Read Библия Церковнославянская д҃ ца́рствъ 9 Bible Online

д҃ ца́рствъ 9 - Библия Церковнославянская bible

д҃ ца́рствъ 9

¹є҆лїссе́й про҇ро́къ призва̀ є҆ди́наго ѿ сынѡ́въ проро́чихъ и҆ речѐ є҆мѹ̀: препоѧ́ши чре́сла своѧ҄, и҆ возмѝ сосѹ́дъ є҆ле́а сегѡ̀ въ рѹ́кѹ твою̀, и҆ и҆дѝ въ рамѡ́ѳъ галаа́дскїй:

²и҆ вни́деши та́мѡ, и҆ ѹ҆́зриши та́мѡ ї҆иѹ́а сы́на ї҆ѡсафа́та сы́на намессі́ева, и҆ вни́деши, и҆ и҆зведе́ши є҆го̀ ѿ среды̀ бра́тїи є҆гѡ̀, и҆ введе́ши є҆го̀ во внѹ́треннюю клѣ́ть:

³и҆ во́змеши сосѹ́дъ є҆ле́а, и҆ возлїе́ши на главѹ̀ є҆гѡ̀, и҆ рцы̀: си́це гл҃етъ гд҇ь: пома́захъ тѧ̀ въ царѧ̀ над̾ ї҆и҃лемъ: и҆ ѿве́рзеши двє́ри, и҆ да бѣжи́ши, и҆ да не пребѹ́деши та́мѡ.

⁴И҆ и҆́де ѻ҆́трочищь проро́къ въ рамѡ́ѳъ галаа́дскїй:

⁵и҆ вни́де, и҆ сѐ, кнѧ҄зи си́лы сѣдѧ́хѹ, и҆ речѐ: сло́во мѝ є҆́сть къ тебѣ̀, ѽ, кнѧ́же. И҆ речѐ ї҆иѹ́й: къ комѹ̀ ѿ всѣ́хъ на́съ; И҆ речѐ: къ тебѣ̀, кнѧ́же.

⁶И҆ воста̀ и҆ вни́де въ до́мъ: и҆ возлїѧ̀ є҆ле́й на главѹ̀ є҆гѡ̀ и҆ речѐ є҆мѹ̀: си́це гл҃етъ гд҇ь бг҃ъ ї҆и҃левъ: пома́захъ тѧ̀ въ царѧ̀ над̾ людьмѝ гд҇ними, над̾ ї҆и҃лемъ.

⁷и҆ да потреби́ши до́мъ а҆хаа́ва господи́на твоегѡ̀ ѿ лица̀ моегѡ̀, и҆ ѿмсти́ши кро́вь рабѡ́въ мои́хъ проро́кѡвъ и҆ кро́вь всѣ́хъ рабѡ́въ гд҇нихъ ѿ рѹкѝ ї҆езаве́лины.

⁸и҆ ѿ рѹкѝ всегѡ̀ до́мѹ а҆хаа́влѧ, и҆ потреби́ши ѿ до́мѹ а҆хаа́влѧ моча́щагосѧ къ стѣнѣ̀, и҆ содержа́щагосѧ, и҆ ѡ҆ста́вльшагосѧ во ї҆и҃ли:

⁹и҆ преда́мъ до́мъ а҆хаа́вль, ѩ҆́коже до́мъ ї҆еровоа́ма сы́на нава́това и҆ ѩ҆́коже до́мъ ваа́сы сы́на а҆хі́ина:

¹⁰и҆ ї҆езаве́ль снѣдѧ́тъ псѝ въ ча́сти ї҆езрае́лѧ, и҆ не бѹ́детъ погреба́ющагѡ ю҆̀. И҆ ѿве́рзе двє́ри и҆ ѹ҆бѣжа̀.

¹¹Ї҆иѹ́й же и҆зы́де ко ѻ҆трокѡ́мъ господи́на своегѡ̀. И҆ рѣ́ша є҆мѹ̀: ми́ръ ли; что̀ ѩ҆́кѡ вни́де неи́стовый се́й къ тебѣ̀; И҆ речѐ и҆̀мъ: вы̀ вѣ́сте мѹ́жа и҆ сѹесло́вїе є҆гѡ̀.

¹²И҆ рѣ́ша: не пра́вда, (а҆́ще не возвѣсти́ши;) возвѣстѝ ѹ҆̀бо на́мъ. И҆ речѐ ї҆иѹ́й къ ни҄мъ: та́кѡ и҆ та́кѡ речѐ ко мнѣ̀, глаго́лѧ: си́це гл҃етъ гд҇ь: пома́захъ тѧ̀ въ царѧ̀ над̾ ї҆и҃лемъ.

¹³И҆ слы́шавше теко́ша спѣ́шнѡ, и҆ взѧ̀ кі́йждо ри҄зы своѧ҄, и҆ положи́ша под̾ ни́мъ, поне́же на є҆ди́нѣмъ ѿ степе́нїй сѣдѧ́ше, и҆ вострѹби́ша въ ро́гъ и҆ рѣ́ша: воцари́сѧ ї҆иѹ́й.

¹⁴И҆ возврати́сѧ ї҆иѹ́й сы́нъ ї҆ѡсафа́та сы́на намессі́ева ко ї҆ѡра́мѹ. Ї҆ора́мъ же са́мъ стрежа́ше въ рамѡ́ѳѣ галаа́дстѣмъ и҆ ве́сь ї҆и҃ль ѿ лица̀ а҆заи́ла царѧ̀ сѷрі́йска.

¹⁵И҆ возврати́сѧ ї҆ѡра́мъ ца́рь цѣли́тисѧ во ї҆езрае́ли ѿ ѩ҆́звъ, и҆́миже ѹ҆ѧзви́ша є҆го̀ сѵ́рѧне, є҆гда̀ бра́шесѧ со а҆заи́ломъ царе́мъ сѷрі́йскимъ. И҆ речѐ ї҆иѹ́й: а҆́ще є҆́сть дѹша̀ ва́ша со мно́ю, да не и҆зы́детъ и҆з̾ гра́да бѣгле́цъ, и҆тѝ и҆ возвѣсти́ти во ї҆езрае́ли.

¹⁶И҆ всѣ́де на конѧ̀, и҆ по́йде ї҆иѹ́й, и҆ сни́де во ї҆езрае́ль, ѩ҆́кѡ ї҆ѡра́мъ ца́рь ї҆и҃левъ цѣлѧ́шесѧ во ї҆езрае́ли ѿ стрѣлѧ́нїй, и҆́миже ѹ҆стрѣли́ша є҆го̀ а҆рамі́ны въ рамѡ́ѳѣ на бра́ни со а҆заи́ломъ царе́мъ сѵ́рскимъ, ѩ҆́кѡ то́й бѣ̀ си́ленъ и҆ мѹ́жъ си́лы, и҆ лежа́ше та́мѡ. И҆ ѻ҆хозі́а ца́рь ї҆ѹ́динъ прїи́де ви́дѣти ї҆ѡра́ма.

¹⁷И҆ стра́жъ взы́де на сто́лпъ во ї҆езрае́ли, и҆ ви́дѣ пра́хъ ї҆иѹ́евъ, є҆гда̀ и҆тѝ є҆мѹ̀ и҆ речѐ: пра́хъ а҆́зъ ви́жѹ. И҆ речѐ ї҆ѡра́мъ: всадѝ мѹ́жа на ко́нь и҆ послѝ проти́вѹ и҆̀мъ, и҆ да рече́тъ: ми́ръ ли;

¹⁸И҆ и҆́де вса́дникъ ко́нный на срѣ́тенїе є҆мѹ̀ и҆ речѐ: та́кѡ глаго́летъ ца́рь: ми́ръ ли; И҆ речѐ ї҆иѹ́й: что̀ тебѣ̀ и҆ ми́рѹ; ѡ҆брати́сѧ вслѣ́дъ менє̀. И҆ возвѣстѝ стра́жъ, глаго́лѧ: прїи́де по́сланный до ни́хъ и҆ не возврати́сѧ.

¹⁹И҆ посла̀ вса́дника ко́ннаго втора́го, и҆ прїи́де къ немѹ̀ и҆ речѐ: та́кѡ речѐ ца́рь: ми́ръ ли; И҆ речѐ ї҆иѹ́й: что̀ тебѣ̀ и҆ ми́рѹ; возврати́сѧ вслѣ́дъ менє̀.

²⁰И҆ возвѣстѝ стра́жъ, глаго́лѧ: прїи́де до ни́хъ и҆ не возврати́сѧ: и҆ во́ждь ведѧ́ше ї҆иѹ́а сы́на намессі́ина, ѩ҆́кѡ въ премѣ́нѣ бы́сть.

²¹И҆ речѐ ї҆ѡра́мъ: впрѧзи́те. И҆ впрѧго́ша колесни́цѹ: и҆ и҆зы́де ї҆ѡра́мъ ца́рь ї҆и҃левъ и҆ ѻ҆хозі́а ца́рь ї҆ѹ́динъ, кі́йждо на колесни́цѣ свое́й, и҆ и҆зыдо́ста на срѣ́тенїе ї҆иѹ́а, и҆ ѡ҆брѣто́ста є҆го̀ и҆ ча́сти навѹѳе́а ї҆езраилі́тина.

²²И҆ бы́сть ѩ҆́кѡ ѹ҆ви́дѣ ї҆ѡра́мъ ї҆иѹ́а, и҆ речѐ ми́ръ ли, ї҆иѹ́е; И҆ речѐ ї҆иѹ́й что̀ тебѣ̀ и҆ ми́рѹ; є҆щѐ блѹды̀ ї҆езаве́ли ма́тери твоеѧ̀, и҆ ча́рове є҆ѧ̀ мнѡ́гїѧ.

²³И҆ ѡ҆братѝ ї҆ѡра́мъ рѹ́ки своѧ҄ и҆ бѣжа̀, и҆ речѐ ко ѻ҆хозі́и: ле́сть, ѻ҆хозі́е.

²⁴И҆ налѧчѐ ї҆иѹ́й рѹко́ю свое́ю лѹ́къ и҆ ѹ҆стрѣлѝ ї҆ѡра́ма посредѣ̀ плєщѹ̀ є҆гѡ̀, и҆ и҆зы́де стрѣла̀ сквозѣ̀ се́рдце є҆гѡ̀: и҆ преклони́сѧ на кѡлѣ́на своѧ҄.

²⁵И҆ речѐ ї҆иѹ́й къ вадека́рѹ трїста́тѹ своемѹ̀: возмѝ и҆ ве́рзи є҆го̀ на ча́сти села̀ навѹѳе́а ї҆езраилі́тина, ѩ҆́кѡ по́мню, а҆́зъ и҆ ты̀ всѣ́дшїи на колєсни́цы и҆до́хомъ вслѣ́дъ а҆хаа́ва ѻ҆тца̀ є҆гѡ̀, и҆ гд҇ь речѐ ѡ҆ не́мъ прро́чество сїѐ, гл҃ѧ:

²⁶не ви́дѣхъ ли кро́ве навѹѳе́евы и҆ кро́ве сынѡ́въ є҆гѡ̀ вчера̀, речѐ гд҇ь; и҆ возда́мъ є҆мѹ̀ на ча́сти се́й, речѐ гд҇ь: и҆ нн҃ѣ ѹ҆̀бо взе́мъ пове́рзи є҆го̀ на ча́сти се́й по гл҃ѹ гд҇ню.

²⁷И҆ ѻ҆хозі́а ца́рь ї҆ѹ́динъ ви́дѣ, и҆ побѣжѐ пѹте́мъ веѳга́нъ и҆ гна̀ по не́мъ ї҆иѹ́й и҆ речѐ: и҆ сегѡ̀ (не и҆́мамъ ѡ҆ста́вити). И҆ поразѝ є҆го̀ на колесни́цѣ є҆гда̀ и҆дѧ́ше въ га́й, и҆́же є҆́сть ї҆евлаа́мъ и҆ ѹ҆бѣжа̀ въ магеддѡ́нъ, и҆ ѹ҆́мре та́мѡ.

²⁸И҆ возложи́ша є҆го̀ ѻ҆́троцы є҆гѡ̀ на колесни́цѹ и҆ везо́ша є҆го̀ во ї҆ер҇ли́мъ, и҆ погребо́ша є҆го̀ во гро́бѣ є҆гѡ̀ во гра́дѣ даві́довѣ.

²⁹И҆ въ первоена́десѧть лѣ́то ї҆ѡра́ма царѧ̀ ї҆и҃лева воцари́сѧ ѻ҆хозі́а над̾ ї҆ѹ́дою.

³⁰И҆ прїи́де ї҆иѹ́й во ї҆езрае́ль (гра́дъ). Ї҆езаве́ль же ѹ҆слы́ша, и҆ нама́за лицѐ своѐ и҆ ѹ҆красѝ главѹ̀ свою̀, и҆ прини́че ѻ҆кно́мъ.

³¹И҆ ї҆иѹ́й вхожда́ше во гра́дъ и҆ речѐ: ми́ръ ли замврі́ю, ѹ҆бі́йцѣ господи́на своегѡ̀;

³²И҆ воззрѣ̀ лице́мъ свои́мъ на ѻ҆кно̀ и҆ ви́дѣ ю҆̀ и҆ речѐ: кто̀ ты̀ є҆сѝ; сни́ди ко мнѣ̀. И҆ преклони́стасѧ къ немѹ̀ два̀ скѡпца̀.

³³И҆ речѐ ї҆иѹ́й: све́рзита ю҆̀. И҆ сверго́ста ю҆̀, и҆ ѡ҆кропи́шасѧ кро́вїю є҆ѧ̀ стѣ́ны и҆ ко́ни, и҆ попра́ша ю҆̀.

³⁴И҆ вни́де ї҆иѹ́й, и҆ ѩ҆дѐ и҆ пѝ, и҆ речѐ: ѡ҆смотри́те нн҃ѣ проклѧ́тѹю сїю̀, и҆ погреби́те ю҆̀, ѩ҆́кѡ дще́рь царе́ва є҆́сть.

³⁵И҆ и҆до́ша погребстѝ ю҆̀, и҆ не ѡ҆брѣто́ша ѿ неѧ̀ ничто̀ и҆́но, то́кмѡ ло́бъ и҆ но́ги и҆ дла҄ни рѹ́къ.

³⁶И҆ возврати́шасѧ и҆ возвѣсти́ша є҆мѹ̀. И҆ речѐ: сло́во гд҇не, є҆́же гл҃а рѹко́ю раба̀ своегѡ̀ и҆лїѝ ѳесві́тѧнина, гл҃ѧ: въ ча́сти ї҆езрае́лѧ снѣдѧ́тъ псѝ пло́ть ї҆езаве́линѹ:

³⁷и҆ бѹ́детъ трѹ́пъ ї҆езаве́линъ а҆́ки гно́й на лицы̀ села̀ въ ча́сти ї҆езрае́лѧ, ѩ҆́кѡ не рещѝ и҆̀мъ: сїѧ̀ є҆́сть ї҆езаве́ль.