Read Библия Церковнославянская а҃ паралипоме́нѡнъ 14 Bible Online

а҃ паралипоме́нѡнъ 14 - Библия Церковнославянская bible

а҃ паралипоме́нѡнъ 14

¹И҆ посла̀ хїра́мъ ца́рь тѵ́рскїй послы̀ къ даві́дѹ, и҆ древа̀ ке́дрѡвл, и҆ зда́телей стѣ́нъ, и҆ древодѣ́лей, да сози́ждѹтъ є҆мѹ̀ до́мъ.

²И҆ позна̀ даві́дъ, ѩ҆́кѡ ѹ҆гото́ва є҆го̀ гд҇ь царе́мъ над̾ ї҆и҃лемъ, ѩ҆́кѡ воздви́жесѧ въ высотѹ̀ ца́рство є҆гѡ̀, ра́ди люді́й є҆гѡ̀ ї҆и҃лѧ,

³и҆ поѧ́тъ даві́дъ є҆щѐ жєны̀ во ї҆ер҇ли́мѣ: и҆ роди́шасѧ є҆мѹ̀ є҆щѐ сы́нове и҆ дщє́ри.

⁴И҆ сїѧ҄ и҆мена̀ и҆́хъ, и҆̀же роди́шасѧ є҆мѹ̀ во ї҆ер҇ли́мѣ: саммаа̀ и҆ сѡва́въ, наѳа́нъ и҆ соломѡ́нъ,

⁵и҆ ї҆еваа́ръ и҆ є҆лїсѹ́й и҆ є҆лїфаа́ѳъ

⁶и҆ наге́ѳъ, и҆ нафа́гъ и҆ ї҆афїѐ,

⁷и҆ є҆лїсама̀ и҆ валїада̀ и҆ є҆лїфале́тъ.

⁸И҆ ѹ҆слы́шаша и҆ноплемє́нницы, ѩ҆́кѡ пома́занъ бы́сть даві́дъ въ царѧ̀ над̾ всѣ́мъ ї҆и҃лемъ, и҆ и҆зыдо́ша всѝ и҆ноплемє́нницы взыска́ти даві́да. И҆ ѹ҆слы́ша даві́дъ и҆ и҆зы́де проти́вѹ и҆́хъ.

⁹И҆ноплемє́нницы же прїидо́ша и҆ разлїѧ́шасѧ во ю҆до́ли и҆споли́нѡвъ.

¹⁰И҆ вопросѝ даві́дъ бг҃а, глаго́лѧ: а҆́ще взы́дѹ на и҆ноплеме́нники, и҆ преда́си ли и҆̀хъ въ рѹ́ки моѧ҄; И҆ речѐ є҆мѹ̀ бг҃ъ: взы́ди, и҆ преда́мъ и҆̀хъ въ рѹ́ки твоѧ҄.

¹¹И҆ и҆зы́де во ваа́лъ-фарасі́нъ, и҆ поразѝ и҆̀хъ та́мѡ даві́дъ. И҆ речѐ даві́дъ: разсѣчѐ бг҃ъ врагѝ моѧ҄ рѹко́ю мое́ю, ѩ҆́коже разсѣче́нїе воды̀. Сегѡ̀ ра́ди наречѐ и҆́мѧ мѣ́стѹ томѹ̀ фарасі́нъ, разсѣче́нїе.

¹²И҆ ѡ҆ста́виша та́мѡ бо́ги своѧ҄ и҆ноплемє́нницы, и҆̀хже даві́дъ повелѣ̀ сожещѝ ѻ҆гне́мъ.

¹³И҆ приложи́ша є҆щѐ и҆ноплемє́нницы, и҆ разлїѧ́шасѧ є҆щѐ во ю҆до́ли и҆споли́нѡвъ.

¹⁴И҆ вопросѝ па́ки даві́дъ бг҃а. И҆ речѐ є҆мѹ̀ бг҃ъ: не и҆сходѝ за ни́ми: ѿврати́сѧ ѿ ни́хъ, и҆ прїи́деши на ни́хъ прѧ́мѡ грѹ́шей:

¹⁵и҆ бѹ́детъ є҆гда̀ ѹ҆слы́шиши гла́съ шѹ́ма верхѡ́въ грѹ́шей, тогда̀ и҆зы́деши на бра́нь, ѩ҆́кѡ и҆зы́де бг҃ъ пред̾ тобо́ю, да порази́тъ полкѝ и҆ноплемє́ннически.

¹⁶И҆ сотворѝ даві́дъ, ѩ҆́коже повелѣ̀ є҆мѹ̀ бг҃ъ: и҆ поразѝ полкѝ фѷлїсті́мѡвъ ѿ гаваѡ́на да́же до гази́ра.

¹⁷И҆ просла́висѧ и҆́мѧ даві́дово во всѣ́хъ страна́хъ, и҆ гд҇ь дадѐ стра́хъ є҆гѡ̀ на всѧ҄ ѩ҆зы́ки.