Read Библия Церковнославянская а҃ паралипоме́нѡнъ 13 Bible Online

а҃ паралипоме́нѡнъ 13 - Библия Церковнославянская bible

а҃ паралипоме́нѡнъ 13

¹И҆ сотворѝ совѣ́тъ даві́дъ (со кнѧ҄зи) и҆ ты҄сѧщники, и҆ сѡ́тники и҆ всѣ́ми нача҄лники,

²и҆ речѐ даві́дъ ко всемѹ̀ собра́нїю ї҆и҃левѹ: а҆́ще ѹ҆го́дно ва́мъ, и҆ ѿ гд҇а бг҃а на́шегѡ благопоспѣши́тсѧ, да по́слемъ къ бра́тїѧмъ на́шымъ ѡ҆ста́вшымсѧ во все́й землѝ ї҆и҃левѣ, и҆ съ ни́ми свѧще́нницы и҆ леѵі́ти, во градѣ́хъ ѡ҆бдержа́нїѧ и҆́хъ, да соберѹ́тсѧ къ на́мъ,

³и҆ да принесе́мъ кївѡ́тъ бг҃а на́шегѡ къ на́мъ, не взыска́хомъ бо є҆гѡ̀ во дни҄ саѹ҄ли.

⁴И҆ ѿвѣща̀ всѐ собра́нїе, да та́кѡ бѹ́детъ, занѐ ѹ҆го́дно бы́сть сло́во сїѐ всѣ҄мъ лю́демъ.

⁵И҆ собра̀ даві́дъ всего̀ ї҆и҃лѧ ѿ предѣ҄лъ є҆гѵ́петскихъ да́же до вхо́да и҆ма́ѳова, є҆́же внестѝ кївѡ́тъ бж҃їй ѿ гра́да ї҆арі́ма.

⁶И҆ принесѐ є҆го̀ даві́дъ: и҆ ве́сь ї҆и҃ль взы́де во гра́дъ даві́довъ, и҆́же бѧ́ше ї҆ѹ́динъ, є҆́же вознестѝ та́мѡ кївѡ́тъ гд҇а бг҃а сѣдѧ́ща на херѹві́мѣхъ, и҆дѣ́же при́звано є҆́сть и҆́мѧ є҆гѡ̀:

⁷и҆ поста́ви кївѡ́тъ бж҃їй на колесни́цѹ но́вѹ и҆з̾ до́мѹ а҆мїнада́влѧ: ѻ҆́за же и҆ бра́тїѧ є҆гѡ̀ ведѧ́хѹ колесни́цѹ:

⁸даві́дъ же и҆ ве́сь ї҆и҃ль и҆гра́хѹ пред̾ бг҃омъ все́ю си́лою и҆ въ пѣ́снѣхъ и҆ въ гѹ́слехъ, и҆ ѱалти́ри и҆ тѷмпа́нѣхъ, и҆ кѷмва́лѣхъ и҆ въ трѹба́хъ:

⁹и҆ прїидо́ша ко гѹмнѹ̀ хїдѡ́ню: и҆ прострѐ ѻ҆́за рѹ́кѹ свою̀, да поддержи́тъ кївѡ́тъ, ю҆не́цъ бо ѹ҆клонѝ є҆го̀:

¹⁰и҆ прогнѣ́васѧ гд҇ь гнѣ́вомъ на ѻ҆́зѹ и҆ поразѝ є҆го̀ тѹ̀, тогѡ̀ ра́ди, ѩ҆́кѡ прострѐ рѹ́кѹ свою̀ (и҆ прикоснѹ́сѧ) кївѡ́тѹ, и҆ ѹ҆́мре тѹ̀ пред̾ бг҃омъ.

¹¹И҆ ѡ҆скорби́сѧ даві́дъ, ѩ҆́кѡ пресѣчѐ гд҇ь пресѣче́нїемъ ѻ҆́зѹ, и҆ наречѐ мѣ́сто то̀ пресѣче́нїе ѻ҆за́не, да́же до днѐ сегѡ̀.

¹²И҆ ѹ҆боѧ́сѧ даві́дъ бг҃а въ то́й де́нь, глаго́лѧ: ка́кѡ внесѹ̀ ко мнѣ̀ кївѡ́тъ бж҃їй;

¹³И҆ не возвратѝ даві́дъ кївѡ́та къ себѣ̀ во гра́дъ даві́довъ, но возвратѝ и҆̀ въ до́мъ а҆ведда́ра геѳе́ина:

¹⁴и҆ пребыва́ше кївѡ́тъ бж҃їй въ домѹ̀ а҆ведда́ровѣ трѝ мц҇ы, и҆ блг҇вѝ бг҃ъ а҆ведда́ра и҆ всѧ҄, ѩ҆̀же и҆мѣ́ѧше.