Read Библия Церковнославянская а҃ паралипоме́нѡнъ 12 Bible Online

а҃ паралипоме́нѡнъ 12 - Библия Церковнославянская bible

а҃ паралипоме́нѡнъ 12

¹И҆ сі́и прїидо́ша ко даві́дѹ въ сїкела́гъ, є҆гда̀ є҆щѐ ѡ҆бдержи́мь бѧ́ше ѿ лица̀ саѹ́ла сы́на кі́сова: и҆ сі́и ѿ си́льныхъ помога́юще во бра́ни,

²напрѧза́юще лѹ́къ десны́ми и҆ шѹ́ими рѹка́ми, и҆ пра́щницы ка́менемъ и҆ стрѣла́ми, ѿ бра́тїй саѹ́ловыхъ ѿ (колѣ́на) венїамі́на:

³кнѧ́зь а҆хїе́зеръ, и҆ ї҆ѡа́съ сы́нъ сама́а гаваѳі́та, и҆ ї҆езїи́лъ, и҆ фали́ѳъ, сы́нове замо́ѳѡвы, и҆ варахі́а, и҆ ї҆иѹ́а а҆наѳѡѳі́тинъ,

⁴и҆ самаі́а гаваѡні́тинъ, си́льный посредѣ̀ три́десѧтихъ и҆ над̾ три́десѧтїю, и҆ ї҆еремі́а, и҆ ї҆езекі́иль, и҆ ї҆ѡанна́нъ, и҆ ї҆ѡзава́ѳъ гадараѳі́тинъ,

⁵є҆лїѡзі́й, и҆ ї҆ерїмѹ́ѳъ, и҆ ваалі́а, и҆ самарі́а, и҆ сафаті́а а҆рѹ́фїнъ,

⁶є҆лка́на, и҆ ї҆есі́а, и҆ ї҆елїи́лъ, и҆ ї҆езаа́ръ, и҆ ї҆есваа́мъ, корі́тѧне,

⁷и҆ ї҆ѡила̀, и҆ заваді́а, сы́нове ї҆ероа҄мли, и҆ и҆̀же ѿ гедѡ́ра.

⁸И҆ ѿ гаддї̀ прибѣго́ша къ даві́дѹ, (є҆гда̀ таѧ́шесѧ) въ пѹсты́ни, мѹ́жїе крѣ́пцы и҆ бойцы̀ наро́чити, держа́щїи щиты̀ и҆ ко́пїѧ: ли́ца же и҆́хъ ѩ҆́кѡ ли́ца львѡ́ва, и҆ легцы̀ ѩ҆́кѡ сє́рны на гора́хъ ско́ростїю:

⁹а҆зе́ръ въ пе́рвыхъ, а҆вді́а вторы́й, а҆лїа́дъ тре́тїй,

¹⁰масма́нъ четве́ртый, ї҆еремі́а пѧ́тый,

¹¹ї҆еѳѳі́а шесты́й, є҆лїи́лъ седмы́й,

¹²ї҆ѡана́нъ ѻ҆смы́й, є҆льзаве́ль девѧ́тый,

¹³ї҆еремі́а десѧ́тый, махавена́й первыйна́десѧть.

¹⁴Сі́и ѿ сынѡ́въ га́довыхъ кнѧ҄зи во́инстїи, є҆ди́нъ над̾ сто́мъ ма́лый, вели́кїй же над̾ ты́сѧщею:

¹⁵сі́и и҆̀же преидо́ша ї҆ѻрда́нъ мц҇а пе́рвагѡ: и҆ се́й напо́лненъ во всѣ́хъ бре́зѣхъ свои́хъ: и҆ и҆згна́ша всѣ́хъ, и҆̀же живѧ́хѹ въ ю҆до́лѣхъ ѿ востѡ́къ да́же до за҄падъ.

¹⁶Прїидо́ша же ѿ сынѡ́въ венїамі́нихъ и҆ ї҆ѹ́диныхъ на по́мощь даві́дѹ.

¹⁷И҆ и҆зы́де даві́дъ во срѣ́тенїе и҆̀мъ и҆ речѐ и҆̀мъ: а҆́ще ми́рнѡ прїидо́стѣ ко мнѣ̀, да бѹ́детъ се́рдце моѐ та́кожде къ ва́мъ: а҆́ще же преда́ти мѧ̀ сѹпоста́тѡмъ мои҄мъ не во и҆́стинѣ рѹкѝ, да ви́дитъ бг҃ъ ѻ҆тє́цъ на́шихъ и҆ сѹ́дитъ.

¹⁸И҆ ѡ҆блечѐ дх҃ъ а҆масі́ю кнѧ́зѧ над̾ три́десѧтїю, и҆ речѐ: и҆дѝ, даві́да сы́не ї҆ессе́евъ, и҆ лю́дїе твоѝ: ми́ръ, ми́ръ тебѣ̀, и҆ ми́ръ помо́щникѡмъ твои҄мъ, ѩ҆́кѡ тебѣ̀ помога́етъ бг҃ъ тво́й. И҆ воспрїѧ́тъ и҆̀хъ даві́дъ и҆ поста́ви и҆̀хъ кнѧзе́й си́лъ.

¹⁹И҆ ѿ манассі́и прибѣго́ша къ даві́дѹ, є҆гда̀ и҆дѧ́хѹ и҆ноплемє́нницы на саѹ́ла на бра́нь, и҆ не помо́же и҆̀мъ даві́дъ, ѩ҆́кѡ совѣ́тъ бы́ти ѹ҆ воево́дъ и҆ноплеме́нничихъ, глаго́лющихъ: съ глава́ми мѹже́й си́хъ ѡ҆брати́тсѧ ко господи́нѹ своемѹ̀ саѹ́лѹ.

²⁰И҆ є҆гда̀ и҆дѧ́ше даві́дъ въ сїкела́гъ, прибѣго́ша къ немѹ̀ ѿ манассі́и є҆дна́й и҆ ї҆ѡзава́ѳъ, и҆ ї҆авни́лъ и҆ мїхаи́лъ и҆ ї҆ѡсафа́ѳъ и҆ є҆лїѹ̀ и҆ салаѳі́й, кнѧ҄зи над̾ ты́сѧщами ѹ҆ манассі́и:

²¹сі́и да́ша по́мощь даві́дѹ на по́лчище геддѹ́рѡвъ, вси́ бо крѣ́пцы си́лою: и҆ бѣ́ша крѣ́пцы нача҄лницы въ во́инствѣ си́лою.

²²Занѐ на всѧ́къ де́нь прихожда́хѹ къ даві́дѹ на по́мощь є҆мѹ̀, въ си́лѹ вели́кѹ, а҆́ки си́ла бж҃їѧ.

²³И҆ сїѧ҄ и҆мена̀ кнѧзе́й во́инства, и҆̀же прїидо́ша ко даві́дѹ въ хеврѡ́нъ, да возвратѧ́тъ ца́рство саѹ́лово къ немѹ̀ по словесѝ гд҇ню:

²⁴сы́нове ї҆ѹ҄дины носѧ́щїи щиты̀ и҆ ко́пїѧ ше́сть ты́сѧщъ и҆ ѻ҆́смь сѡ́тъ, крѣ́пцы ко ѡ҆полче́нїю:

²⁵ѿ сынѡ́въ сѷмеѡ́нихъ, крѣ́пцы си́лою на ѡ҆полче́нїе се́дмь ты́сѧщъ и҆ сто̀:

²⁶ѿ сынѡ́въ леѵі́иныхъ четы́ри ты́сѧщы и҆ ше́сть сѡ́тъ:

²⁷и҆ ї҆ѡ́дда кнѧ́зь ѿ колѣ́на а҆арѡ́нѧ, и҆ съ ни́мъ трѝ ты́сѧщы и҆ се́дмь сѡ́тъ:

²⁸и҆ садѡ́къ, ѻ҆́трокъ крѣ́пкїй си́лою, и҆ до́мѹ ѻ҆тца̀ є҆гѡ̀ кнѧ҄зи два́десѧть два̀:

²⁹ѿ сынѡ́въ же венїамі́нихъ бра́тїй саѹ́ловыхъ трѝ ты́сѧщы, и҆ є҆щѐ бо́лшаѧ ча́сть и҆́хъ наблюда́ше стражбѹ̀ до́мѹ саѹ́лѧ:

³⁰и҆ ѿ сынѡ́въ є҆фре́млихъ два́десѧть ты́сѧщъ и҆ ѻ҆́смь сѡ́тъ крѣ́пцы си́лою, мѹ́жїе и҆мени́тїи по домѡ́мъ ѻ҆те́чествъ и҆́хъ:

³¹и҆ ѿ полѹпле́мене манассі́ина ѻ҆смьна́десѧть ты́сѧщъ, и҆ и҆̀же нареко́шасѧ и҆́менемъ, да поста́вѧтъ царе́мъ даві́да:

³²ѿ сынѡ́въ ї҆ссаха́ровыхъ мѹ́жїе ѹ҆че́ни, и҆̀же познава́хѹ времена̀ разсѹжде́нїю, что̀ сотвори́ти и҆́мать ї҆и҃ль, въ нача҄ла и҆́хъ двѣ́сти, и҆ всѧ҄ бра́тїѧ и҆́хъ съ ни́ми:

³³и҆ ѿ завѹлѡ́на и҆сходѧ́щїи ко ѡ҆полче́нїю бра́ни, со всѧ́кими ѻ҆рѹ҄жїи бра́нными, пѧтьдесѧ́тъ ты́сѧщъ, въ по́мощь даві́дѹ не съ пра́здными рѹка́ми:

³⁴и҆ ѿ нефѳалі́ма кнѧзе́й ты́сѧща, и҆ съ ни́ми въ щита́хъ и҆ съ ко́пїѧми три́десѧть и҆ се́дмь ты́сѧщъ:

³⁵и҆ ѿ сынѡ́въ да́новыхъ ѡ҆полча́ющїисѧ на бра́нь два́десѧть ѻ҆́смь ты́сѧщъ и҆ ше́сть сѡ́тъ:

³⁶и҆ ѿ а҆си́ра и҆сходѧ́щїи помощѝ въ бра́ни четы́редесѧть ты́сѧщъ:

³⁷и҆ со ѻ҆́ныѧ страны̀ ї҆ѻрда́на ѿ сынѡ́въ рѹви́мовыхъ и҆ ѿ га́довыхъ и҆ ѿ полѹпле́мене манассі́ина во все́мъ ѻ҆рѹ́жїи бра́ннѣмъ сто̀ и҆ два́десѧть ты́сѧщъ.

³⁸Всѝ сі́и мѹ́жїе бра́ннїи ѹ҆пра́влени ко ѡ҆полче́нїю се́рдцемъ ми́рнымъ: и҆ прїидо́ша въ хеврѡ́нъ, да поста́вѧтъ царѧ̀ даві́да над̾ всѣ́мъ ї҆и҃лемъ: и҆ про́чїи ѿ ї҆и҃лѧ є҆ди́но се́рдце бѧ́хѹ, да ца́рь бѹ́детъ даві́дъ.

³⁹Бы́ша же тѹ̀ съ даві́довъ трѝ дни҄, ѩ҆дѹ́ще и҆ пїю́ще, ѹ҆гото́ваша бо и҆̀мъ бра́тїѧ и҆́хъ.

⁴⁰И҆ и҆̀же бли́з̾ и҆́хъ бѧ́хѹ да́же до ї҆ссаха́ра и҆ завѹлѡ́на и҆ нефѳалі́ма, приноша́хѹ и҆̀мъ на ѻ҆слѣ́хъ и҆ велблю́дѣхъ, и҆ мска́хъ и҆ волѣ́хъ пи́щѹ, мѹкѹ̀, перевѧ҄сла смо́квей и҆ гро́здїе сѹхо́е, вїно̀ и҆ є҆ле́й, и҆ волы̀ и҆ ѻ҆вны̀ во мно́жествѣ, ра́дость бо бы́сть во ї҆и҃ли.