Read Библия Церковнославянская д҃ ца́рствъ 3 Bible Online

д҃ ца́рствъ 3 - Библия Церковнославянская bible

д҃ ца́рствъ 3

¹И҆ ї҆ѡра́мъ сы́нъ а҆хаа́вовъ воцари́сѧ над̾ ї҆и҃лемъ въ самарі́и, въ лѣ́то ѻ҆смоена́десѧть ї҆ѡсафа́та царѧ̀ ї҆ѹ́дина, и҆ ца́рствова лѣ́тъ двана́десѧть,

²и҆ сотворѝ лѹка́вое пред̾ ѻ҆чи́ма гд҇нима: ѻ҆ба́че не ѩ҆́коже ѻ҆те́цъ є҆гѡ̀ и҆ не ѩ҆́коже ма́ти є҆гѡ̀: и҆ разрѹшѝ ка҄пища ваа́лѡва, ѩ҆̀же сотворѝ ѻ҆те́цъ є҆гѡ̀:

³ѻ҆ба́че ко грѣхѹ̀ ї҆еровоа́ма сы́на нава́това, и҆́же введѐ во грѣ́хъ ї҆и҃лѧ, прилѣпи́сѧ и҆ не ѿстѹпѝ ѿ негѡ̀.

⁴И҆ мѡса̀ ца́рь мѡа́вль бѣ̀ нѡки́дъ и҆ даѧ́ше да́нь царю̀ ї҆и҃левѹ, сто̀ ты́сѧщъ а҆́гнцєвъ и҆ сто̀ ты́сѧщъ ѻ҆внѡ́въ съ рѹна́ми.

⁵И҆ бы́сть по ѹ҆ме́ртвїи а҆хаа́вли и҆ ѿве́ржесѧ ца́рь мѡа́вль царѧ̀ ї҆и҃лева.

⁶И҆ и҆зы́де ца́рь ї҆ѡра́мъ во дни҄ ѡ҆́ны ѿ самарі́и и҆ соглѧ́да ї҆и҃лѧ,

⁷и҆ и҆́де, и҆ посла̀ ко ї҆ѡсафа́тѹ царю̀ ї҆ѹ́динѹ, глаго́лѧ: ца́рь мѡа́вль ѿве́ржесѧ менє̀: и҆́деши ли со мно́ю на бра́нь на мѡа́ва; И҆ речѐ: взы́дѹ: си́це мнѣ̀, ѩ҆́коже и҆ тебѣ̀: ѩ҆́коже лю́дїе моѝ, лю́дїе твоѝ: ѩ҆́коже ко́ни моѝ, ко́ни твоѝ.

⁸И҆ речѐ: кі́имъ пѹте́мъ взы́демъ; И҆ речѐ: пѹте́мъ пѹсты́ни є҆дѡ́мскїѧ.

⁹И҆ и҆́де ца́рь ї҆и҃левъ и҆ ца́рь ї҆ѹ́динъ и҆ ца́рь є҆дѡ́мль, и҆ и҆до́ша пѹте́мъ се́дмь дні́й: и҆ не бѣ̀ полкѹ̀ воды̀ и҆ скотѡ́мъ сѹ́щымъ съ ни́ми.

¹⁰И҆ речѐ ѻ҆трокѡ́мъ свои҄мъ ца́рь ї҆и҃левъ: Ѽ, ѩ҆́кѡ созва̀ гд҇ь трѝ сїѧ҄ цари҄ и҆дѹ́щыѧ преда́ти и҆̀хъ въ рѹ́цѣ мѡа́вли.

¹¹И҆ речѐ ї҆ѡсафа́тъ къ немѹ̀ ца́рь ї҆ѹ́динъ: є҆́сть ли здѣ̀ про҇ро́къ гд҇ень, и҆ вопро́симъ гд҇а и҆́мъ; и҆ ѿвѣща̀ є҆ди́нъ ѻ҆́трокъ царѧ̀ ї҆и҃лева и҆ речѐ: здѣ̀ є҆́сть є҆лїссе́й сы́нъ сафа́товъ, и҆́же возлива́ше во́дѹ на рѹ́цѣ и҆лїинѣ҄.

¹²И҆ речѐ ї҆ѡсафа́тъ: є҆́сть съ ни́мъ гл҃ъ гд҇ень. И҆ сни́де къ немѹ̀ ца́рь ї҆и҃левъ и҆ ї҆ѡсафа́тъ ца́рь ї҆ѹ́динъ и҆ ца́рь є҆дѡ́мль.

¹³И҆ речѐ є҆лїссе́й ко царю̀ ї҆и҃левѹ: что̀ мнѣ̀ и҆ тебѣ̀; и҆дѝ ко проро́кѡмъ ѻ҆тца̀ твоегѡ̀ и҆ ко проро́кѡмъ ма́тере твоеѧ̀. И҆ речѐ є҆мѹ̀ ца́рь ї҆и҃левъ: є҆да̀ созва̀ гд҇ь трѝ цари҄, є҆́же преда́ти ѧ҆̀ въ рѹ́цѣ мѡа҄вли;

¹⁴И҆ речѐ є҆лїссе́й: жи́въ гд҇ь си́лъ є҆мѹ́же предстою̀ пред̾ ни́мъ, ѩ҆́кѡ а҆́ще бы́хъ не лицѐ ї҆ѡсафа́та царѧ̀ ї҆ѹ́дина а҆́зъ прїѧ́лъ, то̀ воззрѣ́лъ ли бы́хъ на тѧ̀, и҆ ви́дѣлъ ли бы́хъ тѧ̀;

¹⁵и҆ нн҃ѣ приведи́ ми пѣвца̀. И҆ бы́сть є҆гда̀ воспѣва́ше пѣве́цъ, и҆ бы́сть на не́мъ рѹка̀ гд҇нѧ,

¹⁶и҆ речѐ: та́кѡ гл҃етъ гд҇ь: сотвори́те пото́къ се́й рва́ми рва́ми,

¹⁷ѩ҆́кѡ та́кѡ гл҃етъ гд҇ь: не ѹ҆́зрите дѹ́ха, и҆ нижѐ ѹ҆ви́дите дождѧ̀: и҆ пото́къ се́й напо́лнитсѧ воды̀, и҆ пїе́те вы̀ и҆ стѧжа҄нїѧ ва҄ша и҆ ско́ти ва́ши:

¹⁸и҆ ле́гко сїѐ пред̾ ѻ҆чи́ма гд҇нима, и҆ преда́мъ мѡа́ва въ рѹ́ки ва́шѧ,

¹⁹и҆ порази́те всѧ́къ гра́дъ тве́рдъ, и҆ всѧ́ко дре́во бла́го низложитѐ, и҆ всѧ́къ и҆сто́чникъ воды̀ заградитѐ, и҆ всѧ́кѹ ча́сть бла́гѹ разбїетѐ ка́менїемъ.

²⁰И҆ бы́сть заѹ́тра восходѧ́щей же́ртвѣ, и҆ сѐ, во́ды и҆дѧ́хѹ пѹте́мъ є҆дѡ́мскимъ, и҆ и҆спо́лнисѧ воды̀ землѧ̀.

²¹И҆ всѝ мѡави́тѧне ѹ҆слы́шаша, ѩ҆́кѡ взыдо́ша три́десѧти царѧ҄ бра́тисѧ съ ни́ми. И҆ возопи́ша ѿвсю́дѹ препоѧ́саннїи ѻ҆рѹ́жїемъ и҆ рѣ́ша: ѻ҆́хъ: и҆ ста́ша ѹ҆ предѣ́ла.

²²И҆ ѹ҆ра́ниша заѹ́тра, и҆ со́лнце возсїѧ̀ на во́ды: и҆ ви́дѣ мѡа́въ сопроти́въ во́ды чє́рмны ѩ҆́кѡ кро́вь,

²³и҆ речѐ: кро́вь сїѧ̀ є҆́сть ѿ ѻ҆рѹ́жїѧ: и҆ би́шасѧ ца́рїе, и҆ ѹ҆бѝ мѹ́жъ и҆́скреннѧгѡ своего̀: и҆ нн҃ѣ (грѧдѝ) на коры҄сти, мѡа́ве.

²⁴И҆ внидо́ша въ по́лкъ ї҆и҃левъ, ї҆и҃лтѧне же воста́ша. и҆ и҆зби́ша мѡа́влѧнъ: и҆ побѣго́ша ѿ лица̀ и҆́хъ: и҆ внидо́ша входѧ́ще и҆ бїю́ще мѡа́ва,

²⁵и҆ гра́ды разби́ша, и҆ всѧ́кѹ ча́сть бла́гѹ наверго́ша мѹ́жїе ка́менїемъ, и҆ напо́лниша ю҆̀, и҆ всѧ́къ и҆сто́чникъ загради́ша, и҆ всѧ́ко дре́во бла́го и҆зсѣко́ша, доне́лѣже ѡ҆ста́виша ка́менїе стѣ́нъ разбїе́но: и҆ ѡ҆бстѹпи́ша пра́щницы и҆ разби́ша є҆го̀.

²⁶И҆ ви́дѣ ца́рь мѡа́вль, ѩ҆́кѡ ѹ҆крѣпи́сѧ над̾ ни́мъ бра́нь, и҆ взѧ̀ съ собо́ю се́дмь сѡ́тъ мѹже́й со ѡ҆бнаже́ннымъ ѻ҆рѹ́жїемъ, є҆́же просѣщи́сѧ ко царю̀ є҆дѡ́мскѹ: и҆ не возмого́ша.

²⁷И҆ поѧ́тъ сы́на своего̀ пе́рвенца, є҆го́же воцарѝ вмѣ́стѡ себє̀, и҆ вознесѐ є҆го̀ во всесожже́нїе на стѣнѣ̀: и҆ бы́сть раска́ѧнїе вели́кое во ї҆и҃ли: и҆ ѿстѹпи́ша ѿ негѡ̀ и҆ возврати́шасѧ въ зе́млю свою̀.