Read Библия Церковнославянская д҃ ца́рствъ 8 Bible Online

д҃ ца́рствъ 8 - Библия Церковнославянская bible

д҃ ца́рствъ 8

¹И҆ глаго́ла є҆лїссе́й къ женѣ̀, є҆ѧ́же воскресѝ сы́на, глаго́лѧ: воста́ни и҆ и҆дѝ ты̀ и҆ до́мъ тво́й, и҆ ѡ҆бита́й и҆дѣ́же а҆́ще мо́жеши ѡ҆бита́ти, ѩ҆́кѡ призва̀ гд҇ь гла́дъ на зе́млю, и҆ прїи́детъ на зе́млю се́дмь лѣ́тъ.

²И҆ воста̀ жена̀, и҆ сотворѝ но глаго́лѹ є҆лїссе́евѹ, и҆ по́йде сама̀ и҆ до́мъ є҆ѧ̀, и҆ ѡ҆бита̀ на землѝ и҆ноплеме́нничи се́дмь лѣ́тъ.

³И҆ бы́сть но сконча́нїи седмѝ лѣ́тъ, и҆ возврати́сѧ жена̀ ѿ землѝ и҆ноплеме́нничи во гра́дъ, и҆ прїи́де возопи́ти къ царю̀ ѡ҆ до́мѣ свое́мъ и҆ ѡ҆ се́лѣхъ свои́хъ.

⁴И҆ глаго́ла ца́рь ко гїезі́ю ѻ҆́трокѹ є҆лїссе́а человѣ́ка бж҃їѧ глаго́лѧ: повѣ́ждь мѝ нн҃ѣ всѧ҄ вели҄каѧ, ѩ҆̀же сотворѝ є҆лїссе́й.

⁵И҆ бы́сть є҆мѹ̀ повѣ́дающѹ царе́ви, ѩ҆́кѡ жи́ва сотворѝ сы́на ѹ҆ме́ршаго: и҆ сѐ, жена̀, є҆ѧ́же воскресѝ є҆лїссе́й сы́на є҆ѧ̀, вопию́щи ко царе́ви ѡ҆ до́мѣ свое́мъ и҆ ѡ҆ се́лѣхъ свои́хъ, И҆ речѐ гїезі́й: господи́не царю̀, сїѧ̀ жена̀ и҆ се́й сы́нъ є҆ѧ̀, є҆го́же жи́ва сотворѝ є҆лїссе́й.

⁶И҆ вопросѝ ца́рь женѹ̀: и҆ повѣ́да є҆мѹ̀. И҆ дадѐ є҆́й ца́рь скопца̀ є҆ди́наго, глаго́лѧ возвратѝ всѧ҄, ѩ҆̀же є҆ѧ̀ сѹ́ть, и҆ всѧ҄ плоды̀ села̀ є҆ѧ̀, ѿ да, въ ѻ҆́ньже ѡ҆ста́ви зе́млю, да́же до нн҃ѣ.

⁷И҆ прїи́де є҆лїссе́й въ дама́скъ. И҆ сы́нъ а҆де́ровъ ца́рь сѵ́рскїй разболѣ́сѧ, и҆ возвѣсти́ша є҆мѹ̀, глаго́люще: прїи́де человѣ́къ бж҃їй до здѣ̀.

⁸И҆ речѐ ца́рь ко а҆заи́лѹ: прїимѝ въ рѹ́кѹ свою̀ да́ръ, и҆ и҆дѝ во срѣ́тенїе человѣ́кѹ бж҃їю, и҆ вопросѝ гд҇а и҆̀мъ, глаго́лѧ: а҆́ще ли жи́въ бѹ́дѹ ѿ болѣ҄зни сеѧ̀;

⁹И҆ и҆́де а҆заи́лъ на срѣ́тенїе є҆мѹ̀, и҆ взѧ̀ да́ръ въ рѹ́кѹ свою̀, и҆ всѧ҄ блага҄ѧ дама́скова, бре́мѧ четы́редесѧть велблю́дѡвъ, и҆ прїи́де, и҆ ста̀ пред̾ ни́мъ, и҆ речѐ ко є҆лїссе́ю: сы́нъ тво́й, сы́нъ а҆де́ровъ, ца́рь сѵ́рскїй, посла́ мѧ къ тебѣ̀ вопроси́ти, глаго́лѧ: бѹ́дѹ ли жи́въ ѿ болѣ́зни моеѧ̀ сеѧ̀;

¹⁰И҆ речѐ къ немѹ̀ є҆лїссе́й: и҆дѝ и҆ рцы̀ є҆мѹ̀: живѧ̀ поживе́ши: но показа́ ми гд҇ь, ѩ҆́кѡ сме́ртїю ѹ҆́мретъ.

¹¹И҆ предста̀ лицѹ̀ є҆гѡ̀, и҆ возложѝ (рѹ́ки) да́же до постыдѣ́нїѧ, и҆ пла́касѧ человѣ́къ бж҃їй.

¹²И҆ речѐ а҆заи́лъ: что̀ ѩ҆́кѡ господи́нъ мо́й пла́четъ; И҆ речѐ: вѣ́мъ є҆ли҄ка сотвори́ши сынѡ́мъ ї҆и҃лєвымъ ѕла҄: крѣ́пѡсти и҆̀хъ сожже́ши ѻ҆гне́мъ, и҆ и҆збра҄нныѧ и҆̀хъ и҆збїе́ши мече́мъ, и҆ младе́нцы и҆̀хъ разбїе́ши, и҆ во чре́вѣ и҆мѣ́ющыѧ и҆̀хъ расто́ргнеши.

¹³И҆ речѐ а҆заи́лъ: кто̀ є҆́сть ра́бъ тво́й, пе́съ ме́ртвый, ѩ҆́кѡ сотвори́тъ глаго́лъ се́й; И҆ речѐ є҆лїссе́й: показа́ ми тѧ̀ гд҇ь ца́рствѹюща над̾ сѷрі́ею.

¹⁴И҆ ѿи́де ѿ є҆лїссе́а и҆ вни́де ко господи́нѹ своемѹ̀. И҆ речѐ є҆мѹ̀ (ца́рь): что́ ти речѐ є҆лїссе́й; Ѿвѣща̀: рече́ ми є҆лїссе́й, живѧ̀ поживе́ши.

¹⁵И҆ бы́сть во ѹ҆́трїи, и҆ взѧ̀ ѻ҆деѧ́ло, и҆ намочѝ въ водѣ̀, и҆ ѡ҆бложѝ на лицѐ є҆гѡ̀, и҆ ѹ҆́мре: и҆ воцари́сѧ а҆заи́лъ вмѣ́стѡ є҆гѡ̀.

¹⁶Въ лѣ́то пѧ́тое ї҆ѡра́ма сы́на а҆хаа́ва царѧ̀ ї҆и҃лєва и҆ ї҆ѡсафа́та царѧ̀ ї҆ѹ́дина, воцари́сѧ ї҆ѡра́мъ сы́нъ ї҆ѡсафа́товъ ца́рь ї҆ѹ́динъ:

¹⁷сы́нъ три́десѧти и҆ двою̀ лѣ́тѹ бѣ̀, внегда̀ воцари́тисѧ є҆мѹ̀, и҆ ѻ҆́смь лѣ́тъ ца́рствова во ї҆ер҇ли́мѣ,

¹⁸и҆ ходѝ въ пѹтѝ царе́й ї҆и҃левыхъ, ѩ҆́коже сотворѝ до́мъ а҆хаа́вль, бѣ̀ бо дщѝ а҆хаа́влѧ жена̀ є҆мѹ̀, и҆ сотворѝ лѹка́вое пред̾ гд҇емъ.

¹⁹И҆ не хотѧ́ше гд҇ь потреби́ти ї҆ѹ́ды, даві́да ра́ди раба̀ своегѡ̀, ѩ҆́коже речѐ да́ти є҆мѹ̀ свѣти́лникъ и҆ сынѡ́мъ є҆гѡ̀ во всѧ҄ дни҄.

²⁰Во дни҄ є҆гѡ̀ ѿве́ржесѧ є҆дѡ́мъ и҆з̾ под̾ рѹкѝ ї҆ѹ́дины и҆ поста́ви над̾ собо́ю царѧ̀.

²¹И҆ взы́де ї҆ѡра́мъ въ сїѡ́ръ, и҆ всѧ҄ колєсни́цы ѩ҆̀же съ ни́мъ. И҆ бы́сть є҆мѹ̀ воста́вшѹ, и҆ и҆збѝ є҆дѡ́ма ѡ҆бстѹпи́вшаго ѡ҆́крестъ є҆гѡ̀, и҆ кнѧ҄зи колесни́цъ, и҆ бѣжа́ша лю́дїе въ селє́нїѧ своѧ҄.

²²И҆ ѿстѹпѝ є҆дѡ́мъ и҆з̾ под̾ рѹкѝ ї҆ѹ́дины да днѐ сегѡ̀: тогда̀ ѿве́ржесѧ ловна̀ во вре́мѧ ѻ҆́но.

²³И҆ прѡ́чаѧ слове́съ ї҆ѡра́млихъ, и҆ всѧ҄ є҆ли҄ка сотворѝ, не сѐ ли, сїѧ҄ пи҄сана въ кни́зѣ слове́съ дні́й царе́й ї҆ѹ́диныхъ;

²⁴И҆ ѹ҆́спе ї҆ѡра́мъ со ѻ҆тцы҄ свои́ми, и҆ погребе́нъ бы́сть со ѻ҆тцы҄ свои́ми во гра́дѣ даві́да ѻ҆тца̀ своегѡ̀: и҆ ца́рствова ѻ҆хозі́а сы́нъ є҆гѡ̀ вмѣ́стѡ є҆гѡ̀.

²⁵Въ лѣ́то второена́десѧть ї҆ѡра́ма сы́на а҆хаа́влѧ царѧ̀ ї҆и҃лева, ца́рствовати нача̀ ѻ҆хозі́а сы́нъ ї҆ѡра́ма царѧ̀ ї҆ѹ́дина:

²⁶сы́нъ два́десѧти двѹ́хъ лѣ́тъ бы́сть ѻ҆хозі́а, є҆гда̀ нача̀ ца́рствовати, и҆ лѣ́то є҆ди́но ца́рствова во ї҆ер҇ли́мѣ. И҆́мѧ же ма́тери є҆гѡ̀ гоѳолі́а, дще́рь а҆мврі́а царѧ̀ ї҆и҃лева.

²⁷И҆ хожда́ше по пѹтє́мъ до́мѹ а҆хаа́влѧ, и҆ сотворѝ лѹка́вое пред̾ гд҇емъ, ѩ҆́коже до́мъ а҆хаа́вль: зѧ́ть бо бѣ̀ до́мѹ а҆хаа́влѧ.

²⁸И҆ и҆́де со ї҆ѡра́момъ сы́номъ а҆хаа́влимъ на бра́нь, на а҆заи́ла царѧ̀ и҆ноплеме́ннича въ рамѡ́ѳъ галаа́дскїй, и҆ ѹ҆ѧзви́ша сѵ́рѧне ї҆ѡра́ма.

²⁹И҆ возврати́сѧ ца́рь ї҆ѡра́мъ цѣли́тисѧ во ї҆езрае́ль ѿ ѩ҆́звъ, и҆́миже ѹ҆ѧзви́ша є҆го̀ въ рамѡ́ѳѣ, є҆гда̀ ра́товаше то́й на а҆заи́ла царѧ̀ сѵ́рска, и҆ ѻ҆хозі́а сы́нъ ї҆ѡра́мль ца́рь ї҆ѹ́динъ сни́де ви́дѣти ї҆ѡра́ма, сы́на а҆хаа́влѧ, во ї҆езрае́ль, ѩ҆́кѡ болѧ́ше то́й.