Read Библия Церковнославянская а҃ паралипоме́нѡнъ 11 Bible Online

а҃ паралипоме́нѡнъ 11 - Библия Церковнославянская bible

а҃ паралипоме́нѡнъ 11

¹И҆ собра́сѧ ве́сь ї҆и҃ль къ даві́дѹ въ хеврѡ́нъ, глаго́люще: сѐ, кѡ́сти твоѧ҄ и҆ пло́ть твоѧ̀ мы̀:

²вчера̀ же и҆ тре́тїѧгѡ днѐ, є҆гда̀ є҆щѐ ца́рствоваше саѹ́лъ, ты̀ бы́лъ є҆сѝ и҆зводѧ́й и҆ вводѧ́й ї҆и҃лѧ, и҆ тебѣ̀ речѐ гд҇ь бг҃ъ тво́й: ты̀ ѹ҆пасе́ши лю́ди моѧ҄ ї҆и҃лѧ, и҆ ты̀ бѹ́деши кнѧ́зь над̾ людьмѝ мои́ми ї҆и҃лемъ.

³И҆ прїидо́ша всѝ старѣ҄йшины ї҆и҃лєвы ко царю̀ въ хеврѡ́нъ: и҆ ѹ҆твердѝ даві́дъ съ ни́ми завѣ́тъ въ хеврѡ́нѣ пред̾ гд҇емъ: и҆ пома́заша даві́да въ царѧ̀ над̾ ї҆и҃лемъ по словесѝ гд҇ню, (є҆́же гл҃а) рѹко́ю самѹи́ловою.

⁴И҆ и҆́де ца́рь даві́дъ и҆ ве́сь ї҆и҃ль во ї҆ер҇ли́мъ, се́й є҆́сть ї҆евѹ́съ, и҆дѣ́же бѧ́хѹ ї҆евѹсе́є жи́телїе землѝ.

⁵Реко́ша же даві́дѹ, и҆̀же ѡ҆бита́ша въ ї҆евѹ́сѣ: не вни́деши сѣ́мѡ. И҆ взѧ̀ даві́дъ крѣ́пость сїѡ́ню, ѩ҆́же є҆́сть гра́дъ даві́довъ.

⁶Рече́ же даві́дъ: всѧ́къ и҆́же ѹ҆бїе́тъ ї҆евѹсе́а въ пе́рвыхъ, бѹ́детъ кнѧ́зь и҆ воево́да. И҆ взы́де на́нь пре́жде ї҆ѡа́въ сы́нъ сарѹі́евъ и҆ бы́сть кнѧ́земъ.

⁷И҆ сѣ́де даві́дъ во ѡ҆бдержа́нїи: сегѡ̀ ра́ди и҆менова̀ є҆̀ гра́дъ даві́довъ.

⁸И҆ созда̀ гра́дъ ѡ҆́крестъ ѿ ма́ала да́же да ѡ҆крѹже́нїѧ: ї҆ѡа́въ же про́чее гра́да состро́и: и҆ воева̀ и҆ взѧ̀ гра́дъ.

⁹Преспѣва́ше же даві́дъ и҆ды́й и҆ расты́й, и҆ гд҇ь вседержи́тель бѣ̀ съ ни́мъ.

¹⁰Сі́и же кнѧ҄зи си́льныхъ даві́довыхъ, и҆̀же помога́хѹ є҆мѹ̀ въ ца́рствѣ є҆гѡ̀ со всѣ́мъ ї҆и҃лемъ, да ца́рь бѹ́детъ по словесѝ гд҇ню, над̾ ї҆и҃лемъ,

¹¹и҆ сїѐ число̀ крѣ́пкихъ даві́довыхъ: ї҆есваа́лъ сы́нъ а҆хама́нь, пе́рвый междѹ̀ три́десѧтми: то́й и҆звлечѐ ме́чь сво́й є҆ди́ножды на три́ста ѩ҆́звеныхъ во є҆ди́но вре́мѧ.

¹²И҆ по не́мъ є҆леаза́ръ, сы́нъ дѡде́а а҆хѡхі́и: се́й бѣ̀ междѹ̀ тре́ми си́льными:

¹³се́й бѣ̀ съ даві́домъ въ фасодомі́нѣ, и҆дѣ́же и҆ноплемє́нницы со́брани бы́ша на бра́нь, и҆ бѣ̀ ча́сть ни́вы полна̀ ѩ҆чме́нѧ, и҆ лю́дїе побѣго́ша ѿ лица̀ и҆ноплеме́ннича:

¹⁴и҆ ста̀ посредѣ̀ ча́сти и҆ защитѝ ю҆̀, и҆ и҆збѝ и҆ноплеме́нники, и҆ сотворѝ гд҇ь сп҇нїе ве́лїе (лю́демъ свои҄мъ).

¹⁵Снидо́ша же ті́и трїѐ ѿ три́десѧти кнѧзе́й на ка́мень ко даві́дѹ въ пеще́рѹ ѻ҆долла́млю, а҆ по́лкъ и҆ноплеме́нничь стоѧ́ше во ю҆до́ли гїга́нтѡвъ.

¹⁶Даві́дъ же бѣ̀ тогда̀ въ крѣ́пости, по́лкъ же и҆ноплеме́нничь бѣ̀ тогда̀ въ виѳлее́мѣ.

¹⁷И҆ возжада̀ даві́дъ и҆ речѐ: кто̀ напои́тъ мѧ̀ водо́ю ѿ кла́дѧзѧ виѳлее́мска, и҆́же є҆́сть во вратѣ́хъ;

¹⁸И҆ трїѐ ті́и проторго́шасѧ сквозѣ̀ по́лкъ и҆ноплеме́нничь и҆ почерпо́ша во́дѹ и҆з̾ кла́дѧзѧ, и҆́же въ виѳлее́мѣ, и҆́же бѣ̀ во вратѣ́хъ, и҆ взѧ́ша и҆ принесо́ша къ даві́дѹ, да пїе́тъ. И҆ не восхотѣ̀ даві́дъ пи́ти є҆ѧ̀ и҆ возлїѧ̀ ю҆̀ гд҇еви

¹⁹и҆ речѐ: мл҇тивъ мѝ бг҃ъ, є҆́же сотвори́ти глаго́лъ се́й: а҆́ще кро́вь мѹже́й си́хъ и҆спїю̀ въ дѹша́хъ и҆́хъ, поне́же дѹша́ми свои́ми принесо́ша. И҆ не восхотѣ̀ пи́ти є҆ѧ̀. Сїѐ сотвори́ша трїѐ си́льнїи.

²⁰И҆ а҆ве́сса бра́тъ ї҆ѡа́вль, то́й бѣ̀ пе́рвый въ трїе́хъ: се́й и҆звлечѐ ме́чь сво́й проти́вѹ трїе́хъ сѡ́тъ мѹже́й во є҆ди́нъ ча́съ и҆ ѹ҆бѝ и҆̀хъ, и҆ то́й бѣ̀ посредѣ̀ трїе́хъ и҆мени́тъ:

²¹ѿ трїе́хъ междѹ̀ двѣма̀ пресла́вный, и҆ бѣ̀ и҆̀мъ нача́лникъ, ѻ҆ба́че ко трїе́мъ пє́рвымъ не дости́же.

²²И҆ ване́а сы́нъ ї҆ѡда́евъ, сы́нъ мѹ́жа крѣ́пкагѡ, мнѡ́га дѣла̀ є҆гѡ̀, ѿ кавасли́ла: то́й ѹ҆бѝ двои́хъ а҆рїи́лѡвъ мѡа́вскихъ, и҆ то́й сни́де и҆ ѹ҆бѝ льва̀ ѹ҆ кла́дѧзѧ во вре́мѧ снѣ́га:

²³и҆ то́й ѹ҆бѝ мѹ́жа є҆гѵ́птѧнина, є҆мѹ́же во́зрастъ бѣ̀ пѧ́ть лакѡ́тъ, и҆ въ рѹцѣ̀ є҆гѵ́птѧнина копїѐ ѩ҆́кѡ врати́ло ткѹ́щихъ: и҆ сни́де къ немѹ̀ ване́а съ жезло́мъ, и҆ восхи́ти копїѐ и҆з̾ рѹкѝ є҆гѵ́птѧнина и҆ ѹ҆бѝ є҆го̀ копїе́мъ є҆гѡ̀:

²⁴сїѧ҄ сотворѝ ване́а сы́нъ ї҆ѡда́евъ, и҆ бѣ̀ и҆мени́тъ посредѣ̀ трїе́хъ си́льныхъ:

²⁵над̾ три́десѧтїю бѣ̀ сла́венъ се́й, а҆ ко трїе́мъ не дости́же: и҆ поста́ви є҆го̀ даві́дъ над̾ ѻ҆те́чествомъ свои́мъ.

²⁶И҆ си́льнїи си́лъ: а҆саи́лъ, бра́тъ ї҆ѡа́вль, є҆леана́нъ, сы́нъ дѡдѡ́евъ ѿ виѳлее́ма,

²⁷саммѡ́ѳъ а҆дди́тѧнинъ, хелкі́й а҆фело́нїнъ,

²⁸ѻ҆ре́й сы́нъ ѿ кі́са ѳекѹ́йскїй, а҆вїезе́ръ а҆наѳѡ́ѳскїй,

²⁹совоха́й а҆сѡѳі́йскїй, и҆лі́й а҆хо́йскїй,

³⁰воора́й сы́нъ нетѡфаѳі́евъ, є҆лла́ѳъ сы́нъ ваїна́ка нетѡфаѳі́йскагѡ,

³¹и҆ѳа́й сы́нъ риве́инъ ѿ хо́лма венїамі́нѧ, ване́а сы́нъ фараѳѡ́нїевъ,

³²ѹ҆рі́й ѿ неа́ли, галсавїи́лъ а҆равеѳі́йскїй,

³³а҆змѡ́ѳъ варсамі́йскїй, є҆лїа́ва саламі́йскїй,

³⁴ї҆ра́съ гоині́йскїй, ї҆ѡнаѳа́нъ сы́нъ сагѝ а҆рарі́йскїй,

³⁵а҆хїа́мъ сы́нъ саха́ра а҆рарі́йскагѡ, зифаа́лъ сы́нъ ѡ҆́ринъ,

³⁶а҆фе́ръ мехѹраѳі́нскїй, а҆хі́а фелоні́йскїй,

³⁷а҆сара́й мармели́нскїй, ноора́й сы́нъ а҆вді́евъ,

³⁸ї҆ѡи́ль бра́тъ наѳа́новъ, мава́ръ сы́нъ тараі́евъ,

³⁹селли́къ а҆ммѡні́инъ, нааре́й вирѡ́ѳїнъ, и҆́же носи́лъ ѻ҆рѹ́жїе ї҆ѡа́ва сы́на сарѹі́ева,

⁴⁰ї҆ра̀ ї҆еѳе́рїинъ, гари́въ ѳе́рїинъ,

⁴¹ѹ҆рі́а хетѳе́йскїй, ваза́ѳъ сы́нъ ѡ҆олі́евъ,

⁴²а҆дїна̀ сы́нъ са́ха, рѹви́ма кнѧ́зь, и҆ ѹ҆ негѡ̀ три́десѧть,

⁴³а҆на́нъ сы́нъ маа́хинъ, и҆ ї҆ѡсафа́тъ ѳаѳаи́нъ,

⁴⁴ѻ҆зі́а а҆старѡ́ѳїнъ, самма̀ и҆ ї҆еи́лъ сы́нове хѡѳа́на а҆рарі́ина,

⁴⁵ї҆едїи́лъ сы́нъ сааме́рїнъ, и҆ ї҆ѡза́е бра́тъ є҆гѡ̀ ѳѡса́їнъ,

⁴⁶ї҆елїи́лъ маѡі́нъ, и҆ а҆рі́ва, и҆ ѡ҆со́їа сы́нъ є҆гѡ̀, є҆наа́мъ, и҆ ї҆еѳема̀ мѡаві́тскїй,

⁴⁷є҆лїи́лъ, и҆ ѡ҆ви́дъ, и҆ ї҆есїи́лъ месѡві́евъ.