегѡ̀ ра́ди не восхотѣ̀ гд҇ь ѹ҆мл҇тивитисѧ.

⁵И҆ прѡ́чаѧ слове́съ ї҆ѡакі́мовыхъ, и҆ всѧ҄ є҆ли҄ка сотворѝ, не сѐ ли, сїѧ҄ напи҄сана въ кни́зѣ слове́съ дні́й царе́й ї҆ѹ́диныхъ;

⁶И҆ ѹ҆́спе ї҆ѡакі́мъ со ѻ҆тцы҄ свои́ми, и҆ воцари́сѧ ї҆ехоні́а вмѣ́стѡ є҆гѡ̀.

⁷И҆ не приложѝ ксемѹ̀ ца́рь є҆гѵ́петскїй и҆зы́ти и҆з̾ землѝ своеѧ̀, ѩ҆́кѡ взѧ̀ ца́рь вавѷлѡ́нскїй ѿ пото́ка є҆гѵ́петска да́же до рѣкѝ є҆ѵфра́та, всѧ҄ є҆ли҄ка бы́ша царѧ̀ є҆гѵ́петска.

⁸Сы́нъ ѻ҆смина́десѧти лѣ́тъ ї҆ехоні́а, є҆гда̀ нача̀ ца́рствовати, и҆ трѝ мц҇ы ца́рствова во ї҆ер҇ли́мѣ. И҆́мѧ же ма́тере є҆гѡ̀ не́сѳа, дщѝ є҆ланасѳа́на, ѿ ї҆ер҇ли́ма.

⁹И҆ сотворѝ лѹка́вое пред̾ ѻ҆чи́ма гд҇нима, по всемѹ̀ є҆ли́ко сотворѝ ѻ҆те́цъ є҆гѡ̀.

¹⁰И҆ въ вре́мѧ то̀ взы́де навѹходоно́соръ ца́рь вавѷлѡ́нскими на ї҆ер҇ли́мъ, и҆ бы́сть гра́дъ во ѡ҆блеже́нїи.

¹¹И҆ прїи́де навѹходоно́соръ ца́рь вавѷлѡ́нскїй на гра́дъ ї҆ер҇ли́мъ, и҆ ѻ҆́троцы є҆гѡ̀ ѡ҆́колѡ ѡ҆бсѣдѧ́хѹ гра́дъ.

¹²И҆ и҆зы́де ї҆ехоні́а ца́рь ї҆ѹ́динъ ко царю̀ вавѷлѡ́нскомѹ, са́мъ и҆ ѻ҆́троцы є҆гѡ̀, и҆ ма́ти є҆гѡ̀, и҆ кнѧ҄зи є҆гѡ̀, и҆ скопцы̀ є҆гѡ̀, и҆ взѧ̀ є҆го̀ ца́рь вавѷлѡ́нскїй въ ѻ҆смо́е лѣ́то ца́рства своегѡ̀.

¹³И҆ и҆знесѐ всѧ҄ сокрѡ́вища ѿтѹ́дѹ сѹ҄щаѧ во хра́мѣ гд҇ни и҆ сокро́вища до́мѹ царе́ва, и҆ сокрѹшѝ всѧ҄ сосѹ́ды златы҄ѧ, ѩ҆̀же сотворѝ соломѡ́нъ ца́рь ї҆и҃левъ во хра́мѣ по гл҃ѹ гд҇ню,

¹⁴и҆ преселѝ ї҆ер҇ли́млѧны и҆ всѧ҄ кнѧ҄зи, и҆ си҄льныѧ крѣ́постїю, плѣ́на де́сѧть ты́сѧщъ плѣни́въ, и҆ всѧ́каго древодѣ́лѧ, и҆ хѹдо́жники: и҆ никто́же ѡ҆ста́сѧ, то́кмѡ ѹ҆бо́зїи землѝ тоѧ̀:

¹⁵и҆ преведѐ ї҆ехоні́ю въ вавѷлѡ́нъ, и҆ ма́терь царе́вѹ, и҆ жєны̀ царє́вы, и҆ скопцы̀ є҆гѡ̀, и҆ крѣ҄пкїѧ землѝ тоѧ̀ введѐ на преселе́нїе и҆з̾ ї҆ер҇ли́ма въ вавѷлѡ́нъ:

¹⁶и҆ всѧ҄ мѹ́жы си́лы, се́дмь ты́сѧщъ, и҆ древодѣ҄ль и҆ хѹдо́жникѡвъ ты́сѧщѹ, всѝ си́льнїи творѧ́щїи бра́нь, и҆ введѐ и҆́хъ ца́рь вавѷлѡ́нскїй въ преселе́нїе въ вавѷлѡ́нъ.

¹⁷И҆ поста́ви царе́мъ вавѷлѡ́нскїй ца́рь ватѳані́ю сы́на є҆гѡ̀ и҆ вмѣ́стѡ є҆гѡ̀, и҆ преложѝ и҆́мѧ є҆мѹ̀ седекі́а.

¹⁸Сы́нъ два́десѧти и҆ є҆ди́нагѡ лѣ́та седекі́а, внегда̀ нача̀ ца́рствовати, и҆ є҆динона́десѧть лѣ́тъ ца́рствова во ї҆ер҇ли́мѣ. И҆́мѧ же ма́тере є҆гѡ̀ а҆мїта́ла, дщѝ ї҆еремі́ина, ѿ ловны̀.

¹⁹И҆ сотворѝ лѹка́вое пред̾ ѻ҆чи́ма гд҇нима, по всемѹ̀ є҆ли҄ка сотворѝ ї҆ѡакі́мъ,

²⁰ѩ҆́кѡ ѩ҆́рость бѣ̀ гд҇нѧ на ї҆ер҇ли́мѣ и҆ на ї҆ѹ́дѣ, до́ндеже ѿве́рже ѧ҆̀ ѿ лица̀ своегѡ̀. И҆ ѿве́ржесѧ седекі́а царѧ̀ вавѷлѡ́нска.