Read Библия Церковнославянская а҃ паралипоме́нѡнъ 16 Bible Online

а҃ паралипоме́нѡнъ 16 - Библия Церковнославянская bible

а҃ паралипоме́нѡнъ 16

¹Принесо́ша ѹ҆́бѡ кївѡ́тъ бж҃їй и҆ поста́виша є҆го̀ посредѣ̀ ски́нїи, ю҆́же водрѹзѝ є҆мѹ̀ даві́дъ, и҆ принесо́ша всесожжє́нїѧ и҆ спаси́тєлнаѧ пред̾ гд҇емъ.

²И҆ совершѝ даві́дъ возносѧ̀ всесожжє́нїѧ и҆ спаси́тєлнаѧ, и҆ благословѝ лю́ди во и҆́мѧ гд҇не,

³и҆ раздѣлѝ всѧ́комѹ мѹ́жѹ ї҆и҃лскѹ, ѿ мѹ́жа да́же до жены̀, мѹ́жѹ хлѣ́бъ є҆ди́нъ пече́ный, (и҆ ча́сть пече́на мѧ́са,) и҆ прѧ́женый со є҆ле́емъ семїда́лъ:

⁴поста́ви же пред̾ лице́мъ кївѡ́та завѣ́та гд҇нѧ ѿ леѵї҄тъ, є҆́же слѹжи́ти и҆ возглаша́ти (дѣла̀ є҆гѡ̀), и҆ и҆сповѣ́дати и҆ хвали́ти гд҇а бг҃а ї҆и҃лева:

⁵а҆са́фъ нача́лникъ, и҆ дрѹгі́й по не́мъ заха́рїа, ї҆еїи́лъ и҆ семїрамѡ́ѳъ, и҆ ї҆еїи́лъ и҆ маттаѳі́а, и҆ є҆лїа́въ и҆ ване́а и҆ а҆вдедо́мъ: ї҆еїи́лъ же во ѻ҆рга́нѣхъ и҆ ѱалти́ри и҆ гѹ́слехъ, а҆са́фъ же въ кѷмва́лѣхъ возглаша́ѧ:

⁶и҆ ване́а и҆ ѻ҆зїи́лъ свѧще́нницы (трѹби́ша) вы́нѹ въ трѹбы҄ пред̾ кївѡ́томъ завѣ́та бж҃їѧ.

⁷Въ то́й де́нь ѹ҆стро́и даві́дъ въ нача́лѣ хвали́ти гд҇а рѹко́ю а҆са́фа и҆ бра́тїи є҆гѡ̀.

⁸Пѣ́снь. И҆сповѣ́дайтесѧ гд҇еви и҆ призыва́йте є҆го̀ во и҆́мени є҆гѡ̀, зна́єма сотвори́те лю́демъ начина҄нїѧ є҆гѡ̀:

⁹по́йте є҆мѹ̀ и҆ воспо́йте є҆мѹ̀, повѣ́дите всѧ҄ чѹдеса̀ є҆гѡ̀, ѩ҆̀же сотворѝ гд҇ь:

¹⁰хвали́те и҆́мѧ ст҃о́е є҆гѡ̀, да возвесели́тсѧ се́рдце и҆́щѹщее бл҃говоле́нїѧ є҆гѡ̀:

¹¹взыщи́те гд҇а и҆ ѹ҆крѣпи́тесѧ, взыщи́те лица̀ є҆гѡ̀ вы́нѹ:

¹²помѧни́те чѹдеса̀ є҆гѡ̀, ѩ҆̀же сотворѝ, зна́мєнїѧ и҆ сѹдбы҄ ѹ҆́стъ є҆гѡ̀,

¹³сѣ́мѧ ї҆и҃лево, рабѝ є҆гѡ̀, сы́нове ї҆а҄кѡвли, и҆збра́ннїи є҆гѡ̀.

¹⁴То́й гд҇ь бг҃ъ на́шъ, во все́й землѝ сѹдбы҄ є҆гѡ̀.

¹⁵Помѧне́мъ во вѣ́къ завѣ́тъ є҆гѡ̀, сло́во є҆гѡ̀, є҆́же заповѣ́длъ въ ты́сѧщы родѡ́въ,

¹⁶є҆́же завѣща̀ а҆враа́мѹ, и҆ клѧ́твѹ свою̀ ї҆саа́кѹ:

¹⁷и҆ поста́ви є҆̀ ї҆а́кѡвѹ въ повелѣ́нїе, ї҆и҃лю въ завѣ́тъ вѣ́ченъ,

¹⁸гл҃ѧ: тебѣ̀ да́мъ зе́млю ханаа́ню, ѹ҆́же достоѧ́нїѧ ва́шегѡ.

¹⁹Внегда̀ бы́ти и҆̀мъ ма҄лымъ число́мъ, ѩ҆́кѡ ѹ҆ма́лишасѧ и҆ пресели́шасѧ въ ню̀,

²⁰и҆ преидо́ша ѿ ѩ҆зы́ка въ ѩ҆зы́къ и҆ ѿ ца́рствїѧ къ лю́демъ и҆ны҄мъ,

²¹не ѡ҆ста́ви мѹ́жа ѡ҆би́дѣти и҆̀хъ, и҆ ѡ҆бличѝ ѡ҆ ни́хъ цари҄:

²²не прикаса́йтесѧ пома҄заннымъ мои҄мъ, и҆ во пр҇ро́цѣхъ мои́хъ не лѹка́внѹйте.

²³Воспо́йте гд҇еви, всѧ̀ землѧ̀, возвѣсти́те ѿ днѐ на де́нь сп҇нїе є҆гѡ̀,

²⁴возвѣсти́те во ѩ҆зы́цѣхъ сла́вѹ є҆гѡ̀, во всѣ́хъ лю́дехъ чѹдеса̀ є҆гѡ̀,

²⁵ѩ҆́кѡ ве́лїй гд҇ь и҆ хва́ленъ ѕѣлѡ̀, стра́шенъ є҆́сть над̾ всѣ́ми бѡ́ги.

²⁶ѩ҆́кѡ всѝ бо́зи ѩ҆зы́кѡвъ їдѡли: гд҇ь же на́шъ небеса̀ сотворѝ.

²⁷Сла́ва и҆ вели́чество пред̾ лице́мъ є҆гѡ̀, крѣ́пость и҆ похвала̀ въ мѣ́стѣ є҆гѡ̀ ст҃ѣ́мъ.

²⁸Дади́те гд҇еви, ѻ҆те́чєствїѧ ѩ҆зы́кѡвъ, дади́те гд҇еви сла́вѹ и҆ крѣ́пость,

²⁹дади́те гд҇еви сла́вѹ и҆́мени є҆гѡ̀: возми́те да́ры и҆ принеси́те пред̾ лицѐ є҆гѡ̀, и҆ поклони́тесѧ гд҇еви во дво́рѣхъ ст҃ы́хъ є҆гѡ̀.

³⁰Да ѹ҆бои́тсѧ ѿ лица̀ є҆гѡ̀ всѧ̀ землѧ̀, да и҆спра́витсѧ землѧ̀ и҆ да не подви́житсѧ:

³¹да возвеселѧ́тсѧ небеса̀ и҆ да возра́дѹетсѧ землѧ̀, и҆ да рекѹ́тъ во ѩ҆зы́цѣхъ: гд҇ь цр҇твѹетъ.

³²Да возгласи́тъ мо́ре и҆ и҆сполне́нїе є҆гѡ̀, и҆ древа̀ пѡльска́ѧ, и҆ всѧ҄ ѩ҆̀же на ни́хъ.

³³Тогда̀ возвеселѧ́тсѧ древа̀ дѹбра҄внаѧ пред̾ лице́мъ гд҇нимъ, ѩ҆́кѡ прїи́де сѹди́ти землѝ.

³⁴И҆сповѣ́дайтесѧ гд҇еви, ѩ҆́кѡ бл҃гъ, ѩ҆́кѡ въ вѣ́къ мл҇ть є҆гѡ̀,

³⁵и҆ глаго́лите: сп҃си́ ны, бж҃е, сп҃си́телю на́шъ, и҆ соберѝ на́съ, и҆ и҆змѝ на́съ ѿ ѩ҆зы҄къ, да хва́лимъ и҆́мѧ ст҃о́е твоѐ, и҆ хва́лимсѧ во хвале́нїихъ твои́хъ.

³⁶Блг҇ве́нъ гд҇ь бг҃ъ ї҆и҃левъ ѿ вѣ́ка да́же и҆ до вѣ́ка. И҆ рекѹ́тъ всѝ лю́дїе: а҆ми́нь. И҆ восхвали́ша гд҇а.

³⁷И҆ ѡ҆ста́виша та́мѡ пред̾ кївѡ́томъ завѣ́та гд҇нѧ а҆са́фа и҆ бра́тїю є҆гѡ̀, да слѹ́жатъ пред̾ кївѡ́томъ вы́нѹ по всѧ҄ дни҄:

³⁸и҆ а҆вдедо́мъ и҆ бра́тїѧ є҆гѡ̀, шестьдесѧ́тъ ѻ҆́смь: и҆ а҆вдедо́мъ сы́нъ ї҆дїѳѹ́нь и҆ ѻ҆са́й (поста́влени) во две́рники:

³⁹садѡ́ка же свѧще́нника и҆ бра́тїю є҆гѡ̀ свѧще́нниками пред̾ ски́нїею гд҇нею въ вы́шнихъ и҆̀же въ гаваѡ́нѣ,

⁴⁰да возно́сѧтъ всесожжє́нїѧ гд҇еви на ѻ҆лтарѝ всесожже́нїй вы́нѹ ѹ҆́трѡ и҆ ве́черъ, и҆ по всѣ҄мъ ѩ҆̀же пи҄сана сѹ́ть въ зако́нѣ гд҇ни, є҆ли҄ка повелѣ̀ сынѡ́мъ ї҆и҃лєвымъ рѹко́ю мѡѷсе́а раба̀ бж҃їѧ:

⁴¹и҆ съ ни́ми є҆ма́нъ и҆ ї҆дїѳѹ́мъ и҆ про́чїи и҆збра́ннїи кі́йждо зва́нїемъ свои́мъ є҆́же хвали́ти гд҇а, ѩ҆́кѡ въ вѣ́къ мл҇ть є҆гѡ̀:

⁴²и҆ съ ни́ми трѹбы҄ и҆ кѷмва́лы є҆́же возглаша́ти, и҆ ѻ҆рга́ны пѣ́нїй бж҃їихъ: сы́нове же ї҆дїѳѹ҄мли во вратѣ́хъ (стоѧ́хѹ).

⁴³И҆ и҆до́ша всѝ лю́дїе кі́йждо въ до́мъ сво́й, и҆ даві́дъ возврати́сѧ, да благослови́тъ до́мъ сво́й.